E Fiafia Ē Agamalu!

“E fiafia ē agamalu, auā e fai mo latou tofi le lalolagi.”—MATAIO 5:5, NW.

1. O le ā le agamalu sa fetalai i ai Iesu i lana Lauga i luga o le Mauga?

NA FETALAI Iesu Keriso i lana Lauga i luga o le Mauga: “E fiafia ē agamalu, auā e fai mo latou tofi le lalolagi.” (Mataio 5:5, NW) O lenei agamalu, po o le agavaivai, e lē o se ufiufi lea o le faatagā agamaulalo, pe ua na o se uiga masani faaletagata. Na i lo lena, o le agamalu moni lea ma le fifilemu i totonu, ua faaalia autū e tali atu ai i le finagalo ma le taʻitaʻiga a Ieova le Atua. Ua iai i tagata e agamalu moni lava se lagona naunau o le faalagolago i le Atua, lea ua atagia atu i amioga agamalu agaʻi i uso a tagata.—Roma 12:17-19; Tito 3:1, 2.

2. Aiseā na fetalai ai Iesu e fiafia ē agamalu?

² Na fetalai Iesu e fiafia ē agamalu ona o le a fai mo latou tofi le lalolagi. Ona o ia o le Alo o le Atua e lelei atoatoa i le agamalu, ua avea ai Iesu ma Suli Sili o le lalolagi. (Salamo 2:8; Mataio 11:29; Eperu 1:1, 2; 2:5-9) Ae ona o ia o le “Atalii [Faa-Mesia] o le tagata,” e ia te ia ai nisi e pule faatasi ma ia i lona Malo faalelagi. (Tanielu 7:13, 14, 22, 27) I le avea o ni “suli faatasi” ma Keriso, o le a saosaolaumea ai ia sui agamalu faauuina i lona tofi o le lalolagi. (Roma 8:17) O isi tagata agamalu pei ni mamoe, o le a olioli i le ola e faavavau i le Parataiso i le nofoaga faalelalolagi o le Malo. (Mataio 25:33, 34, 46; Luka 23:43) O lena faamoemoe ua faafiafia moni ai i latou.

3. O le ā le faaaʻoaʻoga o le agamalu na faataatia e le Atua ma Keriso?

³ Ua maua e le Suli Sili agamalu le lalolagi mai i lona Tamā, o Ieova, le faaaʻoaʻoga maoaʻe o le agamalu. Maeu le faapea soo mai o le Tusi Paia o le Atua e “telegese lona toasa, a e tele le alofa ma le faamaoni”! (Esoto 34:6; Neemia 9:17; Salamo 86:15) E tele le mana o loo ia te ia peitai ua ia faaalia sea agamalu, ina ia mafai ai e ana auauna ona faalatalata atu ia te ia e aunoa ma le matataʻu. (Eperu 4:16; 10:19-22) Sa aʻoaʻoina e le Alo o le Atua, o lē sa “agamalu ma le loto maulalo,” ona soʻo ina ia agamalu. (Mataio 11:29; Luka 6:27-29) O le iʻuga, na faataʻitaʻi ma tusia ai e ia auauna agamalu a le Atua ma lona Alo e uiga i “le agamalu ma le alofa o Keriso.”—2 Korinito 10:1; Roma 1:1; Iakopo 1:1, 2; 2 Peteru 1:1.

4. (a) E tusa ma le Kolose 3:12, o le ā ua faia e i latou o ē agamalu moni? (e) O ā fesili ua tatau i ai la tatou iloiloga?

⁴ I aso nei, e manaomia uma e Kerisiano faauuina ma latou aumea faalelalolagi ona agamalu. I le tuuesea o mea leaga uma, le faaʻoleʻole, le faagutugutulua, le losilosivale, ma le feainai, ua fesoasoani ai le agaga paia o le Atua ia i latou ina ia faafouina i ‘le malosi e faagaoioia ai o latou mafaufau.’ (Efeso 4:22-24; 1 Peteru 2:1, 2) Ua uunaia i latou e faaofuina i latou lava i “le alofa mutimuti vale, ma le agalelei, ma le loto maulalo, ma le agamalu, ma le onosai.” (Kolose 3:12) Peitai o le ā moni lava ua aofia ai i le agamalu? Aiseā e aogā ai ona agamalu? Ma e mafai faapefea ona saosaolaumea lenei uiga i lo tatou fiafiaga?

