Manumalo i le Taua Faasaga i le Loto Mafatia

“O LE mea aupito sili ona lofituina sa feagai ma aʻu,” na faaali mai ai e Lola, o le “agasala i le faalogona faapea ua leai se faamoemoe talu ai, o le avea o se tasi o auauna a Ieova, sa ou manatu ai e lē tatau ona ia te aʻu lea faalogona.” O lenei tulaga taatele o le lē femalamalamaai e masani lava o le uluai fili lea e tatau i se Kerisiano loto mafatia ona faatoilaloina. Na faaopoopo mai Lola: “O le taimi lava ou te lafoaia ai le tuʻia faalemafaufau o aʻu lava ona o le auala o loo oʻu lagona ai ma uai atu i le fia malosi, ona sili ai lea ona mafai ona ou feagai lelei ma le loto mafatia.” Ioe, o le loto mafatia lava ia, ua lē o se pogai lea mo oe e manatu ai faapea ua e tuulafoaia le Atua.

E pei ona taʻua i le mataupu na seʻi faatoʻā mavae atu, o le pogai o le loto mafatia atonu pe ona o le faagasologa lava o sela o le tino. I le 1915, i se taimi umi lava a o leʻi faafesootaia e suesuega talu ai nei le tele o maʻi faaletino ma mafatiaga o le loto, sa taʻua i Le Olo Matamata e faapea: “O lenei mamafatu o le agaga, po o le faalogona tuua toatasi ma le loto mafatia, o se mea masani i nisi taimi i le fanau uma a tagata. . . . [O lea mea] ua faamamafaina i se tulaga lautele e ala i le tulaga o le soifua maloloina faaletino.” I lea, afai e iai pea uiga o le loto mafatia, o le a fesoasoani pe afai e siakiina e se fomaʻi. Afai ua oo ina sili atu le tulaga, atonu o le a manao loa se tasi e togafitia le faaletonu e ala i se fomaʻi tomai faapitoa tau i le loto mafatia.a

Ae tusa lava pe o le mafuaaga e lē faaletino, e lē o se mea moni le faatalitalia faapea o le a lē faanoanoa pe loto vaivai se tasi o auauna a le Atua. Seʻi manatu pagā ia Hana faatuatua, sa oo ina ‘tiga lona loto ma ua tagi tele.’ (1 Samuelu 1:7, 10) O Neemia foi ‘sa tagi ma oi mo ni aso’ ma sa ‘faanoanoa lona loto.’ (Neemia 1:4; 2:2) Na inoino Iopu i lona ola ua oo ai ina lagona faapea ua tulafoaiina o ia e le Atua. (Iopu 10:1; 29:2, 4, 5) Na faapea mai le Tupu o Tavita faapea ua mou atu lona agaga sa ia te ia, ma ua amata ona gase atu lona loto. (Salamo 143:4) Ma sa tautala le aposetolo o Paulo i le iai o le ‘mataʻu i totonu’ ma ua “lafotuina i lalo” po o le “faamaulaloina” tau faalogona ootia.—2 Korinito 4:9; 7:5, 6.

E ui ina o i latou uma nei o auauna faamaoni a le Atua, ae o mafatiaga eseese, popolega, po o faanoanoaga na iai mo se taimi, na mafua ai ona latou faanoanoa. Peitai sa leʻi tuulafoaia i latou e le Atua pe aveesea lona agaga paia ia i latou. O o latou uiga loto mafatia e leʻi mafua ona o le lē taulau faaleagaga. I se tasi taimi ina ua afaina ai Tavita, sa ia aioi atu i le tatalo: “Ia e faafiafia mai le loto o lau auauna.” Sa faamafanafana e le Atua Tavita i lea “aso e puapuagaina ai” ma fesoasoani ia te ia ina ia olioli i lena taimi. (Salamo 86:1, 4, 7) O le a faapena foi ona fesoasoani Ieova i ana auauna i le taimi nei.

Talu ai o le loto mafatia ua lē o iai ia te ia lava se faamaoniga o le lē taulau faaleagaga po o le vaivai o le mafaufau, o se Kerisiano la o puapuagatia ai, e lē tatau ona nofonofo e lē tautala ona o le mā. Na i lo o lea, e tatau ona ia faia se tasi o laasaga aupito tāua e tau ai ma lenei faaletonu. O le ā lena mea?

