Faamaopoopoina Nei mo le Afe Tausaga o loo Sau
“Latou te fai ma tupu . . . faatasi ma ia i tausaga e afe.”—FAAALIGA 20:6.
1. O le ā o le a avea o le tulaga o mea i le lalolagi e sili atu na i lo o le afe tausaga e amata atu i le taimi nei?
O LE Ā! Pe o lona uiga o la tatou tala faapea i le sili atu i le afe tausaga mai le taimi nei, o le a tumau pea ona iai le fanau a tagata i luga o le lalolagi? O le uiga moni lava lena! Ma o se isi foi mea, i le taimi lea o le a lelei atoatoa uma le fanau a tagata i le tino, le loto, ma le mafaufau—e pei o le uluai tane ma le fafine i le amataga o le iai o le tagata i lenei kelope. Ioe, o le afe tausaga mai le taimi nei, o le a iai le fanau a tagata i le faatusa ma foliga o lo latou Atua ma Lē na te Toe Faafoisia i latou. (Kenese 1:26-30) O le a latou olioli i le ola i le tulaga atoatoa i se “faatoaga i Etena,” o le parataiso o le fiafia, i se lalolagi ua faamamāina o le a lē fetinaʻi i tagata e ʻaināina. (Kenese 2:15) O nei mea uma o le a avea o le faataunuuga o le folafolaga a Lē na Foafoaina Mea i le amataga faatatau i le lalolagi ma i latou o ē o le a nonofo ai. O lenei faataunuuga matagofie o le a viia ai o ia o lē e faamaoni i lana folafolaga alofa e faamanuia le fanau uma a tagata e ui lava i teteega uma.
2. Na faapefea i tagata e tusa ai ma le 19 senituri ua mavae, ona maua le vaaiga pe o le a faapeī le fanau a tagata lelei atoatoa?
2 O lena faataunuuga faamanuiaina o le a faapaleina ai le Afe Tausaga o le pulega a le Atua e ala i lona Alo faamamaluina, o lē na faaaluina le 33 1/2 tausaga i le lalolagi o se tagata lelei atoatoa e sili atu i le 19 senituri ua mavae. E tusa ai ma le ituaiga o foliga na ia afio mai ai i lena taimi, ua tatou faitau ai: “Ua liutino tagata le Upu ma sa mau o ia ma i tatou, ma sa tatou matamata i lona mamalu, o le mamalu lava lea o se alo e toatasi mai se tamā; sa tumu o ia i le alofa tunoa ma le upu moni.” (Ioane 1:14, NW) O lea, na vaaia ai e tagata Isaraelu ia Iesu Keriso i lea taimi pe faapeī le mea e taʻua o le tagata lelei atoatoa. (Luka 3:23, 38) Ioe, i le 19 senituri ua mavae na vaaia ai e nisi tagata pe o le a faapeī le tagata lelei atoatoa i le Parataiso faalelalolagi o loo sau.
3, 4. (a) O le ā moni lava le umi o le a pule ai Ieova e ala ia Iesu Keriso ma le 144,000? (e) O le ā le faaupuga ua faaaogāina mo lena vaitaimi, ma na faapefea ona faaatagia i nisi o lomiga a Le Olo Matamata?
3 O le umi o le pulega a le Malo o Ieova e ala ia Iesu Keriso ma lana 144,000 o soʻo faamamaluina, na valoia faapea e afe tausaga. E tusa ai o lena Pulega i le Afe o Tausaga, na tusi ai le aposetolo matua o Ioane: “Na aʻu iloa foi nofoālii, ma ua latou tietie ai, ua tuuina atu foi le faamasinoga ia te i latou; na aʻu iloa foi agaga o e ua vavaeeseina o latou ulu ona o le mau ia Iesu ma le afioga a le Atua, o e na le ifo i le manu feai po o lona faatagata, na le talia foi le faailoga i o latou muaulu po o latou lima; ua latou ola foi, ma ua fai ma tupu faatasi ma Keriso i tausaga e afe; a o e totoe o e ua oti, e lei toe ola i latou seia atoa ia tausaga e afe. O le uluai toe tu lena. Amuia mona ua paia le ua iai se tofi i le uluai toe tu; e le oo foi le pule a le oti faalua ia te i latou, a e avea i latou ma faitaulaga a le Atua ma Keriso, latou te fai ma tupu foi faatasi ma ia i tausaga e afe.”—Faaaliga 20:4-6.
