Tumau Pea i le Maopoopo mo le Faasaoina Atu i le Meleniuma

“Ona tasi ai lea o le lafu mamoe, ma le leoleo mamoe e toatasi.”—IOANE 10:16.

1. I le Atua e soifua pea, ua tusa le afe o tausaga i le ā?

O IEOVA o Lē na Foafoaina le taimi mo le fanau a tagata. Ma ia te ia, o le Atua e lē mafai ona maliu, o lē mai le vavau e oo i le faavavau, o le afe o tausaga ua tusa lea ma le aso e tasi e vave ona mavae atu pe ua oo lava ina ua na o sina taimi o le uati i se tasi o o tatou po.—Salamo 90:4; 2 Peteru 3:8.

2. O le ā le vaitaimi ua faataatia ese e Ieova mo le faamanuiaina o le fanau a tagata?

² Ua faataatia e le Atua le aso faafaatusa o tausaga e afe, lea o le a ia faamanuiaina ai aiga uma o le lalolagi. (Kenese 12:3; 22:17, 18; Galuega 17:31) E aofia ai i lenei i latou o ē ua maliliu nei ma i latou o loo soifua pea. O le a faia faapefea e le Atua lenei mea? Ia, e ala i Lona Malo ia Iesu Keriso, le “fanau” a Lana fafine faafaatusa!—Kenese 3:15.

3. (a) Na faapefea ona tuʻimomomoina le mulivae o le Fanau a le fafine a le Atua, ae na faapefea ona toe faamalōlōina lea manuʻa? (e) I le iʻuga o le Pulega o le Afe o Tausaga a Iesu Keriso, o le ā o le a ia faia i le gata faafaatusa?

³ Sa tuʻimomomoina le mulivae faafaatusa o le Fanau a le fafine a le Atua (po o le faalapotopotoga faalelagi) ina ua puapuagatia Iesu Keriso i le maliu faamaturo ma maliu ai mo se vaega o aso e tolu i le tausaga e 33 T.A. Ae i le aso lona tolu, sa toe faamalōlōina e le Atua e Ona le Malosi Uma lava, o le Foai Ola Sili, lea manuʻa e ala i le toe faatuina mai o lona Alo faamaoni i le ola e lē mafai ona oti i le nofoaga o agaga. (1 Peteru 3:18) Talu ai o le a lē toe maliu lava Iesu, ua iai ai o ia i le tulaga e pule ai o se Tupu i luga o le fanau a tagata mo le afe o tausaga ma oo ina ia “tuʻimomomoina” le ulu o le gata faafaatusa, nutipalaina o ia ia lē toe iai i le iʻuga o le Pulega o le Afe o Tausaga. Maeu se faamanuiaga o le a iai mo le fanau a tagata toe faafoisia!

4. O le ā le ituaiga o polokalama o loo tauaveina e Ieova ma ona tagata?

⁴ E tele se faamaopoopoina o loo agaʻigaʻi i luma i totonu o tagata o Ieova i le lalolagi aoao i le vaitaimi o lenei ‘faaiʻuga o le faiga o mea’ talu mai le faaiʻuga o Taimi o Nuu Ese i le 1914. (Mataio 24:3; Luka 21:24, King James Version) O lenei polokalama faalefaalapotopotoga e muamua lava i le Meleniuma ua faia nei ina ia ōgatasi ma le finagalo ma i lalo o le taʻitaʻiga a le Faamaopoopo Sili, o Ieova le Atua. E ala i Lana fafine, lana faalapotopotoga faalelagi pei se faletua, na fanau mai ai lona Malo folafolaina e ala ia Iesu Keriso i le 1914, e pei ona faamaninoina e ala i le faataunuuga o le valoaga faale-Tusi Paia.

