Mataupu Sefulufā
E Faapefea Ona Pulea e Ieova Lana Faalapotopotoga?
1. O le ā le faamatalaga e faatatau i le faalapotopotoga a Ieova, ua faaalia mai e le Tusi Paia, ma aiseā e tāua ai iā i tatou?
PE E iai se faalapotopotoga a le Atua? Ua taʻu mai iā i tatou e le Tusi Paia, e iai. I lana Afioga, ua ia faaalia mai ai iā i tatou ni nai vaaiga pupuu o le vaega mataʻina faalelagi o lenā faalapotopotoga. (Esekielu 1:1, 4-14; Tanielu 7:9, 10, 13, 14) E ui e lē mafai ona tatou iloa atu lenei vaega lē vaaia, ae ua matuā aafia ai lava tagata tapuaʻi moni i aso nei. (2 Tupu 6:15-17) E iai foʻi se vaega vaaia a le faalapotopotoga a Ieova i le lalolagi. Ua fesoasoani mai le Tusi Paia iā i tatou ina ia malamalama i lenā vaega ma le auala o loo pulea ai e Ieova.
Le Mātauliaina o le Vaega Vaaia
2. O le ā le faapotopotoga fou na amataina e le Atua?
2 E 1,545 tausaga o avea le nuu o Isaraelu ma faapotopotoga a le Atua. (Galuega 7:38) Peitaʻi na lē taulau ona tausia e Isaraelu tulafono a le Atua ma sa latou teena lona lava Alo. O le iʻuga, na teena e Ieova lenā faapotopotoga ma lafoaʻia i latou. Na fetalai atu Iesu i tagata Iutaia: “Faauta, ua tuua lo outou fale, e faatafunaina.” (Mataio 23:38) Ona amata ai loa lea e le Atua o se faapotopotoga fou, lea na ia osia ai se feagaiga fou. Sa fuafuaina le faia aʻe o lenei faapotopotoga i tagata e 144,000, o ē ua filifilia e le Atua ina ia faatasi ma lona Alo i le lagi.—Faaaliga 14:1-4.
3. O le ā na tupu i le aso o le Penetekoso i le 33 T.A. e fai ma faamaoniga manino e faapea, ua faaaogāina nei e le Atua se faapotopotoga fou?
3 O uluaʻi tagata o lenā faapotopotoga fou na faauuina e le agaga paia o Ieova i le aso o le Penetekoso i le 33 T.A. E tusa ai o lenā mea mataʻina na tupu, ua tatou faitau ai: “Ua oo atu foi i le aso Penetekoso, sa i ai uma lava i latou i le mea e tasi ma le loto gatasi. Ona faafuasei mai lea o le taalili mai le lagi, peiseai o le matagi ua agi tele mai, ua tumu uma ai le fale sa latou nonofo ai. Ua iloa foi e i latou o laulaufaiva peiseai o le afi ua vaevaeina, ua nofo i o latou luga taitoatasi. Ua faatutumuina foi i latou uma i le Agaga Paia.” (Galuega 2:1-4) O lea na aumaia ai e le agaga o le Atua se faamaoniga manino e faapea, o tagata nei o le a faaaogāina e le Atua e faataunuuina ai lana fuafuaga, e ala i le taʻitaʻiga a Iesu Keriso mai le lagi.
4. O ai i aso nei o loo faia aʻe ai le faalapotopotoga vaaia a Ieova?
4 I aso nei, e na o se vaega totoe o le 144,000 o loo iai i le lalolagi. Ae i le faataunuuga o valoaga a le Tusi Paia, e iai se “motu o tagata e toatele” o “isi mamoe,” e faitau miliona lo latou aofaʻi, ua aufaatasi ma le vaega totoe faauuina. Ua tuufaatasia e Iesu, le Leoleo Mamoe Lelei, isi mamoe nei faatasi ma le vaega totoe, ina ia latou faia aʻe ai se lafu e tasi i le taʻitaʻiga a lo latou Leoleo Mamoe e toʻatasi. (Faaaliga 7:9; Ioane 10:11, 16) O i latou uma nei ua faia aʻe ai se faapotopotoga autasi, le faalapotopotoga vaaia lea a Ieova.