Se Vaaiga Totoʻa i le Agamalu

5. E mafai faapefea ona faauigaina le agamalu?

⁵ O se tagata e agamalu e agamaulalo o ia i ona uiga ma le amio. I nisi o fuaitau o le Tusi Paia, ua faaliliuina ai le soā nauna o le pra·ysʹ i le “agavaivai,” “agamalie,” “agamalu,” ma le “agamaulalo.” I faatulagaga e sili ona lelei a Eleni, o le soā nauna pra·ysʹ e mafai ona faatatauina i se fisagamālū po o se leomālū. E mafai foi ona mataulia ai se tasi e alofa fua. Ua faapea mai le tagata poto o W. E. Vine: “O le faaaogāina o [le nauna o le pra·yʹtes] e muamua ma e faasino tonu lava i le Atua. O le agamalu lena o le agaga ua tatou taliaina ai Ana feutagaʻiga ma i tatou o se mea lelei, ma o lea, e aunoa ma le fefinauai po o le feteenai; ua fesootai vavalalata lea ma le upu tapeinophrosunē [loto maulalo].”

6. Aiseā e mafai ai ona faapea atu e lē o se vaivaiga le agamalu?

⁶ O le agamalu e lē o se vaivaiga. Na tusia e le tagata poto o William Barclay e faapea: “O loo iai le agamaulalo i le praus, ae i tua o le agamaulalo o loo iai le malosi o le uamea.” E moomia le malosi ina ia agamalu ai. Mo se faataʻitaʻiga, e manaomia le malosi ina ia agamalu ai i lalo o faaosoosoga po o taimi e sauāina ai i tatou. Ua faataatia e le Alo agamalu o le Atua, o Iesu Keriso, se faaaʻoaʻoga lelei i lenei itu. “O le sa agateleina, a e lei toe agatele atu, na faatigaina o ia, a e lei faamatau atu, a ua tuuina atu o ia e ia [ia Ieova le Atua] na te faamasino tonu.” (1 Peteru 2:23) E pei o Iesu agamalu, e mafai foi ona tatou mautinoa o le a feutagaʻi le Atua ma ē agatele ma sauāina i tatou. (1 Korinito 4:12, 13) E mafai ona tatou toʻafilemu, e pei o Setefano sa sauāina, i le iloa faapea afai tatou te faamaoni, o le a faatumauina i tatou e Ieova ma na te lē faatagaina se mea e faaleagaina ai i tatou e faavavau.—Salamo 145:14; Galuega 6:15; Filipi 4:6, 7, 13.

7. O le ā ua faaalia e le Faataoto 25:28 e uiga i se tagata e lē agamalu?

⁷ Sa agamalu Iesu, peitai na ia faaalia le malosi i le tu mausalī mo le mea saʻo. (Mataio 21:5; 23:13-39) So o se tasi ua iai “le finagalo o Keriso” o le a pei o ia i lenei tulaga. (1 Korinito 2:16) Afai e lē agamalu se tagata, e lē pei o ia o Keriso. Na i lo lea, ua fetaui ia te ia upu nei: “O le aai ua sofaia, ua leai se pa, o le tagata lea na te le mataofia lona loto.” (Faataoto 25:28) O se tagata e lē agamalu ua faaavanoaina o ia i le osofaiga a manatu sese e ono faapogaia ai o ia e gaoioi i ni auala e lē talafeagai. E ui ina e lē vaivai le mafaufau o se Kerisiano e agamalu, ae ua ia iloa faapea o “le tali filemu e liliueseina ai le ita; a o le upu faatiga e tupu ai le ita.”—Faataoto 15:1.

