O le Soifuaga o Iesu ma Lana Faiva

Mautinoa i Aso e Gata Ai

AO LATALATA atu le Aso Lua, Nisani 11, i lona iʻuga, o loo iai Iesu ma ona aposetolo i le Mauga o Olive. Na seʻi o latou faatoʻā tuua lava le laufanua o le malumalu, lea e mafai ona latou vaaia i lalo ifo, ma ua latou talanoaina ma Iesu le faailoga o lona faatasi mai i le mana o le Malo ma le iʻuga o le faiga o mea.

I le faaauauina o lana faamatalaga, ua lapatai atu ai Iesu ia i latou e uiga i le mulimuli atu i Keriso pepelo. O le a faia ni taumafaiga, ua ia fetalai atu ai, “ina ia faasese ai i e ua filifilia lava, pe afai e mafai ai.” Ae, i le pei o aeto vaai mamao, o le a faapotopoto atu ai nei tagata filifilia i le mea o loo maua ai meaʻai faaleagaga, i lona uiga faatasi ma le Keriso moni i lona faatasi mai lē vaaia. O le a lē faaseseina i latou ma faapotopoto faatasi atu i se Keriso pepelo.

O Keriso pepelo e na o le faaali vaaia mai e mafai ona latou faia. I se faaeseesega, o le faatasi mai o Iesu o le a lē vaaia. O le a oo mai i se taimi e mataʻu ai i le talafaasolopito o le tagata, e pei ona fetalai Iesu: “Ona faapogisaina loa lea o le la, e le susulu mai foi le masina.” Ioe, o le a avea lenei o le vaitaimi sili ona pogisa talu ona iai le tagata. O le a pei ua faapogisaina le la i le taimi o le ao, ma e pei ua lē susulu mai le masina i le po.

“E luluina foi ʻau a le lagi,” ua faaauau mai ai Iesu. I lea, ua ia faaalia ai faapea o le a iai se vaaiga mataʻutia i le lagi. O le a lē toe avea le lagi ma mea e nonofo ai na o manulele, ae o le a faatumuina i vaalele tau, roketi, ma vaa suesue o le vateatea. O le mataʻu ma le sauā o le a oo atu i se tulaga e sili atu i so o se mea sa faapea ona oo muamua i ai le talafaasolopito o le tagata.

I le avea o se iʻuga, ua fetalai ai Iesu, o le a iai le “atuatuvale o nuu i le fememeai; e ū foi le sami ma le sousou; e [matapogia] foi tagata i le matatau ma le faatalitali i mea e oo mai i le lalolagi.” E moni, o lenei vaitaimi aupito sili ona pogisa talu ona iai le tagata, o le a taʻitaʻiina atu ai i le taimi, e pei ona fetalai i ai Iesu, “ona iloa ai lea i le lagi o le faailoga o le Atalii o le tagata; ona taufaitagituʻi ai lea o itu aiga uma o le lalolagi.”

Ae e lē o tagata uma o le a tagituʻi ‘pe a sau le Atalii o le tagata ma le mana’ e faaumatia lenei faiga leaga o mea. O “e ua filifilia,” le 144,000 o ē o le a aufaatasi ma Iesu i lona Malo faalelagi, o le a lē tagituʻi, e lē faapena foi a latou aumea, o ē na muai taʻua e Iesu o ana “isi mamoe.” E ui lava i le vaitaimi aupito sili ona pogisa i le talafaasolopito o le tagata, ae na tali atu i latou nei i le faalaeiauga a Iesu: “A afua ona faia o ia mea, ia tepa ae outou, ma ia ea i luga o outou ulu; auā e latalata ina faaolaina outou.”

Ina ia mafai ai e ona soʻo o ē o le a ola i le vaitaimi o le iʻuga ona iloa le latalata tele mai o le iʻuga, ua avatua ai e Iesu lenei faataʻitaʻiga: “Ina vaai ia i le mati atoa ma laau uma; pe a faatoa matala mai lau, ua outou vaai, ona outou iloa ai lea ua latalata le tausaga vevela. Ia faapea foi outou, pe a iloa e outou ia mea ua faia, ia outou iloa ua latalata le malo o le Atua. E moni, ou te fai atu ia te outou, E le mavae atu lenei tupulaga, seia taunuu mea uma.”

I lea pe a vaaia e ona soʻo faapea ua faataunuuina vala eseese e tele o le faailoga, ona latou iloa ai lea ua latalata le iʻuga o le faiga o mea, ma ua lē o toe mamao se taimi ona soloiesea loa lea e le Malo o le Atua le amio leaga uma lava. O le mea moni, o le a oo mai le iʻuga i le vaitaimi o loo soifua ai pea tagata o ē na vaai i le faataunuuga o mea uma lava na valoia e Iesu! I le apoapoaia o na soʻo o ē o le a ola i le vaitaimi iloga o aso e gata ai, ua faapea mai Iesu:

“Ia outou, neʻi faamamafaina o outou loto, ma le faaniniva, ma le onā, ma le popole i mea a le olaga nei, neʻi faafuasei mai lea aso ia te outou. Auā e pei o se mailei ona oo mai ai i e nonofo uma lava i le fogāeleele uma. O lea ia outou mataala ai ma tatalo e le aunoa, ina ia taʻuaogaina outou e sao mai ia mea uma ua tāli oo mai, ma ia tutū i luma o le Atalii o le tagata.” Mataio 24:23-51; Mareko 13:21-37; Luka 21:25-36; Faaaliga 14:1, 3; Ioane 10:16.

◆ O ā tulaga i le lalolagi ua faailogaina ai le faatasi mai o Keriso?

◆ O afea o le a ‘taufaitagituʻi ai ituaiga uma o le lalolagi,’ ae o le ā o le a faia e soʻo o Keriso?

◆ O le ā le tala faatusa ua saunia e Iesu e fesoasoani ai i ona soʻo i le lumanai ia maua le tofa mamao pe a latalata mai le iʻuga?

◆ O le ā le apoapoaiga ua saunia e Iesu mo i latou o ona soʻo o ē o le a soifua pea i le vaitaimi o aso e gata ai?