“Pe se a foi le Faailoga o lou Faatasi Mai?”
“Pe oo afea ia mea? pe se a foi le faailoga o lou faatasi mai, ma le faaiuga o le faiga o mea?”—MATAIO 24:3, NW.
1, 2. O le ā e faaalia ai le naunau o tagata e fia iloa le lumanai?
O LE tele o tagata ua naunau e fia iloa le lumanai. Ae ā oe? I lana tusi o le Future Shock, na tusi ai e le polofesa o Alvin Toffler “le faafuasei ona tele o faalapotopotoga ua tuutoina atu e suesueina le lumanai.” Na ia faaopoopo mai: ‘Ua tatou vaaia le faavaeina o faalapotopotoga mo le suesueina o le poto maoae ma faafitauli i le lumanai; le aliai mai o mekasini ua iai faamatalaga mo le lumanai i Egelani, Falani, Italia, Siamani, ma le Iunaite Setete; le tele o aʻoaʻoga a iunivesite ua valoia ai le lumanai.’ Na faaiu mai Toffler: “O le mea moni, e leai se isi na te ‘iloa’ atoatoa le lumanai.”
2 Ua faapea mai le tusi o le Signs of Things to Come: “O le faitauina o alofilima, le pulatoa i se polo lētioata, o valovaloga i fetu, le faitauina o pepa o le pelē, I Ching, o na mea uma o ni poto maoae, a lē faigata ua faigofie, e aumaia ai ia i tatou se manatu i le mea o le a tupu i lo tatou lumanai.” Ae na i lo o le liliu atu i na taumafaiga a tagata, e sili ona lelei mo i tatou le vaai atu i se puna ua faamaonia—o Ieova.
3. Aisea ua talafeagai ai le vaai atu i le Atua mo le poto e uiga i le lumanai?
3 Na fetalai mai le Atua moni e faapea: “E pei ona ou manatu e faapea lava ona taunuu, e pei ona aʻu pule e faapea lava ona faatumauina.” (Isaia 14:24, 27; 42:9) Ioe, ua mafai ona fautua mai Ieova i tagata i mea o le a tutupu, ma e masani ona ia faaaogāina tagata e fai ma fofoga fetalai e faaleoina atu ai valoaga. Na tusia e se tasi o nei perofeta e faapea: “E le faia lava se mea e le Alii o Ieova, a e faaalia lona finagalo i ana auauna o perofeta.”—Amosa 3:7, 8; 2 Peteru 1:20, 21.
4, 5. (a) Aisea ua mafai ai ona avea Iesu ma fesoasoani e tusa ai o le lumanai? (e) O le ā le fesili e tele ona vala lea na fai e le au aposetolo?
4 O Iesu Keriso o le uluai perofeta silisili lea a le Atua. (Eperu 1:1, 2) Seʻi tatou uai atu i se tasi o valoaga autū a Iesu ua valoia ai mea o loo tutupu i lo tatou siosiomaga i le taimi nei. Ua aumai foi e lenei valoaga ia i tatou le malamalamaga saʻo i mea ua toeitiiti ona tutupu lea a o faaiuina le faiga leaga o mea, ae suia e le Atua i se lalolagi parataiso.
5 Sa faamaonia e Iesu, o ia o se perofeta. (Mareko 6:4; Luka 13:33; 24:19; Ioane 4:19; 6:14; 9:17) Ua malamalama ai la i le mafuaaga na fesiligia ai o ia e ona aposetolo e uiga i le lumanai a o nofo o ia i luga o le Mauga o Olive ma tagatagai atu i Ierusalema, e faapea: “Pe oo afea ia mea? pe se a foi le faailoga o lou faatasi mai, ma le faaiuga o le faiga o mea?”—Mataio 24:3, NW; Mareko 13:4.
6. O le ā le faiā i le va o le Mataio 24, Mareko 13, ma le Luka 21; ma o le ā le fesili e ao ona tatou matuā naunau i ai?
6 O le a e iloa la latou fesili ma le tali i ai a Iesu, i le Mataio mataupu e 24, Mareko mataupu e 13, ma le Luka mataupu e 21.a E tele vala e fesootai ai na faamatalaga, ae e lē tutusa. O se faaaoaoga, e na o Luka ua taʻua ai ‘faamaʻi i lea mea ma lea mea.’ (Luka 21:10, 11; Mataio 24:7; Mareko 13:8) Ae i se uiga talafeagai, e ao ona tatou fesili, Pe sa valoia ea e Iesu mea e tutupu i le na o le vaitaimi o lana aufaalogologo, pe sa ia faaaofia ai ma o tatou aso, ma mea o le a tutupu i le lumanai?
