Faasaoolaina Mai le Puapuaga Tele
“O i latou ia o e o mai nai le puapuaga tele, ua ta foi o latou ofu, ma ua faasinasinaina o latou ofu i le toto o le Tamai mamoe.” —FAAALIGA 7:14.
1. O ai o le a faafeiloaia ē ua faatutuina mai i le toetu faalelalolagi?
PE A toe faatutuina mai le lē mafaitaulia o miliona o ʻē amiotonu ma ē amioletonu,’ o le a lē toe faatutuina mai i latou i le ola i se lalolagi e gaogao. (Galuega 24:15) O le a alafaʻi mai i latou i se siomaga ua matagofie ona faaleleia, ma mea e nonofo ai, o lavalava, ma le anoanoai o meataumafa ua saunia mo i latou. O ai o le a faia nei sauniuniga uma? E manino lava, o le a iai tagata e soifua pea i le lalolagi fou a o leʻi amataina le toetu faalelalolagi. O ai i latou? Ua faailoa mai e le Tusi Paia e faapea o i latou ia o le a faasaoina i le puapuaga tele. O le faasaoina o nisi o ē faamaoni mai le puapuaga tele ma o le a lē oo lava i ai le oti, e mautinoa lava o se aʻoaʻoga aupito sili lea ona faaosofia i ai le naunau na i lo isi aʻoaʻoga uma o i le Tusi Paia. O lenei faamoemoe ua matuā faamaonia e le Tusi Paia.
E Pei o Ōna Po o Noa
2, 3. (a) O le ā le faatusatusaga tutusa ua faia i ōna po o Noa ma ō tatou taimi? (e) O le ā ua faasino atu i ai le faasaoina o Noa ma lona aiga mai le Lolo?
2 I le Mataio 24:37-39, na faia ai e Iesu Keriso se faatusatusaga i ōna po o Noa ma vaitaimi o le iuga, lea o loo tatou ola ai nei. Na ia fetalai e faapea: “A e pei o ona po o Noa, e faapea foi pe a sau le Atalii o le tagata. Auā e pei ona faia i ona po a o lei oo le lolo, ua latou aai ma inu, ua latou fai avā foi ma faaavaga, ua oo lava i le aso na ulu atu ai Noa i le vaa, na le iloa foi e i latou ina seia oo le lolo, ma aveesea i latou uma; e faapea foi pe a sau le Atalii o le tagata.”
3 Na tafiesea e le Lolo mai le lalolagi i latou uma na lē faalogo i le feau lapatai a le Atua. E ui i lea, sa leʻi tafiesea ai Noa ma lona aiga. Na latou “ulu atu . . . i le vaa,” e pei ona fetalai i ai Iesu. Ona o lo latou tuutoina i le Atua, na saunia ai e Ieova se ala e faasaoina ai i latou. Ua faasino atu le 2 Peteru 2:5, 9 i le faasaoina o Noa ma lona aiga ina ua faapea mai: “Na o Noa lē talaʻi le amiotonu, o lona toavalu lea na faaolaina [e le Atua], ina ua au mai le lolo i le lalolagi faalematau. Ua silafia e le Alii se mea e laveai mai ai i e amio Atua ai le tofotofoga.” Na faia e Iesu se faatusatusaga i ōna po o Noa ma vaitaimi o le iuga ina ia faaalia ai e toatele tagata o le a lē talia le feau lapatai a le Atua. E ui i lea, i lona faia faapea, ua ia faamautinoa mai ai foi e faapea na usiusitai Noa ma lona aiga i a Ieova le Atua, ma ulu atu i le vaa ma faasaoina ai mai le Lolo tele. O le faasaoina o Noa ma lona aiga ua faasino atu i le faasaoina o auauna faamaoni a le Atua i le iuga o lenei lalolagi.