Sasaa atu Ou Faalogona

E tatau ona ia talanoa atu i se isi e uiga i le faafitauli. Ua taʻua i le Faataoto 12:25: “O le atuatuvale i le loto o le tagata ua faavaivaia ai o ia; a o le upu lelei e faaolioliina ai.” E leai se tasi tagata e mafai ona ia iloa le matuā popole tele o lou loto seʻi vagana ua tatala lou loto ma talanoa atu e uiga i ai. O le faailoa atu i se tagata tiga alofa o lē e mafai ona fesoasoani, o le a e iloa faapea e iai foi isi e iai faalogona ma faafitauli faapena. E lē gata foi i lea, o le faaupuina o faalogona o se faasologa e malōlō ai, auā na te faatoʻafilemuina le loto e avatua faamatalaga i mea tiga na oo i ai na i lo o le faaputuputu i totonu. O le mea lea, e tatau i se tagata loto mafatia ona talanoa atu i se paaga faaipoipo, se matua, po o se uo tiga alofa ma agavaa faaleagaga.—Kalatia 6:1.

O le vaega o le faafitauli o Maria (e pei ona taʻua i le mataupu na seʻi mavae atu) ona sa ia faaputuputu i totonu faalogona ootia na sa fai ma faalavelave na taʻitaʻiina atu ai i lona loto mafatia. “I le tele o tausaga sa ou faatagā faafoliga,” na fai mai ai o ia. “Sa leʻi taitai ona manatu nisi faapea sa ia te aʻu se faalavelave i le feagai ai ma nei faalogona lē aogā.” Na tatala atu e Maria ona faalogona i se toeaina i le faapotopotoga. E ala i fesili faautauta na utufia mai ai e le toeaina mai le loto o Maria popolega sa ia tauaveina ma fesoasoani ia te ia ia sili ona malamalama lelei ia te ia lava. (Faataoto 20:5) O ana upu lelei mai le Tusi Paia na avatu ai ia te ia se faamaoniga. “Mo le uluai taimi sa amata ai ona maua se fesoasoani e feagai ai ma ia faalogona o loo saosaolaumea i lou loto mafatia,” na faamatala ai Maria.

O lea, o le talanoa atu i se toeaina malamalama ua mafai ona saunia ai “vai” faaleagaga e malōlō ai lē ua pei lona solu o le “nuu naumati.” (Isaia 32:1, 2; Salamo 143:6) O se faufautua faaleagaga e iai le tofā mamao e mafai ona fesoasoani foi ia te oe ia iloa pe faapefea ona e faia ni laasaga poto e feutagaʻi ai ma se mea atonu sa e manatu i ai o se tulaga lē aogā. (Faataoto 24:6) Ae e tele mea e manaomia na i lo o le na ona faamatala atu i se isi.

Ia Iloa Lou Tāua Moni

O faalogona o le lē aogā o se vala aupito sili lea i le loto mafatia. Atonu ona o le lē fiafia i le taimi a o itiiti, ua faamaulaloina ai e nisi Kerisiano o i latou lava. Ae ui lava ina tuua e faalogona ootia faaletino, po o le faaleagaina tau feusuaiga i aso ua mavae ni ila i ou faalogona, ae lē mafai e lenei mea ona suia ai le aogā o le tagata. I lea, e tatau ona e finafinau e maua ai se vaaiga paleni i le tāua moni o oe i le avea o se tagata. “Ou te fai atu ai ia te outou uma,” na uunai mai ai le aposetolo o Paulo, “aua le faasili le manatu o se tasi i le mea ua tatau ona manatu ai, a e ia māmā le manatu e tusa ai ia te ia lava.” (Roma 12:3, Charles B. Williams) A o leoleo faasaga i le faamaualuga, e tatau ona e taumafai ina ia lē oo i se tulaga e sili atu i lo o le isi. O i latou e iai se faiā ma le Atua e tautele, e manaomia e ia, auā ua filifilia e ia tagata ia avea o ana “oloa tāua.” Maeu se faaeaga mataʻina!—Malaki 3:17; Hakai 2:7.

