O le Soifuaga o Iesu ma Lana Faiva

Ua Latalata le Peseka Faaiʻu a Iesu

AO LATALATA atu le Aso Lua, Nisani 11, i lona faaiʻuga, ua faauma ai e Iesu le aʻoaʻoina o le au aposetolo i le Mauga o Olive. Maeu se aso pisi ma le tiga na iai! O lenei, atonu a o foi atu i Petania e tofā ai, ua ia taʻu atu i ona aposetolo: “Ua outou iloa a mavae aso e lua ona fai ai lea o le paseka, e tuuina atu ai le Atalii o le tagata ina ia faasatauroina.”

I le aso na sosoo ai, le Aso Lulu, Nisani 12, e foliga mai ua faaalu e Iesu sina taimi paganoa e malōlō ai ma ona aposetolo. I le aso na muamua atu, sa ia aʻoaʻia mamafa ai taʻitaʻi lotu i le lautele, ma ua silafia e ia faapea o loo latou saili e fasioti ia te ia. O lea i le Aso Lulu ua ia lē faaali atu ai faalauaitele ia i latou, talu ai e lē manao o ia e faalavelave mai se mea i lona faamanatuina o le Paseka faatasi ma ona aposetolo i le afiafi po o sosoo mai.

I le taimi lea, ua faapotopoto ai faitaulaga sili ma toeaina o le nuu i le maota o le ositaulaga sili o Kaiafa. I le tiga ona o le aʻoaʻiga mamafa a Iesu i le aso ua tuanai, ua latou faia ai fuafuaga e puʻea o ia i se auala poto faaʻoleʻole ma tuuina ai i le oti. Peitai na latou manatu pea: “Aua le faia i le tausamiga, ina neʻi faanunununu ai le nuu.” Ua latou fefefe i tagata, o ē ua olioli ai Iesu ona o lo latou alofa.

A o taupulepule faalilolilo ma le leaga taʻitaʻi lotu e fasiotia Iesu, ae asiasi atu loa ia i latou se tagata. Na latou matuā ofo, o se tasi lava o aposetolo o Iesu, o Iuta le Sekara, o lē ua totō ai e Satani le manatu leaga o le faalataina o lona Matai! Maeu lo latou fiafia ina ua fesili atu Iuta: “ Se a le mea tou te au mai maʻu, ou te faalataina ai o ia ia te outou?” Na latou ioe atu ma le fiafia e totogi atu ia te ia le 30 tupe siliva, o le tau o le pologa e tusa ai ma le feagaiga o le Tulafono faa-Mose. Ua amata mai ai i lena taimi, ona saili Iuta i se avanoa lelei e faalata ai Iesu ia i latou e aunoa ma le toatele o ni tagata o iai.

Ua amata Nisani 13 i le goto o le la i le Aso Lulu. Ua taunuu atu Iesu mai Ieriko i le Aso Faraile, o le aso lona ono lenei ma o le po faaiʻu foi lea ua faaalu e ia i Petania. O le aso e sosoo ai, le Aso Tofi, o le a manaomia ai le faia o ni sauniuniga faaiʻu mo le Peseka, lea o le a paʻū i le goto o le la, ua tatau ai ona fasia le tamai mamoe o le Paseka ma tunu atoa. O fea o le a latou faamanatuina ai le tausamiga, ma o ai o le a faia sauniuniga?

E leʻi saunia e Iesu ni faamatalaga auiliili, atonu ina ia taofia ai Iuta mai i le avatua o ni faamatalaga i ositaulaga sili faapea e mafai ona latou puʻeina Iesu i le taimi o le faamanatuga o le Paseka. Ae i le taimi nei, atonu i le amataga lava o le aoauli o le Aso Tofi, ua aauina atu ai e Iesu Peteru ma Ioane mai Petania, ma fetalai atu: “Lua te o e sauni le paseka mo i tatou, tatou te aai ai.”

“O ifea e te finagalo i ai ma te saunia?” ua la fesili ai.

“A oo oulua i totonu o le aai,” ua faamatala atu ai e Iesu, “tou te fetaiai ma le tagata o ave le vai omea, lua te mulimuli atu ia te ia i le fale e ulu atu ai o ia. Lua te fai atu i le matai o le aiga, Ua fai mai le aʻoaʻo ia te oe, Po o ifea le afeafe e api ai malo, ina ia matou aai ai le paseka, o aʻu ma oʻu soo? Ona tusi atu ai lea e ia o le afeafe tele aupitoaluga ua uma one teu; lua te sauni ai le paseka.”

E lē taumatea o le matai o le aiga o se soʻo o Iesu o lē atonu ua aloalo atu e talia le talosaga a Iesu ina ia faaaogā lona fale mo lenei sauniga faapitoa. Ae peitai, ina ua taunuu atu Peteru ma Ioane i Ierusalema, na la iloa ai mea uma e pei ona muai taʻuina atu e Iesu. O lea ua faamautinoa ai loa e nei tane e toalua faapea ua saunia le tamai mamoe ma ua faia uma isi faatulagaga ina ia tausia ai manaoga o ē 13 e faamanatuina le Paseka, o Iesu ma ona aposetolo e 12. Mataio 26:1-5, 14-19; Mareko 14:1, 2, 10-16; Luka 22:1-13; Esoto 21:32.

◆ O le ā e foliga mai ua faia e Iesu i le Aso Lulu, ma aiseā?

◆ O le ā le sauniga ua faia i le fale o le ositaulaga sili, ma mo le ā le fuafuaga ua asiasi atu ai Iuta i taʻitaʻi lotu?

◆ O ai ua aauina atu e Iesu i Ierusalema i le Aso Tofi, ma mo le ā le fuafuaga?

◆ O le ā na maua e i laua na aauina atu ua toe faaalia ai foi mana faavavega a Iesu?