Le Faalapotopotoga ua Pulea e le Atua
5. O ai o loo puleaina le faalapotopotoga a le Atua, ma e faapefea?
5 O le faaupuga faale-Tusi Paia ‘le ekalesia [“faapotopotoga,” NW ] a le Atua soifua,’ ua manino mai ai lē o loo puleaina. O loo pulea e le Atua le faalapotopotoga. E saunia e Ieova faatonuga po o taʻiala mo ona tagata e ala mai iā Iesu, o lē na Ia tofia e avea ma Ulu lē vaaia o le faapotopotoga, ma e ala mai i Lana lava Afioga faagaeeina, le Tusi Paia.—1 Timoteo 3:14, 15; Efeso 1:22, 23; 2 Timoteo 3:16, 17.
6. (a) Na faapefea ona manino le taʻitaʻia o le faapotopotoga i le uluaʻi senituri mai le lagi? (e) O le ā e faaalia ai o loo avea pea Iesu ma Ulu o le faapotopotoga?
6 Na matuā manino mai lenā pulega i le aso o le Penetekoso. (Galuega 2:14-18, 32, 33) Sa manino mai ina ua faatonutonuina e le agelu a Ieova le folafolaina atu o le tala lelei i Aferika, ina ua fofogaina mai e Iesu faatonuga i le taimi na liliuina ai Saulo o Taso, ma ina ua amata e Peteru le galuega talaʻi i tagata o Nuu Ese. (Galuega 8:26, 27; 9:3-7; 10:9-16, 19-22) Peitaʻi, mulimuli ane, sa leʻi toe faalogoina ni leo mai le lagi, sa leʻi toe vaaia ni agelu, ma sa leʻi toe iai ni meaalofa faavavega a le agaga. E ui i lea, na folafola mai e Iesu: “Faauta foi, ou te ia te outou i aso uma lava, e oo lava i le gataaga o le lalolagi.” (Mataio 28:20; 1 Korinito 13:8) I aso nei, o loo amanaʻia e Molimau a Ieova le taʻitaʻiga a Iesu. Pe ana lē seanoa lenā mea, semanū e lē mafai ona folafola atu le feʻau o le Malo i le feagai ai ma teteega ogaoga.
7. (a) O ai e faia aʻe ai “le auauna faamaoni ma le mafaufau,” ma aiseā? (e) O le ā le tofiga na tuuina atu i le “auauna”?
7 A o toeitiiti lava oo i lona maliu, na taʻu ai e Iesu i ona soo e uiga i “le auauna faamaoni ma le mafaufau,” lea i le avea ai o ia ma o latou Matai, o le a ia tuuina atu i ai se tiute tauave faapitoa. E iai lenā “auauna” i le taimi e afio aʻe ai le Alii i le lagi, ma o le a faaauau pea ona galue malosi i le taimi e toe afio lē vaaia mai ai Keriso i le mana o le Malo. O lenā faamatalaga e faigatā lava ona faasino atu i se tagata se toʻatasi, ae o loo fetaui atu i le faapotopotoga faauuina a Keriso. Ona ua faatauina lenei faapotopotoga i lona toto, o lea sa taʻua ai e Iesu o lana “auauna.” Sa ia poloaʻi atu i tagata taʻitoʻatasi o lea faapotopotoga ina ia saʻili mai ni soo ma faasolosolo mālie ona fafagaina i latou, i le avatua i ai o “a latou mea e ʻai [faaleagaga] i ona itu aso.”—Mataio 24:45-47; 28:19; Isaia 43:10; Luka 12:42; 1 Peteru 4:10.
8. (a) O ā tiute tauave o loo iai i aso nei i le vasega a le auauna? (e) Aiseā e tāua ai la tatou tali atu i faatonuga o loo maua mai i le auala a le Atua?
8 Talu ai sa faatino ma le faamaoni e le vasega o le auauna le galuega a le Matai i lona toe afio mai lē vaaia i le 1914, ua iai la se faamaoniga e faapea, i le 1919 na faaopoopoina nisi tiute tauave sa tuuina atu iā i latou. O tausaga talu mai lenā taimi, sa talafeagai lelei mo le avatuina o se molimau i le lalolagi atoa e faatatau i le Malo, ma ua aoaoina se motu o tagata e toʻatele o tagata tapuaʻi a Ieova, o loo faamoemoe e sao atu i le puapuaga tele. (Mataio 24:14, 21, 22; Faaaliga 7:9, 10) E manaʻomia foʻi e i latou nei ni meaʻai faaleagaga, ma ua laulauina atu i ai e le vasega a le auauna. O lea la, ina ia faafiafiaina le finagalo o Ieova, e manaʻomia ona tatou talia faatonuga ua ia aumaia e ala i lenei auala ma ia faia e tusa ai ma na faatonuga.