5. O le fanau mai o le ā na valoia i le Faaaliga 12:5, ma o anafea na uluai faamatala ai lenei mea i Le Olo Matamata?

⁵ I lea, ua faataunuuina ai ma le mamalu nei upu i le Faaaliga 12:5: “Ua fanau foi e ia o le tama tane, o le na te pule i nuu uma i le tootoo uamea; ona segia ae lea o lana tama i le Atua i lona nofoālii.” O le fanau mai o le Malo o Ieova e ala ia Keriso, e pei ona faaatagia i le pepe fou faatoʻā fanau i le fafine a le Atua, na muai faamatalaina i Le Olo Matamata o Mati 1, 1925. O le fanau mai o lenei Malo faa-Mesia i le lagi i le 1914, e eseese lea ma le fanau mai o le “nuu” o ‘tama’ a Siona i le lalolagi i le 1919.—Isaia 66:7, 8.

6. (a) O le fanau mai o le malo na manaomia ai le ā le galuega lea na valoia e Iesu? (e) O le faia o lenei galuega, na manaomia ai le ā i le vaega a tagata o Ieova, ma o le ā le ituaiga o tulaga ua latou tuuina atu nei?

⁶ O le fanau mai o le Malo o Ieova lea o le a ia faamamaluina ai lana aiā o le pule silisili ese i le vateatea uma—oi, o le mea lenei sa tatau ona faasilasilaina i le lalolagi atoa! Ma o le taimi lenei mo le faataunuuina o nei upu a Iesu faatatau i faamaoniga o lona ‘faatasi mai’ lē vaaia: “E talaʻiina atu foi lenei tala lelei o le Malo i le atu laulau uma e fai ma molimau i nuu uma; ona oo mai ai lea o le gataaga.” (Mataio 24:3, 14) O le autasi ma le ōgatasi i le talaʻiga faavaomalo, i se fua i le lalolagi aoao o le a manaomia moni ai se faamaopoopoina mo le vaega vaaia o le faalapotopotoga faalevateatea a Ieova. Sa fiafia i ai le Watch Tower Bible and Tract Society i lenei mea, e pei ona suia ai e lona peresitene sa iai i lena taimi o J. F. Rutherford: O lea, mai le tausaga ina ua uma le taua i le 1919, sa agaʻi ai i luma ma le maumauai le faamaopoopoina o i latou na lagolagosua ma le faamaoni i le Sosaiete, e pei o se nuu faafoisia, faatasi ai ma tatalo mo le taʻitaʻiga ma le faamanuiaga a le Faamaopoopo Silisili, o Ieova le Atua. I le fesagaʻi ai ma le Taua e Lua a le Lalolagi, e ui lava i teteega ogoogo mai Pule tautalatasi, o gaoioiga faa-Nasi a Hitila, ma Gaoioiga faa-Katoliko, ae na tuuina atu ai e Molimau a Ieova i le lalolagi aoao se autasi i le faafetaiaia o le lalolagi ua fai ma fili.

7. (a) E ala i le na o le tumau i le ā le faiā o le tasi i le isi ua mafai ai e tagata o Ieova ona faatalitalia le faasaoina i le puapuaga tele? (e) Na faapefea ona sao atu ē na faasaoina i le Lolo faalekelope, ma o ai na latou faaatagia?

