Le Feʻau e Tatau Ona Tatou Folafolaina

‘IA MATATAʻU I LE ATUA MONI MA ANAANA I ANA POLOAIGA’

A O LEʻI taitai oo i le vaitaimi o Kerisiano, na fetalai ai Ieova i le tagata faamaoni o Aperaamo e uiga i se sauniuniga o le a manuia ai “atu nuu uma lava o le lalolagi.” (Kene. 22:18) Sa ia faagaeeina foʻi Solomona e tusi e faatatau i se mea tāua ua manaʻomia mai i tagata uma: ‘Ia matataʻu i le Atua moni ma anaana i ana poloaiga; auā o le mea lea e tatau i tagata uma ona fai.’ (Fai. 12:13) Ae e faapefea i tagata o loo soifua i atunuu uma ona aʻoaʻoina nei mea?

E ui ina sa iai pea ni nai tagata o ē na talitonu i le Afioga a le Atua i le faagasolo mai o taimi, a ua faaalia e le Tusi Paia, o le molimau silisili i le lalolagi aoao lea o le a aofia ai atunuu uma i le tala lelei sa tuu e faia i le “aso o le Alii.” Na amata lenei aso i le 1914. (Faaa. 1:10) E faatatau i lenā taimi, na valoia e le Faaaliga 14:6, 7 e faapea o le a faia se folafolaga tāua i lalo o le taʻitaʻiga faaagelu “i atunuu uma, ma ituaiga, ma gagana eseese ma nuu.” O le a uunaʻia i latou e faapea: “Ia . . . matataʻu i le Atua, ma avatu ia te ia le viiga, auā ua oo mai le itu aso o lana faamasinoga; ma ia outou ifo i le na faia le lagi, ma le fanua, ma le sami, atoa ma puna o vai.” O le finagalo lea o le Atua ia faaoo atu lenei feʻau. Ua iā i tatou le faaeaga o le faia o se sao i lenā galuega.

‘Le Atua Moni.’ Ina ua tulei mai Ieova e faapea, “o outou o aʻu molimau,” sa ia taʻua a o finauina le mataupu e uiga i lona tulaga tau Atua. (Isa. 43:10) O le feʻau lea e tatau ona momoliina atu ua lē tau ina faapea e ao i tagata ona iai sa latou lotu pe talitonu i se atua. Na i lo lenā, e manaʻomia ona tuu atu iā i latou le avanoa ina ia aʻoaʻo ai faapea o Lē na Foafoaina le lagi ma le lalolagi ua na o ia lava le Atua moni. (Isa. 45:5, 18, 21, 22; Ioa. 17:3) Ua na o le Atua moni lava e mafai ona valoia ma le faatuatuaina le lumanaʻi. O se faaeaga mo i tatou le faasino atu e faapea o le faataunuuga o afioga a Ieova i aso ua mavae e aumai ai se faavae mausalī mo le mautinoa, o mea uma ua ia folafola mai mo le lumanaʻi o le a faataunuuina.—Iosua 23:14; Isa. 55:10, 11.

O le mea moni, o le toʻatele o ē tatou te molimau atu i ai, e tapuaʻi i isi atua pe faapea mai e leai se atua o tapuaʻi i ai. Ina ia maua se tasi e faalogo mai, atonu e manaʻomia ona tatou amata i se mea e malilie faatasi i ai. E mafai ona aogā iā i tatou le faaaʻoaʻoga sa faamauina i le Galuega 17:22-31. Seʻi mātau, e ui sa faaaogā e le aposetolo o Paulo le tofā mamao, ae na ia taʻu atu ma le manino le nofoaitalafu o tagata uma i le Atua o Lē na Foafoaina le lagi ma le lalolagi.

Faalauiloaina o le Suafa o le Atua. Aua neʻi lē taulau ona faailoa atu le Atua i lona suafa. E fiafia Ieova i lona suafa. (Eso. 3:15; Isa. 42:8) O lona finagalo ia iloa e tagata lenā suafa. O ia na māfua ai ona faaaofia lona suafa mamalu i le Tusi Paia mo le sili atu i le 7,000 taimi. O la tatou avega tauave le faamasani o tagata i lenā suafa.—Teu. 4:35.

O faamoemoega mo le soifuaga i le lumanaʻi o tagata uma, e faalagolago lea i lo latou iloaina o Ieova ma valaau atu iā te ia i le faatuatua. (Ioe. 2:32; Mala. 3:16; 2 Tesa. 1:8) Ae peitaʻi, o le toʻatele o tagata latou te lē iloa Ieova. Ua aofia ai i lenā se aofaʻiga tele o ē faapea mai e tapuaʻi i le Atua o le Tusi Paia. E tusa pe iai sa latou Tusi Paia ma faitau i ai, atonu latou te lē o iloa le suafa o le Atua ona ua aveesea mai le tele o faaliliuga i aso nei. Na pau le mea ua masani ai nisi tagata ma le suafa o Ieova ona ua taʻu i ai e o latou taʻitaʻi lotu e aua le faaaogāina.

