Ia Mataala Pea i ‘le Taimi o le Iʻuga’
“Ia outou, ina mataala ia . . . auā tou te le iloa pe oo mai afea ia aso.”—MAREKO 13:33.
1. E ao faapefea ona tatou tali atu a o folasia mai mea tutupu faamaniti tino i lenei ‘taimi o le iʻuga’?
AO FOLASIA mai mea tutupu faamaniti tino i lenei ‘taimi o le iʻuga,’ pe ao faapefea ona tali atu i ai Kerisiano? (Tanielu 12:4) Ua lē o tuua i latou i le fememeai. Na fofogaina mai e Iesu se valoaga e aofia ai le faailoga tuufaatasi lea o loo faagasolo ona faataunuuina i lenei 20 senituri. Sa ia valoia le tele o vala e faailogaina ai lenei vaitaimi talu mai le 1914 o se vaitaimi tulagaese. I le iloa lelei o le valoaga a Tanielu e uiga i ‘le taimi o le iʻuga,’ na faaiʻuina ai e Iesu lana lava valoaga sili, i le uunaia o ona soʻo ina ia ‘mataala pea.’—Luka 21:36.
2. Aiseā ua telē ai le manaoga ina ia mataala pea faaleagaga?
2 Aiseā e mataala ai? Auā o le taimi lenei e sili ona faigata i talafaasolopito o tagata. O Kerisiano la e lolo atu i le tautulemoe faaleagaga i lenei taimi, o le a matuā puapuagatia lava. Afai tatou te ola fifilemu pe faatagaina o tatou loto ina ia faamamafaina i popolega o le olaga, ua tatou iai la i se tulaga lamatia. Na lapatai mai Iesu ia i tatou i le Luka 21:34, 35 e faapea: “Ia outou, neʻi faamamafaina o outou loto, ma le faaniniva, ma le onā, ma le popole i mea a le olaga nei, neʻi faafuasei mai lea aso ia te outou. Auā e pei o se mailei ona oo mai ai i e nonofo uma lava i le fogāeleele uma.”
3, 4. (a) O le ā na uiga i ai Iesu ina ua fetalai faapea o le a oo faafuaseʻi mai i tagata le aso o le toasa o le Atua “e pei o se mailei”? (e) Aiseā o le a puʻea faafuaseʻi ai i lena aso tagata lautele ae semanū e lē o tataoina e le Atua le mailei?
3 Sa iai se mafuaaga lelei na fetalai ai Iesu faapea o le a ‘faafuaseʻi mai le aso o Ieova ia i tatou e pei o se mailei.’ E masani lava ona iai i se mailei se matāsele, ma e faaaogāina lea e puʻe ai ni manu felelei po o ni manu vaefa. Ua iai i se mailei se uto, ma o le a mafiti lea uto pe afai e tu ai so o se tasi. Ona selea loa lea i le mailei, ma puʻea ai se tasi. E matuā faafuaseʻi lava ona tutupu o na mea uma. Na fetalai Iesu faapea, i se uiga faapena, o le a maofa ai ma puʻea ai ē ua lē o toe gaoioi faaleagaga i le “aso o le toasa” o le Atua.—Faataoto 11:4.
4 Po o Ieova ea le Atua, o lē na te tataoina le mailei mo tagata? Leai, na te lē o faatalitalia ina ia puʻea faamanu i ofaga tagata ma faaumatia ai i latou. Peitai, o le a puʻea tagata lautele i lena aso, ona latou te lē o manatunatu e faamuamua le Malo o le Atua. Ua latou sailia le olaga i a latou lava auala, ae galo ai le uiga o taualumaga o loo siomia ai i latou. Peitai, e lē tolopoina ai i lenei mea le faasologa a le Atua. Ua iai lana lava taimi atofaina mo le faaleleia o mea. Ma, i le alofa mutimutivale, ua ia lē tuu pogisaina ai le fanau a tagata e uiga i lana faasalaga o loo fotuai mai.—Mareko 13:10.
