LESONA 12
O le ā e Fesoasoani iā te Oe e Faaauau ai Ona Suʻesuʻe le Tusi Paia?
E maua aogā i le suʻesuʻeina o le Tusi Paia, peitaʻi e lē o taimi uma e faigofie ai ona suʻesuʻe. E te ono taumānatu i nisi taimi pe mafai ona faaauau pea lau suʻesuʻega faale-Tusi Paia. Aiseā e aogā ai le faia o au taumafaiga e faaauau pea? O le ā e fesoasoani iā te oe e faaauau ai pea e ui i luʻi?
1. Aiseā e tāua ai le suʻesuʻeina o le Tusi Paia?
“O loo ola le afioga a le Atua ma e matuā malosi foʻi.” (Eperu 4:12) E tāua le Tusi Paia ona o loo faailoa mai ai manatu ma faalogona o le Atua e faatatau iā i tatou. E fesoasoani i lou mauaina o le poto, atamai moni ma le faamoemoe. Ae o le vala sili ona tāua, e fesoasoani le Tusi Paia iā te oe ina ia avea ma uō a Ieova. Pe a e suʻesuʻeina le Tusi Paia, ua e faataga la le mana o loo iai e suia lou olaga.
2. Aiseā e tatau ai ona manatua le tāua o upu moni o le Tusi Paia?
O upu moni o loo i le Tusi Paia e tai pei o ni ʻoa tautele. O le māfuaaga lenā ua faalaeiauina ai i tatou e le Tusi Paia, ina “ia faatau mai le upu moni ma aua lava neʻi toe faatau atu.” (Faataoto 23:23) Pe a tatou manatua le tāua o upu moni o le Tusi Paia, o le a tatou taumafai malosi ai e faaauau pea le suʻesuʻega, tusa pe fesagaʻia tulaga faigatā.—Faitau le Faataoto 2:4, 5.
3. E faapefea ona fesoasoani Ieova iā te oe e faaauau pea lau suʻesuʻega?
E finagalo Ieova e fesoasoani mai iā te oe e aʻoaʻo atili e faatatau iā te ia, auā o ia o Lē na foafoaina oe ma o lau Uō. E foaʻi mai e Ieova iā te oe le ʻfaanaunauga faapea le malosi e galue ai.’ (Faitau le Filipi 2:13.) O lona uiga, pe a e manaʻomia le uunaʻiga e suʻesuʻe ai i nisi taimi, o le a ia fesoasoani mai. O le a ia saunia mai le malosi ina ia faafetaiaʻia ai faafitauli ma teteega, pe a e manaʻomia. Ia talosaga atu e lē aunoa iā Ieova i le tatalo ina ia fesoasoani iā te oe, e faaauau ai pea ona suʻesuʻe le Tusi Paia.—1 Tesalonia 5:17.
SAʻILIʻILI ATILI
Iloilo pe faapefea ona e suʻesuʻe pea le Tusi Paia e ui i se faasologa pisi po o teteega mai i isi, ma le auala o le a fesoasoani mai ai Ieova iā te oe e faia faapea.
4. Ia faamuamua lau suʻesuʻega faale-Tusi Paia
E iai taimi e tatou te pisi ai i mea fai o le olaga ma lē maua ai se taimi e suʻesuʻe ai le Tusi Paia. O le ā e mafai ona fesoasoani iā i tatou? Faitau le Filipi 1:10, ona talanoa lea i fesili nei:
O ā nisi o mea e te manatu e “sili ona tāua” i le olaga?
E faapefea ona e faailoa atu e sili ona tāua iā te oe lau suʻesuʻega faale-Tusi Paia?
A. Pe a utu muamua le oneone i se fagu ona tuu ai lea o maa, e lē ofi uma i ai maa
E. Ae pe a e tuu muamua i ai maa, o le a maua le avanoa e ofi ai le oneone. I se tulaga talitutusa, pe a e faamuamua “mea e sili ona tāua” i lou olaga, e lē gata o le a mafai ona e faataunuuina na mea, ae maua foʻi le taimi mo isi mea
O le suʻesuʻeina o le Tusi Paia e faamalieina ai o tatou manaʻoga faaleagaga, po o tatou faanaunauga ina ia iloa le Atua ma tapuaʻi iā te ia. Faitau le Mataio 5:3, ona talanoa lea i le fesili lenei:
E faapefea ona tatou maua aogā pe a faamuamua le suʻesuʻeina o le Tusi Paia?