E lē gata i lea, maeu se faaaloalo i le avea o le ʻau faigaluega faatasi ma le Atua’ i le auai i galuega faa-Kerisiano o le faia o soʻo. (1 Korinito 3:9; Mataio 28:19, 20) E toatele Kerisiano loto mafatia ua latou iloa faapea o lenei galuega, e atiina aʻe ai se tagata ia taʻuaogāina. “E oo lava i le taimi ina ua uma ona avea ma Kerisiano, sa ia te aʻu se lagona o le lē faamalieina,” na ioe ai Maria. E tumau pea, o loo tausisi o ia i le galuega talaʻi, ma i se tasi aso sa fetaiai ai ma se fafine talavou ua leaga le mafaufau o lē na manao e aʻoaʻo le Tusi Paia. “Sa ia manaomia se tasi o lē e onosai ia te ia, talu ai ona o ia o se tagata e tuai le mafaufau,” na fai mai ai Maria. “Ona sa tele ona ou uai atu i ai, ua galo ai ia te aʻu aʻu lava ma oʻu vaivaiga. Sa manaomia e ia laʻu fesoasoani, ma sa ou iloa faapea e mafai ona ou avatu laʻu fesoasoani ia te ia e ala i le malosi mai ia Ieova. Ina ua ou vaai ua papatiso o ia sa sili ona faalaeiauina ai aʻu e sili atu i upu. Na tuputupu aʻe loʻu faatāuaina o aʻu, ma na mou atu e faavavau le loto mafatia.” Maeu le moni faapea “o lē faasūsū ma le saoloto i isi o le a faasūsūina foi ma le saoloto o ia”!—Faataoto 11:25, NW.

Peitai, e toatele tagata loto mafatia o loo tali mai e pei ona sa faia e se tasi fafine Kerisiano e ogoogo le loto mafatia, o lē na ioe mai faapea: “E ui lava ou te galue mamafa e faamamā ma kuka ma ia iai le agaga talimalo, ae ou te liliu atu ma toe faitio lava aʻu ia te aʻu i nai mea sese iti uma lava.” O lea vaavaai masei lē talafeagai ua matuā faatoilaloina ai le faatāuaina o le tagata lava ia. Manatua faapea o lo tatou Atua o loo malamalama ma na te lē “sailiili masei i taimi uma lava.” (Salamo 103:8-10, NW, 14) Afai e sili ona maualuga le silafia e Ieova o le saʻo na i lo o i tatou, ae na te lē faapologaina i tatou e uiga i nai masei laiti uma lava, ma e fiafia o ia e faaalia lona faamagalo, pe e lē tatau ai ea la ona tatou taumafai e faataʻitaʻi ia te ia i a tatou feutagaiga ma i tatou lava?

O i tatou uma lava e iai pona ma vaivaiga. Peitai, e iai foi ia i tatou le malosi. Sa leʻi faatalitalia e le aposetolo o Paulo ni mea sili mai ana taumafaiga uma lava. “Afai foi ou te valea i le upu, ou te le valea i le poto,” na ia taʻua ai. Sa leʻi iai i a Paulo se lagona maulalo ona talu ai e lē lelei o ia i le lauga atu i le lautele. (2 Korinito 11:6) E faapena foi tagata loto mafatia ona tatau ona taulaʻi atu i mea e lelei ai i latou.

E “i ai le poto i e faamaulalo,” po o i latou ua iloa ma talia o latou tapulaa. (Faataoto 11:2) O i tatou taitoatasi o ni solu po o tagata tutasi e eseese tulaga, tulaga faaletino, ma tomai. A o e auauna ia Ieova ma le solu atoa, o le faia o le mea e te mafaia e faafiafia ai o ia. (Mareko 12:30-33) O le Atua e lē o ia o se tasi e lē mafai ona faamalieina i taumafaiga a ona tagata tapuai tuutoina. O Leora, o se Kerisiano o lē na manuia i le tau faasaga i lona loto mafatia, na faapea mai: “Ou te lē lelei i le faia o nisi mea e pei ona faia e tagata uma, e pei o le taulimaga i le faiva i le fanua. Peitai o loo oʻu taumafai. O le mea o loo oʻu faia o le mea aupito sili lea ou te mafaia.”

