Faaopoopoga i laloLe Faailoga—Pe o E Utagiaina?

“MATOU te mananao i tagata o atunuu uma ina ia olioli i se tulaga olaola, sologa lelei ma le fiafia. O le auala i lenei mea o loo taatia mai e ala i le agaʻi atu i se lalolagi e saoloto mai faiga faaniukelea, ma le leai o ni faiga sauā.”—Perestroika, tusia e le taʻitaʻi Rusia o Mikhail Gorbachev.

Mo mafuaaga lelei, e toatele ua lē mautinoa faapea e i ai moni lava i tagata le tomai e faatupuina aʻe ai nei tulaga i le lalolagi. Na folafola mai e se isi taʻitaʻi, o Iesu Keriso, se mea e sili atu—o le lalolagi parataiso e oo lava i le oti o le a toe suia ai. (Mataio 5:5; Luka 23:43; Ioane 5:28, 29) O le mea moni, o le auala e faataunuuina ai lenei mea o le faalaa tauatua. I le tali atu i le fesili o “afea” o le a oo mai ai lena faalaa, na fetalai Iesu: “E le oo mai le malo o le Atua ma le vaaia e mata.” I le taimi muamua, e na o tagata mataalia e i ai se vaaiga naunautai faafaatusa e pei o le aeto, latou te iloa lenei mea. (Luka 17:20, 37) Ai se ā?

Le Pogai Tatou te Manaomia ai le Faailoga

Talu ona afio aʻe Iesu Keriso i le lagi, o loo “afio [o ia] i le malamalama e lē masao i ai se tasi; e lei vaaia o ia e se tasi tagata, e le mafai foi ona vaai i ai.” (1 Timoteo 6:16) O lea, o le a lē toe vaaia lava o ia e mata faaletagata. E pei ona fetalai Iesu i le aso mulimuli o lona soifuaga faalelalolagi: “E toe itiiti ona le vaai mai lea o le lalolagi ia te au.” (Ioane 14:19) A e mafai ona vaaia o ia i le na o se auala faafaatusa.—Efeso 1:18; Faaaliga 1:7.

Peitai, na fetalai Iesu o le a mafai e ona soʻo ona malamalama pe a amata ona pule le Malo o le Atua. Faapefea? E ala i se faailoga. I le tali atu i le fesili, “Pe se a foi le faailoga o lou maliu mai?” na faaauivi mai ai e Iesu le faamaoniga vaaia o lana pule lē vaaia i le lumanai.—Mataio 24:3.

Na aofia i le faailoga se tala faatusa e faaalia ai po o le ā le ituaiga o tagata o le a latou maua mai ai ni aogā. “O le mea ua i ai le tagata oti,” na fetalai ai Iesu, “e aofaga i ai aeto.” (Mataio 24:28) O i latou uma o ē mananao ina ia faasaoina i le iʻuga o lenei faiga o mea ma ulu atu i le lalolagi fou a le Atua, e tatau ona ‘aofaga faatasi’ ma olioli i meaʻai faaleagaga faatasi ma i latou o “e ua filifilia” e pei o ni aeto a Keriso.—Mataio 24:31, 45-47.

Leoleo Faasaga i le Lē Onosai

E leai se tagata ua mafai ona iloa le aso mo le iʻuga o le faiga amio leaga o mea. “A o lea aso ma lea itu aso,” na fetalai ai Iesu, “e le iloa e se tasi, e le iloa lava e agelu i le lagi, po o le Atalii; ua na o le Tamā lava.”—Mareko 13:32, 33.

E ui i lea, faamata o le a oo mai le faailoga i le vaitaimi o le mavae o le tele o ni tupulaga faaletagata? E leai. E oo mai le faailoga i le vaitaimi o se tupulaga faapitoa e tasi. O le tupulaga lava lea na molimau i le amataga o le faailoga o le a ia molimauina foi lona taualuga i se “puapuaga tele, e leai sona tusa talu le amataga o le lalolagi.” Na faamauina e tusitala o tala faasolopito e toatolu o Mataio, Mareko, ma Luka faamautinoaga a Iesu e uiga i lenei mea.—Mareko 13:19, 30; Mataio 24:13, 21, 22, 34; Luka 21:28, 32.

