Laveaiina Atu i Totonu o se Lalolagi Fou Amiotonu

“E faafiafia foi i latou ia te i latou ona o le manuia e tele.”—SALAMO 37:11.

1, 2. (a) O le a faapefea ona ese le laveaiga e faia e Ieova i o tatou taimi mai i laveaiga i taimi anamua? (e) I totonu o le ā le ituaiga lalolagi o le a taitaiina atu i ai e Ieova ona tagata?

O IEOVA o le Atua o le laveaiga. I vaitaimi anamua, na ia laveaiina ona tagata i le tele o mea na tutupu. O na laveaiga sa mo se taimi lē tumau, auā mai na laveaiga uma taitasi, sa lei faaoo maia e Ieova lana faasalaga e faavavau faasaga i le lalolagi aoao a Satani. Ae i o tatou vaitaimi, ua toe o se aga ona faia loa lea e Ieova le laveaiina silisili o ana auauna uma lava. O le taimi lea o le a ia faaumatia ai so o se mea e fesootai atu i le faiga o mea a Satani i le lalolagi atoa, ma o le a taitaiina atu e Ieova ana auauna i totonu o se lalolagi fou amiotonu e faavavau.—2 Peteru 2:9; 3:10-13.

² Ua folafola mai e Ieova e faapea: “E toe itiiti, ona leai lea o le tagata amio leaga . . . A o e agamalu, e fai mo latou le nuu [lalolagi]; e faafiafia foi i latou ia te i latou ona o le manuia e tele.” (Salamo 37:10, 11) E mo le ā le umi? “E fai lava le nuu [lalolagi] mo tagata amiotonu, e nonofo ai pea i latou.” (Salamo 37:29; Mataio 5:5) Peitai, a o lei tupu lena mea, o le a oo atu lenei lalolagi i se vaitaimi sili o faafitauli e lei tupu muamua lava.

Le “Puapuaga Tele”

3. Na faapefea ona faamatalaina e Iesu le “puapuaga tele”?

³ I le 1914, na ulufale atu ai lenei lalolagi i ona “aso e gata ai.” (2 Timoteo 3:1-5, 13) O lea ua 83 nei tausaga o tatou iai i lena vaitaimi ma ua toeitiiti ona faaiuina lea, pe a tupu le mea na valoiaina mai e Iesu: “E oo . . . le puapuaga tele, e leai sona tusa talu le amataga o le lalolagi, ua oo lava i ona po nei; e le toe faapea foi amuli.” (Mataio 24:21) Ioe, e matuā sili atu lona leaga i lo le Taua Lona Lua a le Lalolagi, lea na faaumatia ai le 50 miliona o ola. Pagā se taimi e luluina ai le lalolagi ua matuā televave mai lava!

4. Aisea e faaoo mai ai e le Atua lana faasalaga i luga o “Papelonia le aai tele”?

⁴ O le a oo mai le “puapuaga tele” ma le matuā faafuasei lava e faateʻia ai, i le “itu aso e tasi.” (Faaaliga 18:10) O le a faailogaina lona amataga i le faaooina mai lea e le Atua o lana faasalaga i lotu sese uma lava, ua taʻua e le Afioga a le Atua o “Papelonia le aai tele.” (Faaaliga 17:1-6, 15) O le tulaga na matilatila ai Papelonia anamua, o faiga lotu sese. O Papelonia faaonaponei ua pei lava o lona soa anamua ma ua fai o ia ma sui o le emepaea o lotu sese. Ua fai o ia ma fafine talitane i lona faagutugutulua ma faiga faapolotiki. Ua ia lagolagoina a latou taua ma faamanuia atu i autau o itu uma o fetauai, ua iu ai ina fefasiotiai tagata o le ituaiga lotu lava lea e tasi. (Mataio 26:51, 52; 1 Ioane 4:20, 21) Ua lē amanaia e ia faiga faapiopio a ona tagata lotu ma faasauā i Kerisiano moni.—Faaaliga 18:5, 24.

