O le Soifuaga o Iesu ma Lana Faiva

Le Faailoga o Aso e Gata Ai

O LE taimi lea, o le afiafi o le Aso Lua. A o nofo Iesu i le Mauga o Olive, na silasila atu i le malumalu o loo i lalo, ona ō mai ai lea ia te ia o Peteru, Aneterea, Iakopo, ma Ioane ua na o i latou. O loo popole i latou e uiga i le malumalu, talu ai na seʻi faatoʻā valoia lava e Iesu faapea ‘e lē toe iai se maa i luga o le tasi maa i le malumalu.’

Peitai e manino mai o loo iai nisi mea e sili atu i o latou mafaufau a o latou faalatalata atu ia Iesu. I ni nai vaiaso muamua atu, sa fetalai atu ai o ia e uiga i lona “maliu [faatasi] mai,” o se taimi pe a “faaalia mai ai le Atalii o le tagata.” Ma i se mea muamua na tupu, na ia taʻu atu ia i latou e uiga i le “gataaga o le lalolagi.” O lea ua matuā fia iloa ai lava e le au aposetolo.

“Ia e fetalai mai ia te i matou,” ua latou fai atu ai, “pe oo afea ia mea [e iʻu ai i le faaumatiaina o Ierusalema ma lona malumalu]? pe se a foi le faailoga o lou maliu [faatasi] mai, ma le gataaga o le lalolagi?” I se āuga, o la latou fesili e tolu ni vaega. Muamua, sa latou mananao e fia iloa e uiga i le iʻuga o Ierusalema ma lona malumalu, i le ma lea e faatatau i le faatasi mai o Iesu i le mana o le Malo, ma i le faaiʻuga, e uiga i le iʻuga o le faiga aoao o mea.

I lana tali umi, na tali atu ai Iesu i vaega uma e tolu o le fesili. Ua ia saunia se faailoga e faailoaina ai le iʻuga o le faiga o mea a Iutaia; ae ua ia saunia foi e sili atu. Ua ia tuuina atu foi se faailoga e faamataala ai ona soʻo i le lumanai faapea ua latou ola i le taimi o lona faatasi mai ma le latalata i le iʻuga o le faiga aoao o mea.

A o faagasolo tausaga, na amata ai e soʻo ona matauina le faataunuuga o le valoaga a Iesu. Ioe, o mea lava ia na ia valoia sa amata ona tutupu i o latou aso. I lea, o Kerisiano o loo soifua i le 37 tausaga mulimuli ane i le 70 T.A., sa leʻi puea faafuasei ma le lē iloa e le faaumatiaga o le faiga o mea faa-Iutaia ma lona malumalu. Peitai ane, e leʻi faataunuuina ai i le 70 T.A. le faatasi mai o Keriso ma le faaiʻuga o le faiga o mea.

O lona faatasi mai i le mana o le Malo o le a tupu i se taimi matuā mulimuli ane lava. Ae o afea? O le talanoaina o le valoaga a Iesu ua faaalia ai lenei mea.

Ua valoia e Iesu faapea o le a iai “taua ma tala o taua.” “E sii le taua e le tasi nuu i le tasi nuu,” o le a iai foi oge, mafuie, ma faamaʻi. O le a inosia ona soʻo ma fasiotia. O le a tutū mai perofeta pepelo ma taʻitaʻi sese le toatele. O le a tupu tele le amio leaga, ma o le a maalili le alofa o se vaega e toatele. I le taimi lava e tasi, o le a talaʻiina ai foi le tala lelei o le Malo o le Atua i le atu laulau uma e fai ma molimau i nuu uma.

E ui lava o le valoaga a Iesu sa iai se faataunuuga faatapulaaina muamua i le faaumatiaga o Ierusalema i le 70 T.A., ae o le faataunuuga sili o lea valoaga o le a faia i le taimi o lona faatasi mai ma le faaiʻuga o le faiga o mea. O se autaluina ma le faaeteete o mea tutupu i le lalolagi talu mai le 1914 ua faaalia ai faapea o valoaga talafeagai a Iesu ua faagasolo nei ina faataunuuina ona vala sili talu mai lena tausaga.

O se isi vaega o le faailoga na tuuina mai e Iesu o le aliaʻi mai o le “mea e inosia e faatafunaina aʻi.” I le 66 T.A., o lenei mea inosia na aliaʻi mai e faatinoina i ni “ʻau o le taua” a Roma lena na siomiaina Ierusalema ma faaleagaina pa o le malumalu. O “le mea e inosia” ua tu i le mea sa lē tatau ona tu ai.

I le faataunuuga sili o le faailoga, o le mea inosia o Malo Sosoo ma lona sui, le Malo Aufaatasi. O lenei faalapotopotoga o le filemu i le lalolagi ua manatu i ai Kerisinetoma o le sui o le Malo o le Atua. Pagā le inosia! O le mea lea, i le gasologa o taimi, o le a auaufaatasi ai malosi faapolotiki ma Malo Aufaatasi e liliu atu i Kerisinetoma (le Ierusalema faafaatusa) ma o le a faaumatia o ia.

I lea na valoia ai e Iesu: “Auā o ia ona po e oo ai le puapuaga tele, e leai sona tusa talu le amataga o le lalolagi, ua oo lava i ona po nei; e le toe faapea foi amuli.” A o avea le faaumatiaina o Ierusalema i le 70 T.A. o le puapuaga tele moni, e sili atu i le miliona tagata na lipotia mai na fasiotia ai, sa lē o se puapuaga tele e sili lea i le Lolo faalekelope i aso o Noa. O lea o le faataunuuga sili o lenei vaega o le valoaga a Iesu e tatau ona iloa i le lumanai. Mataio 24:2-22; 13:40, 49; Mareko 13:3-20; Luka 21:7-24; 19:43, 44; 17:20-30; 2 Timoteo 3:1-5.

◆ O le ā na uunaia le fesili a le au aposetolo, ae o le ā le isi mea e manino mai sa i o latou mafaufau?

◆ O le ā le vaega o le valoaga a Iesu na faataunuuina i le 70 T.A., ae o le ā na leʻi faataunuuina i lea taimi?

◆ O anafea na oo ai le uluai faataunuuga o le valoaga a Iesu, ae o afea o le a oo ai lona faataunuuga sili?

◆ O le ā le mea inosia i lona faataunuuga muamua ma le faataunuuga mulimuli?

◆ Aiseā na lē avea ai le faaumatiaga o Ierusalema o le faataunuuga faaiʻu o le puapuaga tele?