4 Talu ai o tausaga e afe o le meleniuma, ua taʻua ai lena vaitaimi o le Pulega Faa-Meleniuma a Keriso. O i latou o ē talia ma aʻoaʻo lenei aʻoaʻoga faale-Tusi Paia ua taʻua ai i latou i nisi taimi o le au meleniuma po o le au afe tausaga, e tusa ai ma le upu Eleni mo le “afe.” E fiafia lava, ona o tusi o Studies in the Scriptures (na faasalalauina i se taimi e le Watch Tower Bible and Tract Society) na uluai taʻua o le Millennial Dawn, [Tafa o Ata o le Meleniuma]. Ma o le tusi pese sa faaaogāina i se tasi taimi e Tagata Aʻoga o le Tusi Paia Faavaomalo sa faaulutalaina o Hymns of the Millennial Dawn, [O Viiga o le Tafa o Ata o le Meleniuma].
5. O le ā le tulaga o Satani ma ana temoni i le taimi o le Pulega i le Afe o Tausaga a Keriso?
5 O le faaupuga o “tausaga e afe” i le Faaaliga 20:4 e lē o se uiga faafaatusa peitai o loo faasino saʻo atu i le afe o tausaga o le faataamilosaga a le la. I lena vaitaimi o le Meleniuma, o le a nonofo ai Satani le Tiapolo ma lana vao o temoni i le to e lē gata, auā a o leʻi faamatala atu e uiga i le Pulega a Keriso i le Afe o Tausaga, na faapea mai le aposetolo o Ioane: “Na aʻu iloa foi le agelu ua alu ifo i le lagi, ua ia te ia le ki o le to e le gata, ua i lona lima foi le maea uamea tele. Ua pue foi e ia le tarako, o le gata tuai, o le tiapolo lea ma Satani, ua ia fusifusi foi ia te ia i tausaga e afe. Ua ia lafo foi ia te ia i le to e le gata, ua pupuni foi ia te ia, ma tuuina atu le faamaufaailoga i ona luga, ina ia le toe faaseseina e ia o nuu, seia atoa ia tausaga e afe; a mavae foi ia, e tatau ona tatalaina o ia i nai aso.”—Faaaliga 20:1-3.
6. (a) O le ā le aso na tuuina atu e nisi tagata Katoliko Roma mo le iʻuga o le Pulega a Keriso i le Afe o Tausaga? (e) Afai na moni faamatalaga a tagata Katoliko, o le ā le umi ua iai le taimi o ni nai aso ona toe tatalaina mai lea o Satani mai i le lua e leai se iʻuga?
6 Ua faapea mai nisi tagata Katoliko Roma o le Pulega a Keriso i le Afe o Tausaga na iʻu i le 1799 ina ua puʻeina e ʻau a Falani Roma ma lafoaia le avea o le pope ma ona pule, o lea na faaaunuua ai o ia i Falani o se pagota, o i inā na oti ai o ia. Na faapea mai le au taʻitaʻi lotu Katoliko o le taimi lena na tatalaina ai Satani ma ana temoni mai le “lua e lē gata,” po o le “to e le gata,” e toe faafouina la latou galuega taufaasese mo “sina taimi itiiti.” (Faaaliga 20:1-3, Douay Version a Katoliko) Afai e moni lena mea, o lona uiga la o le “sina taimi itiiti” ua uma ona faaauau mai mo le 190 tausaga, ae leai se iʻuga o vaaia.