Na Fia Iloa e le Au Aposetolo
7. O le ā le mea na patino i ai le fesili a le au aposetolo, ae o le ā le mamao sa aofia i le tali a Iesu?
7 I ni nai aso a o leʻi fasiotia Iesu, na ia folafola ai le lafoaia e le Atua o Ierusalema, le aai laumua o tagata Iutaia. O le a faaumatia le aai ma lona malumalu sili. Ona fesiligia lea e nisi o le au aposetolo se ‘faailoga o le faatasi mai o Iesu ma le faaiuga o le faiga o mea.’ (Mataio 23:37–24:3) O le mea moni, sa faaautu o latou manatu i le faiga o mea faa-Iutaia ma Ierusalema, auā latou te leʻi malamalama i le uiga o le mea o le a tupu i le lumanai. Ae i lana tali ia i latou, sa silasila mamao ai Iesu i mea na tutupu seia oo i le 70 T.A. ma e aofia ai foi le taimi lea na faaumatia ai e autau a Roma Ierusalema.—Luka 19:11; Galuega 1:6, 7.
8. O ā nisi o mea tutupu na valoia e Iesu?
8 A o e faitau i tala a Evagelia e tolu, na fetalai ai Iesu i le sii o le taua e le tasi nuu i le tasi nuu, ma le tasi malo i le tasi malo, o oge, o mafuie, o vaaiga taufaamatau, o faailoga i le lagi. I tausaga i le va o le taimi na avatu ai e Iesu lena faailoga (i le 33 T.A.) ma le faatafunaina o Ierusalema (i le 66-70 T.A.), sa aliae ai perofeta pepelo ma Keriso pepelo. Sa avatu e Iutaia sauaga i Kerisiano, o ē sa talaʻiina le feau a Iesu.
9. Na faapea ona iai le faataunuuga o le valoaga a Iesu i le uluai senituri T.A.?
9 Sa tutupu moni nei vala o le faailoga, e pei ona faamautinoa ai e le tusitala o talafaasolopito o Flavius Josephus. Ua ia tusia e faapea, a o leʻi osofai Roma, na faatupuina ai e Mesia pepelo se fouvalega. Sa iai mafuie matautia i Iutaia ma isi nofoaga. Sa tauina foi taua i vaega e tele o le Emepaea o Roma. Pe sa iai ni oge tetele? Ioe, o le mea moni lena. (Faatusatusa i le Galuega 11:27-30.) Ae ā le galuega talaʻi o le Malo? I le 60 po o le 61 T.A., ina ua tusia le tusi o Kolose, sa matuā salalau ai i Aferika, Asia, ma Europa “le faamoemoe o i le tala lelei” o le Malo o le Atua.b—Kolose 1:23.
“ONA OO MAI AI LEA” o le Gataaga
10. Aisea e ao ai ona tatou matauina le upu Eleni o le toʹte, ma o le ā lona faatatauina?
10 I nisi vaega, sa taʻua ai e Iesu mea tutupu i se faasologa o taimi na tutupu ai. Na ia fetalai e faapea: “E talaʻiina atu foi lenei tala lelei o le malo . . . ona oo mai ai lea o le gataaga.” Ua masani ona faaaogā i Tusi Paia faa-Peretania le upu “ona” i se uiga faigofie e faapea “o lea” po o le “ae.” (Mareko 4:15, 17; 13:23) Peitai, i le Mataio 24:14, o loo faavae aʻe ai le “ona” i le soaveape faa-Eleni o le toʹte.c Ua faamatala e tagata popoto i le faa-Eleni e faapea, o le toʹte o se “soaveape e faataitaia mai ai le taimi” sa faaaogā “e faailoa mai ai le mea o le a oo mulimuli mai i le faagasologa o le taimi” po o “le faatomua mai ai foi o se mea o sosoo mai.” O lea, na valoia ai e Iesu le talaʻiga o le Malo ona oo mai ai lea (‘pe a mavae lena’ po o, ‘mulimuli ane’) “o le gataaga.” O lē fea gataaga?
11. Na faapefea ona taulai saʻo atu manatu o Iesu i mea tutupu na e fesootai ma le faaumatiaga o Ierusalema?
11 O le tasi o faataunuuga o le valoaga a Iesu e mafai ona iloa i mea tutupu ia na agaʻi atu i le iuga o le faiga o mea faa-Iutaia. O taua, mafuie, oge, ma isi mea na valoia e Iesu, na tutupu i se vaitaimi e sili atu i le tolusefulu tausaga. Ae e amata mai i le Mataio 24:15, Mareko 13:14, ma le Luka 21:20, ua tatou faitau ai i mea sa tutupu a o latalata le faaumatiaga, a o i faitotoa le iuga.—Mātau le laina o loo togitogi lena e faaalia i le faasologa.
