Le Lolo O Se Lapataiga Mai Aso ua Mavae

I LE TALAFAASOLOPITO umi o le fanau a tagata, sa i ai ni mala mataʻutia e pei o le pasae aʻe o le Mauga o St. Helens pe sili atu foi e masani lava ona tutupu. A e leai se mea na tusa ma le Lolo Tele i ona po o Noa. O se Lolo vai na sili ona faaumatia ai sa faataatia ia se faamatalaga lē ma faagaloina mo le fanau a tagata i se fua faalekelope.

E tusa ma le 150 tala o le vavau eseese e uiga i le Lolo mai vaega eseese uma o le lalolagi e aofia ai Papelonia, Roma, Initia, Ausetalia ma Amerika. E ui ina eseese nei tala o le vavau i o latou auiliiliga, a e i ai lava se ioega lautele e uiga i le mafuaaga tau amio o le Lolo, le faaumatiaga o le fanau a tagata i le kelope aoao, ma le faasaoina o se aiga i se vaa. Ua na o se mala lava faalekelope e mafai ona tuua se talaaga lauiloa tumau.

Sa tusia e se tasi tagata aʻoga o le Tusi Paia: “O le talafeagai o nei faamatalaga uma o se faamaoniga le mafaafitia lea faapea o le tala o le vavau e le na o sina mea na fatu fua; se tala fatu a se tagata, e leʻi tupu i le lalolagi aoao; o le mea lea, o lena tala o le vavau, e i ai sona faavae faatalatuufaasolo; o le iuga o se mea na tupu moni lava i uluaʻi tausaga o le fanau a tagata.” A e ai se ā ua avea ai lena mala i tuā lava o se lapataiga i le tupulaga o ola nei?

E tāua lava mo i tatou ona matauina tulaga na taʻitaʻiina atu ai i le Lolo. Ona o tulaga foʻi faapena o loo i le lalolagi i aso nei ua faamautinoa mai ia ia i tatou le Lolo. Ua faapenei la ona faamatalaina e le tusi o Kenese i le Tusi Paia le talatuufaasolo o mea na tutupu: “Ua silafia e Ieova ua leaga tele lava tagata i le lalolagi, o manatu uma ua mafaufau ifo ai i o latou loto ua na ona leaga ia i aso uma lava. Ua silasila mai le Atua i le lalolagi, faauta foi, ua leaga lava; auā o tagata uma ua leaga ia i latou a latou amio i le lalolagi.”—Kenese 6:5, 12.

Ua matuā pagatia le lalolagi o le fanau a tagata i le paʻū maulalo o tulaga lautele tau amio, ona o manatu uma ua mafaufau ifo ai i o latou loto ua na o le leaga lava i taimi uma. O le iʻuga la, “ua tumu le lalolagi i le saua.” (Kenese 6:11) Sa tuuina atu uma olaga o tagata i le sailia o mea faitino ma le faamalieina o tuinanauga tau feusuaiga. Sa tataʻia e Iesu manatu i lenei mea i lona fetalai mai: “Auā e pei ona faia i ona po a o lei oo le lolo, ua latou aai ma inu, ua latou fai avā foi ma faaavaga, ua oo lava i le aso na ulu atu ai Noa i le vaa, na le iloa foi e i latou ina seia oo le lolo, ma aveesea i latou uma; e faapea foi pe a sau le Atalii o le tagata.” (Mataio 24:38, 39) O lo latou faanaunauga atoa o le faamalieina o tuinanauga faaletino.

Na tuuina atu e Noa se lapataiga auiluma mo le tele o tausaga, a e na lē fia talitonu i ai lena tupulaga. O le mea moni latou te leʻi oʻo pe vaai i se lolo faapena. O lea ona o le faaauau pea ona i ai o tulaga e pei o uluaʻi taimi na paʻū atu ai le lapataiga i taliga tutuli. Sa “le iloa foi e i latou.” Na latou leʻi manatu i le lapataiga faapea e sau mai e Le Na Foafoaina i latou e ala ia Noa.

A e na taʻu atu e le Atua ia Noa: “Ua oo mai i oʻu luma le iuga o tagata uma; auā ua tumu le lalolagi i le saua ona o i latou; faauta foi, o aʻu lava, ou te faaumatia i latou atoa ma le lalolagi.” (Kenese 6:13) Ina ua oʻo mai le Lolo, sa faasaoina Noa ma lona aiga auā na latou utagia le lapataiga ma mulimuli i faatonuga a le Atua. A e ai se ā e avea ai o se mea tatou te naunau faapitoa i ai?

