Le Pogai e Mataala ai Pea Molimau a Ieova

“Ia outou mataala ai; auā tou te le iloa po o le fea itu aso e sau ai lo outou Alii.”—MATAIO 24:42.

1. O ai ua faatatau atu i ai le timaiga ina ia “mataala”?

O AUAUNA uma lava a le Atua—pe talavou pe matutua, pe faatoʻā papatiso po ua leva foi i le auaunaga—ua faatatauina i ai le timaiga a le Tusi Paia e faapea: “Ia outou mataala”! (Mataio 24:42) Aisea ua tāua ai lenei mea?

2, 3. (a) O le ā le faailoga na faamatalaina manino e Iesu, ma o le ā ua faaalia e le faataunuuga o le valoaga? (e) O le ā le tulaga lea na faasino i ai le Mataio 24:42 e tofotofoina ai le moni aʻiaʻi o lo tatou faatuatua, ma e faapefea?

² A o agaʻi atu ina faaiuina le faiva a Iesu i le lalolagi, na ia valoia ai le faailoga o lona faatasi mai lē vaaia i le mana o le Malo. (Mataio, mataupu e 24 ma le 25) Na manino lona faamatalaina mai o lena taimi o lona faatasi mai tautupu—ma mea e tutupu i le faataunuuga o le valoaga e faaalia ai le faapaleina o ia e avea ma Tupu i le lagi i le 1914. Na ia faasino atu foi i se tulaga o le a tofotofoina ai le moni aʻiaʻi o lo tatou faatuatua. Sa faasino lenei i le taimi lea o le a gaoioi ai o ia o se Faaoosala ina ia faaumatia le faiga leaga o mea o iai nei, i le taimi o le puapuaga tele lea na fetalai i ai Iesu e faapea: “A o lea aso ma lea itu aso e le iloa e se tasi, e le iloa lava e agelu i le lagi [“po o le Atalii,” NW], ua na o loʻu Tamā lava.” O le mafuaaga la lena na ia fetalai ai: “O lea, ia outou mataala ai; auā tou te le iloa po o le fea itu aso e sau ai lo outou Alii.”—Mataio 24:36, 42.

³ Ona o lo tatou lē iloa o le aso ma le itu aso o le a amata ai le puapuaga tele, e manaomia ai le tatau ona tatou ola ia pei o ni Kerisiano moni i aso uma pe afai tatou te manatu faapea o i tatou o ni Kerisiano. Po o le auala ea o loo e faaaogā ai lou olaga, o le a e maua ai le faamaoniga a le Alii pe a oo mai le puapuaga tele? Po o le muamua foi e oti, po o le a ia manatua ea oe o se tasi o lē sa auauna ma le faamaoni ia Ieova seia oo i le iuga o lou olaga o loo iai nei?—Mataio 24:13; Faaaliga 2:10.

Sa Taumafai Uluai Soʻo e Mataala

4. O le ā e mafai ona tatou aʻoaʻoina mai le faaaoaoga a Iesu i le mataala faaleagaga?

⁴ O Iesu Keriso lava ia na faataatiaina se faaaoaoga e sili ona lelei o le mataala faaleagaga. Sa ia tatalo e lē aunoa ma tatalo faatauanau i lona Tamā. (Luka 6:12; 22:42-44) Ina ua fetaiai ma tofotofoga, na ia matuā faalagolago atu i le taitaiga o loo i le Tusi Paia. (Mataio 4:3-10; 26:52-54) Na te leʻi faatagaina o ia e faalavelaveina mai le galuega na tofia i ai o ia e Ieova. (Luka 4:40-44; Ioane 6:15) Po o faapena ea le mataala o i latou o ē na manatu o i latou o soʻo o Iesu?

5. (a) Aisea na oo ai i aposetolo o Iesu ni faafitauli i le tausisia o le paleni faaleagaga? (e) O le ā le fesoasoani na tuuina atu e Iesu i ona aposetolo ina ua toe tu mai o ia?