12. Na faapefea ona aafia autau a Roma i le faataunuuga o le Mataio 24:15?
12 I se tali atu i le fouvalega a tagata Iutaia i le 66 T.A., na ō atu ai autau a Roma sa taitaia e Cestius Gallus i Ierusalema ma siomia lenei aai sa manatu i ai tagata Iutaia e paia. (Mataio 5:35) E ui i ni osofaiga mai tagata Iutaia e tetee atu ai, ae sa ō atu faamalosi autau a Roma i totonu o le aai. O le auala lena na latou amata ai ona “tu i le mea paia,” ua moni lea e pei ona valoia e Iesu i le Mataio 24:15 ma le Mareko 13:14. Ona tupu lea o se mea na faateia ai. E ui ina latou siosiomia le aai, ae na faafuasei ona toe solomuli autau a Roma. Na vave ona matauina e Kerisiano le faataunuuga o le valoaga a Iesu, ma na avea lea toe solomuli ma avanoa na latou sosola ese ai loa mai Iutaia ma agaʻi atu i mauga e sopoia ai le Ioritana. Ua taʻua mai e talafaasolopito lo latou faia faapea.
13. Aisea na mafai ai e Kerisiano ona latou utagia le lapataiga a Iesu ina ia sosola ese?
13 Ae afai na toe solomuli autau a Roma mai le siomiaina o Ierusalema, aisea la na manaomia ai e se tasi ona sola ese? Ua faaalia i upu a Iesu, o mea na tutupu sa iloa ai ‘le lata ane o le faatafunaga o Ierusalema.’ (Luka 21:20) Ioe, o le faatafunaga. Na ia valoia ‘se puapuaga tele sa leʻi tupu lava i le amataga ma o le a lē toe tupu foi i se isi taimi.’ Pe tusa o le tolu ma le ʻafa tausaga mulimuli ane i le 70 T.A., na oo moni ai ia Ierusalema le “puapuaga tele” mai autau a Roma i le taitaiga a le Taitaiau o Tito. (Mataio 24:21; Mareko 13:19) Ae aisea la na faamatala ai e Iesu lenei mea o se puapuaga e sili lona matautia na i lo o se isi lava puapuaga sa iai muamua pe i se isi foi taimi mulimuli ane?
14. Aisea e mafai ai ona tatou faapea atu, o le mea na tupu i Ierusalema i le 70 T.A. o se “puapuaga tele” sa leʻi tupu muamua lava ma e leʻi toe tupu foi i se isi taimi?
14 Na vetea Ierusalema e tagata Papelonia i le 607 T.L.M., ma sa vaaia e le aai, taua matautia i le senituri o loo tatou ola ai. Peitai, o le mea na tupu i le 70 T.A. sa avea o se puapuaga tele e tutasi. I se tauiviga pe tusa o le lima masina, na faatoilaloina ai tagata Iutaia e fitafita a Tito. Na latou fasiotia ai pe tusa o le 1,100,000, ae ave faatagataofaatauaina le tusa ma le 100,000. E lē gata i lea, na faaumatia e autau a Roma Ierusalema. O lenei mala na faamaonia ai ua faaiuina e faavavau le faiga tau tapuaiga faa-Iutaia lea sa faaautu i lo latou malumalu. (Eperu 1:2) Ioe, o mea na tutupu i le 70 T.A. e mafai ona manatu i ai ma le saʻo e faapea, o le ‘puapuaga tele lea sa leʻi tupu lava [i lena aai, lena malo, ma lena faiga o mea] talu le amataga o le lalolagi, o le a lē toe tupu lava i se isi taimi.’—Mataio 24:21.d
E Pei ona Valoiaina, e Tele Mea o le a Sosoo Mai
15. (a) O ā mea na valoia e Iesu o le a tutupu, pe a mavae le puapuaga tele i Ierusalema? (e) E tusa ai ma le Mataio 24:23-28, o le ā la tatou faaiuga e tusa ai ma le faataunuuga o le valoaga a Iesu?
15 Peitai, sa leʻi faatapulaaina e Iesu lana valoaga o le puapuaga tele i le uluai senituri. Ua faaalia i le Tusi Paia e faapea, e tele mea na sosoo mai ai i lena puapuaga tele, e pei ona faaalia mai i le faaaogāina o le toʹte, po o le “ona oo mai ai lea,” i le Mataio 24:23 ma le Mareko 13:21. O le ā o le a tupu i le vaitaimi pe a mavae le 70 T.A.? Ina ua mavae le puapuaga tele o le faiga o mea faa-Iutaia, sa aliai mai le toatele o isi Keriso pepelo ma perofeta pepelo. (Faatusatusa le Mareko 13:6 i le 13:21-23.) Ua faamautinoa mai i talafaasolopito e faapea, o nei ituaiga o tagata na aliai mai i le gasologa o senituri talu mai le faaumatiaga o Ierusalema i le 70 T.A., e ui lava latou te leʻi taitaiseseina tagata o ē na maua se vaaiga manino faaleagaga, ma o ē na vaavaai atu mo “le faatasi mai” o Keriso. (Mataio 24:27, 28) Ae peitai, o nei mea na tutupu ina ua mavae le puapuaga tele o le 70 T.A. ua aumaia ai se tasi o faailoaga e faapea sa silasila mamao Iesu i tala atu o lena puapuaga tele, lea sa na o se faataunuuga amata.