7. O le ā ua faaalia i le Tusi Paia e uiga i le taimi ma le natura o le Pulega Faa-Meleniuma a Iesu Keriso?
7 Ae peitai, e tusa ai ma le Tusi Paia, o le Pulega Faa-Meleniuma Moni a Iesu Keriso o loo tumau pea ona i le lumanai. O faataunuuga i aso nei o valoaga a le Tusi Paia ua faaalia ai faapea ua i faitotoa. I le taimi o le Meleniuma moni, o le a lafo moni ai Satani ma ana temoni i le to e lē gata, ma o le a pule ai Iesu Keriso ma lana 144,000 o suli lagolago i luga o le fanau uma a tagata e aunoa ma le aiā mai i le faalapotopotoga a le Tiapolo. O le faamanuiaga e faavavau o le fanau togiolaina uma a tagata, i le faataunuuga o le feagaiga a Ieova ma lana “uo” o Aperaamo, o le a amata i le “motu o tagata e toatele,” o ē o le a faasaoina i le “puapuaga tele” e leai sona tusa lea o le a iʻu ai lenei faiga leaga o mea. O le a faalautele atu i le faitau piliona o tagata ua maliliu o ē na togiolaina e ala i le “toto o le Tamai mamoe,” o Iesu Keriso. (Iakopo 2:21-23; Faaaliga 7:1-17; Kenese 12:3; 22:15-18; Mataio 24:21, 22) I lenei itu, o le a toe faatutuina i latou nei mai lo latou momoe i le oti i tuugamau faamanatu i le ola i luga o le lalolagi.—Ioane 5:28, 29.
Se Faalapotopotoga Kerisiano
8. O le ā le faalapotopotoga na faamatalaina i le tusi The New Creation, ae o le ā le galuega faalefaalapotopotoga na te leʻi vaaia?
8 I le galueaiina o le fuafuaga tauatua, na uluai maua ai e se faalapotopotoga fou na faamanuiaga i le faitau senituri. E tusa ai ma lena faalapotopotoga, ua tatou faitau ai: “Afai o ia Keriso se tasi, o le [foafoaga] fou ia.” “Auā e le aoga le peritome, po o le le peritomeina, peitai o se foafoaga fou [o se mea faiola fou, King James Version] o le mea lea.” (2 Korinito 5:17; Kalatia 6:15, NW) I tuā i le 1904, na tataʻi atu ai e le tusi The New Creation manatu i lenei faalapotopotoga fou lea na oo i ai i le uluai senituri T.A. (Studies in the Scriptures, Faasologa VI, Suesuega V, faaulutalaina “Le Faalapotopotoga o le Foafoaga Fou” [The Organization of the New Creation]) Ona o le manatu na ia aumaia e uiga i le iʻuga o le Taimi o Nuu Ese i le 1914 o lona uiga, faapea sa leʻi vaaia e lena tusi le galuega mataʻina faalefaalapotopotoga lena na tatau ona faia ina ua mavae āuga e faavaivaia ai a le taua muamua a le lalolagi i le talafaasolopito o le tagata.—Luka 21:24, KJ.
9. O le ā le mea na tutū aʻe ai le vaega totoe o le foafoaga fou?
9 O le faasaoina o le vaega totoe o le foafoaga fou faaleagaga i le iʻuga o le Taua Muamua a le Lalolagi i le 1918 ma lo latou ola pea i le tino ina ua mavae le taua i le tausaga e 1919 na oo mai o se mea e matuā ofo ai. Peitai sa leʻi faataatiaina lava tulaga faa-Meleniuma. O lea, e mautinoa lava faapea sa iai se galuega e sili atu mo le vaega totoe o le foafoaga fou e faia i luga o le lalolagi a o leʻi iloaina lona faamoemoe faalelagi o le auai faatasi ma Iesu Keriso i le galuega faa-Meleniuma. O le mea lea, sa iai le manaoga tele mo le faaolaolaina ma le toe faamaopoopoina o le vaega totoe. O lea, faatasi ai ma le faatuatua e lē luluina ma le naunautai i le galuega e faafiafia ai o loo i luma, na latou tutū aʻe ai e tusa ai o lea mea.
