“Afai e Magalo le Masima”

NA TAUINA taua ona o le masima. Sa faaaogaina o se oloa mo faafesuiaiga. I Saina i aso anamua, sa lona lua atu lona tāua i le auro. Ioe, ua loa ona manatu tagata i le masima o se oloa e matuā tautele. Seia oo mai lava i aso nei, ua faaaogā foi mo togafitiga o maʻi ma vai manuʻa, ma ua faaaogaina i le lalolagi atoa o se mea e faalelei ai le tofo ma faasaoina ai meaʻai mai le faaleagaina.

Pe a fua atu i le tele o mea o loo manaomia ma faaaogaina ai le masima, e lē o se mea la e faateʻia ai lona faaaogaina e le Tusi Paia i se tulaga faafaatusa. Mo se faaaoaoga i le Tulafono faa-Mose, na manaomia ai ona faamasima so o se mea na ofoina atu i le fata faitaulaga ia Ieova. (Levitiko 2:13) Sa lei faia lenei mea e tau ina faaleleia ai le tofo o taulaga, ae e foliga mai sa faaāta e le masima le tuusaoloto mai i le tulaga iuvale po o le pala.

I lana Lauga taʻutaʻua i luga o le Mauga, na fetalai atu ai Iesu Keriso i ona soo: “O outou, o le masima o le lalolagi.” (Mataio 5:13) I lenei faaupuga, na faailoa ai e Iesu e faapea o lo latou talaʻi atu i isi e uiga i le Malo o le Atua o le a mafai ai ona avea ma taaʻiga e laveaiina ai pe faasaoina ai ola o ē o faalogologo. O le mea moni, o i latou o ē na faatatauina fetalaiga a Iesu o le a puipuia mai le faaleagaina tau amio ma le faaleagaga i vaipanoa o loo latou ola ma auauna ai.—1 Peteru 4:1-3.

Peitai, na faaauau ona tuuina atu e Iesu le lapataiga: “A e afai e magalo le masima, . . . E leai se mea e toe aoga ai, na ona lafoaiina i fafo, ma solia e tagata.” I le faaopoopo atu i lenei manatu, na faapea mai le tagata atamai faapitoa i mataupu faale-Tusi Paia o Albert Barnes, o le masima lea sa iloaina e Iesu ma ona aposetolo “sa filogia, sa fefiloi faatasi ma mea e maua mai i fualaau ʻaina ma le eleele.” O lea la pe afai e magalogalo le masima, e ono totoe ai “se vaega tele o mea e maua mai le eleele.” Na taʻua e Barnes e faapea, “O na mea, e lē toe aogā seʻi vaganā ai . . . le lafoai i auala, po o ala savali e pei ona faaaogaina ai iliili.”

I le utagiaina o lenei fautuaga, e tatau ai ona faaeteete Kerisiano ina ia aua neʻi taofia la latou molimau atu i le lautele pe lolo atu i ni ituaiga o amioga e lē faaleatua. O le faia o na mea, o le a latou vāivai ai faaleagaga ma ono avea ai ma ni ē e lē aogā, e pei o le ‘masima ua magalo.’