Tulaga Tutusa

E pei o aso a o leʻi oʻo le Lolo, a e maise lava talu mai le Taua l a le Lalolagi ua avea ai le saua ma auala o le soifuaga. O faiga saua faa-Polotiki i atunuu ua iʻu ai i ni taua e sili ona faaumatia ma leaga i le talafaasolopito o le fanau a tagata. Ua salalau atu le saua i aai, i ala tetele, ma i aiga; ua oʻo lava ina faamataʻuina ai tagata faimalaga. A e lē gata i lea, o le televise, ata tifaga, ma tusi ua i ai le matua autu saua o faatosinaga.

O se tasi tulaga tutusa, o le ala o le soifuaga o aso nei o le faamalieina o manaoga tau feusuaiga ma le manao i mea faitino o faanaunauga na ua sasao faaafi i lenei tupulaga. I le lalolagi lautele, ua tatou vaaia ai le paʻū maulalo o tulaga tau amio lena ua aumaia ai faamaʻi pipisi tau feusuaiga i se tulaga o se mala tele. Ua taʻatele naʻuā le faia o le mulilua, faitaaga, ma le tauatane. E pei o le tupulaga a o leʻi oʻo le Lolo, ua faapena foʻi le tupulaga lenei ona alolofa i faafiafiaga faaletino ma le manao tele i mea faitino a e leai se alofa i le Atua.

E pei ona “tiga” o le finagalo o le Atua ona o le iloga o le amio leaga a tagata i ona po o le Lolo, e lē o se mea ea la e alaga tatau ai ona faapea o le lagona o ia te ia i aso nei ona o le amio leaga ua taʻatele i le lalolagi aoao? E lē tatau ea ona avea le mea na ia faia i lena lalolagi i ona po o Noa o se lapataiga i lenei tupulaga? E le o se mea tatau ea ona manatu faapea o le a ia aumaia le faaiʻuga lava lena o loo tatou maua i le Kenese 6:5-7? Ina ua silafia e le Atua le leaga o le fanau a tagata, “ua tiga ai lona finagalo. Ona fetalai ane lea o Ieova: Ou te soloieseina i le fogāeleele tagata na ou faia.” E ala i tusitala faagaeeina o le Tusi Paia, sa faailoa mai ai e le Atua faapea o le a ia aumaia foʻi se faamasinoga faapena i luga o lenei tupulaga e mananao e faamalie manaoga. Ua tulata atu nei o ia i se mala sili ona mataʻutia i talafaasolopito o le tagata.

O Aso e Gata Ai

I le tagaʻi atu i o tatou aso, ua faamatalaina ai e le tusitala faagaeeina o le Tusi Paia o le tusi e lua ia Timoteo le tulaga leaga o mea i le faasologa mai o tausaga ia tatou vaaia nei i le lalolagi aoao. I le mataupu e 3, a o le fuaiupu 1 e oʻo i le 4, ua ia faapea mai ai: “A e ia e iloa e oe lenei mea, o ona aso e gata ai e oo mai ai aso faigata; auā e avea tagata ma e alolofa i latou ia i latou, o e mananao i tupe, o e loto vii, o e faamaulauga, o e upu leaga, o e le faalogo i mātua, o e le faafetai, o e amio leaga, o e le loto aiga, o e tuumavaega, o e faatuaupua, o e le taofi manao o le tino, o e faasaua, o e le alolofa i tagata amio lelei, o e faalata, o e soona fai, o e ua faafefeteina, o e ua tele le manao i mea faafiafia a e leai se manao i le Atua.”

Sa valoia mai foʻi e Iesu Keriso aso e gata ai o lenei faiga o mea. I lana valoaga sa ia fetalai ai e uiga i le faateleina o le tulaga saua ua tatou vaaia nei talu mai le Taua l a le Lalolagi, i lona faapea mai: “Auā e sii le taua e le tasi nuu i le tasi nuu, ma le tasi malo i le tasi malo.” (Mataio 24:7) Sa ia fetalai foʻi faapea “e oti foi tagata i le matatau ma le faatalitali i mea e oo mai i le lalolagi.”—Luka 21:26.

O le faaupuga “aso e gata ai” e tutusa lona uiga mo le tupulaga lenei i le pei o le tupulaga a o leʻi oʻo i ona po o le Lolo—o le iʻuga o se vaega sa avea ma pulega malosi i lena faiga o mea a tagata. Ua faapea mai Paulo le tusitala faagaeeina o le Tusi Paia i le 2 Tesalonia 1:8,9, faapea o le a aumaia e le Atua e ala ia Iesu Keriso, “le taui ma sui i e ua leiloa le Atua, ma ua le anaana i le tala lelei a lo tatou Alii o Iesu Keriso. E faasalaina i latou lava i le fanoga e faavavau lava, ia tea ma le Alii, ma le mamalu o lona malosi.”

