ʻIa Outou Ō Atu e Fai Tagata ma Soo’

1-2. (a) E tusa ai ma le fetalaiga a Iesu i le Mataio 28:18-20, o le ā le galuega autū a le faapotopotoga Kerisiano? (e) O ā fesili o le a tatou iloiloina i lenei mataupu?

E LEʻI leva ona toetū Iesu, ae ia faatonuina loa ona soo ina ia faapotopoto i se mauga i Kalilaia. E mautinoa e iai se mea o loo tulimataʻia e le ʻauaposetolo mai i lenā faatasiga, a o potopoto i lenā nofoaga. (Mata. 28:16) Atonu o le faatasiga lenā na ʻfaaali atu ai o ia i le ʻauuso pe ā ma le toʻalima selau.’ (1 Kori. 15:6) Aiseā na faatonuina ai e Iesu ona soo ina ia potopoto i inā? Ina ia tuuina atu ai iā i latou le galuega tāua lenei: “O le mea lea, ia outou ō atu e fai tagata o nuu uma lava ma soo.”​—Faitau le Mataio 28:18-20.

² O soo na faalogo i fetalaiga nei a Iesu, na mulimuli ane avea ma vaega o le faapotopotoga Kerisiano i le uluaʻi senituri. O le galuega autū a lenā faapotopotoga, o le faateleina lea o soo o Keriso.b I aso nei, ua faitau sefulu afe faapotopotoga Kerisiano i le lalolagi aoao, ma o le latou galuega autū foʻi lenā. I lenei mataupu, o le a iloiloina ai fesili nei e fā: Aiseā e matuā tāua ai le faia o isi ma soo? O le ā e aofia i le galuega o le faia ma soo? Pe e faia se sao o Kerisiano uma i le faia o isi ma soo? Aiseā e manaʻomia ai le onosaʻi i le faia o lenei galuega?

AISEĀ E MATUĀ TĀUA AI LE FAIA O ISI MA SOO?

3. E tusa ai ma le Ioane 14:6 ma le Ioane 17:3, aiseā e matuā tāua ai le galuega o le faia o isi ma soo?

³ Aiseā e matuā tāua ai le galuega o le faia o isi ma soo? Talu ai e na o soo o Keriso e mafai ona avea ma uō a le Atua. E lē gata i lea, o i latou e mulimuli iā Keriso e faaleleia o latou olaga i le taimi lenei, ma maua le faamoemoe o le ola e faavavau i le lumanaʻi. (Faitau le Ioane 14:6; 17:3.) O le mea moni, ua tuuina mai e Iesu iā i tatou se tiute tauave tāua, ae e tatou te lē o faia na o i tatou lenei galuega. Na faapea mai Paulo e faatatau iā te ia lava ma isi ana aumea vavalalata: “O i matou o le ʻaufaigaluega faatasi ma le Atua.” (1 Kori. 3:9) Maʻeu se faaeaga tautele ua tuuina mai e Ieova ma Keriso mo i tatou, o tagata lē lelei atoatoa!

4. O le ā e tatou te aʻoaʻoina mai i le faaaʻoaʻoga a Ivan ma Matilde?

⁴ O le galuega o le faia o isi ma soo e tatou te maua ai le tele o le olioli. Seʻi manatu i le faaaʻoaʻoga a Ivan ma lana avā o Matilde mai i Colombia. Sa la molimau i se tama talavou e igoa iā Davier, lea na faapea mai: “Ou te manaʻo e sui loʻu olaga ae e lē mafai.” O Davier o se tagata fusu e maua ana tupe i fusuaga e faasā i le tulafono, na ia faaaogāina fualaau faasāina, inu tele i le ʻava malosi, ma sa nonofo ma lana uō teine o Erika. Ua faamatala mai e Ivan e faapea: “E nofo Davier i se nuu maotua, ma ina ua amata ona ma asiasi iā te ia, na ma faimalaga i uila vilivae mo le tele o itula i auala palapalā. Ina ua mātauina e Erika suiga i amioga ma uiga o Davier, ona ia auai lea i le suʻesuʻega.” A o faagasolo taimi, na taofia e Davier le faaaogāina o fualaau faasāina, ʻava malosi, ma lē toe fusu. Sa ia faaipoipo foʻi iā Erika. Ua faapea mai Matilde: “Ina ua papatiso Davier ma Erika i le 2016, na ma manatua le tala a Davier e masani ona fai: ʻOu te manaʻo e sui loʻu olaga ae e lē mafai.’ E leʻi mafai ona taofi le maligi o o ma loimata.” E mautinoa lo tatou olioli, pe a fesoasoani i se tasi e avea ma soo o Keriso.

