Ia Lagolagosua iā Iesu lo Tatou Taʻitaʻi

1. O le ā le finagalo o Ieova i aso nei?

O LE finagalo o le Atua i aso nei, ia talaʻia le tala lelei o le Malo i le lalolagi uma. (Mare. 13:10; 1 Timo. 2:3, 4) O Ieova e ana lenei galuega. E tāua tele la le tuuina atu e Ieova o lenei galuega i lona Alo pele e na te taʻitaʻia. E tatou te mautinoa la o le a faataunuuina lenei galuega e tusa ma le finagalo o Ieova, a o leʻi oo mai le iʻuga.​—Mata. 24:14.

2. O le ā o le a tatou talanoaina i lenei suʻesuʻega?

² O le a tatou talanoaina i lenei suʻesuʻega le auala ua faaaogā ai e Iesu le “pologa faamaoni ma le faautauta” e saunia meaʻai faaleagaga, ma faamaopoopo ona soo e faia le galuega talaʻi e sili ona telē i le talafaasolopito. (Mata. 24:45) O le a talanoaina ai foʻi mea e mafai ona faia e i tatou taʻitoʻatasi, e lagolagoina ai Iesu ma le pologa faamaoni.

O LOO TAʻITAʻIA E IESU LE GALUEGA TALAʻI

3. O le ā le pule na tuuina atu iā Iesu?

³ O loo taʻitaʻia e Iesu le galuega talaʻi. E faapefea ona tatou iloa? A o leʻi afio Iesu i le lagi, na ia feiloaʻi ai ma nisi o ona soo faamaoni i se mauga i Kalilaia. Na ia fetalai atu iā i latou: “Ua tuuina mai iā te aʻu le pule uma i le lagi ma le lalolagi.” Mātau lana fetalaiga na sosoo ai: “O le mea lea, ia outou ō atu e fai tagata o nuu uma lava ma soo.” (Mata. 28:18, 19) O lea la, o se tasi o mea na tuuina atu iā Iesu le pule e fai ai, o le taʻitaʻia o le galuega talaʻi.

4. Aiseā e tatou te mautinoa ai o loo taʻitaʻia pea e Iesu le galuega talaʻi?

⁴ Na taʻua e Iesu, o le a faataunuuina le galuega talaʻi ma le faia o isi ma soo i “nuu uma.” O le a ia faatasi foʻi ma ona soo “i aso uma lava seʻia oo i le taufaaiʻuiʻuga o le faiga o mea a le lalolagi.” (Mata. 28:20) O na faamatalaga ua faailoa manino mai ai, e taʻitaʻia pea e Iesu le galuega talaʻi seʻia oo mai i o tatou aso.

5. O le ā la tatou vaega o loo faia i le faataunuuga o le Salamo 110:3?

⁵ E leʻi popole Iesu ina neʻi lē lava le ʻaufaigaluega i le taufaaiʻuiʻuga o le faiga o mea a le lalolagi. Na ia silafia o le a faataunuuina le valoaga lenei o loo i le Salamo: “E ofo atu ma le lotomalie e ou tagata i latou lava i le aso o le malosi o lau vaegaʻau.” (Sala. 110:3) Pe afai o loo faia sou sao i le galuega talaʻi, ua e lagolagoina la Iesu ma le pologa faamaoni, ma ua e fesoasoani i le faataunuuina o lenā valoaga. O loo faaauau pea ona faia lenei galuega, ae e iai luʻi.

6. O le ā se luʻi o loo fesagaʻia e tagata talaʻi o le Malo i aso nei?

⁶ O teteega o se tasi lea o luʻi o loo fesagaʻia e tagata talaʻi o le Malo. Ua faasalalau e ē ua liliuese mai i le upu moni, o taʻitaʻi lotu ma taʻitaʻi o malo, tala taufaasesē e faatatau i la tatou galuega. Pe a faasesēina o tatou tauaiga, tagata e tatou te masani ai ma ē e tatou te faigaluega faatasi i na tala, e latou te ono faamalosia i tatou e aua neʻi toe auauna iā Ieova ma aua neʻi toe talaʻi. I nisi atunuu, e tetee mai tagata e ala i le faafefe, puʻea ma faafalepuipui i tatou. E lē faateʻia ai i tatou i na gaoioiga. Na valoia e Iesu: “O le a inosia foʻi outou e nuu uma ona o loʻu igoa.” (Mata. 24:9) Pe a tatou feagai ma na teteega, e faamaonia ai ua tatou maua le finagalo malie o Ieova. (Mata. 5:11, 12) Ua faapogaia e le Tiapolo na teteega, peitaʻi, e sili atu ona malosi Iesu nai lo o ia. Ua mafai ona oo atu i tagata o nuu uma le tala lelei, ona o le fesoasoani a Iesu. Seʻi o tatou iloiloina ni faamaoniga.