5. E faapefea ona amata le “puapuaga tele”?

⁵ O le a amata le “puapuaga tele” pe a faafuasei ona osofaia e faiga faapolotiki ia “Papelonia le aai tele.” O le a latou “ ʻinoʻino i le fafine talitane, ma faasaunoa ia te ia; ma to ese ona ofu, latou te aai foi i lona tino, ma susunu ia te ia i le afi.” (Faaaliga 17:16) Pe a mavae lena, o ē na lagolago atu o le a “taufaitagi ia te ia ma taufaitagituʻi ona o ia.” (Faaaliga 18:9-19) Peitai ua leva ona faatalitalia e auauna a Ieova lenei mea, ma o le a latou alalaga faapea: “Aleluia! . . . auā ua faasalaina e ia le fafine talitane e sili, o lē na faaleagaina le lalolagi i lana faitaaga, ua ia taui atu ia te ia lava le toto o ana auauna.”—Faaaliga 19:1, 2.

Ua Osofaia Auauna a le Atua

6, 7. Aisea e maua ai e auauna a Ieova le lagona malupuipuia pe a osofaia i le vaitaimi o le “puapuaga tele”?

⁶ Pe a uma ona ia faaumatia lotu sese, ona faasaga mai loa lea o faiga faapolotiki i auauna a Ieova. Ua faapea mai le valoaga, o Satani, o “Koku, o le nuu o Makoku, . . . ou te alu ia te i latou o e o fifilemu, o e nonofo faatalanoa.” Ua manatu ua faigofie ona puea i latou, ua ia osofaia i latou ma sana “itu taua e matuā tele. . . . e pei o le ao e ufitia ai le nuu.” (Esekielu 38:2, 10-16) Ua iloa e tagata o Ieova o le a lē taulau lenei osofaiga ona e latou te faatuatua atu ia Ieova.

⁷ Ina ua manatu Farao ma ana autau faapea ua latou puea auauna a le Atua ona ua taofia mai e le Sami Ulaula, na faavavega ai ona laveaiina e Ieova ona tagata ae faaumatia autau a Aikupito. (Esoto 14:26-28) I le taimi o le “puapuaga tele,” pe a manatu atunuu ua latou puea tagata o Ieova, ona toe liuliualo mai foi lea o ia i se tulaga faavavega mo le laveaiina: “O ia lava ona po . . . e matuā tupu ai loʻu ita tele. O loʻu fuā foi, o le afi lava o loʻu ita ua ou fai atu ai.” (Esekielu 38:18, 19) Ona vave oo mai ai lea o le faaiuga o le “puapuaga tele”!

8. O ā mea mamana e tutupu a o lei faasalaina e Ieova ē amioleaga, ma o ā iuga e oo i ai?

⁸ I se taimi pe a mavae le amataga o le “puapuaga tele,” a o lei faaoo mai e Ieova lana faamasinoga i le vaega o loo totoe o le lalolagi, o le a iai ni mea mamana o le a tutupu mai. Mātau mai āuga o le a oo i ai ona o na mea. “Ona iloa ai lea i le lagi o le faailoga o le Atalii o le tagata [o Keriso]; ona taufaitagituʻi ai lea o ituaiga uma o le lalolagi; latou te iloa atu foi le Atalii o le tagata ua sau i ao o le lagi ma le mana ma le mamalu tele.” (Mataio 24:29, 30) “E i ai foi faailoga i le la, ma le masina, ma fetu, . . . e matapogia foi tagata i le matatau ma le faatalitali i mea e oo mai i le lalolagi.”—Luka 21:25, 26.