O LE Ā E AOFIA I LE GALUEGA O LE FAIA MA SOO?

5. O le ā le laasaga muamua i le faia o isi ma soo?

⁵ O le laasaga muamua mo le faia o isi ma soo, o le “saʻili” lea o i latou ua saunia o latou loto. (Mata. 10:11) Pe a molimau i so o se tasi e tatou te feiloaʻi i ai, ma usitaʻia le faatonuga a Iesu e talaʻi atu, ua faamaonia ai e moni o i tatou o Molimau a Ieova ma o ni Kerisiano moni.

6. O le ā e fesoasoani iā i tatou ina ia taulau manuia ai i le faiva?

⁶ O nisi tagata e naunau e aʻoaʻoina upu moni o le Tusi Paia, ae o le toʻatele e tatou te feiloaʻi ai e foliga e lē ano mai i le taimi muamua. E manaʻomia la ona tatou faaosofia lo latou naunau. Ina ia taulau manuia i le faiva, e manaʻomia ona tatou sauniuni lelei. Ia filifili ni mataupu patino e ono fiafia ai tagata e te feiloaʻi i ai. Pe a māeʻa lenā, ona fuafua lea o se auala e faatomua ai se mataupu.

7. E ono faapefea ona e amata se talanoaga ma se tagata, ma aiseā e tāua ai le faalogo ma faaaloalo i o latou manatu?

⁷ O se faaaʻoaʻoga, atonu e te faapea atu i le tagata o le aiga: “E iai se mataupu ou te fia iloa ai sou manatu. E tele faafitauli o loo tatou fesagaʻia i le taimi lenei, o loo aafia ai foʻi tagata i le lalolagi aoao. Pe e te manatu e mafai e se faigāmalo faaletagata ona foʻia faafitauli o le lalolagi?” Pe a māeʻa, ona talanoa lea i le Tanielu 2:44. E mafai foʻi ona e fesili atu i sou tuaoi: “O le ā sou manatu, o le ā le auala sili e aʻoaʻo ai fanau ia amio lelei?” E mafai ona lua talanoa i le Teuteronome 6:6, 7. Po o le ā lava le mataupu e te filifili e faaaogā, ia mafaufau i le tagata o le a e talanoa i ai. Ia mafaufau po o ā aogā o le a ia maua mai, i manatu o le a ia aʻoaʻoina mai i le Tusi Paia. Pe a talanoa foʻi ma i latou, e tāua ona e faalogo atu ma faaaloalo i o latou manatu. O le faia faapea, o le a e malamalama lelei ai i o latou manatu, ma ono mafai ai ona latou faalogo mai iā te oe.

8. Aiseā e tāua ai le faia e lē aunoa o toe asiga?

⁸ A o leʻi malie se tagata e faia sana suʻesuʻega, e manaʻomia ona e faaalu le taimi ma faia taumafaiga e faia ai toe asiga. Aiseā? Talu ai e ono lē avanoa le tagata i le taimi e toe asia ai. E ono manaʻomia foʻi ona e asia se tagata i le tele o taimi, seʻia oo i le taimi e malie ai e faia sana suʻesuʻega. Ia manatua, e tuputupu aʻe se laau pe afai e faasūsū e lē aunoa. I se tulaga talitutusa, e tuputupu aʻe le alofa o se tagata mo Ieova ma Keriso, pe a talanoa e lē aunoa ma lenā tagata i le Afioga a le Atua.

PE E FAIA SE SAO O KERISIANO UMA I LE FAIA O ISI MA SOO?

9-10. Aiseā e faapea atu ai, o Kerisiano uma o loo fai se sao i le saʻilia o tagata lotofaamaoni?