5, 6. (a) Ona o le faasalaga o loo fotuai mai, o le ā le sauniuniga alofa ua faia e Lē na Foafoaina Mea mo foafoaga faaletagata, ae o le ā le iʻuga lautele? (e) O le ā o le a iloiloina, e fesoasoani ai ia i tatou ina ia mataala pea?
5 O lenei uluai lapataiga, o se sauniuniga alofa lea a Lē sili na Foafoaina Mea, o lē e naunau mai mo le lelei o foafoaga faaletagata i inei i lona tulaga aao faafaatusa. (Isaia 66:1) E pele ia te ia i latou o loo aināina ai le nofoaga ua taʻua o loo tutū ai ona aao. O lea e ala i ana sāvali ma ona sui faalelalolagi, ua ia lapataia ai i latou i mea o le a tutupu ia i latou i le lumanai. (2 Korinito 5:20) Peitai, e ui i na lapataiga uma ua avatu, ae o le a faafuaseʻi lava ona oo mai na mea tutupu i le aiga faaletagata, e faapei ua latou tutū i se mailei. Aiseā? Auā o le toatele o tagata o loo momoe faaleagaga. (1 Tesalonia 5:6) E na o sina vaega toaitiiti lava o loo utagia le lapataiga ma o le a faasaoina atu i le lalolagi fou a le Atua.—Mataio 7:13, 14.
6 E mafai la faapefea ona tatou mataala pea i lenei taimi o le iʻuga ina ia faitaulia faatasi ai ma i latou o ē o le a faasaoina? Ua saunia e Ieova le fesoasoani e manaomia. Seʻi tatou matauina la ni mea se fitu e mafai ona tatou faia.
Tetee atu i Faatosinaga
7. O le ā le lapataiga na aumaia e Iesu e uiga i faatosinaga?
7 Muamua, e tatau ona tatou tetee atu i faatosinaga. Na fetalai Iesu i le Mataio 24:42, 44, e faapea: “O lea, ia outou mataala ai; auā tou te le iloa po o le fea itu aso e sau ai lo outou Alii. O le mea lea ia outou nofo sauni ai; auā o le itu aso tou te le manatunatu ai e sau ai le Atalii o le tagata.” O le gagana sa faaaogā e Iesu i inei, e faaalia ai faapea i lenei taimi faigata, o le a matuā tele ai lava faatosinaga, ma e mafai ona iʻu atu ia faatosinaga i le faaumatiaga. I ona po o Noa, sa tele mea na pupū i ai tagata. O le iʻuga, sa “le iloa” e tagata na tosina ese le mea na tupu, ma tafiaesea ai i latou uma i le Lolo. Ua fetaui lelei ai la ona lapatai mai Iesu: “E faapea foi pe a sau le Atalii o le tagata.”—Mataio 24:37-39.
8, 9. (a) E mafai faapefea e sailiga masani o le olaga ona tosina ese ai i tatou i se tulaga mataʻutia? (e) O ā lapataiga na aumaia e Paulo ma Iesu?
8 Ia teu foi i manatu faapea, i lana lapataiga i le Luka 21:34, 35, sa talanoaina ai e Iesu ni vala masani o le olaga, e pei o le taumafa, inu, atoa ma le popole i mea e tausia ai. E aogā na mea i tagata uma, e aofia ai soʻo o le Alii o Iesu. (Faatusatusa i le Mareko 6:31.) Atonu e lē leaga ia mea, ae a faatagaina, e mafai ona faatosina ese ai i tatou, ia tatou pupū atu i ai, ma faapea ona maua ai i tatou i le mataʻutia o le tautulemoe faaleagaga.
9 O le mea lea, ia aua ai neʻi galo ia i tatou le mea e silisili ona tāua—o le mauaina lea o le faamaoniga a le Atua. Na i lo le soona aafia fua i mea masani o le olaga, tau lava ina ia tatou faaaogāina na mea i se tulaga faatapulaa e manaomia ina ia tatou tumau ai. (Filipi 3:8) E lē tatau ona faalavelave fua i mea tāua o le Malo. E pei ona faapea mai le Roma 14:17, “o le malo o le Atua, e le o mea e ʻai ma mea e inu; a o le amiotonu, ma le filemu, ma le olioli i le Agaga Paia.” Manatua upu a Iesu ina ua ia faapea mai: “Ia outou muai saili [pea] le malo o le Atua ma lana amiotonu; ona faaopoopoina atu lea o ia mea uma ia te outou.” (Mataio 6:33) E lē gata i lena, na folafola mai e Iesu i le Luka 9:62 e faapea: “O lē tago lona lima i le suotosina, ma tepa i tua, e le tatau ia i le malo o le Atua.”
