Ia Olioli i le Faamoemoe o le Malo!

“Ia olioli i le faamoemoe, ia onosai i le puapuaga.”—ROMA 12:12.

1. Aiseā e mafai ai ona tatou maua le olioli i le auaumea faatasi ma Ieova, ma o le ā sa uunaia e le aposetolo o Paulo Kerisiano e faia?

‘O LE Atua fiafia.’ (1 Timoteo 1:11) Maeu le lelei ona faamatalaina ai i lenei mea o Ieova! Aiseā? Auā o ana galuega uma lava ua aumaia ai ia te ia le fiafiaga tele. Ona o Ieova o le Puna o mea lelei uma ma mea uma e faapogaia ai le fiafia, e mafai foi la e ana foafoaga atamamai uma ona maua le fiafia i lo latou auaumea faatasi ma ia. Ua tonu ai la, ona uunaia e le aposetolo o Paulo Kerisiano ina ia talisapaia lo latou faaeaga olioli o le iloaina o Ieova le Atua, ia loto faafetai mo Ana meaalofa matagofie uma o le foafoaga, ma ia olioli i le alofa ma le agalelei ua Ia faaalia ia i latou. Na tusia e Paulo: “Ia outou olioli i le Alii aua le aunoa; ou te toe fai atu, ia outou olioli.”—Filipi 4:4; Salamo 104:31.

2. O le ā le faamoemoe e aumaia ai le olioli tele, ma o le ā ua faalaeiauina Kerisiano e faia e uiga i lenei faamoemoe?

² Pe o utagia ea e Kerisiano lenei timaiga na ofo atu e Paulo? O le mea moni, o loo latou utagia! Ua olioli uso faaleagaga o Iesu Keriso i le faamoemoe mamalu ua faaavanoa mai e le Atua mo i latou. (Roma 8:19-21; Filipi 3:20, 21) Ioe, ua latou iloa o le a latou auai i le faataunuuina o le faamoemoe sili mo le lumanai o le fanau a tagata, e lē gata i ē ola ae atoa foi ma ē oti, e ala i le auauna faatasi ma Keriso i lana pulega o le Malo faalelagi. Tagai faalemafaufau i le tele o lo latou olioli i o latou faaeaga o ni suli faatasi, e auauna o ni tupu ma ni faitaulaga! (Faaaliga 20:6) Maeu se fiafiaga o le a fai mo i latou a o latou fesoasoani mai i le fanau faamaoni a tagata ina ia oo i le lelei atoatoa ma fesoasoani i le faatonutonuina o le toe faafoisia o le Parataiso i lo tatou lalolagi! O le mea moni, ua iai i auauna uma lava a le Atua “[le faavae o] le faamoemoe i le ola e faavavau, na folafolaina mai talu mai tausaga o le vavau e le Atua e le mafai ona tala pepelo.” (Tito 1:2) I le manatu atu i lenei faamoemoe maoaʻe, ua faalaeiauina ai e le aposetolo o Paulo Kerisiano uma: “Ia olioli i le faamoemoe.”—Roma 12:12.a

Le Olioli Moni—O se Uiga o le Loto

3, 4. (a) O le ā le uiga o le faaupuga “ia olioli,” ma o le ā le tele e ao i Kerisiano ona olioli ai? (e) O le ā le olioli moni, ma o le ā e faalagolago i ai?

³ Ina “ia olioli” o lona uiga ia lagona ma ia faaalia le olioli; e lē o lona uiga ia iai i se tulaga o le nenee i taimi uma, po o le soona olioli e lē pulea. O veape e tutusa ma upu faa-Eperu ma le faa-Eleni ua faaaogā i le Tusi Paia mo le “olioli,” le “mitamita,” ma le “oliolisaga,” ua faaalia uma ai faalogona i totonu ma faailoaga i fafo o le olioli. Ua faalaeiauina Kerisiano ina ‘ia olioli e lē aunoa,’ ia “saga olioli pea lava.”—2 Korinito 13:11; 1 Tesalonia 5:16.

