O le Soifuaga o Iesu ma Lana Faiva

Le Tausamiga Afiafi o le Faamanatuga

INA UA uma ona mulumulu e Iesu vae o ona aposetolo, ona ia sii mai lea o le mau i le Salamo 41:9, i lona fetalai atu: “O le ʻai faatasi ma aʻu ua aa mai o ia ia te au i lona mulivae.” Ina ua faalavelaveina i le agaga, ona ia faapea atu lea: “E faalataina aʻu e so outou.”

Ua amata ona tiga le au aposetolo ma taitasi ma faapea atu ia Iesu: “O aʻu ea?” E oo lava ia Iuta le Sekara na fesili atu foi. O Ioane, o lē o loo taoto latalata atu ia Iesu i le laulau, na faalagolago atu i le fatafata o Iesu ma fesili atu: “Le Alii e, o ai ea?”

“O le tasi o le toatinoagafulu ma le toalua, o lē fufui faatasi nei o ma lima i le tanoa,” ua tali atu ai Iesu. “[E moni,] e alu lava le Atalii o le tagata e pei ona tusia ia te ia; a o le tagata na te faalataina le Atalii o le tagata oi talofa ia te ia! e lelei i lea tagata pe ana le fanau mai o ia.” Ina ua mavae lena, ona toe ulu lea o Satani ia Iuta, ua faaaogā ai le avanoa i le loto o Iuta, lea ua oo ai ina leaga. Mulimuli ane i lena po, na taʻua ai ma le talafeagai e Iesu Iuta o le “tagata o le malaia.”

Ua taʻu atu nei e Iesu ia Iuta: “O le mea e te faia, ia vave ia ona fai.” E leai se isi o le au aposetolo na malamalama i le uiga o le fetalaiga a Iesu. Sa manatu nisi faapea talu ai ona o loo ia Iuta le pusa tupe, ua fai atu ai Iesu ia te ia: “Ina faatau mai ia ni mea e tatau ia te i tatou i le tausamiga,” pe avatu ai se mea i ē matitiva.

Ina ua alu ese Iuta, ona faailoa atu lea e Iesu se faamanatuga matuā fou lava, po o le faamanatuina, faatasi ma lona au aposetolo faamaoni. Ua tago o ia i le areto, ua fai le tatalo faafetai, tofitofi, ma avatu ia i latou, ua fetalai atu: “Ina tago ia, ina aai.” Ua ia faamatala atu: “O loʻu tino lenei, ua foaiina atu mo outou; tou te faia le mea nei e fai ma faamanatuga ia te au.”

Ina ua uma ona aai e i latou taitoatasi le areto, ona tago lea o Iesu i le ipu o le uaina, e foliga mai o le ipu lona fa lea na faaaogā i le sauniga o le Paseka. Na ia faia foi le tatalo faafetai mo lea mea, tufatufa atu ia i latou, ua fetalai atu ia i latou ina ia inu i le ipu, ma fetalai atu: “O lenei ipu o le feagaiga fou lea i loʻu toto, ua faamaligiina mo outou.”

O lea, o le mea moni, o le faamanatuga lenei o le maliu o Iesu. E tatau ona faia pea lava pea i tausaga taitasi ia Nisani 14, e pei ona taʻua e Iesu, e fai ma faamanatuga ia te ia. O le a manatua ai e i latou o le a faamanatuina le mea ua faia e Iesu ma lona Tamā faalelagi ina ia saunia ai le faasaoina mo le fanau a tagata mai le faaumatiaina i le oti. Mo tagata Iutaia o ē ua avea ma soʻo o Keriso, o le faamanatuga o le a suia ai le Paseka.

O le feagaiga fou, lea ua aogā ona o le toto masaa o Iesu, ua suia ai le feagaiga tuai o le Tulafono. Ua puluvagaina e Iesu Keriso i le va o itu e lua—i le isi itu, o Ieova le Atua, ma i le isi itu, o le 144,000 o Kerisiano fanauagagaina. E lē gata ina saunia mo le faamagaloga o agasala, ae ua faatagaina ai foi e le feagaiga le faatuina o se malo faalelagi o tupu ma ositaulaga. Mataio 26:21-29; Mareko 14:18-25; Luka 22:19-23; Ioane 13:18-30; 17:12; 1 Korinito 5:7.

◆ O le ā le valoaga faale-Tusi Paia ua sii mai e Iesu e faatatau i se aumea, ma o le ā le faatatauga ua ia faia o lea mea?

◆ Aiseā ua matuā tiga ai le au aposetolo, ma o le ā ua fesili atu ai i latou taitoatasi?

◆ O le ā ua taʻu atu e Iesu ia Iuta e faia, ae ua faapefea ona faaliliuina e isi aposetolo nei faatonuga?

◆ O le ā le faamanatuga ua faailoa atu e Iesu ina ua uma ona alu i fafo Iuta, ma mo le ā le fuafuaga ua ia faia?

◆ O ai itu e lua i le feagaiga fou, ma o le ā ua faataunuuina e le feagaiga?