10. O ā fesili na mapuna aʻe e tusa ai o le faitau miliona o loo faatalitalia e faasaoina atu i le faiga fou o mea?
10 O le faasaoina i le lalolagi o nisi o le fanau a tagata mai le iʻuga pei se mala o lenei faiga amioleaga ma oo atu ai i le Pulega Faa-Meleniuma a Iesu Keriso, sa faatalitalia e le vaega totoe faauuina. Sa faia lenei mea ae maise lava ina ua uma le lauga i le lautele “Le Faitau Miliona o loo Ola Nei o le a Lē Mafai ona Oti” [Millions Now Living May Never Die] na fofogaina atu i Los Angeles, Kalefonia, i le tausaga o le taua i le 1918. Pe sa tatau ona faamaopoopoina lenei faitau miliona o ē o le a faasaoina i le lumanai i a Amaketo? (Faaaliga 16:14-16) A o leʻi momoli atu i le Meleniuma e avea o se vaega o le “lalolagi fou,” pe o le a latou auai i le galuega talaʻi o le Malo faatasi ma le vaega totoe? (2 Peteru 3:13) O nei fesili o le a taliina i taualumaga na tutupu ina ua mavae le taua.
11. (a) O le ā e tatau ona faia i isi mamoe ina ia avea ai i latou o le lafu e tasi faatasi ma le vaega totoe? (e) Aiseā na avea ai le eseese o faamoemoe e lē o se pogai lea mo le eseesega i le va o le vaega totoe ma isi mamoe?
11 O upu o loo mulimuli mai a le Leoleo Mamoe Lelei, o Iesu Keriso, na matuā oo mai lava i lumāmea: “Ua ia te au foi isi mamoe, e le o i lenei lotoā; e tatau ona ou taʻitaʻiina mai o i latou foi, e faalogo foi i latou i loʻu leo; ona tasi ai lea o le lafu mamoe, ma le leoleo mamoe e toatasi.” (Ioane 10:16) Afai sa manaomia e le vaega totoe faauuina le faamaopoopoina mo le galuega pe a mavae le taua mai le 1919 ma agaʻi mai ai, ma pe afai sa manaomia ona avea o isi mamoe ma lafu e tasi faatasi ma le vaega totoe i lenei lotoā, ona ā lea? Ia, o i latou o isi mamoe e tatau foi ona faamaopoopoina e fesootai atu ma lena vaega totoe! O le mea moni faapea o isi mamoe sa ese lo latou faamoemoe—faapea o le ola i le lalolagi parataiso o le fiafia—sa lē o le pogai mo le vaevaeina ai i le va o i latou ma le vaega totoe. Na mulimuli tagata uma i le na o le toatasi le Leoleo Mamoe, ma o le a leai se vaevaeina i le va o vaega e lua seia oo i le faamamaluina o le vaega totoe faauuina i le Malo.
12. (a) O le ā ua sili mamao atu ona tāua na i lo o le faaolataga mo le fanau a tagata? (e) O anafea ma aiseā na avea ai o se mea aupito sili ona tāua le faasilasilaina o le Malo?
12 O le faaolataga o tagata mai le agasala ma le oti, le iʻuga o le pulega a le lalolagi a Satani, ma le toe faafoisia o le fanau usiusitai a tagata i le Parataiso ua toe faavaeina i le lalolagi aoao, o ni taualumaga mataʻina o le fuafuaga alofa a Ieova. Ae peitai, e iai se isi mea e sili mamao atu ona tāua i le vateatea uma. O le ā lena mea? O le faamamaluina o le pule silisili ese a Ieova i le vateatea faatasi ai ma le faapaiaina o lona suafa paia. O le talafeagai o le faasilasilaina o le Malo o Ieova e ala i le Tupu ua Pule o Iesu Keriso, na faamamafaina i le 1922 i le tauaofiaga lona lua i Cedar Point, Ohio, a le International Bible Students. Talu ai na iʻu Taimi o Nuu Ese i le 1914, sa o le taimi tatau lea e tauaveina ai le upu faavaloaga a Iesu: “E talaʻiina atu foi lenei tala lelei o le malo i le atu laulau uma, e fai ma molimau i nuu uma; ona oo mai ai lea o le gataaga.” (Mataio 24:14) O le Malo lena o le a na viiviia le pule silisili ese a Ieova i le vateatea ma faapaiaina lona suafa paia lea na faavaeina i le lagi i le 1914, ma sa pule ai Iesu Keriso i totonu o ona fili. O le tala lelei sili lenei na talaʻia i auala uma sa mafai ona maua mo le faasilasilaina o le Tupu ma lona Malo!