10. O le ā le mataʻutia o loo iai pe afai e lē taulai tonu atu la tatou vaai i le sini?
10 I ni upu faafaatusa, o le taimi lava e amata ai ona tatou suatia, e tatau ai ona tatou faaauau pea i se laina saʻo. O le tagata suapalapala e tepa i tua, na te lē suatia se ala saʻo. Ua tosina ese o ia ma e faigofie lava ona sese ese pe faavaatuʻia i nisi o toʻatugā. Tau lava ina ia aua neʻi o tatou pei o le avā a Lota, o lē na toe tepa i tua ma lē taunuu ai i le saogalemu. E manaomia ona tausisi pea la tatou vaai ia taulai tonu atu i le sini. Ma ina ia faia faapea, e tatau ona tatou tetee atu i faatosinaga.—Kenese 19:17, 26; Luka 17:32.
Ia Tatalo ma le Matuā Naunautai
11. O le ā na faamamafa e Iesu ina ua uma ona lapataia i tatou e uiga i le mataʻutia o faatosinaga?
11 Peitai, e iai isi mea e mafai ona tatou faia ina ia mataala ai pea. O le mea tāua lona lua: Ia tatalo ma le matuā naunautai. Ina ua uma ona lapataia i tatou i le tosina ese atu i sailiga masani o le olaga, na aumaia ai e Iesu le fautuaga lenei: “O lea ia outou mataala ai ma tatalo e le aunoa, ina ia taʻuaogaina outou e sao mai ia mea uma ua tāli oo mai, ma ia tutū i luma o le Atalii o le tagata.”—Luka 21:36.
12. O le ā le ituaiga o tatalo e manaomia, ma o le ā le iʻuga?
12 O lea, e tatau ai ona tatou faatoga atu e lē aunoa e uiga i le mataʻutia o lo tatou tulaga ma lo tatou manaoga ina ia mataalia. Seʻi o tatou tatalo atu la i le Atua faatasi ai ma olega ma le naunautai. Ua faapea mai Paulo i le Roma 12:12: “Ia finafinau i le tatalo.” Ma tatou te faitau ai i le Efeso 6:18, e faapea: “Ia outou tatalo i le Agaga i aso uma lava i talotaloga ma faatoga uma; ia outou mataala pea i lenei lava mea.” O lenei mea, e lē na ona ofoina atu o tatalo i se tulaga faatopetope e pei e leai sona aogā tele. O lo tatou lava ola ua lamatia. O le mea lea e manaomia ai ona tatou talosaga atu ma le naunautai mo le fesoasoani mai le Atua. (Faatusatusa i le Eperu 5:7.) O le auala lena e faatumauina ai i tatou lava i le itu a Ieova. E leai lava se isi mea e sili atu ona aogā e fesoasoani mai ia i tatou i le faataunuuina o lenei mea, na i lo o lo tatou ‘faia o talotaloga i taimi uma.’ Ona faapea ai lea ona tausia o i tatou e Ieova i se tulaga o le tiotio mataalia. Maeu la le tāua, o le finafinau e tatalo.
Pipii Mau i le Faalapotopotoga a le Atua ma Lana Galuega
13. O le ā e manaomia ona tatou auaufaatasi ai ina ia mataala ai pea?
13 Tatou te mananao e sao mai nei mea uma o le a oo mai i le lalolagi. Tatou te mananao foi e tutū atu i luma o le Atalii o le tagata, ua mauaina lana faamaoniga. Ina ia faia faapea, o loo iai se mea lona tolu e mafai ona tatou faia: Ia pipii mausalī i le faalapotopotoga faatiokarate a Ieova. E manaomia ona tatou auaufaatasi ma le lē mataofiofia i lena faalapotopotoga ma auai i ana gaoioiga. I lenei auala, o le a lē masese ai ona matauina i tatou lava o ni Kerisiano o ē o loo mataala.