5. Ia tumau e ui i teteega
A o faagasolo taimi, o le a taumafai nisi e faavaivaia oe mai le suʻesuʻeina o le Tusi Paia. Mātau le faaaʻoaʻoga a Francesco. Faaali le VITIŌ, ona talanoa lea i fesili nei:
I le vitiō, na faapefea ona tali atu uō ma le aiga o Francesco, ina ua ia taʻu atu iā i latou mea ua ia aʻoaʻoina?
Na faapefea ona tauia o ia ona o lona tumau?
Faitau le 2 Timoteo 2:24, 25, ona talanoa lea i fesili nei:
O ā manatu o lou aiga ma au uō i mea o loo e aʻoaʻoina?
E tusa ai ma lenei mau, o le ā le auala e tatau ona e tali atu ai pe a lē fiafia se tasi i lou suʻesuʻeina o le Tusi Paia? Aiseā?
6. Ia faalagolago i le fesoasoani a Ieova
A o tatou vavalalata atu iā Ieova, o le a faateleina foʻi lo tatou faanaunauga e faafiafia o ia. Ae e faigatā ona faia ni suiga i o tatou olaga ina ia ola ai e ōgatusa ma ana tapulaa. Pe a oo iā te oe na faalogona, aua e te faavaivai. O le a fesoasoani Ieova iā te oe. Faaali le VITIŌ, ona talanoa lea i fesili nei:
I le vitiō, o ā suiga na faia e Jim ina ia faafiafia ai Ieova?
O le ā se mea e mataʻina ai lana faaaʻoaʻoga?
Faitau le Eperu 11:6, ona talanoa lea i fesili nei:
O le ā o le a faia e Ieova iā i latou “e matuā saʻili iā te ia,” po o i latou e taumafai malosi e iloa ma faafiafia o ia?
O le ā ua taʻu mai ai e faatatau i faalogona o Ieova, pe a silasila mai o ia i au taumafaiga e suʻesuʻe le Tusi Paia?
PE A FESILI MAI SE TASI: “Aiseā e te suʻesuʻeina ai le Tusi Paia ma Molimau a Ieova?”
O le ā lau tali?
AOTELEGA
E ui e lē faigofie le suʻesuʻeina o le Tusi Paia, ae e mafai ona fesoasoani iā te oe e maua ai se olaga fiafia e faavavau. Ia faaauau ona faalagolago iā Ieova, ma o le a ia tauia oe.
Fesili Autalu
Aiseā e tautele ai iā te oe upu moni o le Tusi Paia?
Pe a uma ona e “faamautinoa o mea e sili ona tāua,” o le ā e manaʻomia ona e faia?
Aiseā e tatau ai ona e talosaga atu mo le fesoasoani a Ieova, ina ia faaauau ai ona e suʻesuʻe le Tusi Paia?
MANATU FAAOPOOPO
Iloilo ni auala se fā ua fesoasoani i le toʻatele o tagata e faaaogā tatau ai o latou taimi.
“E Faapefea Ona Faaaogā Tatau Lou Taimi?” (Ala Mai!, Aperila-Iuni 2014)
Mātau le auala na fesoasoani ai Ieova i se fafine na tetee lana tane, i ana taumafaiga e faafiafia le Atua.
E Fesoasoani Ieova iā i Tatou e Tauave a Tatou Avega (5:05)
Mātau pe na faapefea ona aogā i se tamāloa le tumau o lana avā.
E iai taimi e tuuaʻia ai Molimau a Ieova i le faamalepe aiga. Ae pe moni lenā manatu?
“Pe e Lepetia pe e Atiaʻe e Molimau a Ieova Aiga?” (Mataupu i le jw.org)