9, 10. (a) I le uluaʻi senituri, o le ā le faatulagaga sa iai mo le taliina o fesili e faatatau i aʻoaʻoga ma le avatuina o faatonuga i le talaʻia o le tala lelei? (e) O le ā le faatulagaga o loo iai i aso nei mo le faamaopoopoina o galuega a tagata o Ieova?
9 E iai taimi e tulaʻi mai ai ni fesili e faatatau i aʻoaʻoga ma le faatulagaga o mea. Ona ā lea? Ua taʻu mai e le Galuega mataupu e 15 iā i tatou, le auala na foʻia ai se finauga e faatatau i tagata o Nuu Ese sa liulotu. Na faaoo atu le mataupu i aposetolo ma toeaina i Ierusalema, o ē sa auauna o se vaega pule. Sa iai foʻi masei o na tane, peitaʻi na faaaogā i latou e le Atua. Sa latou iloiloina mau e fesootaʻi i le mataupu, faapea foʻi le faamaoniga o le galue o le agaga o le Atua i le tatalaina o le tala lelei i Nuu Ese. Ona latou aumaia loa lea o se faaiʻuga. Sa faamanuia e le Atua lenā faatulagaga. (Galuega 15:1-29; 16:4, 5) Sa aauina atu e lenā vaega pule ni tagata ina ia latou faalautele atu atili le talaʻiga o le Malo.
10 I o tatou aso, ua faia aʻe ai le Vaega Pule a le faalapotopotoga vaaia a Ieova, i uso ua faauuina e le agaga mai atunuu eseese, ma o loo iai i le ofisaulu i le lalolagi aoao a Molimau a Ieova. E ala i le taiulu a Iesu Keriso, ua faalautele atu ai e le Vaega Pule le tapuaʻiga mamā i atunuu uma, ma faamaopoopoina ai le galuega talaʻi a Molimau a Ieova i le faitau sefuluafe o a latou faapotopotoga. Ua iai i le Vaega Pule le manatu lea foʻi sa i le aposetolo o Paulo, o lē na tusi mai i ona uso Kerisiano: “E leai foi so matou fia pule i lo outou faatuatua, a o fesoasoani i matou i lo outou olioli; auā o le faatuatua tou te tumau ai.”—2 Korinito 1:24.
11. (a) Ua faapefea ona tofia toeaina ma auauna o le faiva? (e) Aiseā e tatau ai ona tatou matuā felagolagomaʻi ma i latou ua tofia?
11 I le lalolagi aoao, e faalagolago atu ai Molimau a Ieova i le Vaega Pule, mo le filifilia maia o ni tane agavaa, o ē ua iai foʻi le aiā e latou te tofia ai toeaina ma auauna o le faiva mo le tausia o faapotopotoga. O loo taʻua i le Tusi Paia mea e manaʻomia mai iā i latou ua tofia, ma e aofia ai le manatu e faapea e lē lelei atoatoa na tane, ma e latou te faia foʻi ni masei. E tauaveina e toeaina o ē ua fautuaina le tofiaina o nisi faapea foʻi i latou e faia tofiga, se tiute tauave mamafa i luma o le Atua. (1 Timoteo 3:1-10, 12, 13; Tito 1:5-9) O lea, ua latou tatalo ai mo se fesoasoani a le agaga o le Atua, ma saʻili se taʻitaʻiga mai lana Afioga faagaeeina. (Galuega 6:2-4, 6; 14:23) Seʻi o tatou talisapaia nei “mea alofa i tagata,” o ē ua fesoasoani mai ina ia tatou maua le “loto gatasi i la le faatuatua.”—Efeso 4:8, 11-16, LF.
12. E faapefea ona faaaogā e Ieova fafine i le faatulagaga ua ia puleaina?
12 Ua faatonu mai e le Tusi Paia, o le vaavaaiga o le faapotopotoga e tatau ona faatinoina e tane. E lē faapea ai ua vaai maulalo i le tāua o tamaʻitaʻi, auā e iai nisi o i latou ua fai ma suli o le Malo faalelagi, ma e tele foʻi so latou sao i le galuega talaʻi. (Salamo 68:11) E lē gata i lea, o le tausiaina ma le faamaoni o o latou tiute tauave faaleaiga, ua saosaolaumea ai fafine i le talaaga lelei o le faapotopotoga. (Tito 2:3-5) Peitaʻi o le aʻoaʻo atu i totonu o le faapotopotoga e faatino lea e tane ua tofia e faia lea vaega.—1 Timoteo 2:12, 13.