14, 15. (a) O le auai i le ā le galuega, e fesoasoani ai ia i tatou ina ia mataala pea? (e) O ai na te filifilia le taimi e faamaeʻaina ai le galuega talaʻi, ma e ao faapefea ona tatou manatu i ai? (i) A mavae le puapuaga tele, o le ā o le a tatou iloaina pe a tatou toe tepa i tua i le talaʻiga sa faia o le Malo?
14 E fesootai vavalalata i ai le mea lona fa e mafai ona fesoasoani ia i tatou ina ia mataala ai pea. E tatau ona tatou auai ma i latou o ē o loo lapataia tagata e uiga i le oo mai o le iʻuga o lenei faiga o mea. O le a lē oo mai le iʻuga atoatoa o lenei faiga tuai o mea seʻi vaganā ua talaʻiina atu “lenei tala lelei o le malo” i le mamao ua fuafuaina ai e le Atua e Ona le Malosi Uma lava. (Mataio 24:14) E lē o Molimau a Ieova latou te filifilia le taimi e faamaeʻaina ai lenei galuega talaʻi. O loo ia Ieova lava ia lena aiā. (Mareko 13:32, 33) E ui i lea, ua tatou filifili e galulue mamafa i le tele e mafai ai ma le umi e manaomia ai ona talaʻi atu, e uiga i le pulega e sili ona lelei e mafai ona maua e le fanau a tagata, le Malo o le Atua. A o tatou auai pea i lenei galuega, o le a pa mai le “puapuaga tele.” (Mataio 24:21) I taimi uma lava i le lumanai, o le a mafai ai e i latou o ē faasaoina, ona toe tepa i tua ma faamautinoa mai ma le loto e faapea o Iesu Keriso e lē o se perofeta pepelo. (Faaaliga 19:11) O le a faataunuuina ai le galuega talaʻi i le tele e sili mamao atu na i lo le mea sa faatalitalia e i latou o loo auai.
15 E tusa ai ma lea itu, i le taimi e sili ona tāua pe a faataunuuina lenei galuega mo le finagalo malie o le Atua lava ia, e aliali mai o le a toatele atu nisi o le a auai na i lo o se isi lava vaitaimi ua mavae. Maeu lo tatou loto faafetai i le faia o so tatou sao i lenei galuega tele! Ua faamautinoa mai ia i tatou e le aposetolo o Peteru e faapea ua “le finagalo [Ieova] ia fano se tasi, a ia oo uma lava i le salamo.” (2 Peteru 3:9) O le iʻuga, ua silisili atu ai ona gaoioi le malosi galue o le Atua e Ona le Malosi Uma lava i aso nei na i lo muamua, ma ua faanaunau Molimau a Ieova e auai pea i lenei galuega o loo uunaia e le agaga. O lea la, ia pipii mau ai i le faalapotopotoga a Ieova, ma ia faateleina au galuega i lana faiva i le lautele. O le a avea lenei o se fesoasoani e te mataala ai pea.
Faia se Iloiloga Totino
16. Aiseā e ao ai ona tatou faia se iloiloga totino o lo tatou tulaga faaleagaga o loo iai nei?
16 O loo iai se mea lona lima e mafai ona tatou faia ina ia mataala ai pea. E ao ia i tatou taitoatasi ona faia se iloiloga totino o o tatou aiaiga o loo iai nei. Ua sili atu ona talafeagai le faia faapea i le taimi nei na i lo muamua. E manaomia ona tatou faamaonia po o le itu a ai o loo tatou tutū mausalī ai. Na faapea mai Paulo i le Kalatia 6:4: “Ia taitoatasi ma faamasino i lana lava galuega.” Ia faia se iloiloga totino i le ōgatasi ma upu a Paulo i le 1 Tesalonia 5:6-8: “Aua neʻi tatou momoe ai faapei o isi, a ia tatou mataala, ma ia faautauta. Auā o e momoe, e momoe i latou i le po; o e inu ia onā, e onā i latou i le po; a o i tatou nei o e o le ao, ia faautauta i tatou, ia tatou oofu i le ufifatafata o le faatuatua ma le alofa, ma le puloutau o le faamoemoe i le ola.”