8. Aiseā e lē faigofie ai ona agamalu?

⁸ E lē o se mea faigofie ona agamalu, ona ua tuufaasolo mai ia i tatou le lē lelei atoatoa ma le agasala. (Roma 5:12) Afai o i tatou o ni auauna a Ieova, tatou te tau faasaga foi la i ʻau a agaga leaga, ia atonu e tofotofoina ai lo tatou agamalu e ala i sauāga. (Efeso 6:12) Ma o le toatele o i tatou o loo galulue faatasi ma i latou o ē ua iai le agaga inainā o le lalolagi o loo pulea e le Tiapolo. (1 Ioane 5:19) O lea e mafai faapefea ona tatou atiina aʻe le agamalu?

Le Auala e Atiina aʻe ai le Agamalu

9. O le ā le manatu o le a fesoasoani ia i tatou e atiina aʻe ai le agamalu?

⁹ O se talitonuga e faavae i le Tusi Paia o loo tatou manaomia ina ia faaalia ai le agamalu, o le a fesoasoani lea ia i tatou e atiina aʻe lenei uiga. E tatau ona tatou galulue i lea aso ma lea aso e atiina aʻe le agamalu. Auā a lē o lena, o le a pei i tatou o tagata o ē manatu i le agamalu o se vaivaiga ma faapea ai e maua le manuia mai le faamaualuga, le fia toa, e oo foi i le sauā. Peitai, ua inosia e le Afioga a le Atua le faamaualuga, ma ua faapea mai se faataoto atamai: “O le tagata alofa ua agalelei o ia ia te ia lava; a o le saua, na te faatigaina lona lava tino.” (Faataoto 11:17; 16:18) E ʻaloʻalo ese tagata mai se tagata inainā, ma lē alofa, e tusa foi pe mafua ona latou faia faapea ina ia alofia ai le faatiga e ala i lona sauā ma le leai o se agamalu.

10. Afai tatou te fia agamalu, o le ā e tatau ona tatou gauai i ai?

¹⁰ Ina ia agamalu, e tatau ona tatou gauai i le taaʻiga a le agaga paia, po o le malosi galue o le Atua. E pei ona faia e Ieova ina ia mafai ona fua mai e le laueleele ona fua, ua faapea foi ona ia faatagaina ana auauna ina ia fuaina mai fua o lona agaga, e aofia ai le agamalu. Na tusia e Paulo: “O le fua o le Agaga o le alofa, o le olioli, o le filemu, o le onosai, o le mataalofa, o le agalelei, o le faamaoni, o le agamalu, ma le le gaoiā; e le faatulafonoina mea faapena.” (Kalatia 5:22, 23) Ioe, o le agamalu o se tasi lea o fua o le agaga o le Atua ua faaalia e i latou o ē faafiafiaina o ia. (Salamo 51:9, 10) Ma maeu ni suiga e aumaia e le agamalu! Ina ia faataʻitaʻi: Sa iai se tagata faasauā e igoa ia Toni o lē sa faamisa, faomea, gaoia vailaau oona, sa taʻitaʻia se vaega tietie uilaafi, ma faaaluina se vaitaimi i le falepuipui. E ui i lea, e ala i le mauaina o le poto o le Tusi Paia ma le fesoasoani o le agaga o le Atua, na suia ai o ia i se auauna agamalu a Ieova. O le tala ia Toni o se tala moni lava. O le ā la e mafai ona faia e se tagata pe afai o se vala tupito na pulea ona uiga, o le leai lea o se agamalu?