⁴ Ae e mafai faapefea e se tasi ona olioli e lē aunoa? E mafai lenei mea ona o le olioli moni o se uiga e sau mai le loto, se uiga e loloto i totonu, o se uiga faaleagaga. (Teuteronome 28:47; Faataoto 15:13; 17:22) O se fua lea o le agaga o le Atua, na lisiina e Paulo, e sosoo ane lava i le alofa. (Kalatia 5:22) I le avea ma uiga i totonu, e lē faalagolago ai i mea o i fafo, e oo lava foi i o tatou uso. Peitai e faalagolago lea i le agaga paia o le Atua. Ma e sau lea mai le faamalieina loloto i totonu, i le iloaina ua ia te oe le upu moni, le faamoemoe o le Malo, ma o loo e faia le mea e faafiafiaina ai Ieova. O lea, o le olioli ua lē na o se uiga faaperesona lea na tatou fananau mai ma i tatou; ae o se vaega o “le tagata fou,” le tuufaatasiga o uiga ia ua tulagaese ai Iesu Keriso.—Efeso 4:24; Kolose 3:10.

5. O afea ma e mafai faapefea ona faaalia i fafo le olioli?

⁵ E ui ina o le olioli o se uiga e sau mai le loto, ae e mafai ona faaalia atu i fafo i nisi o mea. O ā nisi o ia mea, e faailoa atu ai i fafo le olioli? E mafai ona faaalia i so o se mea, mai laufofoga filemu e oo i le ōsoōso moni ona o le olioli. (1 Tupu 1:40; Luka 1:44; Galuega 3:8; 6:15) Pe o le uiga ea la o lenei mea, e faapea o tagata o ē e lē tautatala soo pe o ē e lē mata ʻataʻata i taimi uma e lē olioli? Leai! O le olioli moni na te lē faaalia ia lava i le tautalatala, ata ee, ʻataʻata, po o le līlī soo. Ona o aiaiga, ua mafua ai ona faaalia e le olioli ia lava i ni auala eseese. Ua lē na o le olioli e mafua ai ona tatou faaleuō i le Maota o le Malo, ae peitai, ona o lo tatou alofa faaleuso ma le alofa.

6. Aiseā e mafai ai ona olioli e lē aunoa Kerisiano, e tusa lava pe fesagaʻi ma tulaga e lē logolelei?

⁶ O se vala faifai pea o le olioli, o lona mauaa lea i totonu e avea o se vaega moni o uiga fou o se Kerisiano. O le auala lenei e mafai ai ona olioli e lē aunoa. O le mea moni, i nisi taimi atonu tatou te faalēmalie ai e uiga i se mea, pe atonu tatou te fesagaʻi ma ni tulaga e lē logolelei. Peitai e mafai ona tatou maua pea le olioli i o tatou loto. Sa avea nisi o uluai Kerisiano o ni pologa, e iai matai o ē sa faigata ona faamalieina. Pe sa mafai ea ona olioli e lē aunoa na Kerisiano? Ioe, ona o lo latou faamoemoe i le Malo ma le olioli i o latou loto.—Ioane 15:11; 16:24; 17:13.

7. (a) O le ā sa fetalai i ai Iesu e uiga i le olioli i lalo o puapuaga? (e) O le ā e fesoasoani ia i tatou ina ia onosai ai i lalo o puapuaga, ma o ai ua ia faataatia le faaaʻoaʻoga e sili ona lelei i lenei itu?

⁷ Ina ua uma ona faapea mai le aposetolo o Paulo: “Ia olioli i le faamoemoe,” na ia faaopoopo mai: “Ia onosai i le puapuaga.” (Roma 12:12) Sa fetalai foi Iesu e uiga i le olioli i lalo o puapuaga ina ua ia fetalai i le Mataio 5:11, 12: “Amuia outou pe a latou upu leaga, ma faasaua ia te outou, . . . Ia outou olioli ma fiafia lava; auā o i le lagi lo outou taui e tele.” O le olioli ma le matuā fiafia o loo i inei, e lē manaomia ona faaalia moni mai fafo; o lona uiga o le faamalieina loloto lea i totonu ua maua e se tasi i le faafiafiaina o Ieova ma Iesu Keriso a o tumau mausalī i lalo o tofotofoga. (Galuega 5:41) O le mea moni, e fesoasoani le olioli ia i tatou ina ia tumau ai a o i lalo o puapuaga. (1 Tesalonia 1:6) Ua faataatia e Iesu se faaaʻoaʻoga e sili ona lelei i lenei itu. Ua taʻu mai e le Tusi Paia ia i tatou: “Na onosai [o ia] i le satauro, . . . ona o le olioli sa tuu i ona luma.”—Eperu 12:2.