⁷ E na o Molimau a Ieova lava, i latou o le vaega totoe faauuina ma le “motu o tagata e toatele,” i le avea o se faalapotopotoga autasi i lalo o le puipuiga a le Faamaopoopo Sili, ua iai so o se faamoemoe faale-Tusi Paia o le faasaoina atu i le iʻuga malaia o loo faaloloʻi mai o lenei faiga o mea o loo pulea e Satani le Tiapolo. (Faaaliga 7:9-17; 2 Korinito 4:4) O le a latou faia aʻe “tino” o ē na fetalai ai Iesu o le a faasaoina atu i le puapuaga aupito sili ona leaga i le talafaasolopito uma o le fanau a tagata. E pei lava ona sa iai i aso o Noa, na fetalai Iesu, o le a faapena foi le aso pe a faaalia mai o Ia. I totonu o le vaa na tele tausaga o faia ai ni taumafaiga maopoopo ina ia faaumaina, e na o le toavalu solu na faasaoina i le Lolo faalekelope. Na faasaoina i latou o se aiga autasi. (Mataio 24:22, NW, 37-39; Luka 17:26-30) O le avā a Noa o se ata o le faatoanofotane a Keriso, ma o ona atalii ma avā a ona atalii o ata ia o “isi mamoe,” i aso nei a Iesu, o ē ua tupu aʻe i se motu o tagata ua faateleina, o ni vaega faaiʻu tatou te lē o iloa nei i ai. (Ioane 10:16) Mo le faasaoina atu i le Meleniuma i lalo o le Noa Sili, o Iesu Keriso, e tatau ona latou tumau ai i se tulaga maopoopo faatasi ma le vaega totoe, “o e ua filifilia” ona o i latou na o le a faapuupuuina ai aso o le “puapuaga tele.”—Mataio 24:21, 22.

Faasaoina atu i le Meleniuma

8. I le faaiʻuina o lana valoaga faatatau i lona faatasi mai, o le ā le tala faatusa na avatu e Iesu, ma na faapefea ona mataʻina le aso o Iuni 1, 1935, ina ia malamalama i ai?

⁸ E tusa ai ma le Tala Lelei a Mataio, na faaiʻu ai e Iesu lana valoaga i le faailoga o lona faatasi mai faatasi ma se tala faatusa. I se faataoto masani i mamoe ma ʻoti, ua faatatauina nei, i le taimi o le faaiʻuga o lenei faiga o mea, lea na amata i le faaiʻuga o Taimi o Nuu Ese i le 1914. (Mataio 25:31-46) Sa mataʻina le Aso Toonai, Iuni 1, 1935, ona sa faamalamalamaina ai le faailoaina o mamoe i le faataoto a Iesu o sui o le motu o tagata e toatele. I lena aso, i le tauaofiaga a Molimau a Ieova i Washington, D.C., e 840 tagata na papatisoina e faatinoina lo latou tuuina atu ia Ieova le Atua e ala ia Iesu Keriso. O le toatele o i latou nei na faia lenei gaoioiga ona o le tali vave atu i se lauga i le tusi o Faaaliga 7:9-17 na fofogaina mai e J. F. Rutherford. Sa o lo latou faanaunauga ina ia avea o se vaega o le motu o tagata e toatele o isi mamoe a le Leoleo Mamoe Lelei, i le iai o le avanoa e faasaoina ai i le puapuaga tele o loo sau ma ola atu ai i le faaiʻuga o lenei faiga o mea ma oo atu ai i le Pulega faa-Meleniuma a le Tupu Leoleo Mamoe, o Iesu Keriso. I le faaiʻuga lava, latou te maua ai le ola e faavavau i le lalolagi parataiso.—Mataio 25:46; Luka 23:43.

9. Aiseā ua valaaulia ai mamoe ina “ia fai mo [latou] tofi le malo ua saunia mo [i latou],” ma ua faapefea ona latou iai i se tulaga sili ona lelei i le faia o le lelei i uso o le Tupu?