E mafai faapefea ona tatou faamasani tagata i le suafa o le Atua? E leai se isi mea e sili ona uigā na i lo le faailoa iā i latou mai le Tusi Paia—iā latou lava kopi pe a mafai ai. I nisi faaliliuga i isi gagana, e faitau afe taimi o loo aliali mai ai lenā suafa. I isi, atonu e na o le Salamo 83:18 po o le Esoto 6:3-6 o loo aliali mai ai, pe atonu e maua i faamatalaga pito i lalo o le Esoto 3:14, 15 po o le 6:3. I le tele o faaliliuga, ua suitulaga ai upu e sui aʻi, e pei o le “Alii” ma le “Atua” i mataʻitusi lapopoʻa pe afai o loo iai i se mau o le uluaʻi gagana le suafa totino o le Atua. I mea ua aveesea atoa ai e tagata faaliliu i aso nei le suafa o le Atua, atonu e manaʻomia ona e faaaogā se faaliliuga tuai o le Tusi Paia ina ia faailoa atu ai i tagata le mea ua faia e nei tagata faaliliu. I nisi atunuu, atonu e mafai ona e faasino atu le suafa tauatua mai pese faalelotu po o se mea ua tusia i se nofoaga faitele.

E oo foʻi iā i latou o ē tapuaʻi i isi atua, e mafai ona faaaogā ma le uigā i ai le Ieremia 10:10-13. E lē gata o loo taʻua ai le suafa o le Atua ae o loo faamatala manino ai foʻi po o ai o ia.

Aua le faaufiufia le suafa o le Atua ona o taʻu e pei o le “Atua” ma le “Alii”, e pei ona faia e lotu ua faapea mai o Kerisiano. E lē o le uiga o lea mea e faapea o le a faaaogā lava le suafa i le amataga o talanoaga uma. Ona o le lē fiafia mai, o le a faamuta ai e nisi tagata le talanoaga. Peitaʻi, a māeʻa ona faataatia le faavae mo se talanoaga, aua le matamuli e faaaogā le suafa tauatua.

O se mea e lelei ona mātauina e faapea ua faaaogāina e le Tusi Paia le suafa totino o le Atua e sili atu na i lo le aofaʻiga tuufaatasi o taimi o loo ia faaaogā ai taʻu e pei o le “Alii” ma le “Atua.” E ui i lea, sa leʻi taumafai tusitala o le Tusi Paia e faaaofia le suafa tauatua i fuaiupu uma. A ua latou faia i se auala masani, saʻoloto, ma le faaaloalo. O se faiga lelei lenā e mulimuli ai.

O Lē ua Mātauina i le Suafa. E ui ona o le iai o le suafa o le Atua o se upu moni tāua lea, ua na o se amataga lenā.

Ina ia mafai ona alofa iā Ieova ma valaau atu iā te ia i le faatuatua, e manaʻomia e tagata ona iloa le ituaiga o Atua e iai o ia. Ina ua faailoa atu e Ieova lona suafa iā Mose i le Mauga o Sinai, e tele mea na Ia faia na i lo le na ona toe taʻua o le upu “Ieova.” Na ia faauaʻi atu manatu i nisi o Ona uiga matilatila. (Eso. 34:6, 7) O se faaaʻoaʻoga lenā tatou te mulimuli i ai.

Pe e te molimau atu i se tagata naunau fou po o le taulimaina o lauga i le faapotopotoga, a e tautala atu e uiga i faamanuiaga o le Malo, ia faasino atu po o le ā ua faaalia e nei mea e uiga i le Atua o lē faia na folafolaga. A talanoa e uiga i ana poloaʻiga, ia faamamafa le atamai ma le alofa ua faaalia ai. Ia faamautinoa o mea o loo faafinagaloina e le Atua e lē o aumaia ai ni faigatā iā i tatou, na i lo lenā, ua fuafua ina ia aogā iā i tatou. (Isa. 48:17, 18; Mika 6:8) Faailoa atu po ua faapefea i faailoaga taʻitasi o le malosi o Ieova ona faaalia ai se mea e uiga i lona peresona, ana tapulaa, ma lana fuafuaga. Ia faauaʻi atu manatu i le paleni ua faailoa mai i le auala o loo faaalia ai e Ieova ona uiga. Ia lagona mai e tagata faaleoga o ou faalogona e uiga iā Ieova. O lou alofa mo Ieova e mafai ona fesoasoani e faatupu aʻe ai lenā alofa i isi.

O le feʻau faanatinati mo o tatou aso ua manaʻomia ai i tagata uma ona matataʻu i le Atua. I mea tatou te tautatala ai, e ao ona tatou saʻili e atiina aʻe lenā mataʻu faale-Atua. O lenei mataʻu o se mataʻu e mamā, o se ava iā Ieova, o se migao loloto mo ia. (Sala. 89:7) Ua aofia ai le amanaʻiaina o Ieova o ia o le Faamasino sili, ma o o tatou faamoemoega mo le olaga i le lumanaʻi e faalagolago i lo tatou mauaina o lana faamaoniga. (Luka 12:5; Roma 14:12) O lea, o lenā mataʻu, e ō faatasi ma le alofa loloto mo ia, o le a iʻu, i se faanaunauga malosi e faafiafiaina o ia. (Teu. 10:12, 13) O le mataʻu faale-Atua e uunaʻia ai foʻi i tatou ina ia ʻinoʻino i le leaga, usiusitai i poloaʻiga a le Atua, ma ia tapuaʻi iā te ia ma le loto atoatoa. (Teu. 5:29; 1 Nofo. 28:9, Faata. 8:13) E puipuia ai i tatou faasaga i le taumafai e auauna i le Atua ae toe manaʻo foʻi i mea a le lalolagi.—1 Ioa. 2:15-17.

