Se Meleniuma Matagofie—O loo Fotuai Mai

“Na aʻu iloa foi nofoālii, ma ua latou tietie ai, ua tuuina atu foi le faamasinoga ia te i latou; na aʻu iloa foi agaga o e ua vavaeeseina o latou ulu ona o le mau ia Iesu ma le afioga a le Atua, o e na le ifo i le manu feai po o lona faatagata, na le talia foi le faailoga i o latou muaulu po o latou lima. Ua latou ola foi, ma ua fai ma tupu faatasi ma Keriso i tausaga e afe.” “E sōloiesea foi e le Atua loimata uma i o latou [le fanau a tagata] mata; e leai foi se toe oti, po o se faanoanoa, po o se aue, e leai foi se toe puapuaga; auā ua mavae atu mea muamua.”—Faaaliga 20:4; 21:4.

O LEA le auala ua valoia ai e le Tusi Paia se meleniuma matagofie o loo fotuai mai—le Pulega o le Afe Tausaga a Iesu Keriso ma se tino aufaatasi o tupu faalelagi. Atonu o e faanaunau e faagalo lenei valoaga faapea ua na o se mea lē mautinoa, o se mea ua fatufua. Ae peitai, ua lava mafuaaga mo oe e manatu ai i lenei Meleniuma o se mea moni o loo sau!

Mo le tasi o mea, o le suesueina o le Tusi Paia o le a faaalia ai ia te oe faapea ua uma ona feagai ma meleniuma e ono ua tuanai o le talafaasolopito o le fanau a tagata i se auala ofoofogia maufaatuatuaina. E lē gata i lea, o le Tusi Paia o se tusi o valoaga, ma o le tele o mea na ia muai taʻuina mai, po o valoaga, ua uma ona faataunuuina i auiliiliga uma.a Afai o lea le tulaga, aiseā la ua lē tatau ai ona maufaatuatuaina le Tusi Paia i le muai taʻuina mai o le Meleniuma o loo fotuai mai o le pulega a Keriso? E ui i lea, atonu o e tau manatu, po o le ā o taʻuina mai e le Tusi Paia ia i tatou e uiga i lena vaitaimi? O le ā le fuafuaga o le a ia faia? Ma le mea e sili ona e naunau faapitoa i ai, o le a faapefea ona aafia ai lou olaga?

O se Tofi na Leiloa

Ua faaalia e le Tusi Paia faapea o le Pulega o le Afe Tausaga a Keriso ua iai i lona auala e aumaia ai se tofi e tautele mo lana “fanau.” Ae o le ā le tofi? Ma o ai le “fanau”? O se tofi e mafai ona faamatalaina o se mea ua tuuina atu i le fanau a se tasi pe a oti. Ina ua faamaonia le lē usiusitai o lo tatou tupuaga o Atamu i le Atua, na leiloa ai mo ia lava ma lana fanau uma—le fanau atoa a tagata—le aiā i le ola e faavavau i le parataiso faalelalolagi. Ona tuu mai ai lea e Atamu i lana fanau se tofi o le agasala, oti, ma mea leaga.—Kenese 3:1-19; Roma 5:12.

Na afio mai Iesu i le lalolagi i le tino ina ia toe maua mai mo le fanau a tagata le tofi na leiloa ia Atamu. Na ia faia lenei mea e ala i le faamaonia o lona faamaoni ia Ieova le Atua, i le loto malie e ofoina atu lona soifua e fai ma sui o le fanau a tagata. (Ioane 3:16) E ala i le ola i se olaga lelei atoatoa, e leai se agasala, na maua ai e Iesu le aiā i le ola e faavavau lelei atoatoa i le Parataiso i le lalolagi—le mea tonu lava lea na leiloa ia Atamu. Ae peitai, sa leʻi faaaogāina e Iesu lena aiā; pe na leʻi leiloa foi ia te ia ina ua maliu ma toe faatuina i le ola faalelagi. O le mea lea sa mafai ai ona ia faaaogā lea mea e avea o se tofi tautele e tuufaasolo atu i lana “fanau.”—Roma 5:18, 19.

I Latou e Maua le Tofi —Le “Fanau” a Keriso

I le Isaia 9:6 o loo taʻua faavaloaga ai Iesu o le “Tamā o le faavavau.” Ua avea o ia o le Tamā o le Faavavau o le lalolagi togiolaina o le fanau a tagata, i se tulaga e tuufaasolo atu ai se tofi ia i latou nei ua togiolaina, po o tamafai. (Mataio 20:28; tagai foi i le Salamo 37:18, 29.) Ua faaalia manino lenei i lana folafolaga: “O mai ia, o outou ua faamanuiaina e loʻu Tamā, ia fai mo outou tofi le malo ua saunia mo outou a o lei faavaeina le lalolagi.” Na ia toe faapea atili: “Amuia ē agamalu; auā e fai mo latou tofi le nuu.”—Mataio 5:5; 25:34.

Ae peitai, ina ia avea le lalolagi ma tofi aogā, e tatau ai ona matuā suia tulaga o mea—aumaia i le lelei atoatoa! E tatau ona avea o se lalolagi e maua ai e meafaiola uma a le Atua se pulega filemu lelei atoatoa ma le talafeagai. (Isaia 11:6-9) O faailoga uma o le lē lelei atoatoa faaletagata e tatau ona soloiesea, e aofia ai le oti. (1 Korinito 15:25, 26) O le uiga o lenei mea faapea o ē ua oti, o ē o se vaega o le fanau togiolaina a tagata, e tatau ona toe faatutuina. E na o lenei lava le auala e mafai ai e i latou ona maua le avanoa e avea ma suli o Keriso!—Ioane 5:28, 29.