⁵ Sa iai taimi, na oo ai lava i aposetolo o Iesu, sa faatausuai. Ona o le soona naunau tele ma ni manatu sese, na latou fetaiai ai ma ni lē fiafia. (Luka 19:11; Galuega 1:6) A o latou leʻi aʻoaʻoina le tatau ona matuā faalagolago atu ia Ieova, na lē mautonu i latou i tofotofoga na tutupu aʻe faafuasei. O lea, ina ua pueina faapagota Iesu, na sosola ona aposetolo. Mulimuli ane i lena lava po, na faafitia ai pea e Peteru lona iloaina o Keriso ona ua fefe. O le taimi lena e leʻi paʻi i loto o le au aposetolo le fautuaga a Iesu e faapea: “Ia outou mataala ma tatalo.” (Mataio 26:41, 55, 56, 69-75) Ina ua toe tu aʻe Iesu, na ia faaaogā le Tusi Paia e faamalosia ai lo latou faatuatua. (Luka 24:44-48) Ma ina ua foliga mai atonu o le a faatulagalua e nisi o i latou le faiva lea na tuuina atu ia i latou e fai, ona faamalosia ai lea e Iesu faanaunauga o o latou loto ina ia uai atu i le galuega e sili ona tāua.—Ioane 21:15-17.

6. O ā mailei e lua na muai lapataia ai e Iesu ona soʻo?

⁶ I se taimi muamua atu, na lapataia ai e Iesu ona soʻo ina ia lē avea i latou ma vaega o le lalolagi. (Ioane 15:19) Na ia fautuaina foi i latou ina ia aua neʻi fia sili le tasi i le isi, ae ia auauna uma faatasi o ni uso. (Mataio 20:25-27; 23:8-12) Pe na latou utagia ea lana fautuaga? Pe na latou faasilisilia ea le galuega na ia tuuina atu ia i latou?

7, 8. (a) Ua faapefea e le tala na taʻua e Kerisiano o le uluai senituri ona faaalia ai, sa goto i o latou loto le timaiga a Iesu? (e) Aisea na tāua ai le faaauau pea i le mataala faaleagaga?

⁷ A o soifua pea le au aposetolo, sa latou leoleomalu i le faapotopotoga. Ua molimau mai le talafaasolopito e faapea, sa leʻi aafia uluai Kerisiano i mataupufai faapolotiki a le Emepaea o Roma, ma latou te leʻi faatuina aʻe foi se vasega faapitoa o ni taitailotu. Ae na i lo o lea, sa avea i latou ma ē aasa i le folafolaina atu o le Malo o le Atua. E oo ane i le iuga o le uluai senituri, ua soo atoa le Emepaea o Roma i la latou molimau atu, ma faia foi soʻo i Asia, Europa, ma Aferika i Mātū.—Kolose 1:23.

⁸ Peitai ane, o na mea na faataulauina i le talaʻiga na leʻi faapea ua lē toe manaomia ai le mataala pea faaleagaga. Sa umi pea se taimi na faatali ai le maliu mai o Iesu lea na valoia. Ma a o agaʻi atu le faapotopotoga i le senituri lona lua T.A., na aliae ni tulaga na faamataʻuina ai le itu faaleagaga o Kerisiano. Na faapefea ona tupu lena mea?

I Latou na Mou atu Lo Latou Mataala

9, 10. (a) Ina ua mavae le maliliu o le au aposetolo, o ā mea na tutupu e faaalia ai e toatele ē na faapea mai o Kerisiano na lē mataala pea? (e) O ā mau ua sii mai i lenei palakalafa sa ono mafai ona fesoasoani atu i ē na faapea mai o Kerisiano ina ia tausisia ai lo latou malosi faaleagaga?

⁹ O nisi na ō mai i le faapotopotoga na amata ona latou faaali atu o latou talitonuga i tulaga o filosofia faa-Eleni, ina ia atili talia ai e tagata o le lalolagi mea na latou talaʻia atu. Na faasolosolo mālie ona avea talitonuga faapaupau, e pei o le Tolutasi ma le iai o le solu e ola pea, ma vaega o le ituaiga Faa-Kerisiano ua pisipisia. O lenei mea na taitaia ai i le lafoaia o le faamoemoe i le meleniuma. Aisea? O i latou na talitonu i le ola pea o le solu na latou faia se faaiuga e faapea, o faamanuiaga o le nofoaiga a Keriso o le a maua uma i le nofoaga faaleagaga e ala mai i le solu lea e ola pea pe a oti le tino o le tagata. O lea na latou lē manaomia ai ona mataala mo le faatasi mai o Keriso i le mana o le Malo.—Faatusatusa i le Kalatia 5:7-9; Kolose 2:8; 1 Tesalonia 5:21.