‘Ua Latalata Ona Laveaiina Outou’

9. Aisea e mafai ai e auauna a Ieova ona ‘ea aʻe i luga o latou ulu’ pe a tutupu mai mea mamana?

⁹ O le taimi tonu lava lena o le a taunuu ai loa le valoaga i le Luka 21:28. Na fetalai Iesu e faapea: “A afua ona faia o ia mea, ia tepa ae outou, ma ia ea i luga o outou ulu; auā e latalata ina faaolaina outou.” O le a gatete fili o le Atua i le fefefe auā o le a latou iloa o mea mamana o loo tutupu e mai ia Ieova. Peitai o le a olioli auauna a Ieova ona latou te iloa e faapea ua latalata mai lo latou laveaiina.

10. Ua faamatalaina faapefea e le Afioga a le Atua le faaiuga o le “puapuaga tele”?

¹⁰ Ona faaoo mai ai loa lea e Ieova le faaumatiaga aʻiaʻi o le faiga o mea a Satani: “Ou te faasala foi ia te ia [Koku] i le faamai ma le toto; ou te faatotō ifo foi i luga ia te ia ma ana ʻau, atoa ma nuu e tele ua ia te ia, le timuga tetele, ma uatoʻa tetele, o le afi, ma le teio. . . . E iloa ai lava e i latou o aʻu lava o Ieova.” (Esekielu 38:22, 23) O vala uma o le faiga o mea a Satani e faaumatia. O le sosaiete o tagata na latou teena le Atua e tafiesea. O le taualuga lena o Amaketo o le “puapuaga tele.”—Ieremia 25:31-33; 2 Tesalonia 1:6-8; Faaaliga 16:14, 16; 19:11-21.

11. Aisea ua laveaiina ai auauna a Ieova mai le “puapuaga tele”?

¹¹ O le faitau miliona o ē tapuai ia Ieova i le lalolagi aoao o le a laveaiina mai le “puapuaga tele.” O i latou ia e faia aʻe ai le “motu o tagata e toatele mai atunuu uma, ma aiga, ma nuu, ma gagana.” Aisea e laveaiina ai i latou i se auala silisili ma le matautia? Ona ua latou tuuina atu ia Ieova le ‘auaunaga paia i le ao ma le po.’ O lea ua faasaoina ai i latou mai le iuga o lenei lalolagi ma ulufale atu i totonu o se lalolagi fou amiotonu. (Faaaliga 7:9-15) Ua faapea foi ona latou molimauina ai le faataunuuina o le folafolaga a Ieova e faapea: “Ia e faatalitali ia Ieova, ma e tausi i lona ala; ona faaeaina lea o oe e ia ina ia fai mou le nuu; e te iloa atu le fanoga o e amio leaga.”—Salamo 37:34.

Le Lalolagi Fou

12. O le ā e mafai ona taulai atu i ai le vaai a ē faasaoina mai ia Amaketo?

¹² Maeu se taimi o le a matuā faafiafiaina ai lava—le tafiesea o le amioleaga ma le amataga o se vaitaimi e silisili ona faamamaluina o le talafaasolopito uma o le tagata! (Faaaliga 20:1-4) Maeu le loto faafetai o ē faasaoina mai ia Amaketo ia Ieova o le a latou ulufale atu i se olaga faaletagata e mamā ma fiafia ua faia e le Atua, se lalolagi fou, o le a faapea ona faaliliuina o se parataiso! (Luka 23:43) Ma e lē ono oo lava ia i latou le oti! (Ioane 11:26) E mautinoa lava, e amata mai i lena taimi ma agaʻi atu ai i luma, o le a latou maua le faamoemoe ofoofogia o le ola pea i le umi e soifua ai foi Ieova!