Taulimaina o Mea Sese ma Mea e Lē Malamalama ai

Ae peitai, e faapefea pe afai e te faia se mea sese matuiā? Atonu o le a e lagona e pei o le Tupu o Tavita, o lē ‘sa fealuai ma le faanoanoa i le aso atoa’ ona o ona sese, po o agasala. Peitai o lenei lava faalogona atonu e faaalia ai faapea e leʻi mamao tele lau oo atu ma faia se agasala ua lē mafai ona faamagaloina! (Salamo 38:3-6, 8) O faalogona o agasala e mafai ona faaalia ai faapea o se tasi ua faia le agasala e iai le loto faamaoni ma le loto fuatiaifo lelei. O lea e mafai faapefea ona taulimaina le taʻusalaina? Ia, pe sa e tatalo mo le faamagaloga a le Atua ma faia laasaga e faasaʻo ai le sese? (2 Korinito 7:9-11) Afai o lea, ia faatuatua i le alofa tunoa o Lē e faamagalo agasala uma, a o maumauai ina ia lē toe faia le agasala. (Isaia 55:7) Afai na aʻoaʻia oe, aua neʻi ‘faavaivai pe a faasaʻoina oe, auā o i latou e alofa i ai Ieova e aʻoaʻia e ia.’ (Eperu 12:5, 6) O na faasaʻoga e iai le fuafuaga e fesoasoani atu ai i le toe faavaeina o se mamoe ua se. Ae lē aveesea ai le tāua mai ia te ia o se tagata.

E tusa lava pe faasalaina i tatou e o tatou lava loto, e lē manaomia ai ona tatou faia se faaiʻuga faapea ua faasalaina i tatou e le Atua. “E tatau ona tatou faamautinoa o tatou loto i ona luma, e tusa ai ma so o se mea e taʻusalaina ai i tatou e o tatou lava loto, auā e silisili le Atua i lo o tatou loto ma e silafia e ia mea uma lava.” (1 Ioane 3:19, 20, NW) E silafia e Ieova e sili atu na i lo o a tatou agasala ma mea sese. E silafia e ia tulaga e lē matuiā, auala atoa o o tatou olaga, a tatou gaoioiga ma faanaunauga. O le silisili ese o lona poto ua mafai ai ona ia faafofoga ma le tiga alofa i a tatou tatalo faatauanau mo le faamagaloga, e pei ona sa ia faafofoga ai ia Tavita.

O le lē femalamalamaai ma isi ma soona manatu mamafa e uiga i la latou faamaoniga ua saosaolaumea foi i le manatu ua lē aogā oe, pe atonu foi ua oo lava ina lagona faapea ua teena. Ona o le lē lelei atoatoa, o le a mafai ai ona tautala atu se uso Kerisiano ia te oe i se auala e foliga mai e lē fuafua lelei pe lē alofa. Peitai, e mafai ona faamaninoina ni lē femalamalamaai se tele e ala i le taʻu atu i le tagata e uiga i lou aafiaga ona o ana faamatalaga. (Faatusatusa Mataio 5:23, 24.) Na lapatai mai foi Solomona: “Aua foi e manatu lou loto i upu uma ua faia e tagata.” Aiseā? “Auā ua iloa lelei e lou lava loto ua atulasi ona e fetuu i isi.” (Failauga 7:21, 22, NW) Aua e te faatalitalia ma le lē mautinoa le lelei atoatoa o oe lava po o lau faiā ma isi tagata lē lelei atoatoa. Ia vave ona faamagalo ma faalelei ma isi.—Kolose 3:13.

Ae lē gata i lea, o le tāua moni o oe e lē na ona faatusatusaina pe alofagia oe e isi pe leai. O Keriso sa “le manatua lava o ia,” ma sa ‘manatu faatauvaa ia i isi tagata.’ (Isaia 53:3; Sakaria 11:13) Pe na suia ai i lenei mea le aogā moni o ia mo le auala na faatāua ai o ia e le Atua? E leai, auā e tusa lava pe tatou te lelei atoatoa, e pei o Iesu, e lē mafai ona tatou faamalieina tagata uma.

Le Malosi e Tumau Ai

I nisi taimi, e mafai ona faatuai ona alu ese le loto tiga e ui lava i a tatou taumafaiga ina ia foia. O tiga o faalogona ootia e mafai ona oo ai ina faapogaia se Kerisiano e lagona e pei ona sa faia e Iona: “Auā e lelei ona ou oti, a e leaga ona ou ola.” (Iona 4:1-3) Peitai, sa leʻi tumau pea lona tiga. Sa manumalo ai o ia. O lea afai o le loto tiga o le a foliga mai ai e lē fua lou olaga, ia manatua faapea e pei lava o le puapuaga lena na fai mai ai Paulo “e gata mai ia.” (2 Korinito 4:8, 9, 16-18) O le a oo lava ina iʻu. E leai se tulaga e aunoa ma se faamoemoe. Ua folafola mai e Ieova “e faamafanafanaina loto o e ua loto momomo.”—Isaia 57:15, Lamsa.