13. (a) O le ā le manatu o loo uunaʻia e le Tusi Paia toeaina ina ia latou maua e tusa ai o lo latou tulaga? (e) O le ā le faaeaga e mafai e i tatou uma lava ona faia ai se vaega?
13 I le lalolagi, pe a umia e se tasi se tulaga iloga, e manatu i lenā tagata o sē ua sili, peitaʻi o le tulaga lenei i totonu o le faalapotopotoga a le Atua: “O le aupito itiiti ia te outou uma, e sili lava ia.” (Luka 9:46-48; 22:24-26) Ua fautuaina e le Tusi Paia toeaina ina ia aua neʻi pule faasauā i ē ua fai ma tofi o le Atua, ae na i lo lea, ia avea ma faaaʻoaʻo lelei i le lafu. (1 Peteru 5:2, 3) O molimau uma lava a Ieova, o tane ma fafine, ae lē na o sina vaega ua tofia, ua latou maua le faaeaga e fai ma sui o le Pule Silisili Ese i le vateatea aoao, o loo tautatala atu ma le lotomaulalo i lona suafa ma taʻu atu i tagata i so o se vaipanoa le Malo.
14. Ia faaaogā mau o loo sii mai e talanoa ai fesili o loo lisiina i le faaiʻuga o le palakalafa.
14 E lelei ona tatou fesiligia i tatou lava: ‘Po o oʻu talisapaia moni ea le auala o loo pulea ai e Ieova lana faalapotopotoga vaaia? Po o faaalia atu ea lenā talisapaia, i oʻu uiga faaalia, i laʻu gagana, ma aʻu mea e fai?’ O le fefulifulisaʻi i manatu o loo mulimuli mai o le a fesoasoani lea iā i tatou taʻitoʻatasi e faia ai lenā iloiloga.
Pe afai ou te gauaʻi moni iā Keriso o le Ulu o le faapotopotoga, o le ā la se mea o le a ou faia, e tusa ai ma mau o loo mulimuli mai? (Mataio 24:14; 28:19, 20; Ioane 13:34, 35)
O ai lea o loo oʻu faaaloalo atu i ai, pe afai ou te talia ma le agaga talisapaia, sauniuniga faaleagaga o loo maua mai i le vasega o le auauna ma lana Vaega Pule? (Luka 10:16)
E tatau faapefea i tagata uma o le faapotopotoga aemaise i toeaina, ona manatu le tasi i le isi? (Roma 12:10)
15. (a) O le ā ua tatou faataʻitaʻia atu e ala i o tatou uiga faaalia i le faalapotopotoga vaaia a Ieova? (e) O ā ni avanoa mo i tatou e faamaonia atu ai e pepelo le Tiapolo ma faafiafiaina ai le finagalo o Ieova?
15 O loo taʻitaʻia i tatou e Ieova i aso nei e ala mai i lana faalapotopotoga vaaia lea o loo taʻimua ai Keriso. O o tatou uiga faaalia i lenei faatulagaga, e faailoa atu ai o tatou manatu e faatatau i le finauga o le pule silisili ese. (Eperu 13:17) O loo finau mai lava Satani e faapea, o lo tatou faanaunauga autū e mo so tatou lava lelei. Peitaʻi afai tatou te auauna i so o se mea e manaʻomia ai i tatou, ma ʻalofia le faia o mea ina ia iloa ai i tatou e tagata, ona tatou faamaonia ai lea e pepelo le Tiapolo. Pe afai tatou te alolofa ma faaaloalo iā i latou o loo taʻimua iā i tatou, ae teena le ‘faaneenee atu i tagata e maua mai ai ni a tatou mea,’ ona tatou faafiafiaina ai lea o le finagalo o Ieova. (Iuta 16, LF; Eperu 13:7) O le faamaoni atu i le faalapotopotoga a Ieova, tatou te faaalia ai, o Ieova o lo tatou Atua lea, ma o loo tatou autasi e tapuaʻi atu iā te ia.—1 Korinito 15:58.
Talanoaga Autalu
• O le ā le faalapotopotoga vaaia a Ieova i aso nei? O le ā lana fuafuaga?
• O ai le Ulu ua tofia mo le faapotopotoga, ma o ā faatulagaga vaaia ua fai ma auala e na te aumaia ai faatonuga alofa mo i tatou?
• O ā uiga lelei e tatau ona tatou atiina aʻe agaʻi iā i latou o loo i le faalapotopotoga a Ieova?
[Ata i le itulau 133]
Ua taʻitaʻia i tatou e Ieova e ala mai i lana faalapotopotoga vaaia lea o loo taʻimua ai Keriso