A e peitai, e i ai le mataʻutia pe a oo ina lē onosai. Ua fitu sefululima tausaga ua mavae talu ona pa le Taua Muamua a le Lalolagi i le 1914. Mai le vaaiga faaletagata, e mafai ona foliga ua matuā umi tele lenei taimi. A e o nisi Kerisiano o loo i ai le vaaiga naunautai e pei o le aeto, o ē sa latou vaaia le Taua Muamua a le Lalolagi o loo matuā tiotio pea. E leʻi mavae atu lo latou tupulaga.

Ina ua ia tuuina mai le faailoga, na lapatai mai Iesu e uiga i le mataʻutia o le lē onosai. Sa ia fetalai e uiga i tagata taitoatasi o ē o le a faapea ifo i o latou loto: “E faatuai mai loʻu alii.” Na faaalia e Iesu faapea o faalogona faapena, afai e lē taofia, e mafai ona taʻitaʻiina atu ai i ni gaoioiga valea. (Mataio 24:48-51) E tele atu nisi mea na fai mai ai aposetolo o Keriso e uiga i lenei mea.

“Tagata Tauemu”

E tusa ai ma le tusitala o le Tusi Paia o Iuta, na faaleoina mai e aposetolo a Keriso le lapataiga o loo mulimuli mai: “E iai i ona aso e gata ai o tagata tauemu, o ē savavali e tusa ma o latou lava tuʻinanau mo mea e lē faaleatua.”—Iuta 17, 18, NW.

O le faanaunauga mo le ola i se lalolagi fou mamā, e faigofie lava ona suia i “tuʻinanau mo mea e lē faaleatua.” E matautia faapitoa lava lenei mea i aso nei ona o auala o loo talanoa ma fesootai ai le lalolagi. Sa leʻi faapea muamua i le talafaasolopito o le tagata ona faaalialia i se tulaga e sili ona tele faiga sauā, faiga faataulāitu, ma amioga lē mamā faaleituaiga. Ua masani ona avea ma matua autū i faasalalauga i leitio ma musika, ma ua vaaia foi i le anoanoai o polokalama i TV, videos, o faasalalauga faatosina, tusi, ma mekasini.

Ua faasino atu e le faailoga i le iʻuga o na amioga lē faaleatua. O lea, e masani ona faaamuamu nisi tagata, o ē o loo mataʻaai mo mea lē faaleatua, i le faailoga. E pei ona valoia, latou te finau mai faapea “ua tutumau pea o mea uma talu ona faatoa faia.”—2 Peteru 3:3, 4.

ʻUa Maalili le Alofa’

Talu ai nei lava, sa faatalanoaina ai e le mekasini Newsweek se tusitala Amerika o Paul Bowles, ua 75 ona tausaga. I le taliina o le fesili, “O le ā sau vaaiga i le lalolagi?” na faapea mai Bowles: “Ua matuā nutililii le lalolagi i le uiga tau amio. Ua lē o toe faamaoni se tasi e pei o le auala sa latou i ai i le 60 tausaga ua mavae. Sa i ai se manatu lautele e uiga i le tagata ua taʻua o le tamālii; o se uiga tāua tele i la tatou aganuu i atunuu i Sisifo. I le taimi nei, ua lē toe amanaia e so o se tasi. Ua i ai foi le matuā faamamafa tele i tupe.”

O lenei tulaga ua pei lava o lea na valoia e le Tusi Paia. Na muai taʻua e Iesu: “E maalili foi [le alofa, NW] o tagata e toatele, ona ua tupu tele o le amio leaga.” (Mataio 24:12; 2 Timoteo 3:1-5) A o faateleina le manatu faapito ma le matapeapea, a e ua faaitiitia le alofa mo le Atua. Ua tele ma tele pea tagata ua faaalia le tuu faamuamua o o latou lava faanaunauga na i lo o tulafono a le Atua, e ala i le auai i gaoioiga solitulafono, faiga tau faamataʻu, faiga lē faamaoni faapisinisi, amioga lē mamā faaleituaiga, ma le faaaogāseseina o vailaau faasaina.