17. A faia se iloiloga totino, o ā fesili e ao ona fesili ifo ai ia i tatou lava?
17 Ae faapefea i tatou? A tatou iloiloina i tatou lava i le malamalama o le Tusi Paia, po o tatou iloaina ai ea o loo tatou mataala pea, i le mauaina o le faamoemoe o le faaolataga e pei o se puloutau? O i tatou ea o ni tagata o ē ua vavaeese atoatoa mai i le faiga tuai o mea ma ua lē toe aafia ai i ana taaʻiga? Faamata o ia i tatou moni lava le agaga o le lalolagi fou a le Atua? Po o tatou mataalia atoatoa ea i le mea o loo agaʻi atu i ai lenei faiga o mea? Afai o lea, o le a lē puʻea la i tatou i le aso o Ieova e peiseaī o i tatou o ni tagata gāoi.—1 Tesalonia 5:4.
18. O ā isi fesili atonu e manaomia ona fesili ifo ai ia i tatou lava, ma o ā iʻuga?
18 E ui i lea, ae faapefea pe a faaalia mai i la tatou iloiloga totino faapea o loo tatou tauivi ina ia maua se olaga solosolo lelei, e manaia, fiafia, ma taugalemū? Ae faapefea pe afai tatou te iloa, ua faasolo ina mamafa o tatou mata faaleagaga i le ivā ma momoe ai? Pe o tatou iai ea i se tulaga moomoo, e fia tuliloaina nisi o mea matalasi faalelalolagi? Afai o lea, seʻi o tatou ala maia!—1 Korinito 15:34.
Mafaufau Loloto i Valoaga ua Faataunuuina
19. O ā nisi o valoaga ua tatou vaaia le faataunuuina?
19 Ua tatou oo mai nei i le mea lona ono e fesoasoani ia i tatou ina ia mataala ai pea: Ia mafaufau loloto i le tele o valoaga ua faataunuuina i lenei taimi o le iʻuga. Ua uma ona tatou laasia le tausaga lona 77, talu mai ona faaiʻuina taimi atofaina o nuu ese i le 1914. A tatou toe tepa atu i tua i le tolu kuata o le senituri, tatou te iloa ai le faataunuuina faasolosolo mai o lea valoaga ma lea valoaga—le toe atiina aʻe o le tapuaiga moni; le faasaoina mai o le vaega totoe faauuina, faatasi ma a latou aumea, i totonu o se parataiso faaleagaga; le talaʻia o le tala lelei o le Malo i le lalolagi atoa; ma le aliaʻi mai o le motu o tagata e toatele. (Isaia 2:2, 3; mataupu 35; Sakaria 8:23; Mataio 24:14; Faaaliga 7:9) Ua faaeaina ai foi le suafa silisili o Ieova ma lana pule aoao i le vateatea, atoa ma le faateleina o le toʻaitiiti e fai ma toʻaafe ma le nuu faatauvaa e avea ma nuu malosi, a o faatelevaveina e Ieova i ona lava taimi. (Isaia 60:22; Esekielu 38:23) Ma ua lalata atu nei, mea na vaaia e Ioane i le tusi o Faaaliga i lo latou taualuga.
20. O le ā le talitonuga maumauai ua maua e Molimau a Ieova, ma ua faamaonia moni ai lava o i latou o ā?
20 O le mea lea, ua talitonu maumauai ai Molimau a Ieova i le saʻo o lo latou malamalamaga i le uiga o taualumaga o le lalolagi talu mai le 1914, e sili atu ai na i lo muamua. I le iai o sea talitonuga, ua faamaonia ai le avea o i latou ma meafaigaluega i aao o le Atua e Ona le Malosi Uma lava. O i latou ia ua tofia ina ia faaooina atu le feau mai le Atua i lenei taimi e sili ona tāua. (Roma 10:15, 18) Ioe, ua taunuu moni lava afioga a Ieova mo le taimi o le iʻuga. (Isaia 55:11) I le tali atu i lenei mea, e ao ai ona faagaeeina i tatou ina ia faaauau pea seia oo ina tatou vaaia le faataunuuga faaiʻu o valoaga uma lava a le Atua e Iesu Keriso.