7. O le ā se faamaoniga e te iloa ai ua faataunuuina le valoaga o loo i le Faaaliga 14:6, 7?

⁷ O le isi luʻi o loo fesagaʻia e tagata talaʻi o le Malo, o le eseese o gagana e tautatala ai tagata. Na faailoa atu e Iesu i le faaaliga na ia tuuina atu i le aposetolo o Ioane, o le a foʻia e le tala lelei lenā luʻi i o tatou aso. (Faitau le Faaaliga 14:6, 7.) E faapefea? Ua tatou tuuina atu i le tele o tagata le avanoa e tali mai ai i le feʻau o le Malo. I aso nei, ua mafai e tagata i le lalolagi aoao ona faitau i a tatou lomiga faale-Tusi Paia i la tatou Upega tafaʻilagi o le jw.org, lea o loo maua i le silia ma le 1,000 gagana. Na faataga e le Vaega Pule le faaliliuina o le tusi Se Olaga Fiafia e Faavavau!, i le silia ma le 700 gagana. O lenā tusi, o le meafaigaluega autū lea o loo tatou faaaogāina i le faia o isi ma soo. Ua mafai foʻi ona maua meaʻai faaleagaga e ala i vitiō ua faia i le gagana faataga. Ua maua foʻi lomiga i le gagana patupatu mo ē e pō le vaai. Ua tatou vaaia le faataunuuina o valoaga o le Tusi Paia. Ua aʻoaʻoina e tagata mai i “gagana uma a atunuu eseese” le “gagana mamā,” o le upu moni o le Afioga a le Atua. (Saka. 8:23; Sefa. 3:9) Ua mafai ona faataunuuina nei mea uma, ona o le taʻitaʻiga maufaatuatuaina a Iesu Keriso.

8. O ā iʻuga lelei o la tatou galuega talaʻi i aso nei?

⁸ I aso nei, e silia ma le 8,000,000 tagata mai i atunuu e 240, o loo auaufaatasi i le faalapotopotoga a Ieova. E faitau sefulu afe i latou e papatiso i tausaga taʻitasi. Peitaʻi, e lē o le mea e sili ona tāua o le toʻatele, ae o le mafai e na soo fou ona atiaʻe uiga faaleagaga po o “le tagata fou.” (Kolo. 3:8-10) O le toʻatele o tagata, ua latou lē toe faia amioga lē mamā, faiga sauā, faailoga tagata ma le lotonuu. Ua faataunuuina le valoaga i le Isaia 2:4, ua latou ʻlē toe aʻoaʻo foʻi i taua.’ E tatou te fesoasoani e tosina mai tagata i le faalapotopotoga a le Atua, a o tatou taumafai malosi e oofu i le tagata fou. E faamaonia atu ai foʻi o loo tatou mulimuli i lo tatou taʻitaʻi o Iesu Keriso. (Ioa. 13:35; 1 Pete. 2:12) E lē tutupu fua na suiga, auā o loo aumaia e Iesu le fesoasoani e tatou te manaʻomia.

TOFIA E IESU SE POLOGA

9. I le Mataio 24:45-47, o le ā na valoia e faatatau i le taimi o le iʻuga?

⁹ Faitau le Mataio 24:45-47. Na valoia e Iesu o le a ia tofia le “pologa faamaoni ma le faautauta” i le taimi o le iʻuga, e saunia meaʻai faaleagaga. E tatou te faatalitalia la lenā pologa e galue mamafa i aso nei, ma o le mea tonu lenā o loo faia e le pologa. Ua faaaogā e lo tatou taʻitaʻi se vaega toʻaitiiti o tane tofia, e saunia ʻmeaʻai faaleagaga i le taimi tatau’ mo tagata o le Atua ma ē e lotofiafia. E lē fia pule nei tane i le faatuatua o isi. (2 Kori. 1:24) E latou te amanaʻia o Iesu Keriso o le ʻtaʻitaʻi ma le taʻitaʻiʻau’ o ona tagata.​—Isa. 55:4.