O nisi ua latou iloa le faataunuuga o le faailoga, a e ua lē taulau ona gaoioi faatatau i ai, ona ua matuā aafia ai i le faamalieina o i latou lava. I le isi itu, o le utagia o le faailoga e manaomia ai le onosai ma le tumau i le faaalia o le alofa lē manatu faapito mo le Atua ma tuaoi.—Mataio 24:13, 14.

“Popole i Mea a le Olaga Nei”

Na lapataia foi e Iesu faapea, e ese ai mai fiafiaga manatu faapito, o manaoga masani ma tatau o mea faaletino ua mafai ona matuā mitiia ai nisi, ma latou lē amanaia ai le faailoga. Na ia uunai mai: “Ia outou neʻi faamamafaina o outou loto, ma le faaniniva, ma le onā, ma le popole i mea a le olaga nei, neʻi faafuasei mai lea aso ia te outou. Auā e pei o se mailei ona oo mai ai i e nonofo uma lava i le fogāeleele uma.”—Luka 21:34, 35.

O le mea moni, ua faamalosiau mai e le Tusi Paia se olaga faaleaiga fiafia. (Efeso 5:24–6:4) E masani ona manaomia ai e lenei mea le ulu o le aiga ina ia auai i se ituaiga o galuega po o se pisinisi e saunia ai mea manaomia mo lana avā ma le fanau. (1 Timoteo 5:8) Peitai, o se vaaiga lē saʻo pe a faatagaina e se tasi lona olaga ia faaautū i na o mea tau i le aiga, le pisinisi, ma mea faitino. Ona o lenei matautia, na lapatai mai ai Iesu: “Pei ona faia foi i ona aso o Noa, e faapea lava ona fai i ona aso o le Atalii o le tagata. Na aai i latou ma inu, [na fai avā tamaloloa, ua faaipoipo atu foi fafine, NW] ua oo lava i le aso na ulu ai Noa i le vaa, ona oo mai ai lea o le lolo, ua fano ai i latou uma. . . . E faapea lava i le aso e faaalia mai ai le Atalii o le tagata.”—Luka 17:26-30; Mataio 24:36-39.

“Avea” pe “Tuua”?

Ua tuai mai le itula. Toeitiiti, ona faalaa ane lea o le Malo o le Atua e faasaʻo le tulaga o mea. Ona aafia ai lea o tagata uma i se tasi o auala e lua. E pei ona sa faamatalaina e Iesu: “O ia ona po e i ai i le vao o tagata e toalua, e avea le tasi, a e tuua le tasi. E olo faatasi fafine e toalua i le mea e olo aʻi saito, e avea le tasi, a e tuua le tasi.”—Mataio 24:40, 41.

Pe a oo mai lena taimi faigata, o le ā le tulaga o le a e tu i ai? Pe o le a tuua oe mo le faaumatiaga, pe o le a avea oe mo le faasaoina? Ina ia taʻitaʻiina oe i le ala saʻo, ia toe manatunatu i le tala faatusa a Iesu: “O le mea ua i ai le tagata oti, e aofaga i ai aeto.”—Luka 17:34-37; Mataio 24:28.

O lea sa faamamafa ai e Iesu le manaoga mo le vaai mamao, ma le gaoioiga autasi. O i latou e avea mo le faasaoina o i latou na o ē e faatasitasi e lē aunoa ma maua aogā mai meaʻai susua faaleagaga ua saunia e le Atua. E faitau miliona ua latou iloa totino faapea o lena fafagaina faaleagaga e maua mai le aufaatasiga vavalalata ma se tasi o le sili atu i le 57,000 faapotopotoga o Molimau a Ieova, ma e ala i le suesueina o lomiga e faavae i le Tusi Paia e pei o lea e te faitauina.

E sili atu i le tolu miliona o Molimau a Ieova ua faaalia le faatuatua i le faailoga e ala i le tufaina atu o le “tala lelei o le malo” i o latou tuaoi. (Mataio 24:14) O e tali atu ea ma le mautonu i le tala lelei? Afai o e faia faapea, e mafai la ona e teu lotoina le folafolaga o le faasaoina atu i le lalolagi parataiso.

[Ata i le itulau 5]

E toatele ua matuā mitiia i faafiafiaga ua latou lē amanaia ai le faailoga

[Ata i le itulau 6]

O le utagiaina o le faailoga e aofia ai le faatasitasi ina ia fafagaina i le Afioga a le Atua