16. O le ā le vala ua faaopoopo e le Luka 21:24 i le valoaga a Iesu, ma o le ā le faatatauga ua iai i lenei mea?
16 Afai tatou te faatusatusa le Mataio 24:15-28 ma le Mareko 13:14-23 i le Luka 21:20-24, tatou te maua ai se faailoaga lona lua e iloa ai sa faalautele atu le valoaga a Iesu i tala atu o le faaumatiaga o Ierusalema. Ia manatua, e na o Luka lava na ia taʻua faamaʻi. Ua na o ia foi na faaiuina lenei vaega o le valoaga i fetalaiga nei a Iesu: “E solia foi Ierusalema e nuu ese, seia faaiuina tausaga o nuu ese [“taimi o Nuuese,” King James Version].”e (Luka 21:24) Sa aveesea e Papelonia le tupu mulimuli o Iutaia i le 607 T.L.M., ma ina ua mavae lena, ona solia ai lea o Ierusalema, lea na fai ma sui o le Malo o le Atua. (2 Tupu 25:1-26; 1 Nofoaiga a Tupu 29:23; Esekielu 21:25-27) I le Luka 21:24, na faailoa mai ai e Iesu faapea o le a faaauau pea lenei tulaga e oo atu i le lumanai seia oo i le taimi e toe faavae ai e le Atua se Malo.
17. O le ā le faailoaga lona tolu ua ia i tatou e iloa ai e faatatau atu foi le valoaga a Iesu i le lumanai?
17 O le faailoaga lona tolu lenei e iloa ai sa faasino atu foi Iesu i se faataunuuga i le lumanai: E tusa ai ma le Tusi Paia, sa tatau ona maliu le Mesia ma toe faatuina mai, ona nofo ai lea o ia i le itu taumatau o le Atua seia oo ina auina atu o ia e le Tamā e faatinoina le manumalo. (Salamo 110:1, 2) Sa taʻua foi e Iesu lava ia lona nofo ai i le itu taumatau o lona Tamā. (Mareko 14:62) Na faamautinoa mai e le aposetolo o Pauro e faapea, o Iesu lea na toe faatuina sa iai o ia i le itu taumatau o Ieova e faatalitali ai mo le taimi e avea ai ma Tupu ma Faaoosala a le Atua.—Roma 8:34; Kolose 3:1; Eperu 10:12, 13.
18, 19. O le ā le sootaga ua faia e le Faaaliga 6:2-8 i le valoaga lea e tutusa i ai Evagelia?
18 Mo le iloaina o le faailoaga lona fa, ma o le faailoaga faaiu foi e iloa ai o loo faatatauina le valoaga a Iesu e uiga i le faaiuga o le faiga o mea i tala atu o le uluai senituri, e mafai ona tatou suʻe i le Faaaliga mataupu e 6. I ni tusitusiga na faia i le faitau sefulu tausaga talu ona mavae le 70 T.A., na faamatala ai e le aposetolo o Ioane se vaaiga faagaeetia o ni tagata tietie solofanua o loo matuā gaoioi. (Faaaliga 6:2-8) O lenei vaaiga faavaloaga “i le aso o le Alii”—le aso o lona faatasi mai—ua mataulia ai lo tatou 20 o senituri o se taimi o taua mataina (fuaiupu 4), le matuā salalau atu o oge (fuaiupu 5 ma le 6), ma le “oti” (fuaiupu 8). E manino lava, e tutusa lenei ma le mea na taʻua e Iesu i Evagelia, ma e faamaonia ai, o lana valoaga e iai sona faataunuuga e sili atu i lenei ‘aso o le Alii.’—Faaaliga 1:10.
19 Ua ioe tagata popoto, o le faailoga tuufaatasi lea na valoia i le Mataio 24:7-14 ma le Faaaliga 6:2-8 ua iloatino mai talu ona pa le taua a le lalolagi i le 1914. Ua folafola e Molimau a Ieova i le lalolagi atoa le iai nei o le faataunuuga lona lua ma o le sili foi lea o le valoaga a Iesu, e pei ona faamaonia i taua sauā, mafuie matautia, oge matautia, ma faamaʻi pipisi. Na taʻua faapea e le U.S.News & World Report (Iulai 27, 1992) i lenei vaega faaiu: “O le faamaʻi o le AIDS (FFP) . . . ua maliliu ai le faitau miliona ma ua lē o toe umi ona fai lea ma mala e sili ona matautia ma e leai se fofo i le talafaasolopito. O le Mala o Faamaʻi lea na aafia ai Asia ma Europa i le 14 o senituri na feoti ai pe ā ma le 25 miliona tagata. Ae oo atu i le tausaga e 2000, o le a oo i le 30 i le 110 miliona tagata e maua i le HIV, o le siama e pogai ai le AIDS, e amata mai i le 12 miliona ua iai i le taimi nei. Talu ai le leai o se vaifofo, ua mautinoa le fesagai uma o i latou o loo iai le siama o le HIV ma le oti.”