Le Ata Mai i le Uluai Senituri
4. I le faataunuuina o fetalaiga a Iesu, o ā mea na tutupu na tataʻi atu ai i le faatafunaina o Ierusalema i le 70 T.A.?
4 Na fetalai foi Iesu i mea e tutupu i le iuga o lenei lalolagi. I le Mataio 24:21, 22, tatou te faitau ai e faapea: “Auā o ia ona po e oo ai le puapuaga tele, e leai sona tusa talu le amataga o le lalolagi, ua oo lava i ona po nei; e le toe faapea foi amuli. A le faapuupuuina foi ia aso, e le faaolaina se tasi; a e faapuupuuina ia aso ona o e ua filifilia.” Na iai se faataunuuga muamua o nei upu i le uluai senituri o ō tatou Aso Taatele. I le 66 T.A., na vagaia ai le aai o Ierusalema e autau a Roma i le taitaiga a Cestius Gallus. Na oo atu fitafita Roma i se tulaga na latou faaleagaina ai pa o le malumalu, ma e toatele tagata Iutaia sa nofosauni e lolo atu. E ui i lea, i se tulaga e leʻi faatalitalia, ma e foliga mai e aunoa ma se mafuaaga, na toe aveesea mai ai e Cestius Gallus āna fitafita. Ina ua iloa ua toe tuumuli ʻau a Roma, na gaoioi loa Kerisiano e tusa ma afioga a Iesu na fetalai i ai i le tele o tausaga a o lumanai lea mea: “A iloa e outou ua siosiomia Ierusalema i ʻau o le taua, ia outou iloa i lea aso ua latalata lona faatafunaina. O lea aso, o e ua i Iutaia ia latou sosola i mauga; o e ua i totonu o lea aai, ia latou o ese; o e ua i le vao foi, aua neʻi latou o atu i totonu o le aai.” (Luka 21:20, 21) O tagata Iutaia na liliu i le Faa-Kerisiano, o ē na filifilia, na latou tuua faavavevave loa le aai ua faamalaiaina o Ierusalema ma na faasaoina ai mai le faatafunaga matautia e leʻi umi ae faaoo atu i ōna luga. I le 70 T.A., na toe foi atu ai autau a Roma i lalo o le taitaiau o Tito. Sa latou siosiomia Ierusalema, vagaia le aai, ma faatafunaina.
5. O le ā le mafuaaga na faapuupuu ai le puapuaga tele i Ierusalema i le 70 T.A.?
5 Na faamatala mai e se tagata tusitala Iutaia i talafaasolopito o Josephus e faapea, e 1,100,000 Iutaia na maliliu, ae 97,000 na faasaoina ma na ave faatagataotauaina. O i latou ia o Iutaia e lē o ni Kerisiano na faasaoina na mautinoa lava sa lē avea ma “e ua filifilia” o le valoaga a Iesu. Na fetalai atu Iesu i le nuu fouvale o Iutaia e faapea: “Faauta, ua tuua lo outou fale, e faatafunaina. Auā ou te fai atu ia te outou, tou te le toe iloa mai aʻu, seia outou fai mai, Ia manuia lē maliu mai i le suafa o le Alii [“Ieova,” NW].” (Mataio 23:38, 39) E lē o iai se faamaumauga e faapea na talia faafuasei e Iutaia ia sa faaputuputu i totonu o Ierusalema ia Iesu o le Mesia, ma avea ma Kerisiano, ma maua ai le finagalo lelei o Ieova. E ui i lea, na faapuupuuina le puapuaga tele lea na oo i a Ierusalema i le 70 T.A. O le vagaia mulimuli e autau a Roma sa leʻi alu ai se taimi umi. Na faatagaina e lenei mea nisi o Iutaia ina ia faasaoina ai, ae i le aauina atu i vaega eseese o le Emepaea o Roma o ni pologa.
Le Motu o Tagata e Toatele ua Faasaoina
6, 7. (a) O le ā le aai tele faalelotu e leʻi faaumatiaina, o se vaega o le ā le puapuaga tele e leʻi faapea ona iai muamua? (e) O le ā na valoia e Ioane e tusa ai ma le puapuaga tele o fotuai mai i lenei lalolagi?