⁹ Aiseā ua valaaulia ai nei tagata pei mamoe ina “ia fai mo [latou] tofi le malo ua saunia mo [i latou] a o lei faavaeina le lalolagi”? Ua taʻu atu e le Tupu ia i latou faapea talu ai na latou faia mea lelei i ona “uso,” ma o le mea lea ua latou faia ia te ia. E ala i lenei faaupuga, “uso,” o le uiga o le upu a le Tupu o le vaega totoe o ona uso faaleagaga o loo iai pea i le lalolagi i lenei faaiʻuga o le faiga o mea. I le avea o se tasi o le lafu faatasi ma nei uso o le Tupu Leoleo Mamoe o Iesu Keriso, o le a latou tausia ai le sootaga vavalalata e mafaia ma le vaega totoe o na uso ma i lea o le a latou iai i se tulaga aupito sili ona lelei e faia ai mea lelei mo i latou. E oo lava i auala faaletino, o le a latou fesoasoani ai i uso o Iesu e talaʻi le feau o le Malo ua faavaeina i le lalolagi atoa a o leʻi oo mai le iʻuga. E tusa ai o lenei mea, o le a faapelepele ai e mamoe lo latou faaeaga o le tausia ia maopoopo faatasi ma le vaega totoe e avea o le lafu e tasi a le Leoleo Mamoe e toatasi.

10. O le ā lona uiga mo mamoe, “ia fai mo [latou] tofi le malo ua saunia mo [i latou] a o leʻi faavaeina le lalolagi”?

¹⁰ O le ulu atu i le “malo ua saunia mo [i latou]” e lē o le uiga faapea o nei mamoe o le a pule faatasi ma Keriso ma ona uso i le lagi mo le afe o tausaga. Na i lo o lea, e amata mai le amataga o le Meleniuma, o le a ulu atu ai mamoe i le nofoaga faalelalolagi o le Malo. Talu ai, o i latou o le fanau a Atamu ma Eva, o lenei nofoaga faalelalolagi o le a pule mai i ai le Malo o le Atua e ala ia Keriso, na saunia mo i latou “a o lei faavaeina le lalolagi” o le fanau a tagata togiolaina. E lē gata i lea, talu ona avea mamoe o se fanau faalelalolagi a le Tupu, o lē ua avea o lo latou “Tamā o le faavavau,” ua latou ulu atu ai i se nofoaga faalelalolagi, po o le nuu, i lalo o le Malo o le Atua.—Isaia 9:6, 7.

11. Ua faapefea ona faaalia e mamoe faapea ua latou tutū mo le malo, ma ona o lenei mea, o le ā le faamanuiaga ua fai mo i latou?

¹¹ I le faaeseesea atu i ʻoti faafaatusa, ua faaalia ai ma le lē masese ē e pei ni mamoe faapea ua latou tutū mo le Malo. Faapefea? E ala i galuega, ae lē na o upu. Ona o le lē vaaia o le Tupu i le lagi, e lē mafai ai ona latou faia mea lelei tuusaʻo ia te ia i le lagolagoina o lona Malo. Latou te faia mea lelei i ona uso faaleagaga o ē o i le lalolagi. E ui lava o lenei mea ua tupu ai le inoino, tetee, ma sauaga i le vaega a ʻoti, ae mo le faia o lena mea lelei, ua taʻu atu ai e le Tupu i na mamoe faapea ua ‘faamanuiaina i latou e lona Tamā.’

12. O ai o le a avea ma faaeaga mo mamoe faasaoina e toe faafeiloaia, ma e faatatau i lenei mea, o le ā le manatu ua maua ai e nisi o le vaega totoe?

¹² O le motu o tagata e toatele o ē pei ni mamoe ua maua aogā mai i uso faaleagaga o le Tupu o le a faamanuiaina i le faaeaga e olioli ai o le faasaoina atu i le Meleniuma. I le taimi e tatau ai, o le a latou auai i le toe faafeiloaia o tagata ua maliliu o ē o loo iai i tuugamau faamanatu. (Ioane 5:28, 29; 11:23-25) O le a aofia ai ia i latou nei augatamā faatuatua ma perofeta o ē na puapuagatia ma onosaia le tele o mea mo le faapaiaina o le silisili ese o Ieova, ina ia “maua e i latou le toe tu mai e sili ona lelei,” atonu o le toetu muamua i le lalolagi. (Eperu 11:35) O loo lisiina mai se vaega o na tane ma fafine o le faatuatua i le Eperu mataupu e 11, lea na aofia ai Ioane le Papatiso. (Mataio 11:11) Ua manatu nisi o le vaega totoe faauuina i le faasaoina atu ma ola ai ina ia faafeiloaiina ē faamaoni o le a toe tutū mai, o ē na maliliu a o leʻi oo i le Penetekoso 33 T.A. Pe o le a faaeaina ai la i lea le au faauuina?