¹⁰ Na atili faamautuina lenei tulaga e ala i isi mea na tutupu aʻe. O nisi na faapea mai o ovasia Kerisiano, na amata ona latou faaaogāina a latou faapotopotoga e fai ma auala e ausia ai ni tulaga ina ia lauiloa ai i latou lava. Na latou taumafai faatogafiti ina ia faatutusa le tāua o o latou lava manatu ma aʻoaʻoga, ma le tāua o le Tusi Paia po o le oo foi ina faasilisili atu na i lo o le Tusi Paia. Pe a tulai mai ni avanoa lelei, ona faaavanoa atu lea e lenei lotu faaaposetate o ia lava ina ia auauna ai mo manaoga o le malo faapolotiki.—Galuega 20:30; 2 Peteru 2:1, 3.

O Āuga ona o le Faatuputeleina o le Mataala

11, 12. Aisea na lē faailogaina ai e le Lotu Porotesano Toefuataina le toe amataina o le tapuaiga moni?

¹¹ Ina ua mavae senituri o faiga lē tonu a le Lotu Katoliko Roma, na faailoa atu e tagata o le Lotu Toefuataina lo latou lē fiafia i lenei mea i le 16 o senituri. Ae na leʻi faailogaina ai i lena mea se toe amataina o le tapuaiga moni. Aisea e leʻi faapea ai?

¹² E ui lava ina iai ni nai vaega o le Lotu Porotesano na saoloto mai le pulega a Roma, ae na latou tauaveina pea le tele o aʻoaʻoga autū ma faiga o le faaaposetasi—le talitonuga o se vasega faapitoa o taitailotu, faapea foi le talitonuga i le Tolutasi, le ola pea o le solu, ma le faapuapuagatia e faavavau pe a oti. Ma, i le pei o le Lotu Katoliko Roma, sa latou faaauau ona avea pea i latou ma vaega o le lalolagi, i le faifai mea vavalalata ma faiga faapolotiki. O lea sa latou manatu ai e teena so o se faatalitalia o le afio mai o Keriso o se Tupu.

13. (a) O le ā e faaalia ai na pele moni lava i nisi tagata le Afioga a le Atua? (e) I le gasologa o le 19 senituri, o le ā le mea na tupu na sili ona mataina i nisi o ē na faapea mai o Kerisiano? (i) Aisea na toatele ai na oo i le lē fiafia?

¹³ Peitai, na fetalai Iesu e faapea, pe a mavae le maliliu o le au aposetolo, o le a faaauau pea e suli moni o le Malo (o ē na ia faatusaina i saito) ona tutupu aʻe faatasi ma le au faafia Kerisiano (po o, titania) seia oo i le taimi o le seleselega. (Mataio 13:29, 30) Tatou te lē mafaia i aso nei ona lisiina ma le mautinoa i latou uma o ē ua manatu i ai le Matai o ni saito. Ae e aogā ona mātau faapea, i le faagasologa o senituri lona 14, 15, ma le 16, sa iai ni tagata na lamatia o latou ola ma o latou saolotoga, a o taumafai e faaliliuina le Tusi Paia i le gagana a tagata lautele. O isi e lē gata ina latou taliaina le Tusi Paia o le Afioga a le Atua, ae na latou teena foi le Tolutasi ona e lē faale-Tusi Paia. O nisi na latou teena le talitonuga i le ola pea o le solu ma le faapuapuagatiaina i le afi i seoli ona ua matuā lē ogatasi lava ma le Afioga a le Atua. E lē gata i lea, i le gasologa o le senituri lona 19, na amata ai e ni vaega i le Iunaite Setete, Siamani, Egelani, ma Rusia, ona faaleo mai le talitonuga maumaututu e faapea ua matuā latalata le taimi o le toe afio mai o Keriso, o se āuga lena o le faateleina o a latou suesuega i le Tusi Paia. Ae o le tele o mea na latou faatalitalia, sa oo ai i ni lē fiafia. Aisea? O le tele lava, talu ai na latou soona faalagolago tele atu i tagata, ae na lē tele se faalagolago i le Tusi Paia.