6 A o mautinoa sa avea le faaumatiaga i le 70 T.A. o Ierusalema ma “puapuaga tele” i lena aai faalelotu, ae o le faataunuuga sili o fetalaiga a Iesu, e leʻi oo ina faataunuuina. O se aai tele faalelotu, o Papelonia le Aai Tele, le emepaea o lotu sese, o le a oo i ai se puapuaga tele e faafanoina ai, ona sosoo ai lea ma se puapuaga e leʻi faapea ona iai muamua i vaega uma o le faiga o mea a Satani. (Mataio 24:29, 30; Faaaliga 18:21) Pe tusa ma le 26 tausaga talu ona mavae le faaumatiaga o Ierusalema, na tusi faatatau atu ai le aposetolo o Ioane i le Faaaliga 7:9-14, e uiga i lea puapuaga tele o faamalumalu mai i le lalolagi aoao. Na ia faaalia ai e faapea, e iai se motu o tagata e toatele o le a faasaoina mai ai.
7 O nei tagata ua faasaoina, ua taʻua o le “motu o tagata e toatele,” ua iloaina i latou ona o ni gaoioiga mautinoa ua latou faia. E tusa ai ma le Faaaliga 7:14, na faapea atu ai se tasi o toeaina mai i toeaina e 24 i le lagi i a Ioane: “O i latou ia o e o mai nai le puapuaga tele, ua ta foi o latou ofu, ma ua faasinasinaina o latou ofu i le toto o le Tamai mamoe.” Ioe, e alalaga atu le motu o tagata e toatele i a Ieova o le puna o lo latou faaolataga. Ua latou faaalia le faatuatua i le toto faamaligiina o Iesu, ma ua iai i se tulaga tauamiotonuina i luma o Lē na Foafoaina i latou ma lana Tupu tofia o Iesu Keriso.
8. O le ā le faiā lelei o loo iai i le va o le “motu o tagata e toatele” ma ē o totoe o uso faauuina o Iesu?
8 I aso nei, toetoe lava lima miliona sui o le motu o tagata e toatele o loo i lalo o le taitaiga ola a le Tupu faalelagi o Iesu Keriso. O loo gauai atu i latou i a Keriso faatasi ai ma le mafuta vavalalata atu i ōna uso faauuina o loo totoe pea i le lalolagi. Na fetalai Iesu e faatatau i le tausiga e tuuina atu e le motu o tagata e toatele i a i latou nei faauuina e faapea: “E moni, ou te fai atu ia te outou, auā na faia e outou i le tasi o e aupito itiiti o oʻu uso nei, o aʻu lea na outou faia i ai.” (Mataio 25:40) Talu ai sa latou tuuina atu ma le lē manatu faapito le fesoasoani i uso faauuina o Keriso, ua faamasinoina ai le motu o tagata e toatele e faapea ua latou faia ni mea lelei i a Iesu lava ia. Ua fesoasoani lea i a i latou ina ia iai se faiā mautu ma Iesu Keriso ma Ieova le Atua. Ua latou maua se faaeaga e aufaatasi atu ai i le vaega totoe faauuina i le avea ma Molimau a le Atua ma o ē e tauaveina lona suafa.—Isaia 43:10, 11; Ioelu 2:31, 32.
Tumau i le Mataala
9, 10. (a) O le ā e ao ona tatou faia ina ia tausia ai lo tatou tulaga taʻuamiotonuina i luma o le Atalii o le tagata? (e) E tatau faapefea ona tatou gaoioi ina ia tumau i le “mataala e le aunoa”?
9 E tatau i le motu o tagata e toatele ona tausisia lo latou tulaga taʻuamiotonuina ma le lē faavaivai i luma o le Atalii o le tagata, lea e manaomia ai le tumau i le mataala seia oo lava i le iuga. Na taʻua ma le manino e Iesu lenei mea ina ua ia fetalai e faapea: “Ia outou, neʻi mafatia o outou loto i le soona ulavale, ma le onā, ma le popole i mea a le olaga nei, neʻi faafuasei mai lea aso ia te outou e pei o se mailei; auā e oo mai ai i e nonofo uma lava i le fogāeleele uma. O lea ia outou mataala e le aunoa ma tatalo ina ia outou maua le malosi e sao mai ia mea uma ua tāli oo mai, ma ia tutū i luma o le Atalii o le tagata.”—Luka 21:34-36.