20. O le ā ua aofia i le uluai faataunuuina o le Mataio 24:4-22, ae o le ā le isi faataunuuga ua manino mai?
20 O le ā la sa tatou faaiuga e uiga i le tali atu a Iesu i le fesili a le au aposetolo? Na valoia ma le saʻo e lana valoaga, mea e taitaiina atu i ai ma faaaofia ai le faaumatiaga o Ierusalema, ma na taʻua ai foi ni mea sa sosoo ane i le 70 T.A. Ae o le tele o vala o lana valoaga o le iai lea o se faataunuuga lona lua ma le silisili i le lumanai, e taitaiina atu i le puapuaga tele, lea o le a faaiuina ai le faiga leaga o mea o iai nei. O le uiga o lenei mea e faapea, o le valoaga a Iesu i le Mataio 24:4-22, ma isi na e tutusa i ai i le Mareko ma le Luka, sa faataunuuina mai i le 33 T.A. e oo atu i le puapuaga tele o le 70 T.A. Peitai, o le a iai foi le faataunuuga lona lua o na lava fuaiupu, lea o le a aofia ai se puapuaga tele i le lumanai. Ua iai nei ia i tatou lena faataunuuga tele; ua mafai ona tatou vaaia i aso taitasi.f
E Taitaiina atu i le Ā?
21, 22. O fea tatou te maua i ai le faailoaga faavaloaga e iloa ai, o le a iai isi mea tutupu e oo mai?
21 Sa leʻi faaiu e Iesu lana valoaga i le taʻua o perofeta pepelo ia e faia faailoga taufaasese i le taimi umi a o leʻi oo ‘ina faataunuu taimi atofaina o nuuese.’ (Luka 21:24; Mataio 24:23-26; Mareko 13:21-23) Sa faaauau ona ia taʻua isi mea mataina e tutupu, o mea ua vaaia i le lalolagi atoa. O le a fesootai nei mea ma le afio mai o le Atalii o le tagata i le mana ma le mamalu. Ua fai le Mareko 13:24-27 ma faaaoaoga o lana valoaga lea ua faaauau pea:
22 “O aso foi ia pe a mavae atu lena puapuaga, e faapogisaina ai le la, e le susulu mai foi le masina, e pauu mai fetu o le lagi, e luluina foi ʻau a le lagi. Ona iloa atu lea e i latou o le Atalii o le tagata ua sau i ao ma le mana tele ma le mamalu. Ona aauina mai lea e ia o ana agelu, latou te faapotopotoina e ua filifilia e ia mai matāmatagi e fa; e amata i le tuluʻiga o le lalolagi e oo atu i le tuluʻiga o le lagi.”
23. Aisea e mafai ai ona tatou vaavaai atu pea mo se faataunuuga o le Mataio 24:29-31 e ui lava ua leva ona mavae le uluai senituri T.A.?
23 Sa leʻi oo mai le Atalii o le tagata, o Iesu Keriso lea ua toe faatuina, i lena vaaiga ofoofogia e mulimuli mai i le iuga faamalaiaina o le faiga o mea faa-Iutaia i le 70 T.A. E mautinoa, sa leʻi iloa o ia e ituaiga uma o le lalolagi, e pei ona taʻua i le Mataio 24:30, sa leʻi faapotopotoina loa e agelu o le lagi Kerisiano faauuina uma mai le lalolagi atoa. O afea la o le a faataunuuina ai lenei vaega faaopoopo o le valoaga mataina a Iesu? Po o faataunuuina ea i mea o loo tutupu i o tatou autafa i le taimi nei, pe na i lo o lea, ua na saunia se malamalamaga mai le Atua e faatatau i mea e mafai ona tatou faatalitalia i le lumanai lata mai? E ao ona tatou fia iloa moni lava, auā ua taʻua e Luka le timaiga a Iesu e faapea: “A afua ona faia o ia mea, ia tepa ae outou, ma ia ea i luga o outou ulu; auā e latalata ina faaolaina outou.”—Luka 21:28.