⁹ E faia e Kerisiano uma so latou sao i le saʻilia o tagata lotofaamaoni. E mafai ona faatusaina lea galuega i le saʻilia o se tamaitiiti ua leiloa. I le ā le itu? Seʻi mafaufau i le mea moni lenei na tupu i se tamaitiiti e tolu tausaga na leiloa. E pe ā ma le toʻa 500 tagata na aofia i le saʻilia o lea tamaitiiti. Ae ina ua mavae le pe ā ma le 20 itula, ae maua loa e se tagata tauofo le tamaitiiti i totonu o se togāsana. E leʻi manaʻo lea tagata e viia o ia mo le mauaina o le tamaitiiti. Na ia faapea mai: “E faitau selau tagata na galulue e saʻilia le tamaitiiti.”

¹⁰ E toʻatele tagata e pei o le tamaitiiti na leiloa. Ua leai so latou faamoemoe, ae e latou te manaʻomia le fesoasoani. (Efe. 2:12) E silia i le valu miliona i tatou o loo galulue i le saʻilia o tagata e tatau i ai le feʻau. Atonu e leʻi maua sau suʻesuʻega faale-Tusi Paia. Peitaʻi, e iai isi o le ʻautalaʻi o loo galulue i lenā lava oganuu, ma tau ai i tagata o loo fia suʻesuʻe i le Afioga a le Atua. Pe a maua e uso ma tuafāfine se tasi ua avea ma soo o Keriso, e olioli i latou uma na fesoasoani i le saʻilia o lea tagata.

11. E tusa pe e lē o iai sau suʻesuʻega faale-Tusi Paia, ae o ā nisi auala e mafai ona e fesoasoani ai e faia isi ma soo?

¹¹ E tusa pe e lē o faia sau suʻesuʻega faale-Tusi Paia i le taimi lenei, ae e iai lava isi auala e mafai ona e fesoasoani ai i le faia o isi ma soo. O se faaaʻoaʻoga, e mafai ona e faafeiloaʻia ma ia faaleuō i tagata fou e asiasi mai i le Maota mo Sauniga. O le faia faapea o le a e faamautinoa ai iā i latou, o le alofa e mātaulia ai i tatou o Kerisiano moni. (Ioa. 13:34, 35) E tusa pe pupuu au tali i le sauniga, ae e mafai lava ona aʻoaʻo ai tagata fou e faailoa o latou talitonuga, e ala i le tali i sauniga i se auala faamaoni ma faaaloalo. E mafai foʻi ona lua galulue ma se tagata talaʻi fou i le faiva, ma fesoasoani iā te ia i le faaaogāina o le Tusi Paia e fetufaaʻi ai ma tagata. O le faia faapea, o le a e aʻoaʻoina ai o ia e faaaʻoaʻo i le Keriso.​—Luka 10:25-28.

12. Pe e manaʻomia ona iai ni o tatou tomai faapitoa e fai ai isi ma soo? Ia faamatala.

¹² E lē tatau ona tatou mafaufau e manaʻomia ona iai ni o tatou tomai faapitoa, ina ia aʻoaʻo ai isi e avea ma soo o Iesu. Aiseā? Seʻi manatu i le faaaʻoaʻoga a Faustina mai i Polivia. Ina ua feiloaʻi ma Molimau a Ieova, e leʻi iloa faitau. Ae talu mai lenā taimi, na amata loa ona aʻo lana faitau, peitaʻi e leʻi lelei tele. Ua papatiso o ia i le taimi lenei, ma e fiafia foʻi e aʻoaʻo isi. E lima ana suʻesuʻega faale-Tusi Paia e masani ona fai i vaiaso taʻitasi. E ui e lelei atu le faitau a le toʻatele o tagata suʻesuʻe a Faustina nai lo o ia, ae e toʻaono tagata na ia fesoasoani ai ina ia papatiso.​—Luka 10:21.