Le Faamaoniga o le Mataala o i Latou Nei

14. Faamatala mai le auala na feagai ai C. T. Russell ma ē na latou auaufaatasi, i le suesueina o le Tusi Paia.

¹⁴ Ona oo lea i le 1870, na faavae ai e Charles Taze Russell ma nisi na latou auaufaatasi, se vaega mo le suesueina o le Tusi Paia i Allegheny, i Pennsylvania. E lē o i latou uluai tagata na iloaina le tele o upu moni o le Tusi Paia na latou maua, ae ina ua suesue, na latou faia ai ma masani le tilofaia maeaea o mau uma o loo iai i se fesili sa fesiligia.a O lo latou sini, e lē ina ia suʻe ni mau e faamaonia ai se manatu na muai fafau, ae ina ia faamautinoa sa latou faia ni faaiuga na ogatasi ma mea uma o loo taʻua e le Tusi Paia i lea mataupu.

15. (a) O le ā na oo ina iloatino e isi e ese mai i le uso o Russell? (e) O le ā na faailogaina ai le ese o Tagata Aʻoga o le Tusi Paia mai ia i latou nei?

¹⁵ Sa iai nisi na muamua atu ia i latou na, sa latou ioe e faapea, o le a afio lē vaaia mai Keriso, o se agaga. O nisi na manatu, o le autū o le toe afio mai o Keriso, e lē ina ia susunuina le lalolagi ma faamutaina uma le olaga faaletagata, ae, ina ia faamanuiaina aiga uma o le lalolagi. Sa iai foi nisi na talitonu e faapea, o le tausaga e 1914 o le a faailogaina ai le iuga o Taimi o Nuu Ese. Ae i Tagata Aʻoga o le Tusi Paia o ē sa auaufaatasi ma le uso o Russell, sa sili atu ia i latou le tāua o nei mea i lo na o ni manatu mo se talanoaga faalelotu. Sa ola aʻe ai o latou olaga i nei upu moni ma na lauiloa atu ai i latou i malo uma i se tulaga na sili ona mataina i lena vaitaimi.

16. I le tausaga e 1914, aisea na tusi ai le uso o Russell e faapea: “O loo tatou iai i se vaitau o tofotofoga”?

¹⁶ Ae sa manaomia pea ona latou mataala. Aisea? O se faaaoaoga, e ui lava sa latou iloa o le 1914 na faailogaina e le valoaga a le Tusi Paia, ae sa latou lē mautinoa lelei po o le ā tonu lava le mea o le a tupu ai i lena tausaga. Sa avea ai lena mea ma tofotofoga ia i latou. I Le Olo Matamata faa-Peretania o Novema 1, 1914, na tusi ai le uso o Russell e faapea: “Seʻi o tatou manatua, o loo tatou iai i se vaitau o tofotofoga. . . . Afai o iai so o se mafuaaga o le a ono toe faamaamulu ai se tasi i lona talitonuga i le Alii ma Lana Upu Moni, ma mou atu ai lona faataulagaina mo le Galuega a le Alii, o lona uiga la, e lē o le alofa moni mo le Atua sa iai i lona loto na uunaia ai lona fiafia i le Alii, ae o se isi mea; atonu sa faamoemoe ona o le taimi ua puupuu; o lona uiga sa na ona tuutoina atu mo se taimi patino.”

17. Na faapefea ona tausisia pea le paleni faaleagaga o A. H. Macmillan, ma isi e pei o ia?

¹⁷ O nisi na latou lafoaia le auaunaga ia Ieova i tuā i inā. Ae sa leʻi faapena A. H. Macmillan. I tausaga mulimuli ane, na ia tausao mai ai e faapea: “I nisi taimi, ua sili atu ona mautinoa lo tatou faatalitalia o se taimi patino, na i lo o le faamautinoaga a le Tusi Paia.” O le ā na fesoasoani ia te ia e tausisia ai pea lona paleni faaleagaga? Na ia iloatino, e pei ona ia faapea mai, “ina ua lē faataunuuina na mea na faatalitalia, sa leʻi suia ai fuafuaga a le Atua.” Na ia taʻua atili: “Na ou iloa e tatau ona tatou taʻutino o tatou sese ma faaauau ona saili atu i le Afioga a le Atua mo nisi faamalamalamaga.”b O le loto maulalo na faatagaina ai e na uluai Tagata Aʻoga o le Tusi Paia le Afioga a Atua, ina ia toe fetuunai ai o latou manatu.—2 Timoteo 3:16, 17.