10. O lē fea lomiga o loo faailoa atu i le ata na uunaʻia ai oe e auauna iā Ieova?

¹⁰ Talu mai le 1919, na saunia ai e le pologa faamaoni lomiga eseese lea ua maua ai e tagata e faaalia le fiafia le avanoa e aʻoaʻoina ai le Afioga a le Atua. I le 1921, na saunia ai e le pologa le tusi The Harp of God e fesoasoani ai i tagata e faaalia le fiafia e aʻoaʻoina mataupu faavae o le Tusi Paia. A o faagasolo taimi, na saunia ai isi lomiga. O le ā le lomiga na fesoasoani iā te oe e aʻoaʻo ai e faatatau i lo tatou Tamā i le lagi, ma alofa iā te ia? Po o le “Let God Be True,” O Le Upu Moni E Taʻitaʻia Ai i le Ola Faavavau, E Mafai Ona E Ola e Faavavau i Parataiso i le Lalolagi, Le Poto e Taʻitaʻia ai i le Ola e Faavavau, O ā Aʻoaʻoga Moni a le Tusi Paia?, O ā Aʻoaʻoga Mai i le Tusi Paia?, po o le tatou lomiga fou Se Olaga Fiafia e Faavavau!? O nei lomiga uma na saunia ina ia faia ai isi ma soo, ma o le mea tonu lenā na manaʻomia e tagata i lenā taimi.

11. Aiseā e matuā tāua ai lo tatou maua uma o meaʻai faaleagaga?

¹¹ E lē na o ē e faaalia le fiafia e latou te manaʻomia meaʻai aano faaleagaga. E tatou te manaʻomia foʻi meaʻai faaleagaga. Na tusi le aposetolo o Paulo: “O meaʻai aano e mo tagata matutua ia.” Na ia toe faaopoopo mai, o le faatatauina o nei meaʻai faaleagaga e fesoasoani iā i tatou ʻe iloa ai le mea saʻo ma le mea sesē.’ (Epe. 5:14) O se luʻi le faatatauina o tapulaa a Ieova e faatatau i amioga mamā, ona ua matuā faateteleina le amioleaga. E faamautinoa e Iesu e tatou te maua le malosi e manaʻomia, e auala mai i meaʻai susua faaleagaga. O le puna o nei meaʻai faaleagaga o le Afioga faagaeeina a le Atua, le Tusi Paia. Ua saunia e le pologa faamaoni nei meaʻai ma tufatufaina atu i lalo o le taʻitaʻiga a Iesu.

12. Ua faapefea ona tatou faaaʻoaʻo iā Iesu i le faamamaluina o le suafa o le Atua?

¹² Ua tatou faamamaluina le suafa o le Atua, e pei ona sa faia e Iesu. (Ioa. 17:6, 26) O se faataʻitaʻiga, i le 1931, na tatou faaaogāina ai le igoa o Molimau a Ieova, lea e faavae mai i le Tusi Paia. O le faia faapea, e faailoa atu ai e matuā tāua iā i tatou le suafa o lo tatou Tamā i le lagi. (Isa. 43:10-12) Talu mai Oketopa o lenā tausaga, na tusia ai i Olomatamata o masina taʻitasi le suafa o Ieova i le faavaa pito i luma. E lē gata i lea, ua toe tuu i le Tusi Paia​—O le Faaliliuga a le Lalolagi Fou le suafa o le Atua i vaega sa tatau ona iai. Maʻeu le matuā eseese ma lotu ua faapea mai o Kerisiano, lea ua aveesea le suafa o Ieova mai i le tele o a latou faaliliuga o le Tusi Paia!