10 Ina ia taulau ona tutū i luma o le Atalii o le tagata, e tatau ona talia mai i tatou e ia, ma o le a lē mafai ona tatou mauaina pe afai tatou te faatagaina le taaina o i tatou e mafaufauga o lenei lalolagi. E faatosina tele mafaufauga o le lalolagi ma e mafai ona faavalea ai se tasi ina ia pupū atu i fiafiaga o le tino po o le soona popole tele i faafitauli o le olaga ma ua ia lē toe faamuamua ai manaoga o le Malo. (Mataio 6:33) O sea laasaga e faavaivaia faaleagaga ai le tagata ma e mafai ona tuua ai o ia i se tulaga faalemautinoa e tusa ai ma ōna tiute tauave i le Atua ma isi. E mafai ona avea ai o ia ma sē e lē toe talaʻi po o le faaleagaina foi o lona tulaga i le faapotopotoga i le faia lea o se agasala matuia, atonu i le faaalia o se agaga lē salamō. O tagata taitoatasi o le motu o tagata e toatele e tatau i a te ia lava ona mataala. E ao ona vavae ese o ia mai i lenei lalolagi e lē mataʻu i le Atua ma āna faiga.—Ioane 17:16.
11. O le faatatauina o ā mataupu silisili mai le Tusi Paia o le a fesoasoani e faasaoina ai i tatou i a Amaketo?
11 Ina ia faia faapea, ua saunia ai e Ieova mea tatou te manaomia e ala mai i lana Afioga, lona agaga paia, ma lana faalapotopotoga vaaia. E ao ona tatou faaaogaina ma le tatau nei mea. E faaopoopo atu i ai, e ao ona tatou tatalo ma usiusitai i le Atua pe afai tatou te faatalitalia lona finagalo alofa mai. O se tasi o mea, e tatau ona tatou atiina aʻe se matuā ʻinoʻino i mea leaga. Na faapea mai le faisalamo: “Ou te lei nofo faatasi ma tagata ulavavale; ou te lei alu faatasi ma tagata pepelo. Ua ou ʻinoʻino i le faapotopotoga o e fai mea leaga; ou te le nofo foi faatasi ma tagata amio leaga. Aua neʻi e faatasia aʻu ma tagata agasala, ma loʻu ola neʻi faatasi ma tagata ua totolima.” (Salamo 26:4, 5, 9) I le faapotopotoga Kerisiano, o ē talavou ma ē matutua e manaomia ona faatapulaaina le aumea atu i a i latou e leʻi tuuina atu i a Ieova. Ina ia talia mai e le Atua, tatou te taumafai e tausia le lē matauleagaina ma le lē ponā mai le lalolagi. (Salamo 26:1-5; Iakopo 1:27; 4:4) I le faia faapea, o le a tatou mautinoa ai le lē tafiesea o i tatou e Ieova i le oti faatasi ai ma ē faalematau i le Atua i a Amaketo.
O Nisi o le a “Le Oti Lava”
12, 13. (a) A o leʻi faatuina Lasalo, o ā upu na fetalai i ai Iesu sa lē atoatoa ona malamalama i ai Mareta? (e) O le ā na lē uiga i ai fetalaiga a Iesu e faapea, ʻo le a lē oo lava le oti’ i nisi?
12 O se faamoemoe faamaniti tino le faasaoina mai le iuga o lenei faiga o mea ma faatasi ai ma le avanoa o le lē oo i ai o le oti. O le faamoemoe lenei na faataoto mai e Iesu mo i tatou. A o leʻi faatuina lana uo pele o Lasalo, na fetalai atu faapea Iesu i le tuafafine o Lasalo o Mareta: “O aʻu nei o le toe tu ma le ola; o lē faatuatua mai ia te au, e ui lava ina oti, a e ola lava ia. O tagata ola uma o e faatuatua mai ia te au, e le oti lava e oo i le faavavau; po ua e talitonu mai ea i lena mea?” Na talitonu Mareta i le toetu ae sa leʻi malamalama o ia i mea uma ia na fetalai i ai Iesu.—Ioane 11:25, 26.