Ia Olioli i le Faamoemoe e Ui i Faafitauli

8. O ā faafitauli atonu e fesagaʻi ma Kerisiano, ae aiseā e lē aveesea ai e faafitauli le olioli o se Kerisiano?

⁸ O le avea ma auauna a Ieova, e lē faapea o le a saoloto ai se tasi mai faafitauli. Atonu e iai faafitauli faaleaiga, o faigata tau tamaoaiga, le lē lelei o le soifua malōlōina, po o le maliliu o ē pele ia i tatou. E ui ina e mafai ona aumaia e na mea le faanoanoa, ae e lē mafai ona latou aveesea ai le faavae mo lo tatou olioli i le faamoemoe o le Malo, le olioli i totonu o loo iai i o tatou loto.—1 Tesalonia 4:13.

9. O ā faafitauli o Aperaamo sa iai, ma e faapefea ona tatou iloa sa iai le olioli i lona loto?

⁹ Ia manatunatu ia Aperaamo, mo se faaaʻoaʻoga. Sa lē sologa lelei pea le olaga mo ia. Na iai ona faafitauli faaleaiga. Sa lē feoeoeai lana palake o Akara, ma lana avā o Sara. Na iai se fefinauaiga. (Kenese 16:4, 5) Sa tauemu Isamaeli ia Isaako ma faasauā ia te ia. (Kenese 21:8, 9; Kalatia 4:29) Mulimuli ane, sa maliu lana avā faapelepele o Sara. (Kenese 23:2) E ui lava i na faafitauli, ae sa olioli Aperaamo i le faamoemoe o le Fanau o le Malo, le Fanau a Aperaamo lea o le a manuia ai aiga uma lava o le lalolagi. (Kenese 22:15-18) Ona o le olioli sa i lona loto, na ia tumau ai i le auaunaga ia Ieova mo tausaga e selau ina ua ia tuua lona nuu moni o Uro. O le mea lea ua tusia ai e uiga ia te ia: “Na ia faatalitali atu i se aai ua [matuā] faavaeina, o lona mataisau ma le tufuga o le Atua lea.” Ona o le faatuatua o Aperaamo i le Malo faa-Mesia o loo sau, ua mafai ai ona faapea mai le Alii o Iesu, ina ua maeʻa ona tofia e le Atua e avea ma Tupu: “O Aperaamo . . . na matuā fiafia o ia ina a iloa e ia loʻu nei aso, na ia iloa foi, ma olioli ai.”—Eperu 11:10; Ioane 8:56.

10, 11. (a) O le ā le tauiviga o loo faia e i tatou o Kerisiano, ma ua faapefea ona laveaiina i tatou? (e) O le ā ua na totogia le lē mafai ona tatou tauina atoatoa o le taua faasaga i lo tatou tino agasala?

¹⁰ Ona o ni tagata lē lelei atoatoa, e manaomia ai foi ona tatou tauivi ma lo tatou tino agasala o loo iai, ma o lenei tauiviga ina ia faia le mea saʻo e mafai ona matuā mafatia ai. E ui i lea, o la tatou taua faasaga i o tatou vaivaiga, e lē o lona uiga e faapea ua leai ai so tatou faamoemoe. Sa lagona e Paulo le faanoanoa ona o lenei feteenaiga, ma na ia faapea mai ai: “O ai sē laveai ia te au ai le tino o lenei oti? Ou te faafetai lava i le Atua, auā o Iesu Keriso lo tatou Alii.” (Roma 7:24, 25) O lea, e ala ia Iesu Keriso ma le togiola na ia saunia, ua faasaoina ai i tatou.—Roma 5:19-21.