13. E faapefea ona toe faaauau e Iesu le galuega o le faamalologa lea na ia amataina i le lalolagi?

¹³ O Iesu, o lē ua tofia e Ieova e avea ma Tupu faalelagi o le a taulamua i le faaooina mai o faamanuiaga faavavega o le a faapea ona olioli ai ē ua laveaiina. A o iai o ia i le lalolagi, na ia faapupulaina mata na tauaso ma faafoisia le faalogo i taliga na tutuli ma faamalolo foi “i maʻi uma, ma maʻi tiga uma.” (Mataio 9:35; 15:30, 31) I le lalolagi fou, o le a ia faaauauina ai lena galuega tele o le faamalologa e oo atu i le lalolagi aoao. I le avea ma Sui o le Atua, o le a na faataunuuina ai le folafolaga e faapea: “E sōloiesea foi e le Atua loimata uma i o latou mata; e leai foi se toe oti, po o se faanoanoa, po o se aue, e leai foi se toe puapuaga; auā ua mavae atu mea muamua.” (Faaaliga 21:4) O le a lē toe manaomia lava ni fomai po o ni falemaliu!—Isaia 25:8; 33:24.

14. O le ā le laveaiga o le a oo mai i auauna a Ieova o ē ua maliliu?

¹⁴ O i latou foi o le a laveaiina o auauna uma faamaoni a le Atua ua leva ona maliliu. I le lalolagi fou, o le a faasaoina i latou mai le pule a le tuugamau. Ua faamautinoa mai e Ieova e faapea: “O le a toe tutū mai e ua amiotonu atoa ma e ua amioletonu.” (Galuega 24:15) E aliali mai, o ē “amiotonu” o le a vave ona faatutuina mai ma faia sa latou sao i le faalauteleina atu o le Parataiso. Maeu le matagofie o le a iai mo i latou na faasaoina mai ia Amaketo e faalogo atu i tala i mea na tutupu i ē faamaoni ua autausagā talu ona maliliu, ae o lea ua toe feola mai!—Ioane 5:28, 29.

15. Faamatala nisi o tulaga o le a oo mai i le lalolagi fou.

¹⁵ O i latou uma o loo soifua o le a oo ia i latou mea na taʻua e le faisalamo e uiga ia Ieova: “O loo e faamafola lou aao, ma faamaoona le manao o mea ola uma lava.” (Salamo 145:16) O le a lē toe iai se fia ʻai: O le a toe faafoisia le lalolagi i le paleni lelei o lona siosiomaga ma o le a fau ma soloi fua e maua mai ai. (Salamo 72:16) O le a lē toe iai ni tagata e leai ni fale e mau ai: “Latou te le fai fale ina ia mau ai nisi,” ma o le a taitasi le tagata lava ia ma nofo “i lalo o lona vine, ma lalo o lona mati; e leai foi se na te faamatau mai.” (Isaia 65:21, 22; Mika 4:4) O le a lē toe iai se fefe: O le a lē toe iai ni taua, sauaga, po o ni solitulafono. (Salamo 46:8, 9; Faataoto 2:22) “Ua mapu le lalolagi uma, ua filemu lava; ua latou alalaga ma le fiafia.”—Isaia 14:7.

16. Aisea o le a faatumulia ai le lalolagi fou i le amiotonu?

¹⁶ I le lalolagi fou, o faufauga a Satani e ala mai i faasalalauga i tusi ma isi lava mea ua uma ona tafiesea. Nai lo lena, “e aʻoaʻoina ē e nonofo i le atu laulau uma i le amiotonu.” (Isaia 26:9; 54:13, NW) A o mavae atu lea tausaga ma lea tausaga o aʻoaʻoga mamā faaleagaga, ona oo atu ai lea ina “tumu le lalolagi i le malamalama o Ieova, e pei ona ufitia o le iliti tai i le suāsami.” (Isaia 11:9) O manatu ma gaoioiga e atiina ae ai o le a faatumulia ai tagata uma. (Filipi 4:8) Seʻi manatu faalemafaufau atu i ai, o se lalolagi o tagata ua saʻoloto mai solitulafono, gugutu, matauʻa—o se auuso faavaomalo o loo fuaina mai fua o le agaga o le Atua e tagata uma. E mautinoa, e oo foi lava i le taimi nei o loo faatupuina na uiga e le motu o tagata e toatele.—Kalatia 5:22, 23.

Aisea ua Ia Faatali Umi Ai?