18. Na faapefea e le mataala faa-Kerisiano ona selesele mai ai aogā auiluma i le mataupu o le lē avea ma vaega o le lalolagi?

¹⁸ I tausaga na mulimuli mai, na leʻi faaitiitia ai lo latou manaoga ina ia mataala pea. E mautinoa, na latou iloa, sa lē tatau ona iai se vaega a Kerisiano i le lalolagi. (Ioane 17:14; Iakopo 4:4) I le ogatusa ma lena mea, na latou lē aufaatasi atu ai ia Kerisinetoma i le faamamaluina o Malo Sosoo e avea ma sui faapolotiki o le Malo o le Atua. Ae ina ua oo i le 1939, na faatoʻā latou manino ai loa i le mataupu o le solitu faa-Kerisiano.—Tagai i Le Olomatamata faa-Peretania o Novema 1, 1939.

19. O ā aogā ua iu i ai le faafoeina o le faapotopotoga ona o le mataala pea o le faalapotopotoga?

¹⁹ Sa leai lava sa latou vasega o ni faifeau, e ui ina manatu nisi toeaina tofia e faapea, na pau lava le galuega sa faatalitalia i latou e faia o le talaʻi atu lea i le faapotopotoga. Peitai ane, ona o se faanaunauga tinou ina ia pipii mau atu pea i le Tusi Paia, na toe tilofaia ai e le faalapotopotoga le vaega a toeaina e tusa ai o le faamalamalamaga a le Tusi Paia, ma sa faia pea lava pea e ala mai i mataupu i Le Olomatamata Ona faia ai lea o ni suiga faalefaalapotopotoga ina ia ogatasi ma mea o loo faaalia mai i le Tusi Paia.

20-22. Ua faapefea ona agaigai i luma sauniuniga vavave a le faalapotopotoga aoao i le faataulauina o le galuega na valoia o le folafolaina o le Malo i le lalolagi atoa?

²⁰ Sa faia e le faalapotopotoga aoao ni sauniuniga vave ina ia faataulauina atoatoa ai le galuega sa faataatia mai e le Afioga a le Atua mo o tatou aso. (Isaia 61:1, 2) I le ā le mamao sa tatau ona oo atu i ai le folafolaina o le tala lelei i o tatou aso? Na fetalai Iesu: “Ia muai talaʻiina foi le tala lelei i nuu uma lava e ao ai.” (Mareko 13:10) E masani lava i le vaaiga faaletagata ona foliga atu ai e lē mafai ona faataunuuina lena tiute.

²¹ Peitai, ona o le mautinoa ia Keriso o ia o le Ulu o le faapotopotoga, ua agaʻi ai pea i luma le vasega o le auauna faamaoni ma le mafaufau. (Mataio 24:45) I le faatuatua ma le mausali, ua latou faasino atu ai i tagata o Ieova le galuega e ao ona faia. Mai le 1919 ma faasolo mai ai, na faamamafa atili atu ai pea manatu i le faiva i le fanua. Sa lē faigofie i le toatele le ō atu mai lea fale i lea fale ma talanoa atu i tagata latou te lē masani i ai. (Galuega 20:20) Ae o mataupu o suesuega e pei o le “Ua Faamanuiaina Ē e Lē Fefefe” (i le 1919) ma le “Ia Loto Tetele” (i le 1921) na fesoasoani i nisi ina ia amata ai i le galuega, faatasi ma le faatuatua atu ia Ieova.

²² O le talosaga i le 1922, ina ia “faalauiloa, faalauiloa, faalauiloa, le Tupu ma lona malo,” na saunia ai se uunaiga manaomia ina ia tuuina atu i lenei galuega le faasilisilia e tatau ona iai. Mai le 1927 ma faasolo mai ai, na tuuesea ai toeaina o ē na latou lē taliaina lena avega tauave faale-Tusi Paia. Pe tusa o le taimi lava foi lena, na tofia ai sui femalagaai o le Sosaiete, o ē na aauina atu i isi atunuu, ina ia avea ma faatonu i le auaunaga i itumalo, e tauaaoina atu faatonuga totino i tagata talaʻi i le auaunaga i le fanua. Sa lē mafai e tagata uma ona paeonia, ae pe a oo i faaiuga o vaiaso, e toatele na latou matuā faaaogāina le aso atoa i le auaunaga, e amata mai lava i le taeaopo, ona malōlō puupuu lea mo se sanuisi, ma toe faaauau ai i le auaunaga seia oo lava ina latalata ina po. O taimi mataina na o le tuputupu aʻe faatiokarate, ma e tele se aogā ia i tatou pe a toe manatunatu i le auala na taitaia ai e Ieova ona tagata. O loo faaauau pea ona ia faia faapea. Faatasi ma ana faamanuiaga, o le a oo atu ai lava le galuega o le talaʻia o le tala lelei o le Malo ua faavaeina, i se faaiuga manuia.