11. I le atiina aʻe o le agamalu, o le ā le vaega e faia e le tatalo?

¹¹ O tatalo mai le loto mo le agaga o le Atua ma, mo lona fua o le agamalu o le a fesoasoani lea ia i tatou e atiina aʻe lenei uiga. Atonu e manaomia ona tatou ‘ole atu pea,’ e pei ona fetalai ai Iesu, ona foaiina mai lea e Ieova le Atua o mea tatou te ole atu ai. Ina ua maeʻa ona faailoa atu faapea e avatu e tamā faaletagata i a latou fanau mea lelei, sa fetalai Iesu: “O lenei, o outou e [agasala ma lē mafaatusalia le] leaga, afai ua iloa e outou ona avatu o mea lelei mā a outou fanau; e le sili ea ona foaiina mai e lo outou Tamā o i le lagi le Agaga Paia i e ole atu ai ia te ia?” (Luka 11:9-13) E mafai ona fesoasoani le tatalo ina ia avea le agamalu ma vala tumau o lo tatou fausaga—o se uiga e saosaolaumea i lo tatou fiafiaga atoa ma le fiafiaga o a tatou aumea.

12. Aiseā e avea ai le teu i manatu faapea e lē lelei atoatoa tagata, e fesoasoani ia i tatou ina ia agamalu?

¹² O le teuina i manatu faapea e lē lelei atoatoa tagata e mafai ona fesoasoani ia i tatou ina ia agamalu. (Salamo 51:5) E lē mafai ona tatou mafaufau ma gaoioi lelei atoatoa, e sili atu i lo le mea e mafaia e isi tagata, o lea e ao ai ona mautinoa ua ia i tatou le manatu mamafa ma ia faia i latou e pei foi ona tatou mananao e fai mai ia i tatou. (Mataio 7:12) I le iloaina faapea tatou te faia uma lava mea sese, e ao ona faapogaia ai i tatou e faamagalo ma agamalu i feutagaʻiga ma isi. (Mataio 6:12-15; 18:21, 22) I lona aotelega, pe tatou te lē faafetai ea ona o le faaalia e le Atua o le alofa ma le agamalu ia i tatou?—Salamo 103:10-14.

13. E mafai faapefea ona tatou maua le fesoasoani e atiina aʻe ai le agamalu pe afai tatou te amanaia faapea na faia e le Atua tagata o ni sui saoloto i mea tau amio?

¹³ O le amanaiaina faapea na faia e le Atua tagata o ni sui e saoloto i mea tau amio, e mafai foi ona fesoasoani ia i tatou e atiina aʻe le agamalu. O le a lē faatagaina ai e lenei mea so o se tasi ina ia faalēamanaia tulafono a Ieova e aunoa ma le faasalaina, peitai ua faaavanoa ai mo le eseesega i mea e mananao ai, mea e fiafia, ma mea e lē fiafia i ai ona tagata. O lea tau ina ia tatou amanaia, e leai se tasi ua faatonuina e faafetaui i le tulaga atonu tatou te manatu e sili atu ona lelei. O le a fesoasoani lenei agaga ia i tatou ina ia agamalu ai.

14. E uiga i le agamalu, o le ā e ao ona avea ma a tatou filifiliga?

¹⁴ O le filifiliga ia aua neʻi tuulafoaia le agamalu o le a fesoasoani lea ia i tatou e atiina aʻe pea lenei uiga. O le gauai i le taaʻiga a le agaga o Ieova e oo ai ina toe fuataiina o tatou mafaufauga. (Roma 12:2) E fesoasoani se agaga agamalu, e pei o Keriso i le taimi nei, e taofiofia ai i tatou mai le auai atu i ‘gaoioiga o amioga lē pulea, tuʻinanau leaga, inutele i uaina, poula, inugāava, ma ifoga i tupua e soli ai tulafono.’ Ia aua lava neʻi o tatou tuulafoaia le agamalu ona o tupe, fiafiaga lautele, po o isi mafuaaga pe ona o le faia e tagata o faamatalaga sese e uiga i la tatou amioatua. (1 Peteru 4:3-5) E lē tatau ona tatou faatagaina so o se mea e faapogaia ai i tatou ina ia auai i “galuega a le tino,” e oo ai ina tatou faamatuu atu i lo tatou agamalu ma lē taulau ai ona tatou maua le Malo o le Atua pe olioli i ona faamanuiaga. (Kalatia 5:19-21) Tau ina ia tatou saafi pea i le faaeaga o le avea ma tagata agamalu o le Atua, pe faauuina mo le ola faalelagi po o le mauaina o le faamoemoe faalelalolagi. O lea la, seʻi o tatou iloiloina nisi o aogā o le agamalu.

