Faataoto 3:5, 6—“Aua le Faalagolago i Lou Lava Malamalama”

“Ia e faatuatua iā Ieova ma lou lotoatoa, ae aua le faalagolago i lou lava malamalama. Ia e manatua o ia i ou ala uma, ona ia faasaʻoina lea o ou ala.”—Faataoto 3:5, 6, Faaliliuga a le Lalolagi Fou.

“Ia e faatuatua i le ALII ma lou loto atoa; a e aua le faalagolago i lou lava atamai. Ia e manatua o ia i ou ala uma, ona faatonuina ai lea e ia lava ou ala.”—Faataoto 3:5, 6, Tusi Paia Samoa—Lomiga 1969.

Uiga o le Faataoto 3:5, 6

E ao ona tatou saʻili iā Ieovaa le Atua mo le taʻitaʻiga nai lo o lo tatou faia e i tatou lava o faaiʻuga tāua.

“Ia e faatuatua iā Ieova ma lou lotoatoa.” E faaalia lo tatou faatuatua i le Atua pe a tatou faia mea e tusa ai ma lana auala. E tatau ona tatou matuā faatuatua i le Atua ma o tatou lotoatoa. I le Tusi Paia, e faasino atu le loto o se tasi i ona faalogona, o uunaʻiga e na te faia ai se mea, o ona manatunatuga ma ona uiga. O lea la, o le faatuatua i le Atua ma o tatou lotoatoa, e lē na o o tatou faalogona e aofia ai. O se filifiliga lenā e tatou te faia auā ua tatou mautinoa atoatoa, ua silafia e Lē na faia i tatou le mea e sili ona lelei mo i tatou.—Roma 12:1.

“Aua le faalagolago i lou lava malamalama.” E manaʻomia ona tatou faatuatua i le Atua auā e lē mafai ona tatou faalagolago i o tatou lava mafaufauga lē lelei atoatoa. Afai e tatou te faalagolago iā i tatou lava pe fai a tatou gaoioiga e fua i o tatou lava faalogona, o le a tatou ono faia ni filifiliga e foliga mai e lelei i le taimi muamua, ae e iʻu ai i ni iʻuga leaga. (Faataoto 14:12; Ieremia 17:9) E matuā sili atu le atamai o le Atua nai lo o i tatou. (Isaia 55:8, 9) Pe a taʻitaʻia i tatou i manatunatuga o le Atua, o le a taulau manuia o tatou olaga.—Salamo 1:1-3; Faataoto 2:6-9; 16:20.

“Ia e manatua o ia i ou ala uma.” E tatau ona tatou saʻili po o le ā le silafaga a le Atua i so o se vala tāua o o tatou olaga, ma i so o se faaiʻuga tāua e tatou te faia. E tatou te faia faapea e ala i le tatalo mo lana taʻitaʻiga, ma mulimuli i ana fetalaiga o loo i le Tusi Paia.—Salamo 25:4; 2 Timoteo 3:16, 17.

“Ona ia faasaʻoina lea o ou ala.” E faasaʻo e le Atua o tatou ala e ala i le fesoasoani mai ina ia tatou ola i ana tapulaa amiotonu. (Faataoto 11:5) O le iʻuga, o le a tatou ʻalofia ai le tele o faafitauli, ma olioli ai i se olaga fiafia.—Salamo 19:7, 8; Isaia 48:17, 18.

Siʻomaga o le Faataoto 3:5, 6

O loo maua i le tusi o le Tusi Paia o Faataoto taʻiala faavae mo se olaga fiafia ma taulau manuia i le silafaga a le Atua. O uluaʻi mataupu e iva o le Faataoto o loo tusia o ni fautuaga a se tamā i se atalii pele. O loo faamatilatila i le mataupu e 3 aogā e maua e ē e faatāuaina ma faatatauina fautuaga atamai a Lē na faia i tatou.—Faataoto 3:13-26.