13. Mo le galuega o le folafolaina o le Malo, o le ā na saunia e le Atua, ma aiseā?
13 O Ieova o Lē na faamaopoopoina i se fua faalevateatea, auā o ia Lē Pule Silisili Aupito Sili ona Maualuga. Ua ia faamautinoaina nei le faamaopoopoina maeʻaeʻa o le faalapotopotoga, i inei i le lalolagi, o le galuega faavaomalo o le folafolaina o lona Malo a o leʻi oo mai le iʻuga o lenei faiga o mea. O sui o le vaega totoe faasaoina o ē ua faauuina na fusia faatasi, o le mea lea, ua faamaopoopoina ai i se faalapotopotoga faavaomalo ina ia faataunuuina lona finagalo. E tatau ia i latou nei ona folafola atu i le lalolagi faapea i le manatu i le luia e Satani o le pule silisili ese a Ieova i le vateatea, ua tatau ai ona viia le moni ma le tonu aʻiaʻi o lena pulega, taʻuamiotonuina, ma taimi uma lava i le lumanai.
Le Faalapotopotoga Muamua i le Meleniuma
14. (a) A o leʻi oo mai i o tatou aso (T.A.), o le ā le faalapotopotoga na avea o se vaega faalelalolagi o le faalapotopotoga faalevateatea a Ieova? (e) Na faamaonia faapefea Tavita o sē e faamaopoopo mataʻina?
14 Mo le 15 senituri a o leʻi oo mai i o tatou Aso, (T.A.) sa iai se faalapotopotoga vaaia a Ieova le Atua i le lalolagi. Sa ia faaaogā le perofeta o Mose e avea o Lana puluvaga i le faamaopoopoina o le nuu o Isaraelu ina ua uma ona faasaoina mai Aikupito, le uluai emepaea o le lalolagi i talafaasolopito o le Tusi Paia. I lalo o le Tulafono faa-Mose, na avea ai Isaraelu o le vaega vaaia o le faalapotopotoga faalevateatea a Ieova. O sē faamaopoopo mataʻina i totonu o nei tagata filifilia o le Atua sa o le tupu leoleo mamoe o Tavita, o lē ua tatou faitau ai: “Sa faamaopoopoina i latou e Tavita [tagata sa Levī o ē na auauna i le malumalu o Ieova] i vaega, na taʻua i latou i igoa o Keresona, o Koato, ma Merari, o atalii o Levi.” “Na ia faamaopoopoina i latou [o faitaulaga] e ala i le vili, auā sa ia i latou tulaga paia ma avea o ni auauna a le Atua i le gafa o Eliasaro ma i le gafa o Itamaro.”—1 Nofoaiga a Tupu 23:3, 6; 24:1, 5, The New English Bible.
15. (a) I le ā le tulaga na ō ese mai ai Isaraelu mai Aikupito? (e) O ai foi na filifili e tuua Aikupito, ma pe sa tumau ai ona faatasi i latou ma tagata Isaraelu?