[Faaopoopoga i lalo]
a E mafai ona maua ni vaega o nei mataupu i le faasologa i le itulau e 14 ma le 15; ma o laina na e togitogi atu e faailogaina ai vaega e tutusa.
b Mo faamatalaga faatalafaasolopito e uiga i nei mea tutupu, tagai i le Watchtower o Ianuari 15, 1970, itulau 43-45.
c E silia i le 80 taimi e aliae mai ai le toʹte i le Mataio (e 9 taimi i le mataupu e 24) ma le 15 taimi i le tusi o Luka. E na o le faaono ona faaaogā e Mareko le upu toʹte, ae o le fa o na faaaogāina sa aofia ai “le faailoga.”
d Na taʻua e se faamatalaga a le tusitala mai Peretania o Matthew Henry: “O le faaumatiaga o Ierusalema e autau a Kaletaia sa matuā matautia, ae ua sili ai la le matautia o lenei. Sa faamatauina mai ai se fasiotiga tele o tagata uma . . . o Iutaia.”
e Ua iloa e le toatele i le tala a Luka se suiga o le manatu na faamamafa ina ua mavae le Luka 21:24. Ua taʻua e Dr. Leon Morris: “Ua faaauau ona fetalai Iesu e uiga i taimi o Nuuese. . . . I le manatu o le toatele o tagata aʻoga popoto, ua agaʻi atu nei i le afio mai o le Atalii o le tagata.” Ua tusia e le polofesa o R. Ginns: “O le Afio mai o le Atalii o le Tagata—(Mata 24:29-31; Mareko 13:24-27). O le faatauaina o ‘taimi o Nuuese’ ua saunia ai se faatomuaga i lenei matua; ua faasolo atu nei manatu o [Luka] i tua atu o le faaumatiaga o Ierusalema ma agaʻi atu ai i le lumanai.”
f Ua tusi mai faapea le polofesa o Walter L. Liefeld: “E mautinoa lava le mafai ona faamaonia atu e faapea, o fetalaiga faavaloaga a Iesu e aofia ai vaega e lua: (1) o mea tutupu o le 70 T.A. e aofia ai le malumalu ma le (2) o mea tutupu i le lumanai, ua faamatalaina i isi taʻu faafaaaliga.” Ua faapea mai se faamatalaga na faatonutonuina e J. R. Dummelow: “O le tele o mea sa sili ona faigata o lenei lauga sili, na foia ina ua iloatino sa faasino atu lo tatou Alii e lē i le na o se mea e tasi e tupu, ae e lua, ma o le faatatauga muamua ua avea ma ata o le mea lona lua. . . . ae maise lava le Luka 21:24, lea e tautala i ‘taimi o Nuuese,’ . . . ua faatulaga mai ai se va e lē gata mai i le va o le paʻū o Ierusalema ma le iuga o le lalolagi.”
Po o E Manatua?
◻ O ā faataunuuga na iai e tusa i le tali atu a Iesu i le fesili ua i le Mataio 24:3, ma taitaiina atu ai i le 70 T.A.?
◻ Ua faapefea i le faaaogāina o le upu toʹte ona fesoasoani ia i tatou ina ia malamalama ai i le valoaga a Iesu?
◻ I le ā le uiga o le iai o se “puapuaga tele” i le uluai senituri sa leʻi faapea ona tupu muamua lava?
◻ O ā vala tutasi e lua o le valoaga a Iesu ia e aafia ai i tatou i aso nei o loo faasino atu i ai Luka?
◻ O ā faailoaga ua faasino atu i le faataunuuga lona lua ma o le silisili foi lea o le valoaga o i le Mataio 24:4-22?
[Siata i le itulau 14, 15]
4 “Ua faapea atu [Iesu] ia te i latou, Ia outou, neʻi faaseseina outou e se tasi. 5 Auā e toatele e o mai i loʻu igoa, ua faapea ane, O aʻu nei o le Keriso; latou te faaseseina foi tagata e toatele. 6 E faalogo outou i taua ma tala o taua; ia outou, neʻi tou atuatuvale; auā e ao ona taunuu o nei mea uma, a e lei oo i le gataaga.
7 “ʻAuā e sii le taua e le tasi nuu i le tasi nuu, ma le tasi malo i le tasi malo; ona oo mai ai lea o oge, ma faamai, ma mafuie i lea mea ma lea mea. 8 O na mea uma o le amataga ia o puapuaga.
9 “ʻOna latou tuuina atu ai lea o outou i le puapuaga, ma latou fasiotia outou; e inosia foi outou e nuu uma ona o loʻu igoa. 10 O ona po ia e tausuai ai tagata e toatele, e faalata le tasi i le tasi, ma feitagai i latou. 11 E tutū mai foi perofeta pepelo e toatele, latou te faasese foi i tagata e toatele. 12 E maalili foi loto o tagata e toatele, ona ua tupu tele o le amio leaga. 13 A o lē tumau seia oo i le gataaga, e faaolaina lea. 14 E talaʻiina atu foi lenei tala lelei o le malo i le atu laulau uma, e fai ma molimau i nuu uma; ona oo mai ai lea o le gataaga.