Aogā o le Agamalu

15. E tusa ma le Faataoto 14:30, aiseā e atamai ai ona agamalu?

¹⁵ O se tagata e agamalu e toʻafilemu lona loto, mafaufau ma le tino. Ua mafua lea ona e lē auai o ia i ni fefinauaiga, pe faapopoleina ona o gaoioiga a isi, po o le faapologaina foi o ia lava i popolega e tutupu soo. E fesoasoani le agamalu ia te ia ina ia iloilo ai pea ona faalogona ootia, ma e aogā lenei i le tulaga faalemafaufau ma le faaletino. Ua faapea mai se faataoto: “O le loto [toʻafilemu], o le ola lea o le tino.” (Faataoto 14:30) Atonu e iʻu le leai o se agamalu i le ita, lea e mafai ona faatupuina ai le toto maualuga pe faapogaia ai foi ni faafitauli i le faamalūina o meaʻai, le sela, tetete o mata, ma isi faafitauli. Ua olioli se Kerisiano agamalu i aogā matalasi, e aofia ai ‘le filemu o le Atua’ o loo leoleoina lona loto ma le mafaufau. (Filipi 4:6, 7) Maeu le atamai o le avea ma sē e agamalu!

16-18. O ā āuga o le agamalu ua iai i la tatou faiā ma isi?

¹⁶ O le uiga o le agamalu e faaleleia ai la tatou faiā ma isi. Atonu sa ia i tatou se uiga o le uunaia o mataupu seia oo ina tatou manumalo ai. Atonu e feitai tagata ia i tatou ona o le leai o so tatou loto maulalo ma le agamalu. I lalo o na tulaga, e lē tatau ona faateʻia ai i tatou pe afai tatou te aafia i ni fefinauaiga mai lea taimi i lea taimi. Peitai, ua faapea mai se faataoto: “A leai se fafie, e mate ai le afi; a leai foi se faatuaupua, e mavae ai le misa. O le malala i le malala ola, ma le fafie i le afi, e faapea le tagata faamisa e tupu ai le misa.” (Faataoto 26:20, 21) Afai tatou te agamalu, na i lo le ‘faaopoopo atu o fafie i le afi’ ma faaita ai i isi, o le a tatou maua se faiā lelei ma i latou.

¹⁷ O se tagata agamalu e masani ona maua e ia uo lelei. E fiafia tagata e auaumea faatasi ma ia ona e ia te ia se uiga mautinoa, ma o ana upu e susua ma suamalie e pei o le meli. (Faataoto 16:24) Sa moni lena ia Iesu, o lē na mafai ona faapea mai: “Ia outou amoina laʻu amo, ma ia outou faaaʻoaʻo ia te au, auā o aʻu lē agamalu ma le loto maulalo; ona maua lea e outou o le malologa mo outou agaga. Auā e avegofie laʻu amo, o laʻu avega foi e māmā ia.” (Mataio 11:29, 30) Sa leʻi inainā Iesu, ma sa lē mamafa foi lana amo. O i latou na ō mai ia te ia, sa tausia lelei ma faafouina faaleagaga. E faapena foi le tulaga pe a tatou auaumea ma se uo Kerisiano e agamalu.

¹⁸ O le agamalu e faapelepeleina ai i tatou e aumea talitonu. E lē masalomia, o le toatele o Kerisiano i Korinito, sa tosina atu ia Paulo ona sa ia aioi atu ia i latou i “le agamalu ma le alofa o Keriso.” (2 Korinito 10:1) E mautinoa sa talilelei atu tagata i Tesalonia i le aposetolo, ona sa avea o ia o se aʻoaʻo agamalu, ma le agamaulalo. (1 Tesalonia 2:5-8) E lē tau fesiligia e tele ni mea sa aʻoaʻoina e toeaina Efeso mai ia Paulo ma alolofa faapelepele ai ia te ia. (Galuega 20:20, 21, 37, 38) Pe o e faaalia ea le agamalu e faapea ona pele ai oe i isi?