¹¹ Ua totogia e le togiola a Keriso le lē mafai ona tatou tauina o le taua i se tulaga lelei atoatoa. E mafai ona tatou olioli i lenei togiola ona ua mafai ai ona maua se loto fuatiaifo mamā ma faamagaloina ai a tatou agasala. Ua taʻua e Paulo i le Eperu 9:14, faapea ua iai i “le toto o Keriso” le malosi e “faamamāina [ai] o outou loto fuatia ifo ai galuega e oti ai.” O lea, e lē manaomia ona faamamafaina loto fuatiaifo o Kerisiano i ni faalogona e ōia ma agasala ai. O lenei mea, atoa ma le faamoemoe ua ia i tatou, ua saunia ai se uunaiga malosi mo le fiafiaga olioli. (Salamo 103:8-14; Roma 8:1, 2, 32) O le manatunatu pea i lo tatou faamoemoe, o le a faalaeiauina ai i tatou uma lava ina ia tauina le taua ma le manuia.

Teu Mau lo Tatou Faamoemoe i le Mafaufau

12. O le ā le faamoemoe e mafai ona manatunatu i ai Kerisiano faauuina?

¹² E tāua ona teuina i manatu o le vaega totoe ua faauuina i le agaga atoa ma isi mamoe, lo latou “faamoemoe i le [olataga],” ia avea pea e pei o se pulou e puipuia ai. (1 Tesalonia 5:8) E mafai ona manatunatu Kerisiano faauuina i le faaeaga matagofie o le mauaina o le ola e lē toe mafai ona oti i le lagi, e fesootai tuusaʻo ma Ieova le Atua, ma olioli ai i se mafutaga totino ma Iesu Keriso faamamaluina ma aposetolo atoa ma isi uma o le 144,000 o ē na tausisi i lo latou faamaoni seia oo i le iʻuga i le tele o senituri. Maeu se tamaoaiga e lē mafaamatalaina o aumea!

13. Ua faapefea ona manatu ē faauuina o loo iai pea i le lalolagi e uiga i lo latou faamoemoe?

¹³ Ua faapefea ona manatu sina toaitiiti o ē faauuina o loo iai pea i le lalolagi e uiga i lo latou faamoemoe o le Malo? E mafai ona taaofaia lenei mea i upu a se tasi na papatisoina i le 1913: “O lo matou faamoemoe o se mea mautinoa, ma o le a faataunuuina atoatoa lea e oo lava i sui mulimuli o le 144,000 o le lafu mamoe itiiti i se tulaga e i tala atu o le mea e mafai ona tatou manatu faalemafaufau i ai. O i matou o le vaega totoe o ē sa iai i le tausaga e 1914, a o matou faatalitalia i matou uma e ō i le lagi, ua lē o leiloa lo matou manatu i le tāua o lena faamoemoe. Peitai ua sili atu ai lo matou malosi na i lo le mea sa matou iai muamua, ma ua matou talisapaia uma lava le umi e tatau ona matou faatalitali ai mo lea. O se mea lea ua aogā ona faatalitali i ai, e tusa foi pe manaomia ai le miliona o tausaga. Ua sili atu ona ou faatāuaina lo matou faamoemoe na i lo se isi lava taimi muamua, ma e lē taitai ona ou manao e leiloa loʻu talisapaia o lea faamoemoe. Ua aumaia foi e le faamoemoe o le lafu mamoe itiiti se faamautinoaga faapea o le faamoemoega o le motu o tagata e toatele o isi mamoe, o le a lē aunoa ma so o se tulaga e lē taulau ai, ae o le a faataunuuina e sili atu na i lo la tatou vaaiga pupula faalemafaufau o loo iai. O le pogai lena ua matou taofi mau atu ai seia oo lava i lenei itula, ma o le a matou taofi mau atu pea i ai seia oo ina faamaonia e le Atua faapea e faamaoni o ia i ana ‘folafolaga tautele ma le matuā silisili.’”—2 Peteru 1:4; Numera 23:19; Roma 5:5.