O e na faasaoina mai le Lolo na latou iloa faapea na soloiesea le tupulaga i ona po o le Lolo mai le lalolagi. O tagata ma mea uma na latou ola ai sa tafiesea uma. E faapena foʻi pe a aumaia e le taui ma sui tauatua le iʻuga i lenei tupulaga saua o i ai nei. “E toeitiiti ona leai lea o le tagata amio leaga; e te mafaufau foi i le mea sa i ai o ia, a e leai lava.”—Salamo 37:10.

E Mafai Ona Faasaoina

O le tuufeagai ai i le va o le tupulaga i ona po o le Lolo ma lo tatou tupulaga e leʻi gata ai i amioga leaga a tagata ma lo latou faaumatiaga. E pei lava ona iloa sa i ai ē na faasaoina mai i le Lolo, o lea o le a i ai foʻi ni ē faasaoina i le iʻuga o lenei faiga o mea. O ē na faasaoina mai le Lolo o i latou o ni tagata agamalu sa leʻi ola e pei ona ola tagata lautele. O i latou o ē na alolofa i le amiotonu o ē na usiusitai i le Atua ma utagia ana lapataiga. Ua faailoa mai ia i tatou e le Kenese 6:8, 9: “A o Noa, ua alofagia o ia e Ieova . . . O Noa o le tagata amiotonu ia ma le sao i e tupulaga ma ia.” Sa tusi le aposetolo o Peteru e faatatau ia te ia ma ē na faaaoina e faapea o le Atua “e lei faasaoina foi le lalolagi tuai, na o Noa lē talai le amiotonu, o lona toavalu lea na faaolaina ina ua aumai le lolo i le lalolagi faalemataʻu.”—2 Peteru 2:5.

Ua faamautinoa mai ia i tatou e perofeta a le Atua faapea o le a i ai se motu o tagata e toatele o le a faasaoina mai le faaumatiaga tauatua o loo sau o lenei faiga o mea. O i latou foʻi, o ni tagata agamalu o ē alolofa i le amiotonu ma o ni tagata e sili ona usiusitai i faatonuga a le Atua e pei lava ona sa faia e Noa. Ina ua uma ona valoia le oʻo mai o le faaumatiaga o ē amio leaga, fai mai le faisalamo: “A o e agamalu e fai mo latou le nuu, e faafiafia foi i latou ia te i latou ona o le manuia e tele.”—Salamo 37:11; Faaaliga 7:9, 13, 14.

Sa valoia e Iesu faapea o aso e gata ai o le a faalauiloa atu ai le tala lelei o le Malo o le Atua i le lalolagi atoa. O le auala lena ua aoaoina mai ai tagata e mafuli atu i le amiotonu o le lalolagi mo le faasaoina. Sa faataʻitaʻia e Iesu lenei mea i lana faataoto o le tuueseeseina o mamoe ma oti ma sa ia faaiʻuina le faataoto i lona fetalai mai faapea o e amiolētonu e pei o oti “ona ō atu ai lea o latou nā i le sala e faavavau, a o e amiotonu [pei ni mamoe] e o atu i le ola e faavavau.”—Mataio 25:31-46.

E ui ina ua leva atu le Lolo mai o tatou aso, a e manino lava o se lapataiga mo i tatou e tatau ona utagia. O lona talaaga sa tusia, e pei ona fai mai ai le Tusi Paia, “e aʻoaʻo mai ai ia e i tatou.” (Roma 15:4) O se lapataiga faasaga i le ola i le lalolagi saua, faananau i feusuaiga, ma uiga manao tele i mea faitino e aunoa ma le utagia Le Na Foafoaina i tatou. E le suia lava o ia. Na tafiesea e le Atua le tupulaga i ona po o le Lolo ona o lo latou leaga. O le pogai foʻi lena o le a ia tafiesea ai lenei tupulaga ma lana faia aoao o mea a malo faapolotiki, faiga tau tamaoaiga tuinanau i mea faitino, ma tapuaiga sese.

Ina ia faasaoina mai le iʻuga o lenei faiga o mea, e tatau ona tatou utagia le lapataiga o aso ua mavae. E tatau ona faamaonia i tatou o ni ē alolofa i le amiotonu, e pei ona sa faia e le toavalu na faasaoina mai le Lolo. Ma mo le faasaoina e tatau ona tatou mulimuli i le faatonuga o loo i le Sefanaia 2:3: “Ia outou saili le amoitonu, ia outou saili le agamalu, atonu e lilo ai outou i le aso o le toasa o Ieova.”

[Ata i le itulau 7]

E pei ona faasaoina o Noa ma lona aiga mai le Lolo, e mafai foʻi la ona e i ai faatasi ma tagata faasaoina fiafia i le iuga o lenei faiga o mea.