13. Aiseā o le lē tatau ai mo le vaega totoe ona iai mo le faafeiloaia ma tausia o i latou o le a toe faatutuina i le lalolagi?

¹³ O le a lē talafeagai lenei. O le motu o tagata e toatele o ē o le a faasaoolaina atu i le puapuaga tele o le a iai i le taimi lea, o le a lava ma totoe lo latou numera ina ia mafai ona tausia lea tulaga ma ia faamasani atu i ē o le a toe tutū mai i le “lalolagi fou” i lalo o le “lagi fou.” (2 Peteru 3:13) E oo lava i le taimi nei, o loo faamaopoopoina le motu o tagata e toatele mo lenei mea. I aso nei, o uso faaleagaga o Iesu i le lalolagi ua lipotia mai i se fuainumera e itiiti ifo i le 9,000, o nisi la o le a faasaoina mai ia i latou, o le a toaitiiti tele i latou mo le tausia o galuega uma i le sauniuniga mo le toetu lautele. (Esekielu 39:8-16) O lea, i inei, ua iai le motu o tagata e toatele o lona fuainumera ua oo atu i le faitau miliona, o le a faia se auaunaga silisili ona lelei. Ma o lea faaeaga, e aunoa ma se masalosalo ua teuina mo i latou.

14. (a) Mo le ā ua aʻoaʻoina ai le toatele o le motu o tagata e toatele, ma aiseā e tatau ai i se vaega o i latou ona talia le avega tauave i le taimi nei? (e) O ā mea ua lē o toe umi ae oo mai, ma o le ā le galuega o loo faatali mai mo isi mamoe?

¹⁴ O le toatele o le motu o tagata o loo aʻoaʻoina nei i tiute tauave faalefaapotopotoga ma e ala i polokalama o le fausiaina o loo faia e le faalapotopotoga a le Atua i le lalolagi aoao. Ma o se faalaeiau le vaai atu i le faaopoopoga o tane matutua faaleagaga o le motu o tagata e toatele ua tofia latou te faia tiute tauave sili i le faalapotopotoga ua galueaiina nei e Ieova i le lalolagi. O ē totoe o ē faauuina, ua agaʻi atu ina matutua i tausaga ma ua itiiti ai se malosi e mafai ai ona tauave le avega. E talia ma le fiafia e nei uso o le Tupu le fesoasoani alofa faalefaapotopotoga ua mafai ona tuuina atu e toeaina taʻumatuaina faaleagaga ma auauna o le faiva o isi mamoe. Ua lē o toe umi se taimi, ona aveesea lea o Papelonia le Aai Tele mai le vaaiga a le Lalolagi. O lea e pei ona faaalia i le Faaaliga 19:1-8, ona faamaeʻa ai lea i le lagi o le faaipoipoga a le Tamai Mamoe ma lana faatoanofotane le 144,000, a o isi mamoe, i le auauna e avea o le lalolagi fou i lalo o le lagi fou, o le a fai ma sui o le Tupu i le faaauauina pea o le galuega sili o le toe faafoisia seia oo ina avea le lalolagi uma ma parataiso ua ʻaināina mo le viiga o Ieova.—Isaia 65:17; faatusatusa Isaia 61:4-6.