13 Sa leʻi faauiga faapea e Iesu o le a feola pea ōna aposetolo faamaoni i le tino ma o le a lē oti lava. I se tulaga tuufaafeagai, na ia faailoa mulimuli ane o le a feoti ōna soo. (Ioane 21:16-23) E mautinoa lava, o le faauuina o i latou e le agaga paia i le Penetekoso i le 33 T.A., o lona uiga e tatau ona maliliu i latou ina ia maua ai lo latou tofi faalelagi o ni tupu ma ositaulaga. (Faaaliga 20:4, 6) O lea, a o mavae atu le taimi, na maliliu uma ai lava Kerisiano o le uluai senituri. Peitai ane, na iai se fuafuaga na ala ai ona fetalaia e Iesu upu na ia taʻua. O āna fetalaiga e uiga i le lē oti lava o nisi, o le a faataunuuina.
14, 15. (a) O le a faapefea ona faataunuuina fetalaiga a Iesu e faapea o nisi ʻe lē oti lava’? (e) O le ā le tulaga o lenei lalolagi, ae o le ā le faamoemoe o loo iai i ē amiotonu?
14 O se tasi o mea, o Kerisiano faamaoni faauuina o le a lē taitai lava oo i ai le oti e faavavau. (Faaaliga 20:6) E lē gata i lea, e faatatau fetalaiga a Iesu i se vaitaimi patino pe a faalaa mai le Atua i mataupu a tagata ma o le a aveesea ai le amioleaga i le lalolagi, e pei lava ona sa ia faia i ōna po o Noa. O ē faamaoni o faia le finagalo o le Atua i lea taimi o le a lē oti i latou i gaoioiga tau faamasinoga a le Atua. Na i lo lea, o le a maua le avanoa e faasaoina ai mai le faaumatiaga o le lalolagi, e pei o Noa ma lona aiga. O lea faamoemoe e mausali, e faavae i aʻoaʻoga a le Tusi Paia ma faaataina mai e ala i faaaoaoga. (Faatusatusa i le Eperu 6:19; 2 Peteru 2:4-9.) O le faataunuuina o le valoaga a le Tusi Paia ua faaalia ai o le lalolagi o iai nei e faia aʻe i le sosaiete o tagata amioleaga ua toe o se aga ona muta lea i le faaumatiaga. Ua matuā lē mafai lava ona toe suia le tulaga o iai nei, auā ua tumu le lalolagi i le amioleaga. O le mea na fetalai i ai le Atua i ōna po o Noa ua faapena foi ona moni i le lalolagi i aso nei. Ua faatumulia loto o le toatele o tagata i le leaga, ma ua leaga foi ō latou manatu i taimi uma lava.—Kenese 6:5.
15 Ua faataga pea e Ieova tagata e pulea le lalolagi mo le tele o senituri e aunoa ma se faalavelave mai i ai o le Atua, peitai ua utiuti tele lo latou taimi o totoe. Ua lē pine ona tafiesea lea e Ieova le amioleaga uma mai le lalolagi, e pei lava ona fai mai ai le Tusi Paia. (Salamo 145:20; Faataoto 2:21, 22) E ui i lea, o le a na lē faaumatia faatasi ai ē amiotonu ma ē amioleaga. E leʻi faia lava e le Atua se mea faapea! (Faatusatusa i le Kenese 18:22, 23, 26.) Aisea o le a ia faaumatia ai fua i latou o loo taumafai e auauna atu ma le faamaoni ma matataʻu atu i a te ia? O se mea talafeagai i a i latou o tapuai ma le faamaoni i a Ieova, o ola pea pe a amata le puapuaga tele, ona mauaina le finagalo alofa i fofoga o le Atua ma lē faaumatia ai, e pei lava ona lē faaumatiaina o Noa ma lona aiga ina ua oo atu le lalolagi amioleaga o ōna vaitaimi i se iuga malaia. (Kenese 7:23) O le a latou maua le puipuiga mai le Atua ma o le a faasaoina i le iuga o lenei lalolagi.