Olioli Nei i le Faamoemoe o le Parataiso

14. O le ā le faamoemoe e manaomia ona teu i manatu o le motu o tagata e toatele?

¹⁴ O sea faailoaga o le faatuatua olioli, e totoina ai ia i latou o le motu o tagata e toatele o isi mamoe ni mafuaaga sili mo le olioli. (Faaaliga 7:15, 16) E manaomia ona teuina i manatu o i latou na, le faamoemoe o le faasaoina atu ia Amaketo. Ioe, ia tepa taulai atu e maimoa i le taʻumamāina e le Malo o le Atua, o le pule silisiliese i le vateatea aoao a Ieova le Atua ma le faapaiaina o lona suafa mamalu e ala i le aumaia o le puapuaga tele, lea o le a faamamāina ai le lalolagi mai ē amioleaga ia o loo avea le Tiapolo ma o latou atua. Maeu se olioli o le a iai i le faasaoina atu i lena puapuaga tele!—Tanielu 2:44; Faaaliga 7:14.

15. (a) O ā galuega o faamalōlōga sa faia e Iesu a o iai o ia i le lalolagi, ma aiseā? (e) O ā manaoga tau le soifua malōlōina o ē faasaoina atu ia Amaketo, ma aiseā e ese ai i latou mai ē toe faatutūina?

¹⁵ Ua faapea mai le Faaaliga 7:17 e uiga i le motu o tagata e toatele: “O le Tamai mamoe . . . na te fafaga ia i latou, ma taʻitaʻi ia te i latou i puna o vai ola; e sōloieseina foi e le Atua o loimata uma nai o latou mata.” E ui ina ua iai nei se faataunuuga faaleagaga o lenei valoaga, ae o le a vaai tino lava ē o le a faasaoina atu ia Amaketo i lona faataunuuga moni. E faapefea? Ia, o le ā sa faia e Iesu a o iai o ia i le lalolagi? Sa ia faamalōlōina ē mumutu, faasavavali i ē pipili, faalogoa taliga o ē tutuli ma faapupula mata o ē tauaso, na ia faamalōlōina foi lepela, o supa, atoa ma “maʻi uma, ma maʻi tiga uma.” (Mataio 9:35; 15:30, 31) Pe lē o le mea ea lena o loo manaomia e Kerisiano i aso nei? O le a tauaveina pea e le motu o tagata e toatele vaivaiga ma tulaga lē atoatoa i totonu o le lalolagi fou. O le ā tatou te faatalitalia o le a faia e le Tamai mamoe e uiga i na mea? E matuā eseese lava manaoga o ē faasaoina atu ia Amaketo, mai manaoga o i latou o ē o le a toe faatutūina. E ui ina e leʻi oo ina lelei atoatoa faaletagata, ae atonu o le a toe foafoaina i latou e toe faatutūina i ni tino atoatoa, e lelei, ma malolosi. Ona o le vavega o le toetū, e foliga mai ai o le a lē manaomia ona toe faafouina i latou i se taimi mulimuli, mai vaivaiga tuai e ala i le vavega o le faamalōlōina. I le isi itu, ona o le tutasi o le mea e tupu ia i latou, o le faasaoina atu lea ia Amaketo, o le mea la o le a manaomia ma o le a maua e le anoanoai o le motu o tagata e toatele, o le toe faafouina lea faavavega. E manino, o se fuafuaga tele o faamalōlōga a Iesu, sa faia lea mo le faalaeiauina o le motu o tagata e toatele, le faamoemoe olioli o le lē gata ina faasaoina o i latou ae o le a faamalōlōina i se taimi mulimuli.

16. (a) O afea atonu e faataunuuina ai le faamalōlōina faavavega o ē faasaoina atu ia Amaketo, ma o le ā le iʻuga? (e) O le ā le faamoemoe o le a faaauau pea ona tatou olioli ai i le Meleniuma?