17. Aisea ua faatali umi ai pea Ieova i le faaooina mai o le iuga i le amioleaga?

¹⁷ E ui i lea, aisea ua faatali umi ai Ieova mai le aveesea o le amioleaga ae laveaiina atu ona tagata i le lalolagi fou? Manatunatu i mea e ao ona faataulauina. O le mea e sili ona tāua o le faaeaina lea o le pule silisili ese a Ieova, lana aiā e fai ai o ia ma pule. E ala i le faatagaina o se vaitaimi ua lava lelei lona umi e mavae atu, ua ia faailoa mai ai e aunoa ma le toe masalomia e faapea, o pulega faaletagata e see ese mai lana pule silisili ese ua iu i se matuā toilalopopo. (Ieremia 10:23) I le taimi nei la, ua matuā tonu ia Ieova ona suia le pule faaletagata i le pule a lona Malo faalelagi e ala mai ia Keriso.—Tanielu 2:44; Mataio 6:9, 10.

18. O afea o le a fai ai ma tofi o ē tupuga mai ia Aperaamo le nuu o Kanana?

¹⁸ O mea ua tutupu i nei senituri uma ua tutusa ma le mea na tupu i le vaitaimi o Aperaamo. Na fetalai atu Ieova ia Aperaamo o le a mau ē e tupuga mai ia te ia i le nuu o Kanana—ae e tatau ona latou faatali seia atoa tausaga e faselau “auā ua le [oo ina] atoatoa le agasala a sa Amorī i nei ona po.” (Kenese 12:1-5; 15:13-16) O le uiga o le upu “Amorī” iinei (o se ituaiga na aupito lauiloa) e aliali mai na fai o ia ma sui o nuu uma o Kanana. E tusa e faselau tausaga talu ona mavae, ona faatoʻā tuu loa lea e Ieova ona tagata e pule i Kanana. A o lei oo i lena taimi, na faataga e Ieova nuu o Kanana e atiina ae pea o latou lava sosaiete. O ā iuga na oo i ai?

19, 20. O ā ituaiga o sosaiete o tagata na fafau aʻe e Kanana?

¹⁹ O le tusi Bible Handbook, a Henry H. Halley, na faamauina ai se faamatalaga e faapea, i Mekito, na maua ai e le ʻau suesue i toega o mea anamua mea na faaleagaina o le malumalu o Asaira, o se atua fafine, le faletua o Paala. Na ia tusi mai faapea: “I se savaliga puupuu mai lenei malumalu e te tau atu ai i se fanuatanu, o iina na maua ai le tele o faguele, o loo iai toega o pepe ia na faia ai taulaga i totonu o lenei malumalu . . . O perofeta a Paala ma Asaira na avea ma fasioti tagata autū o tamaiti laiti.” “O se tasi faiga e matautia le matagā o le [mea] na latou taʻua o ‘taulaga faavae.’ Pe a fausia se fale, ona faia ai lea o se taulaga i se tamaitiiti, ona faufaatasi ai lea ma lona tino i totonu o le puipui.”

²⁰ Na faaopoopo mai faapea Halley: “O le tapuaiga ia Paala, Asaira, ma isi atua o Kanana na faia aʻe i faiga faaletapuaiga e matuā lē pulea lava; na avea a latou malumalu ma tumutumuga o mea leaga uma . . . e tapuaia e tagata Kanana e ala i le matuā faia o amioga lē mamā, . . . ona fasiotia lea o a latou pepe ulumatua e fai ma taulaga i nei lava atua. E foliga mai i se tulaga lautele, na avea ai le nuu o Kanana e pei o Sotoma ma Komoro i se tulaga atoa faaleatunuu. . . . Pe sa tatau i se sosaiete faapea o tagata ua matuā tumu i faiga inosia ma le faamasaatoto ona tuu atu pea i ai le avanoa e faaauau ai pea? . . . O ē e suesue i toega o mea anamua na latou eliina aai o Kanana na faatafunaina, na maofa i le lē faaumatiaina vave e le Atua o nei aai nai lo le taimi na Ia faia ai.”—Faatusatusa i le 1 Tupu 21:25, 26.