15. O ā faamanuiaga o loo aloalo atu i ai le motu o tagata e toatele mo le Meleniuma?

¹⁵ I le taimi o le Pulega faa-Meleniuma a Keriso, pe a toe faatutuina mai le fanau a tagata togiolaina mai le oti, ona olioli ai lea o le motu o tagata e toatele faasaoina i faaeaga ofoofogia ma le sili ona faamamaluina. Ona avea ai lea o i latou i le taimi lea o atalii ma afafine o le Tupu. Ona mafai ai lea e na atalii o ia i latou ona umia le tofi o le avea ma alii sili (perenise) e oo lava i le pei o atalii o le Tupu o Tavita sa avea o pereni se faatasi ma ni tiute tauave eseese.a Ua faamanatu mai e lenei mea ia i tatou le Salamo 45, na fatuina ma faasino atu i le “tupu” faauuina a Ieova.

16. O ai moni o loo tautala i ai le Salamo 45, ma e mafai faapefea ona faamaonia o lena mea?

¹⁶ I le ā le tupu na tautala moni atu i ai le Salamo 45? Ia, e ia Iesu Keriso! Na faia e le Eperu 1:9 lena faatatauga i lona siitia mai o le Salamo 45:7, ua faitauina faapea: “Ua e finagalo i le amiotonu, ma e ʻinoʻino i le amio leaga; o le mea lea ua faauuina ai oe e le Atua, o lou Atua lava, i le suāuu o le fiafia, e sili lava i e tou te faatasi.” O lea, o le Iesu Keriso faamamaluina moni lava lena o loo faapea mai ai le Salamo 45:16: “E suia ou tamā i ou alo; e te tofia i latou e fai ma alii sili i le lalolagi uma.”

17. I le ā, ma ia te ai o loo naunau faapitoa i ai le Tupu, o Iesu Keriso?

¹⁷ Ma le tonu lava, e sili atu ona naunau Iesu i lona lumanai i le avea o se Tupu o loo pule, i lo o lona taimi faalelalolagi i aso ua mavae. E moni e lē o galo ia te ia lena taimi ua tuanai ma ae maise ona tupuaga faaletagata o loo aofia ai i le folafolaga a Ieova e manuia ai aiga uma lava o le lalolagi e ala i le Fanau faa-Aperaamo. Ae o lona faanaunauga autū i le taimi nei, o loo i le lumanai lata mai e pei ona fuafuaina e Lē na Faia Tupu o Ieova le Atua. O lea, o fanau faalelalolagi a Iesu,ae maise lava o atalii o loo faatasi ma i latou ua taʻuagavaaina e auauna i lalo o lana pulega i tulaga faaperenise, o le a latou umia ni tulaga e naunau i ai—e sili atu na i lo o ona augatamā faalelalolagi.

18. Ua faapefea i nisi faaliliuga o le Salamo 45:16 ona faamamafaina ai le matuā naunau sili o Iesu i atalii faaperenise na i lo o ona augatamā faalelalolagi?

¹⁸ O le naunau sili o Iesu i atalii perenise na i lo o augatamā o loo faamamafaina lea i faaliliuga eseese o le Tusi Paia. Ua faapenei ona faia e nisi o ia faaliliuga le Salamo 45:16: “E laa atu ou atalii i tulaga o ou tamā, ma tutū aʻe e avea o perenise i le nuu atoa.” (Moffatt) “O tulaga o ou tamā, o le a maua e ou atalii; e te faia foi i latou ma perenise i le nuu atoa.” (Fuaiupu 17, The New American Bible) “Na i lo o ou tamā, ua e fanauina ni fanau: e te faia i latou ma perenise i le lalolagi uma lava.”—The Septuagint Version, faasalalauina e Samuel Bagster and Sons.

19. O le ā le avega tauave faalefaapotopotoga ua iai nei i nisi tane o le motu o tagata e toatele, ma o le ā le tulaga atonu o le a tofia i ai i latou e le Tupu o Iesu Keriso i le vaitaimi o lana Pulega i le Afe o Tausaga?