------------------------------------------------------------------
15 “‘Pe a iloa foi e outou le mea e inosia e faatafunaina aʻi, na fai mai ai e le perofeta o Tanielu, ua tu i le mea paia, (ina mafaufau ia o lē faitau;) 16 o e o i Iutaia i ia ona po, ia latou sosola i mauga; 17 o le ua i luga o le fale, aua neʻi alu ifo ia e ave se mea ai lona fale; 18 o le ua i le vao foi, aua neʻi foi atu e ave ona ofu. 19 Oi talofa foi i fafine totō, ma ē failele i ia ona po. 20 A ia outou tatalo ina neʻi outou sosola i le tausaga maalili, po o le sapati. 21 Auā o ia ona po e oo ai le puapuaga tele e leai sona tusa talu le amataga o le lalolagi, ua oo lava i ona po nei; e le toe faapea foi amuli. 22 A le faapuupuuina foi ia aso, e le faaolaina se tasi; a e faapuupuuina ia aso ona o e ua filifilia.
------------------------------------------------------------------
23 “‘Afai e fai ane se tasi ia te outou i ia ona po, Faauta, o iinei le Keriso, po o iila; aua tou te faalogo i ai. 24 Auā e tutū mai Keriso pepelo, ma perofeta pepelo, latou te faia foi faailoga tetele ma vavega, ina ia faasese ai i e ua filifilia lava, pe afai e mafai ai. 25 Faauta, ua ou muai taʻuina atu ai ia te outou. 26 O lea, afai latou te fai mai ai ia te outou, Faauta, o i le vao ia; aua tou te o atu i ai; faauta, o i se afeafe ia; aua tou te faalogo i ai. 27 Auā e pei ona emo mai o le uila i sasae, ma malamalama atu i sisifo; e faapea foi ona sau o le Atalii o le tagata. 28 Auā o le mea ua i ai le tagata oti, e aofaga i ai aeto
------------------------------------------------------------------
------------------------------------------------------------------
29 “ʻA mavae atu le puapuaga o ia ona aso, ona faapogisaina loa lea o le la, e le susulu mai foi le masina, e pauu foi fetu mai le lagi, e luluina foi ʻau a le lagi. 30 Ona iloa ai lea i le lagi o le faailoga o le Atalii o le tagata; ona taufaitagituʻi ai lea o ituaiga uma o le lalolagi; latou te iloa atu foi le Atalii o le tagata ua sau i ao o le lagi ma le mana ma le mamalu tele. 31 E aauina atu foi e ia o ana agelu ma le leo tele o le pu, latou te faapotopoto foi i e ua filifilia e ia mai matāmatagi e fa, e amata i le tasi tuluʻiga o le lagi, e oo i le tasi tuluʻiga.’”
MARKEKO 13
5 “Ona tali atu lea o Iesu ia te i latou, ua faapea atu, Ia outou, neʻi faaseseina outou e se tasi; 6 auā e toatele e o mai i loʻu nei igoa, ma faapea ane, O aʻu o ia, latou te faaseseina foi tagata e toatele. 7 Pe a tou faalogo i taua ma tala o taua, aua tou te atuatuvale; auā e tupu lava ia mea; a e lei oo i le gataaga.
8 “ʻAuā e sii le taua e le tasi nuu i le tasi nuu, o le tasi malo foi i le tasi malo; e i ai foi mafuie i lea mea ma lea mea, e i ai foi oge ma fouvale; o amataga ia o puapuaga.
9 “ʻIa outou ia te outou; auā e tuuina atu outou e i latou i fono, ma sasaina outou i sunako; e tutū foi outou i luma o alii ma tupu ona o aʻu, e fai ma molimau ia te i latou. 10 Ia muai talaʻiina foi le tala lelei i nuu uma lava e ao ai. 11 Pe a latou taʻitaʻiina ma tuuina atu outou, aua neʻi muai manatu i sa outou e fai atu ai, aua foi le luaʻi fatufatuaʻi; a o se mea e foaiina ia te outou i lena itu aso, o lea tou te fai atu ai; auā e le o outou e fai atu ai, a o le Agaga Paia. 12 E tuuina atu foi le uso e le uso ia oti, e tuuina atu foi e le tamā lona atalii, e tutū atu foi le fanau i o latou mātua, ina ia fasiotia i latou. 13 E inosia foi outou e tagata uma ona o loʻu igoa; a o lē tumau seia oo i le iuga, e faaolaina lea.
------------------------------------------------------------------
14 “‘Pe a outou iloa le mea e inosia e faatafunaina aʻi, ua fai mai ai e Tanielu le perofeta, ua tu i le mea e le tatau ai, (o lē faitau ia mafaufau ia;) o e o i Iutaia i ia ona po, ia latou sosola i mauga; 15 o le ua i luga o le fale, aua neʻi alu ifo ia i le fale, aua foi neʻi ulu ai e ave se mea ai lona fale; 16 o le ua i le vao foi, aua neʻi toe foi o ia e ave lona ofu. 17 Oi talofa foi i fafine totō, ma ē failele i na ona aso! 18 A ia outou tatalo ina neʻi sosola outou i le tausaga maalili; 19 auā o ia ona aso e i ai le puapuaga, e leai sona tusa talu lava le amataga o mea na faia e le Atua, ua oo mai i ona po nei, e le toe faapea foi amuli. 20 Afai foi e le faapuupuuina ia aso e le Alii, e leai se tagata e faaolaina; a e peitai ona o le au filifilia ua filifilia e ia ua ia faapuupuuina ai ia aso.