Po o E Mataala Pea?

23. E tusa ai ma le alofa faa-Kerisiano ma le vavae ese mai le lalolagi, e mafai faapefea e i tatou taitoatasi ona faataitaia atu e faapea o loo tatou mataala pea?

²³ I le tali atu i le taitaiga a Ieova, ua faaauau ai pea ona lapataia i tatou e lana faalapotopotoga ina ia nofouta i faiga ma amioga e ono mataulia ai i tatou o se vaega o le lalolagi, ma oo ai i se lamatiaga o le tafiesea faatasi atu ai. (1 Ioane 2:17) Ma le talafeagai, e manaomia e i tatou taitoatasi ona mataala e ala i le tali atu i taitaiga a Ieova. Ua tuuina mai foi e Ieova ia i tatou faatonuga e faatatau i le ola faatasi ma galulue faatasi. Ua fesoasoani lana faalapotopotoga ia i tatou ina ia talisapaia le uiga moni o le alofa faa-Kerisiano. (1 Peteru 4:7, 8) O lo tatou mataala pea e manaomia ai lo tatou taumafai vilivilitai e faatatauina lenei fautuaga, e ui lava i vaivaiga faaletagata.

24, 25. I ā vala matuā tāua e tatau ona tatou mataala ai pea, faatasi ma le ā le faamoemoe o loo tulimatai atu i ai?

²⁴ Ua faaauau pea ona faamanatu mai ia i tatou e le auauna faamaoni ma le mafaufau e faapea: “Ia e faatuatua ia Ieova ma lou loto atoa; a e aua le faalagolago i lou lava atamai.” (Faataoto 3:5) “Ia tatalo e le aunoa.” (1 Tesalonia 5:17) Ua fautuaina i tatou ina ia aʻoaʻo e faavae aʻe a tatou faaiuga i le Afioga a le Atua, ina ia avea lenei afioga o ‘se sulu i o tatou vae ma le malamalama i o tatou ala.’ (Salamo 119:105) Ua faalaeiauina ma le alofa i tatou ina ia faamuamua pea i o tatou olaga le talaʻiina o le tala lelei o le Malo o le Atua, o le galuega lea na valoia e Iesu mo o tatou aso.—Mataio 24:14.

²⁵ Ioe, e mautinoa lava o loo mataala le auauna faamaoni ma le mafaufau. E manaomia foi e i tatou taitoatasi ona mataala pea. O le iuga o le faia faapea, tau ia ina ia avea i tatou o nisi o i latou na o ē e tutū ua faamaonia atu i luma o le Atalii o le tagata pe a afio mai o ia e faaoo mai le sala faafaamasinoga.—Mataio 24:30; Luka 21:34-36.

[Faaopoopoga i lalo]

I le Autaluga

◻ E pei ona faaalia i le Mataio 24:42, aisea e manaomia ai ona tatou mataala pea?

◻ Na faapefea ona tausisia e Iesu ma ona soʻo o le uluai senituri le mataala faaleagaga?

◻ Talu mai le 1870, o ā ni mea ua faia ona o le mataala pea o auauna a Ieova?

◻ O le ā o le a faamaonia atu ai o loo tatou taitoatasi ma mataala pea?

[Ata i le itulau 23]

Na tele pea mea na faia e Iesu i le galuega na tofia atu i ai e lona Tamā. Na ia tatalo foi faatauanau

[Ata i le itulau 24]

O Charles Taze Russell i ona tausaga faaiuiu

[Ata i le itulau 25]

Ua silia i le 4,700,000 ē folafolaina le Malo o loo maelega i le lalolagi atoa