15 I le faitau selau o tausaga a o leʻi oo i le taimi o Tavita, ina ua tuua e tagata Isaraelu Aikupito, latou te leʻi faanatinati atu i se tulaga nunumi faatasi ae na ō ese atu i latou i se tulaga maopoopo faasolosolo lelei. Na faaalia i lenei mea se galuega lelei o le faamaopoopoina i le vaega a lo latou puluvaga, o Mose. Sa ō atu foi se vaega tele o tagata e lē ni Isaraelu faatasi ma i latou, o ē na filifili e tuuina a latou mea ma tagata o le Atua faivavega, o Ieova, o lē na sili lona malosi na i lo o atua uma o Aikupito. E ui lava i le tele o tulaga faigata, i nisi taimi mulimuli ane, sa oo ina iai pea lenei “vao tagata ese” e loto lelei agaʻi i tagata filifilia o Ieova, faatasi ma i latou i le vao mataʻutia o Sinai. (Esoto 12:37-51; Numera 11:4) Faatasi ai ma tagata Isaraelu, o lena vao o tagata ese e toatele na mautinoa lava ona ulu atu i le Nuu Folafolaina i lalo o le taʻitaʻiga a le sui o Mose, o Iosua, auā na faamaonia e le Atua e tatau ona faia sauniuniga i inā ona o na tagata ese.
16. (a) O ai na faaatagia e le vao o tagata ese e toatele? (e) O le ā e tatau ia i latou nei ona faia ina ia faasaoina ai i le iʻuga o lenei faiga?
16 O lena motu o tagata ese e toatele mai Aikupito faa-Farao na faaatagia ai se motu o tagata e toatele o le 20 senituri. E lē o i latou o ni Isaraelu faaleagaga, ae o isi mamoe a le Leoleo Mamoe Lelei, o Iesu Keriso. Faatasi ai ma le vaega totoe faauuina, ua latou vaavaai atu i luma i le faasaoina atoatoa mai le Aikupito faaata, le faiga o mea a le lalolagi lea o loo avea ai le Farao Sili, o Satani le Tiapolo, ma ona atua. (Ioane 10:16; 2 Korinito 4:4; Faaaliga 7:9) Ae o le ā e tatau ona latou faia ina ia faasaoina ai i le faaumatiaga sauā o le lalolagi a Satani ma ulu atu ai i le lalolagi fou folafolaina i lalo o le Iosua Sili, o Iesu Keriso? (2 Peteru 3:13) E tatau ona latou tausia ina ia ōgatasi ma fuafuaga faalefaalapotopotoga o le fatu o le faalapotopotoga vaaia a Ieova, le vaega totoe faauuina.
17. I lenei lalolagi lē maopoopo, ua faapefea ona gaoioi i latou o le motu o tagata e toatele, ma o le ā o latou vaavaai agaʻi atu i ai?
17 Ae maise lava talu mai le ogatotonu o le sefulu o tausaga lona fa o le luasefulu senituri na aumaia ai le motu o tagata e toatele o isi mamoe ina ia faapotopoto faatasi e avea o se lafu e tasi i lalo o le Leoleo Mamoe faamamaluina, le Tupu o loo pule, o Iesu Keriso. I totonu o se lalolagi o loo faaauau pea ona agaʻi atu ina faateleina le lē maopoopo e ui lava o loo iai le faalapotopotoga a Malo Aufaatasi, o i latou o lenei motu o tagata e toatele, latou te lagolago atu ma le loto atoa i le vaega totoe faauuina ma i lea ua avatu ai le faamaoniga o le mana e autasia ai o le agaga paia o Ieova. Ma le maumauai, ua tumau ai pea ona latou maopoopo faatasi ma le vaega totoe a o vaavaai atu i luma i le auaunaga faapitoa i luga o le lalolagi i le taimi o le Afe o Tausaga o le Pulega a Iesu Keriso.
O ā Ou Manatu?
◻ O le ā ua faaalia i le Tusi Paia e uiga i le taimi ma le natura o le Pulega Faa-Meleniuma a Iesu Keriso?
◻ O le ā e sili atu ona tāua na i lo o le faaolataga o le fanau a tagata?
◻ A o leʻi oo mai i o tatou aso (T.A.), o le ā le faalapotopotoga na avea o se vaega faalelalolagi o le faalapotopotoga faalevateatea a Ieova?
◻ Ua faapefea ia i latou na faaatagia e le vao o tagata ese e toatele ona faasaoina i le Pulega i le Afe o Tausaga?