------------------------------------------------------------------
21 “‘Afai foi e fai ane se tasi ia te outou i ia ona po, Faauta, o iinei le Keriso; pe faapea, Faauta, o iilā; aua neʻi faalogo i ai. 22 Auā e tutū mai Keriso pepelo, ma perofeta pepelo, ma latou faia faailoga ma vavega, ina ia faasese aʻi e ua filifilia lava, pe afai e mafai ai. 23 Ia outou; faauta, ua ou muai taʻuina atu ia te outou ia mea uma.
------------------------------------------------------------------
------------------------------------------------------------------
24 “ʻO aso foi ia pe a mavae atu lena puapuaga, e faapogisaina ai le la, e le susulu mai foi le masina, 25 e pauu mai fetu o le lagi, e luluina foi ʻau a le lagi. 26 Ona iloa atu lea e i latou o le Atalii o le tagata ua sau i ao ma le mana tele ma le mamalu. 27 Ona aauina mai lea e ia o ana agelu, latou te faapotopotoina e ua filifilia e ia mai matāmatagi e fa; e amata i le tuluʻiga o le lalolagi e oo atu i le tuluʻiga o le lagi.’”
8 “Ua fetalai atu ia, Ia outou, neʻi faaseseina outou; auā e toatele e o mai i loʻu igoa, e taitasi ma faapea ane, O aʻu o ia; ua latalata foi ona po; aua foi tou te mulimuli atu ia te i latou. 9 Pe a outou faalogo i taua ma fouvalega, aua tou te atuatuvale; auā e ao ina muai taunuu mai o ia mea, a e le oo loa mai le gataaga.’
10 “Ona fetalai atu lea o ia ia te i latou, E sii le taua e le tasi nuu i le tasi nuu ma le tasi malo i le tasi malo. 11 E i ai mafuie tetele i lea mea ma lea mea, o oge foi, ma faamai; ma faaiteite ma faailoga tetele mai le lagi.
12 “ʻA o lei oo nei mea, latou te pupue ma faasaua ia te outou, e tuuina atu ia te outou i sunako ma fale puipui, latou te taʻitaʻiina atu outou i tupu ma alii ona o loʻu igoa. 13 E oo ia mea ia te outou e fai ma molimau. 14 O lenei, ia tuu i o outou loto, tou te le muai mafaufau i se upu tou te tali atu ai. 15 Auā ou te avatu mo outou le upu ma le poto, e leai so latou o e finau mai ia te outou na te mafaia ona tali mai, pe tetee mai ia te outou. 16 E tuuina atu foi outou e mātua, ma uso, ma aiga, ma uo; o isi foi o outou e fasiotia e i latou. 17 E inosia foi outou e tagata uma ona o loʻu igoa. 18 A e leai lava so outou lauulu e tasi e paū. 19 O lo outou onosai ia maua ai lo outou ola.
------------------------------------------------------------------
20 “ʻA iloa e outou ua siosiomia Ierusalema i ʻau o le taua, ia outou iloa i lea aso ua latalata lona faatafunaina. 21 O lea aso, o e ua i Iutaia ia latou sosola i mauga; o e ua i totonu o lea aai, ia latou o ese; o e ua i le vao foi, aua neʻi latou o atu i totonu o le aai. 22 Auā o ona aso ia e faasalaina ai, ina ia taunuu mai o mea uma ua tusia. 23 Oi talofa i fafine ua totō, atoa foi ma ē failele i ia lava aso; auā e oo le puapuaga tele i le nuu, ma le toasa i le nuu nei. 24 E oti i latou i le mata o le pelu; e tāfea foi i nuu uma;
------------------------------------------------------------------
e solia foi Ierusalema e nuu ese, seia faaiuina tausaga o nuu ese.
------------------------------------------------------------------
------------------------------------------------------------------
25 “ʻE i ai foi faailoga i le la, ma le masina, ma fetu; o i le lalolagi foi le atuatuvale o nuu i le fememeai; e ū foi le sami ma le sousou; 26 e oti foi tagata i le matatau ma le faatalitali i mea e oo mai i le lalolagi; auā e luluina ʻau a le lagi. 27 Ona iloa atu ai lea e i latou o le Atalii o le tagata e sau i le ao, ma le mana ma le mamalu tele. 28 A afua ona faia o ia mea, ia tepa ae outou, ma ia ea i luga o outou ulu; auā e latalata ina faaolaina outou.’”
[Ata i le itulau 10]
O le puapuaga tele i le 70 T.A. o se mea silisili lea ua faatoʻā tupu i Ierusalema ma le faiga o mea faa-Iutaia