Le Suafa o le Atua—“O le ʻOlo Malosi.” O tagata o ē ua iloa moni Ieova o loo iai i se puipuiga sili. E leʻi māfua lenei mea ona ua latou faaaogāina lona suafa totino pe e faapea foʻi e mafai ona latou taulotoina mai nisi o ona uiga. Ae ua māfua ona o lo latou faatuatuaina o Ieova lava ia. E faatatau iā i latou, ua taʻua i le Faataoto 18:10 e faapea: “O le suafa o Ieova, o le ʻolo malosi lea; e sola atu i ai lē amiotonu, ona sao ai lea o ia.”

Ia faaaogā lelei avanoa ina ia uunaʻia ai isi e faatuatuaina Ieova. (Sala. 37:3; Faata. 3:5, 6) O lenā faatuatuaina e faaalia ai le faatuatua iā Ieova ma ana folafolaga. (Epe. 11:6) Pe a ‘valaau tagata i le suafa o Ieova’ ona ua latou iloa o ia o le Pule Silisili Ese Aoao, e alolofa i ona ala, ma talitonu atoatoa ua na o ia e mafai ona maua ai le faaolataga, ona faasaoina loa lea o i latou—e pei ona faamautinoa mai e le Afioga a le Atua iā i tatou. (Roma 10:13, 14) A o e aʻoaʻoina isi, fesoasoani iā i latou ina ia atiina aʻe lenā ituaiga o faatuatua i vala uma o le olaga.

E toʻatele tagata ua lofituina i o latou faafitauli o loo latou fesagaʻia. Atonu ua latou lē iloa se vaifofō. Ia uunaʻia i latou e aʻoaʻo ala o Ieova, ia faatuatuaina o ia, ma ia faatatau mea ua latou aʻoaʻoina. (Sala. 25:5) Ia faalaeiau i latou e tatalo faatauanau mo le fesoasoani a le Atua ma faafetai atu iā te ia mo ana faamanuiaga. (Fili. 4:6, 7) Pe a oo ina latou iloa Ieova, e lē mai le na ona faitau i ni nai faamatalaga a le Tusi Paia ae faapea foʻi i le tofo i le faataunuuga o ana folafolaga i o latou lava olaga, o le a amata ai ona latou maua le saogalemu lea e sau mai le talisapaia moni o le mea e uiga i ai le suafa o Ieova.— Sala. 34:8; Iere. 17:7, 8.

Ia faaaogā lelei avanoa uma e fesoasoani ai i tagata e talisapaia le atamai o le mataʻu i le Atua moni, o Ieova, ma le tausia o ana poloaʻiga.

“MOLIMAU ATU E UIGA IĀ IESU”

INA ua mavae lona toetū mai ma a o lumanaʻi lona afio aʻe i le lagi, na avatu e Iesu Keriso faatonuga i ona soo, e faapea: “E fai foi outou ma molimau ia te au . . . e oo lava i le tuluʻiga o le lalolagi.” (Galu. 1:8) O auauna faamaoni a le Atua i o tatou aso, ua taʻua i latou o ē “o loo iai le galuega o le molimau atu e uiga iā Iesu.” (Faaa. 12:17, NW) O faapeʻī lou maelega e uiga i le avatuina o lenā molimau?

O le toʻatele o tagata o ē fai mai ma le faamaoni e talitonu iā Iesu, e augapiu ma so latou iloa e uiga i lona soifuaga muamua a o leʻi avea ma tagata. E latou te lē iloaina sa avea moni o ia ma tagata a o iai i le lalolagi. E latou te lē malamalama i le uiga moni o le avea o ia ma Alo o le Atua. E itiiti lava se mea ua latou iloa e uiga i lana matafaioi i le faataunuuga o le fuafuaga a le Atua. E latou te lē o iloa mea o loo ia faia i le taimi nei, ma latou te lē iloa le auala e aafia ai o latou olaga i mea o le a ia faia i le lumanaʻi. Atonu foʻi latou te manatu sesē faapea o Molimau a Ieova e lē talitonu iā Iesu. O lo tatou faaeaga la le taumafai ia faailoa atu upu moni e uiga i nei mataupu.

O loo iai pea isi tagata e lē talitonu faapea sa iai se tasi e pei o Iesu o loo faamatala i le Tusi Paia na soifua moni. O isi e manatu iā Iesu ua na o se tagata taʻutaʻua. E toʻatele e teena le manatu faapea o ia o le Alo o le Atua. O le “molimau atu e uiga iā Iesu” i le lotolotoi o na tagata e manaʻomia ai le tele o taumafaiga, le onosai ma le faautautaga.

E tusa lava po o le ā le vaaiga a lau ʻaufaalogologo, ae manaʻomia ona latou aʻoaʻoina le poto e uiga iā Iesu Keriso pe afai latou te fia maua sauniuniga a le Atua mo le ola e faavavau. (Ioa. 17:3) O le finagalo manino ua faaalia o le Atua, o tagata soifua uma lava e tatau ona ‘taʻutaʻu atu i le lautele o Iesu Keriso o le Alii lava ia’ ma e tatau ona gauaʻi atu i lana pule. (Fili. 2:9-11) O lea, e lē mafai ona tatou ʻalofia le mataupu pe a tatou feiloaʻi ma tagata o ē e iai manatu malolosi ae sesē pe matuā tetee mai. A o mafai i nisi tulaga ona tatou talanoa saʻoloto e uiga iā Iesu—e oo foʻi i a tatou uluaʻi asiasiga—ae i isi, atonu e manaʻomia ona tatou faia ni faamatalaga faautauta, o le a fesoasoani i la tatou ʻaufaalogologo ina ia amata ai ona mafaufau saʻo iā te ia. Atonu e manaʻomia ona tatou mafaufau i ala e faailoa atu ai vala faaopoopo o le mataupu i asiasiga o loo lumanaʻi. Peitaʻi, atonu e lē mafai ona talanoa i mea uma o loo aofia ai, seʻia oo ina tatou faia se suʻesuʻega faale-Tusi Paia ma se tagata.—1 Timo. 2:3-7.

Le Tulaga Tāua o Iesu i le Fuafuaga a le Atua. E manaʻomia ona tatou fesoasoani i tagata ina ia iloa e faapea, talu ai o Iesu “o le ala” ma ‘e le alu atu lava se tasi i le Tamā seʻi vaganā ua ui atu iā te ia,’ e lē mafai la ona maua se faiā faamaonia ma le Atua e aunoa ma le faatuatua iā Iesu Keriso. (Ioa. 14:6) Seʻi vaganā lava ua iloa e se tagata le matafaioi tāua ua tofia atu e Ieova i lona Alo ulumatua, e lē mafai ona malamalama i le Tusi Paia. Aiseā? Auā ua tofia e Ieova lenei Alo e fai ma tagata autū i le faataunuuina o Ana fuafuaga uma. (Kolo. 1:17-20) O le mea lenei o loo faaautū i ai valoaga a le Tusi Paia. (Faaa. 19:10) O Iesu Keriso o ia lea e ala mai ai le vaifofō ua saunia mo faafitauli uma lava sa lāgā i le fouvalega a Satani ma le agasala a Atamu.—Epe. 2:5-9, 14, 15.

Ina ia talisapaia le matafaioi a Iesu, e tatau i se tagata ona amanaʻia o loo iai le fanau a tagata i se tulaga faanoanoa lea e lē mafai ona faasaʻoloto mai ai. O i tatou uma lava ua fananau mai i le agasala. O lenei mea atonu e āfaina ai i tatou i ni auala eseese i le gasologa o o tatou olaga. Peitaʻi, pe vave mai pe tuai, e iʻu lava i le oti. (Roma 3:23; 5:12) Ia fetufaaʻi i lenā manatu ma i latou o loo e molimau atu i ai. Ona faasino atu lea faapea e ala i le taulaga togiola a Iesu Keriso, ua mafai ai e Ieova ona saunia ma le alofa se laveaʻiga mai le agasala ma le oti mo i latou o ē faaalia le faatuatua i lenā sauniuniga. (Mare. 10:45; Epe. 2:9) O lenei auala o le a tatala ai le avanoa mo i latou ina ia maua le ola e faavavau i se tulaga lelei atoatoa. (Ioa. 3:16, 36) E lē mafai lava ona maua i se isi auala. (Galu. 4:12) I le avea o se faiaʻoga, pe o e iai na o oe pe o e i le faapotopotoga, ia faia e sili atu na i lo le tau ina taʻua o nei mea moni. Ia atiina aʻe i le agalelei ma le faapalepale i lau ʻaufaalogologo se lagona o le lotofaafetai, mo le matafaioi a Keriso lo tatou Togisala. O le talisapaia o lenei sauniuniga e mafai ona iai se taaʻiga malosi i uiga, amio ma sini i le olaga o se tagata.—2 Kori. 5:14, 15.

O le mea moni, e na o le faatasi ona foaʻiina mai e Iesu lona soifua e fai ma taulaga. (Epe. 9:28) Peitaʻi, o loo ia auauna nei ma le malosi o se Ositaulaga Sili. Ia fesoasoani i isi ina ia malamalama i le uiga o lenā mea. Po o fesagaʻi ea i latou ma omiga, faanoanoaga, mafatiaga, po o faafitauli ona o le agaleaga o tagata o loo siʻomia ai i latou? A o avea Iesu ma tagata, sa oo iā te ia nei mea uma. Ua ia silafia o tatou lagona. Ona o le lē lelei atoatoa, po o tatou lagona ea le manaʻoga mo le alofa mutimutivale o le Atua? A tatou tatalo i le Atua mo le faamagaloga e faavae i le taulaga a Iesu, e gaoioi Iesu o se ‘fesoasoani faatasi ma le Tamā.’ I le tigā alofa, o loo “fautua [ai] foi o ia mo i tatou.” (1 Ioa. 2:1, 2; Roma 8:34) E faavae i le taulaga a Iesu ma e ala i lana auaunaga o se Ositaulaga Sili, ua mafai ai ona tatou faalatalata atu i le “nofoalii o le alofa tunoa” o Ieova ina ia maua lana fesoasoani i le taimi tatau. (Epe. 4:15, 16) E ui e tatou te lē o lelei atoatoa, a o le fesoasoani ua saunia e Iesu o se Ositaulaga Sili ua mafai ai ona tatou auauna i le Atua ma se lotofuatiaifo mamā.—Epe. 9:13, 14.

E lē gata i lea, e telē le pule ua faatinoina e Iesu i le avea o lē na tofia e le Atua e fai ma Ulu o le faapotopotoga Kerisiano. (Mata. 28:18; Efe. 1:22, 23) Ona o lea tulaga, ua ia saunia ai taʻiala manaʻomia e ōgatasi ma le finagalo o le Atua. Pe a e aʻoaʻoina isi, ia fesoasoani iā i latou ina ia malamalama o Iesu Keriso, ae lē o se tagata, o le Ulu o le faapotopotoga. (Mata. 23:10) I lau uluaʻi feiloaʻiga ma tagata fiafia, ia valaaulia i latou i sauniga a le faapotopotoga i lo latou vaipanoa, lea o loo tatou suʻesuʻeina ai le Tusi Paia faatasi ma le fesoasoani a mataupu ua saunia mai e le “auauna faamaoni ma le mafaufau.” E lē gata i le faamatalaina iā i latou po o ai le “auauna” ae po o ai foʻi le Matai, ina ia latou iloa ai le tulaga ulu o Iesu. (Mata. 24:45-47) Ia faafeiloaʻi atu i latou i toeaina, ma faamatala agavaa faale-Tusi Paia e tatau ona ausia e i latou nei. (1 Timo. 3:1-7; Tito 1:5-9) Ia faailoa atu o le faapotopotoga e lē pule ai toeaina, ae latou te fesoasoani iā i tatou ina ia savavali i tulagāaao o Iesu Keriso. (Galu. 20:28; Efe. 4:16; 1 Pete. 5:2, 3) Ia fesoasoani i nei tagata fiafia ina ia latou iloa o lea ua faamaopoopo i le lalolagi aoao se sosaiete o loo faagaoioia i lalo o le tulaga ulu o Keriso.

I Evagelia, ua tatou aʻoaʻoina ai e faapea ina ua ulu atu Iesu i Ierusalema a o toeitiiti oo i lona maliu, sa alalaga lona ʻausoo e faapea o ia o “le tupu o loo maliu mai i le suafa o [Ieova]”! (Luka 19:38) A o loloto atili le suʻesuʻe a tagata i le Tusi Paia, o le a latou iloa ai ua tuuina atu e Ieova iā Iesu le faatagaga e pule ai, lea o le a aafia ai tagata o atunuu uma. (Tani. 7:13, 14) Pe a faia au lauga i le faapotopotoga pe taulima ni suʻesuʻega, ia atiina aʻe le talisapaia mo mea o le a uiga i ai le pulega a Iesu mo i tatou uma.

Ia faamamafa e faapea o le auala o loo tatou ola ai e faaalia ai po o tatou talitonu moni o Iesu Keriso o le Tupu ma po o tatou lotomalilie e gauaʻi atu i lana pulega. Ia faamatilatila le galuega sa tofia e Iesu ona soo e fai, ina ua uma ona faauuina o ia o se Tupu. (Mata. 24:14; 28:18-20) Ia iloilo mea na fetalai i ai Iesu, le Faipule [“Ofoofogia,” NW], e faatatau i mea e ao ona faamuamua i le olaga. (Isa. 9:6, 7; Mata. 6:19-34) Ia faauaʻi atu manatu i le agaga o fetalaiga a le Perenise o le Filemu, lea e ao i ona soo ona faaalia. (Mata. 20:25-27; Ioa. 13:35) Ia faaeteete aua e te faamasino fua po o faia e isi mea e sili atu na i lo mea e ao ona latou faia, ae faalaeiau i latou ina ia iloilo mea o loo faaalia mai e a latou gaoioiga e uiga i lo latou gauaʻi i le tulaga tau tupu o Keriso. A o e faia faapea, ia e iloa e manaʻomia foʻi ona e faia lenā mea.

Le Avea o Keriso ma Faavae. Ua faatusa e le Tusi Paia le galuega o le faia o se soo Kerisiano i le fauina o se fausaga i luga o Iesu Keriso e fai ma faavae. (1 Kori. 3:10-15) Ina ia taulau lenei mea, fesoasoani i tagata ina ia iloa Iesu e pei ona faamatala ai i le Tusi Paia. Ia faaeteete ia aua neʻi o latou vaai iā te oe o lē e ao ona mulimuli ai. (1 Kori. 3:4-7) Ia faauaʻi atu o latou manatu iā Iesu Keriso.

Afai sa lelei ona faataatia le faavae, o le a malamalama la tagata suʻesuʻe, na tuu e Keriso se faaaʻoaʻoga mo i tatou ina ia “mulimuli atu i ona tulagāaao.” (1 Pete. 2:21) E faaopoopo atu i lenā, ia faalaeiau tagata aʻoga e faitau i Evagelia, ua lē na o ni talafaasolopito moni ae o se auala e mulimuli ai. Ia fesoasoani iā i latou ina ia utagia manatu ma uiga sa tu matilatila ai Iesu. Ia faalaeiau i latou e uaʻi totoʻa i le auala sa manatu ai Iesu e uiga i lona Tamā, le auala sa ia onosaia ai faaosoosoga ma tofotofoga, le auala sa ia faaalia ai le gauaʻi i le Atua, ma le auala sa ia feutagaʻi ai ma tagata i lalo o tulaga eseese. Ia faamamafa le galuega na faaalu uma ai e Iesu lona soifuaga. Ma pe a fesagaʻi ma filifiliga ma tofotofoga i le olaga, o le a fesili ifo se tagata suʻesuʻe iā te ia lava: ‘O le ā o le a faia e Iesu i lenei tulaga? Pe o le a faaalia ea i loʻu olaga le lotofaafetai e tatau ai mo mea ua ia faia mo aʻu?’

Pe a e tautala atu i luma o le faapotopotoga, aua e te manatu faapea talu ai ua faatuatua ou uso iā Iesu, o le a lē manaʻomia ai ona faauaʻi faapitoa atu iā te ia. O mea o loo e taʻua o le a sili atu ona uigā pe afai e te ati aʻe i le faatuatua lenā. Pe a e tautala e uiga i sauniga, ia faafesootaʻi atu lenei ma le matafaioi a Iesu o le Ulu o le faapotopotoga. Pe a e talanoa i le faiva i le fanua, ia faauaʻi atu manatu i le agaga sa faaalia e Iesu a o ia faatinoina lana faiva, ma ia taulima le faiva e tusa ai o mea o loo faia e Keriso o se Tupu, i le aoaoina o tagata mo le faasaoina atu i le lalolagi fou.

Ua manino mai e sili atu mea e manaʻomia na i lo le na ona aʻoaʻoina o manatu masani e uiga iā Iesu. Ina ia avea ma Kerisiano moni, e tatau i tagata ona faaalia le faatuatua iā te ia ma alolofa moni iā te ia. O lenā alofa e uunaʻia ai ina ia usiusitai ma le faamaoni. (Ioa. 14:15, 21) E mafai ai e tagata ona tumau mausalī i le faatuatua i lalo o tulaga ogaoga, ia faaauau ai ona savavali i tulagāaao o Keriso i aso uma o o latou olaga, ma faamaonia ai o i latou o ni Kerisiano taʻumatuaina o ē ua matuā “mauaa ma faavaeina.” (Efe. 3:17) O lenā ituaiga o olaga e avatu ai le viiga iā Ieova, le Atua ma o le Tamā o Iesu Keriso.

“LENEI TALA LELEI O LE MALO”

I LE saunia o faamatalaga auʻiliʻili e faatatau i le faailoga o lona faatasi mai ma le faaiʻuga o le faiga o mea, na valoia e Iesu e faapea: “E talaʻiina atu foi lenei tala lelei o le malo i le atu laulau uma, e fai ma molimau i nuu uma; ona oo mai ai lea o le gataaga.”—Mata. 24:14.

O le ā moni lava lenei feʻau e ao ona matuā faailoa atu i le lautele? E faatatau lea i le Malo sa aʻoaʻoina e Iesu i tatou ina ia tatalo atu ai i le Atua, e faapea: “Ia oo mai lou malo.” (Mata. 6:10) Ua faamatalaina i le Faaaliga 11:15 e faapea “o le malo . . . a lo tatou Alii [Ieova] ma lona Keriso” auā o le faatagaga o le pule e mai iā Ieova ma ua faaee atu i luga o Keriso o se Tupu. Peitaʻi, seʻi mātau, o le feʻau lea na fetalai Iesu o le a folafolaina i o tatou aso, e sili mamao atu na i lo le mea sa talaʻia e ona soo i le uluaʻi senituri. Na latou taʻu atu i tagata e faapea: “Ua latalata ia te outou le malo o le Atua.” (Luka 10:9) I lenā taimi sa iai i lo latou lotolotoi Iesu, lē ua faauuina e fai ma Tupu. Ae pei ona faamauina i le Mataio 24:14, na valoia e Iesu le folafolaina i le lalolagi aoao o se isi taualumaga tāua i le faataunuuga o le fuafuaga a le Atua.

Sa avatu i le perofeta o Tanielu se faaaliga o lenei taualumaga. Na ia vaaia “Lē e pei o le Atalii o le tagata,” o Iesu Keriso, ua ia maua mai “Lē ua mai anamua ona aso,” o Ieova le Atua, “le pule, ma le viiga, ma le malo, ina ia auauna ia te ia o nuu uma, ma atu nuu, ma gagana eseese.” (Tani. 7:13, 14) O lenā mea iloga i le vateatea aoao na tupu lea i le lagi i le tausaga e 1914. Mulimuli ane, ona lafo ifo lea o le Tiapolo ma ana temoni i le lalolagi. (Faaa. 12:7-10) Sa faapea ona ulu atu ai le faiga tuai o mea i ona aso e gata ai. Ae a o leʻi aveesea atoatoa, o loo avatu se folafolaga i le lalolagi atoa e faapea ua pule nei le Tupu faa-Mesia a Ieova mai lona nofoalii i le lagi. Ua faailoa atu lenei mea i tagata uma lava i so o se nofoaga. O le latou tali mai e faamaonia ai lo latou uiga agaʻi i Lē Silisili Ese o le Pule i “malo o tagata.”—Tani. 4:32.

Ioe, e tele isi mea e oo mai—e mātua tele lava! O loo tatou tatalo pea, “Ia oo mai lou malo,” ae e lē o iai se manatu e faapea o loo lumanaʻi pea le faavaeina o le Malo o le Atua. Na i lo lenā, o loo iai le manatu o le a gaoioi le Malo faalelagi i se auala tuusaʻo ina ia faataunuu ai valoaga e pei o le Tanielu 2:44 ma le Faaaliga 21:2-4. O le a ia suia le lalolagi i se parataiso e tumu i tagata o ē alolofa i le Atua ma o latou uso ā tagata. A o tatou talaʻia “lenei tala lelei o le malo,” o faamanuiaga na i le lumanaʻi tatou te taulaʻi atu i ai. Ae tatou te faailoa atu foʻi ma le mautinoa e faapea, ua māeʻa ona tuu atu e Ieova le faatagaga atoa i lona Alo e pule ai. Po o e faamamafaina ea lenei tala lelei pe a e molimau atu e uiga i le Malo?

Faamatalaina o le Malo. E mafai faapefea ona tatou faataunuuina lo tatou tofiga ina ia faasilasila le Malo o le Atua? E mafai ona tatou faagaeeina le fiafia e ala i le amata o ni talanoaga i mataupu eseese, peitaʻi e ao ona vave faamanino atu e faapea o la tatou feʻau, o loo faatatau lea i le Malo o le Atua.

O se vala tāua o lenei galuega e aofia ai le faitau ma le sii atu o mau o loo faasino i le Malo. Pe a e faasino i le Malo, ia faamautinoa ua malamalama i ai i latou o ē o loo e talanoa i ai. Atonu e sili atu e manaʻomia na i lo le tau ina faapea atu o le Malo o le Atua o se pulega. O nisi tagata atonu e faafaigatā ona mafaufau i se mea e lē o vaaia o se pulega. E mafai ona e fefulisaʻi ma i latou i ni auala eseese. Mo se faaaʻoaʻoga, e lē vaaia le kalave, ae e iai sona aafiaga malosi i o tatou olaga. E lē mafai ona tatou vaai i Lē na faia tulafono o le kalave, ae e manino o loo iā te ia se malosiaga tele. O loo taʻua o ia e le Tusi Paia o “le Tupu o le vavau.” (1 Timo. 1:17) Pe e mafai foʻi ona e fai atu e faapea i se atunuu telē, e toʻatele tagata e leʻi oo lava i le laumua pe vaai tino i lo latou taʻitaʻi. E latou te iloa nei mea e ala i lipoti o tala fou. I se auala faapena, ua taʻu mai ai iā i tatou e le Tusi Paia, lea ua lolomia i gagana e sili atu i le 2,200, e uiga i le Malo o le Atua; ua na faailoa mai foʻi iā i tatou lē ua tuu atu i ai le pule ma le mea o loo faia e le Malo. O Le Olomatamata, lea ua lolomia i gagana e sili atu na i lo se isi lava lomiga, ua tuutoina i le “Faasilasilaina le Malo o Ieova,” e pei ona lomia i le faavaa i luma.

Ina ia fesoasoani i tagata ia malamalama i le Malo, e mafai ona e taʻua nisi o mea o loo latou mananaʻo e saunia e faigāmalo: le saogalemu tau tamaoaiga, le filemu, le saʻolotoga mai solitulafono, le feutagaʻi ma le lē faailoga tagata ma vaega uma o ituaiga, o aʻoaʻoga, ma le tausia o le soifua mālōlōina. Ia faailoa atu ua na o le Malo o le Atua o le a faamalieina atoatoa nei mea, atoa ai ma isi faanaunauga lelei uma o le fanau a tagata.—Sala. 145:16.

Ia taumafai e faagaee se faanaunauga i tagata ina ia avea ma tagatānuu o le Malo, lea o le a pule ai Iesu Keriso o se Tupu. Faasino atu i vavega sa ia faia, o ni faaataga o mea o le a ia faia o se Tupu faalelagi. Ia talanoa e lē aunoa i uiga matagofie sa ia faaalia. (Mata. 8:2, 3; 11:28-30) Faamatala atu e faapea sa ia foaʻiina mai lona ola mo i tatou ma mulimuli ane, sa toe faatūina e le Atua o ia i se olaga e ola pea i le lagi. O inā o loo pule mai ai o ia o se Tupu.—Galu. 2:29-35.

Ia faamamafa e faapea ua pule nei le Malo o le Atua mai le lagi. Peitaʻi, ia manatua o le toʻatele lava o tagata, e leʻi oo i tulaga o loo latou mafaufauina e fai ma faamaoniga o lenā pule. Ia ioeina lenā mea, ma fesili atu i ai po ua latou iloa le mea na fetalai ai Iesu Keriso o le a fai ma ona faamaoniga. Faamatilatila nisi o vala o le faailoga tuufaatasi o loo maua i le Mataio mataupu e 24, Mareko mataupu e 13, po o le Luka mataupu e 21. Ona fesili lea pe aiseā o le a oo mai ai nei tulaga i le lalolagi ona o le faanofotupuina o Keriso i le lagi. Ia faauaʻi atu manatu i le Faaaliga 12:7-10, 12.

I le avea o se faamaoniga moni o mea o loo faia e le Malo o le Atua, faitau le Mataio 24:14, ma faamatala le polokalame i le lalolagi atoa, o aʻoaʻoga faale-Tusi Paia o loo faia nei. (Isa. 54:13) Taʻu atu i tagata ia aʻoga eseese o loo maua ai e Molimau a Ieova aogā—e faavae uma i le Tusi Paia, e faia e aunoa ma se totogi. Faamatala atu faapea, e faaopoopo i la tatou faiva i lea fale ma lea fale, ua tatou ofo atu foʻi aʻoaʻoga i le Tusi Paia e fai fua i aiga, i tagata taʻitoʻatasi ma aiga i atunuu e sili atu i le 230. O iai ea se faigāmalo e mafai ona saunia lenā ituaiga o polokalame tau aʻoaʻoga ua faasalafa atu e lē gata i ona tagatānuu ae mo tagata i le lalolagi uma? Ia valaaulia tagata ina ia ō mai i le Maota o le Malo, ia auai i fonotaga ma tauaofiaga a Molimau a Ieova, seʻi vāai i faamaoniga i le auala ua aafia ai olaga o tagata i na aʻoaʻoga.—Isa. 2:2-4; 32:1, 17; Ioa. 13:35.

Ae pe o le a iloa ea e le tagata o le aiga po ua faapefea i lona lava olaga ona aafia ai? E mafai ona e faailoa atu i ai ma le faautauta faapea, o le fuafuaga o lau asiasiga o le talanoaina lea o le avanoa ua tatala mai i tagata uma, ina ia filifili ai i le ola ma avea o ni tagatānuu o le Malo. E faapefea? E ala i le aʻoaʻoina o mea ua manaʻomia e le Atua ma ola e ōgatasi ma na mea i le taimi nei.—Teu. 30:19, 20; Faaa. 22:17.

Fesoasoani i Isi ia Faamuamua le Malo. E tusa po ua māeʻa ona talia e se tagata le feʻau o le Malo, o loo iai filifiliga e tatau ona ia faia. O le ā le tele o le a ia faamuamua ai le Malo o le Atua i lona lava olaga? Na uunaʻia e Iesu ona soo ia ‘muaʻi saili pea le malo.’ (Mata. 6:33) E mafai faapefea ona tatou fesoasoani i uso Kerisiano ina ia faia lenā mea? I le faataatia lea o se faaaʻoaʻoga lelei e i tatou lava ma i le talatalanoa i avanoa o loo iai. I nisi taimi, e ala i le fesili pe ua iloilo e se tagata nisi o mea e mafai ona fai ma e ala i le fetufaaʻi o mea na tutupu e faaalia ai mea o loo faia e isi. I le talatalanoa i tala a le Tusi Paia i lenei auala o le a faapea ona faaloloto ai le alofa o se tasi mo Ieova. I le faamamafaina o le moni o le Malo. I le faamamafa o le tāua o le galuega o le folafolaina o le Malo. O le mea silisili ona lelei e masani ona fai, e lē i le taʻu atu i tagata o le mea e manaʻomia ona fai, ae i le faagaee iā i latou o se faanaunauga ia faia.

E aunoa ma se masalosalo, o le feʻau e matuā tāua lea e tatau iā i tatou uma ona folafola atu, o loo muaʻi taulaʻi atu iā Ieova le Atua, Iesu Keriso, ma le Malo. O upu moni tāua la e faatatau i ai, e ao ona faamamafa i le tatou molimau atu i le lautele, i a tatou faapotopotoga, ma i o tatou olaga totino. Pe a tatou faia lenā mea, ua tatou faaalia ai o loo tatou maua moni aogā mai la tatou Aʻoga o le Faiva Faatiokarate.