16. O ā mea ofoofogia o le a tutupu i le lalolagi fou, ma o le ā le uiga o ia mea mo ē faasaoina?
16 Ona ā lea? I le lalolagi fou, o faamanuiaga e faamaloloina ai o le a oo atu i tagata a o faatatauina atoatoa aogā o le taulaga togiola a Iesu. Ua taʻua faafaatusa e le Tusi Paia se “vaitafe manino o le vai o le ola, e manino e pei o le maa tioata, ua tafe ifo mai le nofoālii o le Atua ma le Tamai Mamoe. O i le moa o lona ala tele ma itu taitasi o le vaitafe le laau o le ola, o loo fua mai i fuata e sefulu ma le lua, e taitasi le masina ma fua mai ai lona fuata; o lau foi o le laau e faamalolo ai nuu.” (Faaaliga 22:1, 2) E ofoofogia le faapea atu o le “faamalolo” e aofia ai le manumalo mai le oti na tuufaasolo mai i a Atamu! “E faaumatia e ia le oti e faavavau; e soloiesea foi e le Alii o Ieova o loimata i mata uma lava.” (Isaia 25:8) O lea, o i latou o ē faasaoolaina atu nai le puapuaga tele i totonu o le lalolagi fou e lē manaomia ona oo i ai le oti!
O se Faamoemoe Mautinoa
17. O le ā le mautinoa o le faamoemoe o le a faasaoina nisi mai i a Amaketo, ma o le a “le oti lava e oo i le faavavau”?
17 Pe e mafai ona tatou mautinoa atoatoa lenei faamoemoe ofoofogia? E matuā mautinoa lava! Na faailoa atu e Iesu i a Mareta e faapea o le a iai le taimi e ola ai tagata e lē oo i ai le oti. (Ioane 11:26) E faaopoopo atu i ai, i le Faaaliga mataupu e 7 lea na avatu e Iesu i a Ioane, na faaali atu ai se motu o tagata e toatele ua sao mai le puapuaga tele, ua faasaoolaina mai ai. Pe e mafai ona tatou talitonu i a Iesu Keriso ma le tala faamaumauina o le Lolo i le vaitaimi o Noa? E matuā aunoa ma se masalosalo i ai! E lē gata i lea, ua i le Tusi Paia tala o isi mea na tutupu ia na faasaoolaina ai e le Atua āna auauna i vaitaimi o le faamasinoga o atunuu ma lo latou faatoilaloina. Pe o le a itiiti ea le faatalitalia o ia na te faia faapea i lenei taimi o le iuga? Pe e iai ea se mea e faigata i Lē na Foafoaina Mea?—Faatusatusa i le Mataio 19:26.
18. Ua faamautinoa mai faapefea i a i tatou le mauaina o le ola i le lalolagi fou a Ieova?
18 O le auauna atu ma le faamaoni i a Ieova i le taimi nei, ua faamautinoa mai ai i a i tatou le mauaina o le ola e faavavau i lana lalolagi fou. Mo le faitau miliona e lē mailoa o tagata, o le a mafai ona faamautinoa le mauaina o le ola e faavavau i lena lalolagi fou e ala i le toetu. Ae i ō tatou vaitaimi, e faitau miliona tagata o Ieova—ioe, o se motu o tagata e toatele e lē mafaitaulia e se tasi—ua iai se faaeaga tutasi o le faasaoina nai le puapuaga tele. Ma o le a lē taitai lava ona oti i latou.
Faamatala mai Faamolemole
◻ Na faaatagia mai faapefea i ōna po o Noa le faasaoina i a Amaketo?
◻ O le ā e ao ona tatou faia ina ia faasaoina ai i tatou pe a afio mai Iesu e faaoo mai faamasinoga a Ieova?
◻ Aisea e mafai ai ona tatou fai atu o ē faasaoina mai i a Amaketo e “le oti lava e oo i le faavavau”?
[Ata i le itulau 15]
Sa sosola ese Kerisiano mai le puapuaga i Ierusalema