¹⁶ O lena faamalōlōga faavavega, o le a tupu moni lava i ē faasaoina atu ia Amaketo, i le taimi lava e mavae ai Amaketo ma a o leʻi taitai ona amataina le toetū. (Isaia 33:24; 35:5, 6; Faaaliga 21:4; faatusatusa Mareko 5:25-29.) Ona tiaʻi loa lea e tagata o matatioata, o tootoo, o nofoa faataavalevale, o tainifo faapipii, o mea faalogo, atoa ma isi mea faapena. Maeu se mafuaaga mo le olioli! Maeu le fetaui lelei o lena uluai gaoioiga toe faafoisia a Iesu ma le vaega a ē faasaoina atu ia Amaketo ina ia avea ma faavae o le lalolagi fou! O le a aveesea mala faigata mai le ala, ina ia mafai ai e na tagata faasaoina ona agaʻigaʻi i luma ma le maelega, i le tepa taulai atu ma le naunautai i galuega ofoofogia o le Meleniuma ua folasia mai i o latou luma, ae lē o le tosoina i lalo i mea atonu ua faamalaiaina ai i latou e le lalolagi tuai. I le faagasologa atoa o le Meleniuma, o le a latou olioli ai i le faamoemoe o le mauaina lea o le ola lelei atoatoa faaletagata i le faaiʻuga o le afe tausaga.

17. O ā tulaga olioli o le a iai a o faagasolo le galuega o le toe faafoisia o le Parataiso?

¹⁷ Afai o lou faamoemoe lena, ia manatunatu foi i le olioli o le auai i le toe faafoisiaina o le Parataiso i le lalolagi. (Luka 23:42, 43) E lē taumatea o le a fesoasoani ē faasaoina atu ia Amaketo ina ia faamamāina le lalolagi ma faapea ona saunia ai ni nofoaga toʻafilemu e toe tutū mai i ai ē ua maliliu. Atonu o le a suia sauniga o falelauasiga i sauniga e faafeiloaia ai i latou ua toe aumaia e le toetū, e aofia ai ē pele ia i tatou lava o ē na maliliu. Ma ia manatu i le mafutaga e sili ona fiafia ai faatasi ma tane ma fafine faamaoni mai senituri ua mavae. O ai e te manao faapitoa lava lua te talanoa? Pe o Apelu ea, o Enoka, Noa, Iopu, Aperaamo, Sara, Isaako, Iakopo, Iosefa, Mose, Iosua, Raava, Tepora, Samasoni, Tavita, Elia, Elisaia, Ieremia, Esekielu, Tanielu, po o Ioane le Papatiso? Ia, o se vaega fiafia foi lena o lo outou faamoemoe. O le a mafai ona tou talanoa ma i latou, aʻoaʻo mai ia i latou, ma galulue faatasi ma i latou i le galueaiina o le lalolagi atoa e avea ma parataiso.

18. O ā tulaga olioli atili e mafai ona tatou manatunatu i ai?

¹⁸ Ia tagai faalemafaufau foi, i meaʻai lelei, o vai mamā, atoa ma le ea mālū, faatasi ma lo tatou lalolagi ua toe faafoisia i lona tulaga paleni lelei atoatoa, le auala na foafoaina ai e Ieova. O le a avea ai la le olaga, e lē na o se fiafiaga o le lelei atoatoa e mavae atu, ae i le auai ma le toʻaga ma le uigā i galuega e olioli ai. Ia manatunatu i se sosaiete i le lalolagi aoao o tagata e saoloto mai le solitulafono, faamaualuga, fuā, femisaai—se auuso ua tupu aʻe ai fua o le agaga ma ua fuaina mai e tagata uma. Maeu le faafiafia loto!—Kalatia 5:22, 23.

Le Faamoemoe ua Aogā ai ona Ola i le Olaga

19. (a) O afea e tatau ona faataunuuina ai le olioli o loo taʻua i le Roma 12:12? (e) Aiseā e ao ai ona tatou maumauai ia aua neʻi avea avega mamafa o lenei olaga e uunaia ese ai lo tatou faamoemoe?