13. E ui i lo tatou tulaga pisi, ae o ā ni faamanuiaga e tatou te olioli ai i le faia o isi ma soo?

¹³ O le toʻatele o Kerisiano e pisi i le tele o tiute tauave tāua. E ui i lea, e maua lava lo latou taimi e faia ai suʻesuʻega faale-Tusi Paia, ma matuā olioli ai. Seʻi mafaufau i le faaaʻoaʻoga a Melanie mai i Alaska. O ia o se matua nofo toʻatasi, na ia tausia aʻe lana tama teine e valu tausaga. E iai foʻi sana galuega faataimi atoa, ma fesoasoani e tausia lona tamā na aafia i le kanesa. E na o Melanie le Molimau a Ieova i lea taulaga maotua. E masani ona ia tatalo mo le malosi ina ia talaʻi ai e ui i le malūlū, talu ai lona naunau e maua sana suʻesuʻega faale-Tusi Paia. Mulimuli ane, na ia feiloaʻi iā Sara o lē na matuā fiafia ina ua ia iloa e iai le suafa o le Atua. Ina ua mavae sina taimi, na talia e Sara se suʻesuʻega faale-Tusi Paia. Ua faapea mai Melanie: “E oo ane i afiafi o Aso Faraile ua ou vaivai, ae e ma te maua ma laʻu tama aogā pe a ma ō e fai le suʻesuʻega. E ma te fiafia foʻi e saʻiliʻili tali o fesili a Sara, ma na ma matuā fiafia i le vaai atu ua avea o ia ma uō a Ieova.” Sa fesagaʻia ma le lototele e Sara teteega, tuua lana lotu, ma papatiso.

AISEĀ E MANAʻOMIA AI LE ONOSAʻI I LE FAIA O ISI MA SOO?

14. (a) Aiseā e faatusa ai le galuega o le faia o isi ma soo i faiga faiva? (e) O le ā se aafiaga iā te oe o upu a Paulo o loo i le 2 Timoteo 4:1, 2?

¹⁴ E tusa pe e foliga mai e lē o fua mai lau faiva, ia aua le faavaivai i le saʻilia pea o nisi soo. Ia manatua, na faatusa e Iesu le faia o isi ma soo i faiga faiva. Atonu e tele itula e fagogota ai tagata faifaiva, faatoʻā maua ni iʻa. E masani ona latou fagogota i le leva o le pō po o le taeaopō, ma o nisi taimi e latou te malaga ai i ogāsami mamao. (Luka 5:5) I se tulaga talitutusa, e faaalu e nisi Kerisiano le tele o le taimi e “fagogota” ai i taimi ma nofoaga eseese. Aiseā? Ina ia mafai ona feiloaʻi i le toʻatele o tagata. O i latou e faia nisi taumafaiga filigā, e tauia i latou e ala i le feiloaʻi i tagata e fiafia i la tatou feʻau. Pe e mafai ona e talaʻi i se taimi o le aso e ono toʻatele ai tagata e te feiloaʻi i ai, po o nofoaga foʻi e ono maua ai i latou?​—Faitau le 2 Timoteo 4:1, 2.

15. Aiseā e manaʻomia ai le onosaʻi i le faia o suʻesuʻega faale-Tusi Paia?

¹⁵ Aiseā e manaʻomia ai le onosaʻi i le faia o suʻesuʻega faale-Tusi Paia? O se tasi o māfuaaga, ona e iai nisi mea e manaʻomia ona tatou faia, nai lo o le tau ina fesoasoani i le tagata suʻesuʻe e iloa ma naunau i aʻoaʻoga o le Tusi Paia. E manaʻomia ona tatou fesoasoani iā te ia, ina ia iloa ma alofa iā Ieova le Tusitala o le Tusi Paia. E lē gata i lea, e tatau ona aʻoaʻo le tagata suʻesuʻe i mea e faatalitalia e Iesu mai i ona soo, ae e manaʻomia foʻi ona fesoasoani iā te ia ina ia iloa le auala e ola ai o se Kerisiano moni. E tatau ona tatou onosaʻi e fesoasoani iā te ia, a o ia taumafai e faatatau taʻiala o le Tusi Paia. O nisi, na mafai ona suia o latou manatu ma masaniga i ni nai masina. Ae o isi na manaʻomia ai se taimi umi.

16. O le ā e te aʻoaʻoina mai i le faaaʻoaʻoga a Raul?

¹⁶ O le faaaʻoaʻoga a se misionare sa galue i Peru, e mafai ona faataʻitaʻi mai ai le aogā o le faaalia o le onosaʻi. Ua faapea mai le misionare: “Na uma ona ma suʻesuʻeina tusi e lua ma se tagata suʻesuʻe e igoa iā Raul. Peitaʻi, na ia fesagaʻia pea luʻi faigatā. