Fesili Mai le Au Faitau
I Le Olomatamata o Aokuso 15, 1996, ua faapea mai se faamatalaga o i ai: “I le vaega faaiu o le puapuaga tele, ‘o tagata’ ua faapea ona sosola atu i le itu a Ieova o le a faasaoina.” Po o fautuaina mai ai ea i lena manatu e faapea pe a maeʻa le uluai vaega o le puapuaga tele, e toatele ē fou o le a ō atu i le itu a le Atua?
E lē o le manatu lena na faatatau atu i ai.
O fetalaiga a Iesu o loo faamauina i le Mataio 24:22 o le a iai i sona faataunuuga autū i le lumanai i se faasaoina e ala mai i le uluai vaega o le puapuaga tele o loo fotuai mai, le osofaiga lea i lotu. Ua faapea mai lena mataupu: “Ia manatua o ‘tagata,’ o le vaega totoe faauuina ma le ‘motu o tagata e toatele,’ ua uma ona faasaoina pe a faafuasei ona faaumatia atoatoa Papelonia le Aai Tele i le vaega amata o le puapuaga tele.”
O i latou na e faamaoni o le a lē toe i ai i se tulaga matautia pe a gaoioi Iesu ma lana ʻau faalelagi i le vaega faaiu o le puapuaga tele. Ae o ai i latou o le a faasaoina i lena vaega o le puapuaga tele? Ua faaalia i le Faaaliga 7:9, 14 e faapea o se motu o tagata e toatele o loo iai le faamoemoe e ola i le lalolagi o le a faasaoina. Ae faapefea Kerisiano ua faauuina i le agaga? O “Fesili mai le Au Faitau o loo iai i le Watchtower o Aokuso 15, 1990, sa talanoaina ai le mafuaaga e lē mafai ai ona tatou maumauai i le taimi o le a aveina aʻe ai le vaega totoe faauuina i le lagi. O lea la, i le mataupu talu ai nei o i le (Aokuso 15, 1996), o loo faapena foi ona lē o faapatino mai ai se taimi, o loo taʻua ai se faamatalaga faalauaitele e faapea: “E faapena foi i le vaega faaiu o le puapuaga tele, o ‘tagata’ ua sosola atu i le itu a Ieova o le a faasaoina.”
Ae i le mataupu pe faamata e toe i ai ni ē fou o le a mafai ona toe aʻoaʻoina le upu moni ma ō atu i le itu a le Atua ina ua mavae le amataga o le puapuaga tele, seʻi mātau fetalaiga a Iesu o loo tusia i le Mataio 24:29-31. Pe a mavae le pa mai o le puapuaga tele, o le a aliali mai ai le faailoga o le Atalii o le tagata. Na fetalai Iesu e faapea o le a tau faitagituʻi ituaiga uma o le lalolagi ma faanoanoa. Sa ia lei fetalai lava faapea ua oo ina iloa e tagata le mea ua tupu, ua salamō, ō atu i le itu a le Atua, ma avea ma soo moni.
I se tulaga tutusa, i le faataoto i mamoe ma oti, e faaali mai le Atalii o le tagata ma i se tulaga tau faamasinoga ua ia tuueseeseina ai tagata e faavae i mea na latou faia po mea latou te leʻi faia i taimi ua mavae. E lei taʻua lava e Iesu se mea e faatatau i tagata o ē ua leva ona faaalia uiga pei ni ʻoti ae ua faafuasei lava ona liliu ma avea ma mamoe. E afio mai o ia e faamasino e faavae i uiga ua uma ona faamaonia ai le ituaiga tagata e iai i latou.—Mataio 25:31-46.
Peitai, i lenei foi tulaga, e leai foi se mafuaaga tatou te maumauai ai e tusa i lenei manatu. O tagata o le Atua e aofia ai ē faauuina ma le motu o tagata e toatele, ua latou iloa mea e ao ona latou faia i le taimi nei—o le talaʻi ma fai ma soo. (Mataio 28:19, 20; Mareko 13:10) O le taimi tonu lenei mo i tatou e ave ai i fale le faalaeiauga e faapea: “O lenei foi, o i matou o faigaluega faatasi ma ia, ua matou aioi atu ia te outou, ina neʻi talia fua e outou le alofa tunoa o le Atua. Auā ua faapea mai o ia, O le tausaga e talia ai na ou faalogo ai ia te oe, o le aso foi e faaolaina ai na ou fesoasoani ai ia te oe. Faauta, o lenei le tausaga e talileleia mai ai; faauta, o lenei le aso e faaolaina ai.”—2 Korinito 6:1, 2.