I lea, o le Pulega o le Afe Tausaga a Keriso o le a avea o se vaitaimi fiafia lea o le a auaumalie atu ai ona “tuusaunoa . . . ia le faapologaina e le iu vale” le fanau a tagata ma oo atu ai i le lelei atoatoa. (Roma 8:21) E fiafia lava, ona e oo lava i puna e masani ai ua latou iloa lenei mea e avea o le fuafuaga o se meleniuma. I le Webster’s Ninth New Collegiate Dictionary (lomiga 1985) ua faamatalaina ai le “meleniuma” o “se vaitaimi o le fiafia tele po o le lelei atoatoa o le fanau a tagata.”

E Sili atu i le Pulega a Solomona

O lenei Meleniuma mamalu e mafai ona faatusaina i le 40 tausaga o le pulega filemu ma le olaola a le Tupu o Solomona ia Isaraelu anamua. (1 Tupu 4:24, 25, 29) Ina ua asiasi atu le tupu fafine o Seepa i le Tupu o Solomona, na ia faapea atu: “Ua moni le tala na ou faalogo ai i loʻu nuu i au afioga, ma lou poto. A e peitai na ou le talia ia tala seia ou sau, ma vaavaai i ai oʻu mata. Faauta, e itiiti mea na talaina atu ia te au, a e tele mea na le talaina atu; ua sili lava lou poto, ma lou manuia i le tala na ou faalogo i ai. Amuia ou tagata, amuia foi au auauna nei, o e tutū i ou luma e le aunoa, ma faalogo i lou poto.”—1 Tupu 10:6-8.

Afai sa sili atu ona filemu, tamaoaiga, ma atamai le pulega a le Tupu faalelalolagi o Solomona mo le 40 tausaga, ioe, e sili atu i lo o le faaluaina, o mea sa sili ona faatalitalia e le tupu fafine o Seepa, o lea la o le Pulega o le Afe Tausaga a le Tupu o Solomona sili faalelagi o Iesu Keriso, e mautinoa lava o le a sili mamao atu na i lo le mea o mafaufau i ai le tagata! I upu a Iesu lava ia, o ia e “sili ia Solomona.” (Mataio 12:42) Taumafai e faaata i lou mafaufau tulaga aupito sili o le soifua maloloina, tamaoaiga, filemu, amiotonu, ma le fiafia i le lalolagi e mafai ona e mafaufauina, ma o le a lē mafai ona e maua e oo lava i sina iota o ni mea o loo teuina i le Meleniuma a Keriso.

Pe ua Feagai ma le Meleniuma Lona Tolu?

O mea tutupu i le lalolagi talu mai le 1914 ua faaalia ai faapea ua tatou ola i ‘le iʻuga o le faiga o mea.’ Na fetalai atili Iesu faapea o le tupulaga na ō mai faatasi ma nei mea na valoia o le a “le mavae atu lava . . . seia oo mai nei mea uma.” Pe o le uiga o lenei mea faapea o le a feagai le Pulega Faa-Meleniuma a Keriso ma le meleniuma lona tolu?—Mataio 24:3-21, 34.

Na lapataia e Iesu ona soʻo e lē tatau ona latou iloa. Na fetalai o ia: “E le tusa ona outou iloa o ona po ma ona tausaga ua tuu e le Tamā i lana lava pule.” (Galuega 1:7) Ma e faatatau i le “aso ma lea itu aso” tonu o le a tutupu ai nei mea, na fetalai Iesu faapea na o lona Tamā lava, o Ieova le Atua, na te silafia. (Mataio 24:36) O lea, e lē o lagolagoina e le Tusi Paia so o se tuputupu aʻe ua iai nei o le faitau aofai o perofeta ma gaoioiga o aso pogisa ia o loo faasino atu i le ta o le tulua o po ma ao i le Po o le Tausaga Fou, le 1999, faapea o le iʻuga o le lalolagi.

Ae peitai, o mea tutupu i le vaitaimi nei i le lalolagi ua faaalia manino ai faapea o le taimi o le iʻuga o lenei faiga leaga pogisa o mea ua “leva” ma faapea o le Meleniuma a Keriso ua “lata mai.” (Roma 13:12) Na i lo le fia iloa o le aso tonu ma le itula e oo mai ai lenei mea, o se taimi sili lenei ona lelei e ave ai i totonu le poto e uiga i mea e manaomia e le Atua mo le faasaoina. (Ioane 17:3) I lenei auala o le a mafai ai ona e aʻoaʻoina pe o le a faapefea ona e iai faatasi ma i latou o ē o le a fetalai atu i ai Iesu: “O mai ia, o outou ua faamanuiaina e loʻu Tamā, ia fai mo outou tofi le malo ua saunia mo outou a o lei faavaeina le lalolagi.” (Mataio 25:34) Ua loto naunau Molimau a Ieova ma e mafai ona fesoasoani atu ia te oe ina ia iai faatasi ma i latou o ē o le a olioli i faamanuiaga i le Meleniuma sili o loo sau.b

[Faaopoopoga i lalo]

[Faamatalaga faaopoopo i le itulau 6]

“O mai ia, o outou ua faamanuiaina e loʻu Tamā, ia fai mo outou tofi le malo ua saunia mo outou a o lei faavaeina le lalolagi”