¹⁹ I lo tatou fiafia tele, ona ua iai perenise faamanuiaina ia i tatou. O loo maua i latou i totonu o isi mamoe o ē faalogo i le leo o le Leoleo Mamoe Lelei o Iesu Keriso. Ua latou faalogo i lenei leo,ae maise lava talu mai le 1935, ina o faamatalaina le Faaaliga 7:9-17 i le tauaofiaga a Molimau a Ieova i Washington, D.C. I aso nei, e faitau afe o lenei motu o tagata e toatele o isi mamoe o loo auauna o ni toeaina, po o ovasia, i faapotopotoga a Molimau a Ieova e sili atu i le 60,000 i atunuu e 212 i le lalolagi aoao. E ala i le tumau pea i le maopoopo faatasi ma le vaega totoe o uso faaleagaga o Iesu o loo iai pea i le lalolagi, o loo tutū ai nei tane i se faasologa ina ia avea atoatoa ma ataliifai faalelalolagi o le Tupu, o Iesu Keriso i le taimi o lana Pulega o le Afe o Tausaga i luga o le lalolagi fou folafolaina. (2 Peteru 3:13) I le avea o i latou na, o le a mafai ai ona tofia i latou e avea ma perenise e auauna i le lalolagi fou.

20. (a) O le ā le uiga o le a iai i le Tupu agaʻi i ona tagata tofia i le lalolagi? (e) O ai o le a toe faafeiloaia e le motu o tagata e toatele, ma o le ā le avanoa ua faataatia i luma o i latou o le a toe foi mai?

²⁰ O le a fiafia le Tupu, o Iesu Keriso, e silafia nei alii sili po o perenise fou ua tofia, e pei lava ona ia silafia nei le tulaga faaovasia o isi mamoe faamaoni i faapotopotoga a Molimau a Ieova i aso nei. O sui uma lava o le motu o tagata e toatele o isi mamoe—o fafine faapea ma tane—o le a iai le faaeaga fiafia o le toe faafeiloaia mai le oti o i latou uma o le a faalogo i le siufofoga o Iesu ma toe tutū mai i le avanoa o le mauaina o le ola e faavavau i le tulaga lelei atoatoa faaletagata i luga o se lalolagi ua faamamāina o le a faaliliuina i se parataiso faalekelope. (Ioane 5:28, 29) O i latou e sili ona alofagia o le a toe faatutuina mai, o le a aofia ai augatamā togiolaina o Iesu Keriso, o tane faatuatua o ē na loto naunau e faamaonia lo latou tuutoina ia Ieova le Atua e oo lava i le oti ona o le faamoemoe ia maua se “toe tu mai e sili ona lelei.” (Eperu 11:35) Peitai, o le siitia aʻe i se olaga lelei atoatoa faaletagata i le taimi o le Pulega faa-Meleniuma a lo latou Tupu Faaola, o Iesu Keriso, ua na o se amataga. E ala i le tumau maopoopo ma le lē gausia i lalo o Ieova le Atua i le taimi o le tofotofoga mulimuli, i luga o le fanau a tagata toe faafoisia i le faaiʻuga o le Meleniuma, o le a latou faamaonia ai i latou e aogā mo le taʻuamiotonuina mo le ola e lē uma i le Parataiso e avea o se vaega faalelalolagi o le faalapotopotoga faalevateatea a Ieova.—Mataio 25:31-46; Faaaliga 20:1–21:1.

[Faaopoopoga i lalo]

O le ā Lau Tali?

◻ Ua faataatia ese e Ieova le ā le vaitaimi mo le faamanuiaina o le fanau uma a tagata?

◻ I le na o le tumau i le ā le faiā o le tasi ma le isi e mafai ai ona faasaoina i tatou i le puapuaga tele?

◻ O le ā lona uiga mo mamoe ina ‘ia maua mo le tofi le malo ua saunia mo i latou a o leʻi faavaeina le lalolagi’?

◻ I le taimi o le Meleniuma, o ā faaeaga o le a mafai ona auai le motu o tagata e toatele?