19. Ua faapefea ona fesoasoani le agamalu i tagata o Ieova ina ia tausia ai pea o latou tulaga i lana faalapotopotoga?

¹⁹ E fesoasoani le agamalu i tagata o Ieova ina ia gauai ma tausia ai pea o latou tulaga i lana faalapotopotoga. (Filipi 2:5-8, 12-14; Eperu 13:17) Ua avea le agamalu ma auala e taofia ai i tatou mai le sailia o se viiga, lea e faavae i le faamaualuga ma e inosia e le Atua. (Faataoto 16:5) O se tagata e agamalu, e lē manatu ia te ia lava e sili atu i lo uso talitonu, ma e lē taumafai o ia e fiasili pe faamaualuga ia i latou. (Mataio 23:11, 12) Na i lo lea, na te amanaia lona tulaga agasala ma lona manaomia o le sauniuniga a le Atua o le togiola.

Faatupuina e le Agamalu le Fiafiaga

20. O ā āuga o le agamalu ua iai i le olaga faaleaiga?

²⁰ E ao i auauna uma lava a le Atua ona manatua, o le agamalu o se fua o lona agaga e faapea ona faatupuina ai le fiafiaga. Mo se faataʻitaʻiga, ona o le faaalia e tagata o Ieova o uiga na e pei o le alofa ma le agamalu, ua latou maua ai ni aiga fiafia. A feutagaʻi tane ma avā taitasi i se auala agamalu, o le a tausia aʻe ai la a la fanau i se siomaga toʻafilemu, ae lē i se aiga e tumu i upu ma gaoioiga inainā. A o avatu e le tamā i lana fanau fautuaga i le agamalu, o le a maua ai e o latou mafaufau laiti se taunuuga lelei, ma o le a avea ai le loto agamalu o se vaega o o latou uiga. (Efeso 6:1-4) E fesoasoani le agamalu i tane ina ia alolofa ai pea i a latou avā. Ua fesoasoani lea i avā ina ia gauai atu i a latou tane ma ua uunaia ai fanau e usiusitai i o latou mātua. Ua faapogaia foi e le agamalu sui o le aiga ina ia maua le agaga faamagalo lea e saosaolaumea i le fiafiaga.—Kolose 3:13, 18-21.

21. I le faaiʻuga, o le ā le fautuaga na aumaia e le aposetolo o Paulo i le Efeso 4:1-3?

²¹ Ua faatupuina e aiga ma tagata taitoatasi e agamalu, le fiafiaga i totonu o faapotopotoga o loo latou auaufaatasi. O le mea lea, e manaomia ai e tagata o Ieova ona faia se taumafaiga naunautai ina ia agamalu. O e faia ea faapena? Sa aioi atu le aposetolo o Paulo i aumea Kerisiano faauuina ina ia savavali e tusa ma lo latou valaauina faalelagi, ma ia faia faapea i “le loto maulalo lava ma le agamalu, ma le onosai, ia outou faapalepale le tasi i le tasi ma le alofa, ia taumafaia e outou ona taofi o le loto gatasi i la le Agaga i le noataga o le filemu.” (Efeso 4:1-3) E tatau i Kerisiano o loo iai le faamoemoe faalelalolagi ona faaalia foi le agamalu ma isi uiga faaleatua. O le auala lenei e aumaia ai le fiafiaga moni. E moni lava e fiafia ē agamalu!

E Faapefea ona E Tali?

◻ Aiseā e fiafia ai tagata e agamalu?

◻ O le ā lona uiga ia agamalu?

◻ E mafai faapefea ona atiina aʻe le agamalu?

◻ O ā nisi o aogā o le agamalu?