21. O le ā e tutusa ai le tulaga o tagata Kanana ma tulaga o tagata i o tatou aso?

²¹ Ua oo atu le amioleaga a sa Amorī i lona tulaga “atoatoa.” Ua matuā tonu ai ia Ieova lona faaumatiaina o i latou. E faapena foi le tulaga moni ua iai i aso nei. Ua faatumulia lenei lalolagi i sauaga, o amioga lē mamā, ma le lē faaaloalo i tulafono a le Atua. Ma talu ai ua tatau ona tatou inoino i faiga taulaga inosia na faia i tamaiti i Kanana anamua, ae faapefea le faitau sefulu o miliona o tagata talavou o loo iai i taua a lenei lalolagi, e sili atu ona leaga nai lo so o se mea na faia i Kanana? E mautinoa lava, ua matuā tonu nei ia Ieova le faaoo mai o le iuga o lenei faiga o mea amioleaga.

Le Faataunuuina o se Isi Mea

22. O le ā ua faataunuuina nei i o tatou vaitaimi ona o le onosai o Ieova?

²² O le onosai o Ieova i nei aso e gata ai ua ia faataunuuina ai se isi mea. Ua ia faataga pea le taimi ina ia aoao ma aʻoaʻoina ai le motu o tagata e toatele, lea ua oo atu lona faitau aofai i le lima miliona. I lalo o le taitaiga a Ieova, ua avea i latou o se faalapotopotoga e agaʻi i luma. O tane, fafine, ma talavou ua toleniina ina ia aʻoaʻoina isi i upu moni o le Tusi Paia. E ala i a latou sauniga ma lomiga faale-Tusi Paia, ua latou aʻoaʻoina ai ala alofa o le Atua. (Ioane 13:34, 35; Kolose 3:14; Eperu 10:24, 25) E lē gata i lea, ua latou aʻoaʻoina ni tomai i faugafale, o mea e faaaogā ai le eletise (electronics), o faiga tau lomitusi, ma isi lava tomai ina ia lagolago atu ai i le talaʻia o le “tala lelei.” (Mataio 24:14) E foliga mai o na tomai tau i le aʻoaʻo atu ma le faufale o le a tele ina faaaogaina i le lalolagi fou.

23. Aisea ua avea ai o se faaeaga le ola i lenei vaitaimi?

²³ Ioe, i aso nei, o loo saunia ai e Ieova ana auauna ina ia sao mai i le “puapuaga tele” ma ulu atu i se lalolagi fou amiotonu. I lena taimi, o le a lē toe iai Satani ma lana lalolagi amioleaga e tetee mai, lē toe iai ni maʻi, faanoanoa, ma le oti. Faatasi ai ma le maelega tele ma le olioli, o le a faapea ai ona agaʻi atu tagata o le Atua i se galuega fiafia o le fausiaina o se parataiso, o iina o le a iai i aso uma lava le ‘fiafiaga tele.’ Maeu se faaeaga o lo tatou ola i le tumutumuga o tausaga uma lava, o le iloa ma auauna atu ia Ieova, ma iloa ua toe o se aga ona ‘ea aʻe lea i luga o o tatou ulu auā ua latalata ona faaolaina i tatou’!—Luka 21:28; Salamo 146:5.

Fesili Autalu

◻ O le ā le “puapuaga tele,” ma e faapefea ona amata?

◻ Aisea o le a lē taulau ai le osofaiga a Koku i auauna a Ieova?

◻ E faapefea ona faaiuina le “puapuaga tele”?

◻ O ā mea lelei ofoofogia o le a aumaia e le lalolagi fou?

◻ Aisea ua faatali umi ai pea Ieova i le faaooina mai o le iuga i lenei faiga o mea?

[Ata i le itulau 16]

O le a faaliliuina le lalolagi atoa e avea o se parataiso