Aua lava neʻi mapu le tatalo, e tusa lava pe foliga mai e lē talia au tatalo. Na ole atu Tavita: “Le Atua e, ia e faafofoga mai i laʻu alaga; . . . pe a faavaivai loʻu loto; ia e taʻitaʻiina aʻu i le papa e sili ona maualuga ia te au.” (Salamo 61:1, 2) E faapefea ona taʻitaʻiina i tatou e Ieova i se mautinoa i totonu faapea, e foliga mai e lē mafai ona oo atu i ai i lo tatou lava malosi? O Eileen, o lē na tauivi ma le loto mafatia mo le faitau tausaga, ua tali mai: “Sa leʻi faatagaina aʻu e Ieova ina ia ou faavaivai. Ua aumaia ai e lenei mea ia te aʻu le faamoemoe faapea afai ou te taumafai pea, o le a ia fesoasoani mai pea ia te aʻu. I le iloa o le upu moni o le Tusi Paia na faaolaina moni ai aʻu. E ala i auala eseese—o le tatalo, le faiva, sauniga, i lomiga, aiga, ma uo—na saunia ai e Ieova se malosi mo aʻu e taumafai ai pea.”

Ia vaai i le faaletonu o se tofo o lou faatuatua. “E mafai ona e faalagolago i le Atua,” ua faamautinoa mai ai i tatou e le aposetolo o Paulo. “Na te lē tuua outou i le tofotofoga e sili atu na i le mea tou te lavā oono. Peitai pe a tofotofoina outou, o le a ia saunia ma se auala e sao mai ai ina ia outou lavā onosai.” (1 Korinito 10:13, Beck) Ioe, o le a avatu e le Atua ia te outou “le malosi e sili atu na i lo o le malosi masani,” e tauaveina ai so o se avega o faalogona ootia.—2 Korinito 4:7,  NW.

Se Lalolagi Fou e Aunoa ma le Loto Mafatia!

Ua folafola mai e le Atua faapea ua lē o toe mamao a e aveesea, e ala i le Malo faalelagi, tulaga uma o le loto mafatia i lo tatou lalolagi. Ua folafola mai e lana afioga: “Ou te faia le lagi fou ma le lalolagi fou; e le toe manatua mea na muamua, e le alu ae foi i le loto. Ae peitai ia outou olioli ma fiafia e faavavau i le mea ou te faia.” (Isaia 65:17, 18) O nei upu na muai faataunuuina i tuā lava i le 537 T.L.M., i le taimi ina ua toe faafoisia mai le nuu anamua o Isaraelu i lona nuu moni. Ona pepese ai lea o Ona tagata: “Ona tusa ai lea o i tatou ma tagata ua fai a latou miti. Ona tumu ai lea o tatou gutu i le featani, ma o tatou laulaufaiva i le leo fiafia.” (Salamo 126:1, 2) Maeu le silisili o le a lē pine ae iloa ai le faataunuuga faaiʻu o lenei valoaga faamafanafana loto i le lalolagi fou a le Atua!—2 Peteru 3:13; Faaaliga 21:1-4.

I lalo o le Malo o le Atua (le “lagi fou”), o se sosaiete amiotonu o tagata i luga o le lalolagi (le “lalolagi fou”) o le a toe faafoisia i le tulaga lelei atoatoa o faalogona ootia, le faaletino, ma le soifua maloloina faaleagaga. E lē faapea o le a lē toe manatua e i latou nei mea i aso ua mavae, peitai i le manatu atu i mea lelei uma o le a latou mafaufau i ai i lea taimi ua olioli ai, o le a leai se pogai mo i latou e manatua ai pe taulaʻi atu ai i mea uma e faanoanoa ai na oo ia i latou i aso ua mavae. Seʻi manatu faalemafaufau, i taeao taitasi i le ala mai ma le mafaufau ua manino atoatoa, e naunau e faia le galuega o le aso—e lē toe faalavelaveina e se tulaga loto mafatia!

O le mautinoa atoatoa o le moni o lenei faamoemoe na faapea mai ai Lola (o lē na taʻua i le amataga o la tatou mataupu): “I le manatua faapea o le Malo o Ieova o le a faasaʻoina lenei faafitauli sa avea o se fesoasoani sili ia te aʻu. Sa ou iloa faapea o le loto mafatia o le a lē tumau e faavavau.” Ioe, e mafai ona e mautinoa faapea o le a lē pine ae faia e Ieova le manumalo atoatoa i le loto mafatia!

[Faaopoopoga i lalo]