¹⁹ O se mea na faatalitalia ma ua taunuu, e lē toe avea lena o se faamoemoe, o lea o le olioli ua faalaeiauina e Paulo i le Roma 12:12 e tatau ona faataunuuina i le taimi nei. (Roma 8:24) I le tau lava o le manatunatu i faamanuiaga o le a aumaia e le Malo o le Atua i le lumanai, o se mafuaaga lea tatou te olioli ai i lena faamoemoe i le taimi nei. O lea ia maumauai e aua neʻi faatagaina avega mamafa o le olaga i se lalolagi faapiʻopiʻo e uunaia ese ai lou faamoemoe mamalu. Ia aua neʻi faavaivai ma lē lavatia, e leiloa ai le faamoemoe o loo lumanai. (Eperu 12:3) O le lafoaia o le ala faa-Kerisiano o le a lē foia ai ou faafitauli. Ia manatua, afai e faamaamulu se tasi mai le auaunaga i le Atua ona o avega mamafa uma o le olaga i le taimi nei, e tumau pea ona ia te ia o na avega mamafa, ae o le a ia misia ai le faamoemoe ma misia ai le avanoa o le olioli i faamoemoega ofoofogia o loo lumanai.

20. O le ā le āuga o le faamoemoe o le Malo ia i latou o ē ua sapasapaia, ma aiseā?

²⁰ Ua iai i tagata o Ieova mafuaaga uma e ola fiafia ai. Ona o lo latou faamoemoe pupula faagaeeina, ua aogā ai ona ola i le olaga. Ma ua latou lē taofia lenei faamoemoe olioli mo na o i latou lava. Leai, o loo latou naunau e fetufaai ai ma isi. (2 Korinito 3:12) O lea o i latou o ē sapasapaia le faamoemoe o le Malo, o ni tagata maumauai, ma ua latou saili e faalaeiau i isi e ala i le taʻuina atu ia i latou o le tala lelei mai le Atua. Ua faatumuina ai i lenei mea olaga o i latou o ē e taliaina le feau faatasi ai ma le faamoemoe e silisili ona matagofie, sa leʻi faapea ona avatu muamua i le fanau lautele a tagata—le faamoemoe o le Malo na te toe faafoisia le Parataiso i le lalolagi. Afai e lē taliaina lea e tagata, e faaauau pea ona tatou olioli ona ua ia i tatou le faamoemoe. O i latou e lē faalogo mai, o le a avea ma ē e misia, ae lē faapena i tatou.—2 Korinito 4:3, 4.

21. O le ā ua iai nei i faitotoa, ma e ao faapefea ona tatou faatāuaina lo tatou faamoemoe?

²¹ E faapea le folafolaga a le Atua: “Faauta, ou te faia ia fou mea uma lava.” (Faaaliga 21:5) Ua iai nei i faitotoa le lalolagi fou faatasi ma ona faamanuiaga matagofie uma ma e lē gata mai. O lo tatou faamoemoe—mo le ola i le lagi po o le parataiso i le lalolagi—e tautele; ia tausisi pea i ai. I nei aso mulimuli e sili ona faigata, na i lo muamua, ia manatu i ai e “pei se taula o le [solu], e le matosina ma ua mausali.” Pe a taula lo tatou faamoemoe ia Ieova, “o le papa e faavavau—o le Papa mai anamuā,” ona mautinoa lea ua ia i tatou se mafuaaga malosi ma le faagaeetia i le taimi nei lava e “olioli ai i le faamoemoe” o loo taatia mai i o tatou luma.—Eperu 6:19; Isaia 26:4, The Amplified Bible.

[Faaopoopoga i lalo]

Fesili Autalu

◻ O le ā le faamoemoe sili o le fanau a tagata?

◻ O le ā le olioli moni?

◻ O afea atonu e taunuu ai le faamalōlōina faavavega o ē faasaoina atu ia Amaketo?

◻ Aiseā e lē ao ai ona tatou faatagaina avega mamafa o le olaga e uunaia ese ai lo tatou faamoemoe?

◻ O ā tulaga olioli o loo e tepa taulai atu i ai i le lalolagi fou?

[Ata i le itulau 9]

Pe e lē faatumuina ea lou loto i le olioli e molimauina ituaiga o faamalōlōga na faia e Iesu?

[Ata i le itulau 10]

O i latou e olioli i le Malo, latou te faalaeiauina isi e ala i le fetufaai i lo latou faamoemoe