Ua Lalata Tele mai le Faaolataga Na i lo le Taimi na Avea ai i Tatou ma Ē Talitonu
21. O le ā le fesoasoani lona fitu ua tatou maua ina ia mataala ai pea faaleagaga?
21 I le faaiʻuga, o le fesoasoani lona fitu ina ia tatou mataala ai pea: Ia teu mau i le mafaufau, ua lalata tele mai lo tatou faaolataga na i lo le taimi muamua na avea ai i tatou ma ē talitonu. Ae e sili atu ai ona tāua, ua matuā lalata mai lava le taimi e taʻumamāina ai le pule silisiliese a Ieova ma le faapaiaina o lona suafa. O lea, ua sili atu ai ona faanatinati le manaoga ina ia mataala pea na i lo muamua. Ua tusia faapea e le aposetolo o Paulo: “Ina ua tatou iloa ona po, ua oo i le itu po e ala ai e na momoe; auā ua latalata nei ia te i tatou le ola, sa mamao ina o tatou uluai faatuatua. Ua leva le po, ua lata mai le ao.”—Roma 13:11, 12.
22. E ao faapefea i le lalata tele mai o lo tatou faaolataga ona aafia ai i tatou?
22 Ona ua lalata tele mai lo tatou faaolataga, e tatau ai la ona tatou mataala pea! E lē tatau ona tatou faatagaina ni faanaunauga totino pe faalelalolagi e taʻumāmāina ai lo tatou talisapaia mo mea o loo faia e Ieova mo ona tagata i lenei taimi o le iʻuga. (Tanielu 12:3) E manaomia ona tatou faaalia atili atu le finafinau na i lo muamua, ina ia aua ai neʻi o tatou liliu ese mai le ala ua folasia manino mai e le Afioga a le Atua mo i tatou. (Mataio 13:22) Ua faaalia manino mai e faamaoniga faapea, ua tuvae nei lenei lalolagi i ona aso e gata ai. E lē o toe mamao ona soloiesea loa lea ia lē toe iai e faavavau, ina ia faaavanoa ai mo se lalolagi fou amiotonu.—2 Peteru 3:13.
23. I le ā le auala o le a fesoasoani ai Ieova ia i tatou, ma o ā iʻuga faamanuiaina?
23 O lea la, seʻi o tatou mataala ai pea i taimi uma. E lē pei o le taimi muamua, seʻi o tatou mataalia ia po o fea o tatou iai i le gasologa o taimi. Manatua, o le a lē taitai ona tuulafoaia e Ieova lenei mataupu. Na i lo lena, o le a sili atu lona fesoasoani mai ia i tatou ina ia mataala pea i lenei taimi o le iʻuga. Ua leva le po. Ua lata mai le ao. O lea ia mataala ai pea! E lē o toe mamao ona tatou oo atu loa lea i le aso e sili ona matagofie o aso uma lava, a o faataunuuina e le Malo faa-Mesia le fuafuaga a Ieova mo le lalolagi!—Faaaliga 21:4, 5.
O ā Au Tali?
◻ O le ā na uiga i ai Iesu ina ua ia fetalai faapea o le a oo faafuaseʻi mai i tagata le aso o le toasa o le Atua “e pei o se mailei”?
◻ Aiseā e tatau ai ona tatou tetee atu i faatosinaga, ma e mafai faapefea ona tatou faia faapea?
◻ O le ā le ituaiga o tatalo e manaomia ina ia tumau ai pea i le mataala?
◻ O le ā le ituaiga o aufaatasiga e matuā tāua?
◻ Aiseā e faia ai se iloiloga totino o lo tatou tulaga faaleagaga?
◻ O le ā le vaega e faia e valoaga i lo tatou mataala pea?