O le Soifuaga o Iesu ma Lana Faiva

I Petania, i le Fale o Simona

INA ua tuua e Iesu Ieriko, ua aga atu o ia mo Petania. E toeitiiti ona atoa le aso o le malaga, talu ai ona e faigata aega i fanua maualuga pe tusa ma le 12 maila [19 kilomita]. O Ieriko pe tusa o le 820 futu [250 mita] i fanua maulalo e feagai ma le sami, ma o Petania pe tusa ma le 2,500 futu [760 mita] i luga aʻe o le sami. Atonu o e manatua Petania, o le nuu o le aiga o Lasalo ma ona tuafafine. O le nuu itiiti lea pe tusa ma le lua maila [3 kilomita] mai Ierusalema, e taatia mai i le malifa i sasaʻe o le Mauga o Olive.

E toatele ua uma ona taunuu i Ierusalema mo le Paseka. Na latou ō mai vave ina ia faamamāina i latou mo le faamanatuga. Atonu sa latou fetagofi i ni tino oti po o le faia o nisi mea na lē mamā ai i latou. O lea na latou mulimuli ai i taualumaga ua uma ona faataatia ina ia faamamāina i latou ina ia mafai ai ona faamanatuina ma le talia le Paseka. A o faapotopoto i latou nei na vave ō mai i le malumalu, e toatele lava sa vaavaai solo pe o le a maliu mai Iesu i le Paseka.

Sa avea Ierusalema ma nofoaga vevela o fefinauaiga e uiga ia Iesu. O se iloa lautele faapea o loo mananao taʻitaʻi lotu e puʻe ia te ia ina ia fasiotia. O le mea moni, ua latou tuuina atu ni faatonuga faapea afai e iloa e so o se tasi le mea o iai o ia, e tatau ona lipoti mai ia i latou. E faatolu ona latou faia faapena i masina e tolu na mavae atu—i le Tausamiga o Faleapitaga, i le Tausamiga o le Tuuina atu, ma ina ua mavae le toefaatuina o Lasalo—sa taumafai ai nei taʻitaʻi e fasioti ia te ia. O lea, ua tau manatu ai tagata, pe o le a faailoa mai e Iesu o ia lava i se isi taimi? “O le ā lou manatu?” Ua latou fesili ai le tasi i le isi. “Pe o le a lē sau lava o ia i le tausamiga?”

I le taimi lea, ua taunuu ai Iesu i Petania pe tusa o le ono aso a o leʻi oo i le Paseka, lea e paʻū i le Aso 14 o Nisani e tusa ai ma le kalena faa-Iutaia. Ua taunuu Iesu i Petania i se taimi o le po o le Aso Faraile, lea e i le amataga o le Aso 8 o Nisani. E lē mafai ona ia alu malaga atu i Petania i le Aso Toonai auā o le malaga i le Sapati—mai le goto o le la i le Aso Faraile i le goto o le la i le Aso Toonai e faasaina i le tulafono a Iutaia. Atonu ua alu atu Iesu i le fale o Lasalo, e pei ona sa ia muai faia, ma tofā ai i inā i le po o le Aso Faraile.

Ae peitai, o se isi tagata e nofo i Petania ua ia valaaulia Iesu ma ana uo latou te taumamafa i le po o le Aso Toonai. O le tagata o Simona o sē na lepela, ae atonu na faamaloloina o ia e Iesu i se taimi muamua atu. Sa iai Lasalo faatasi ma i latou na taooto ma Iesu i le laulau. I le tausia o ona uiga o se tagata galue mamafa, o loo auauna ai Mareta i malo. Peitai, e pei ona masani ai, o loo uai atu ai Maria ia Iesu, ma o le taimi lea i se tasi o auala na tupu ai se finauga.

Na tago ai Maria ua tatala le fagu alapasa, po o se fagu laitiiti, o loo iai pe tusa ma le pauna [0.5 kilokalama] o le suāuu manogi, “o le uu nato” moni lava. E tautele lava lenei mea. E moni, o lona tau pe tusa o le totogi o se galuega i le tausaga atoa! Ina ua liligi e Maria le suāuu i le ao o Iesu ma ona aao ma solo ai i lona lauulu, ua faatumuina ai le fale i le manogi o le suāuu.

Ua feita le au soʻo ma fesili atu: “Se a le mea ua faamāumau ai lena mea?” Ona fai atu lea o Iuta le Sekara: “Pe se a le mea na le faatau ai lena uu manogi i tenari e tolu selau, ma avatu ai i e matitiva?” Peitai sa leʻi manatu mamafa moni Iuta e uiga i ē matitiva, auā na ia gaoi mai ni tupe mai le pusa tupe na teuina e le au soʻo.

Ona puipuia lea o Iesu ia Maria. “Tuu pea ia ia te ia,” na ia poloai ai. “Se a le mea tou te faalavelave ai ia te ia? o le mea lelei ua faia e ia ia te au nei. Auā tou te nonofo pea ma e matitiva, o aso uma foi ou te loto i ai ua outou mafaia ona agalelei atu ia te i latou; a o aʻu nei, tatou te le nonofo pea ma outou. Ua faia e ia le mea ua ia mafai ai; ua na uuina loʻu tino e fai ma faataimuaga o loʻu tanuga. E moni, ou te fai atu ia te outou, o nuu uma lava i le lalolagi e talaʻiina i ai lenei tala lelei, e taʻua ai foi lenei mea ua faia e ia, e faamanatu aʻi ia te ia.”

Ua iai nei Iesu i Petania mo le sili atu i le 24 itula, ma ua logo atu tala o lona iai. O le mea lea, ua ō mai ai tagata e toatele i le fale o Simona ina ia vaai ia Iesu, peitai na latou ō mai foi ina ia vaai ia Lasalo. O lea na fautua atu ai ositaulaga sili ina ia fasiotia e lē na o Iesu ae ma Lasalo foi. Ua faia lenei mea ona o le toatele o tagata ua tuu atu lo latou faatuatua ia Iesu auā na latou vaai ua ola lē na toe faatuina e ia nai le oti! E moni, pagā le leaga o nei taʻitaʻi lotu! Ioane 11:55–12:11; Mataio 26:6-13; Mareko 14:3-9; Galuega 1:12.

◆ O anafea na taunuu ai Iesu i Petania, ma o fea atonu sa ia malōlō ai i le Sapati?

◆ O le ā le talanoaga o loo faia i le malumalu, ma aiseā?

◆ O le ā le gaoioiga a Maria na faatupu ai ni fefinauaiga ma ua faapefea ona puipuia o ia e Iesu?

◆ O le ā ua faataʻitaʻia ai le leaga tele o ositaulaga sili?