O LOO FAAMAOPOOPO E IESU ONA SOO

13. E faapefea ona e mautinoa o loo faaaogā e Iesu le “pologa faamaoni ma le faautauta” i aso nei? (Ioane 6:68)

¹³ Ua faaaogā e Iesu le “pologa faamaoni ma le faautauta,” e atiaʻeina se faalapotopotoga mataʻina i le lalolagi e faaauilumaina le tapuaʻiga moni. O ā ni ou lagona e faatatau i lenā faalapotopotoga? Atonu e te mafaufau i upu a le aposetolo o Peteru ina ua tali atu iā Iesu: “O ai a matou ō i ai? Ua iā te oe upu o le ola e faavavau.” (Ioa. 6:68) Pe ana leai le faalapotopotoga a Ieova, faamata o fea ua tatou iai i lenei taimi? Ua faamautinoa e Keriso e fafagaina lelei faaleagaga i tatou, e ala i le faalapotopotoga a Ieova. Ua ia toleniina i tatou ina ia agavaa mo le talaʻia o le tala lelei. Ua ia fesoasoani foʻi iā i tatou e oofu i le “tagata fou,” ina ia faafiafiaina ai Ieova.​—Efe. 4:24.

14. O ā aogā o le avea ma vaega o le faalapotopotoga a Ieova i le taimi o le faamaʻi o le KOVITI-19?

¹⁴ O loo saunia e Iesu le taʻitaʻiga atamai i taimi o faigatā. Ua faamaonia le aogā o lenā taʻitaʻiga, ina ua amata le faamaʻi o le KOVITI-19. A o lē mautonu le toʻatele o tagata i le mea e fai, ua faamautinoa e Iesu ua tatou maua taʻiala manino e puipuia ai pea i tatou. Na faalaeiauina i tatou ia fai tali fofoga ma tausisi i le vā faatulagaina, pe a ō i nofoaga faitele. Na faamanatu atu foʻi i toeaina ina ia fesootaʻi e lē aunoa i tagata uma o le faapotopotoga, ma ia iloa le tulaga o o latou manaʻoga faaletino ma le faaleagaga. (Isa. 32:1, 2) Na tatou maua foʻi isi taʻiala ma faalaeiauga mai i lipoti a le Vaega Pule.

15. O ā taʻiala na tatou maua i le auala e faia ai sauniga ma le talaʻiga i le taimi o le faamaʻi, ma o ā iʻuga na maua ai?

¹⁵ I le taimi o le faamaʻi, na tatou maua ai foʻi faatonuga manino i le auala e faia ai a tatou sauniga ma le galuega talaʻi. Na vave lava ona tatou auai i sauniga faa-Kerisiano, fonotaga ma tauaofiaga, e faaaogā ai le Initaneti. Na amata foʻi ona tatou faaaogāina tusi ma telefoni e talaʻi atu ai. Ioe, na faamanuia e Ieova a tatou taumafaiga. Na lipotia mai e lālā le faatupulaʻia o le numera o tagata talaʻi. E toʻatele foʻi i latou na faalaeiauina i tala o mea na tutupu i lenā taimi.​—Tagaʻi i le pusa “O Loo Faamanuia e Ieova la Tatou Talaʻiga.”

16. O le ā ua tatou mautinoa i ai?

¹⁶ Na manatu nisi ua faasāsā naʻuā le faalapotopotoga i le taimi o le faamaʻi. Peitaʻi, na matuā faamaonia le atamai o taʻiala na tatou maua. (Mata. 11:19) A o tatou manatunatu i le auala alofa o loo taʻitaʻia ai e Iesu ona tagata, ua tatou mautinoa ai po o le ā lava le mea e tupu, o loo faatasi mai pea Ieova ma lona Alo pele.​—Faitau le Eperu 13:5, 6.

17. O ā ni ou faalogona i le galue ai i lalo o le taʻitaʻiga a Iesu?

¹⁷ Maʻeu le faamanuiaina o i tatou i le galulue i lalo o le taʻitaʻiga a Iesu! Ua avea i tatou ma vaega o se faalapotopotoga ua autasi e ui i le eseese o aganuu, atunuu, ma gagana e tautatala ai. Ua fafagaina lelei i tatou i meaʻai faaleagaga, ma toleni lelei foʻi mo le galuega talaʻi. Ua aʻoaʻoina i tatou taʻitoʻatasi e oofu i le tagata fou, ma faaalia le alofa o le tasi i le isi. E tele māfuaaga e tatou te mitamita ai i lo tatou taʻitaʻi o Iesu!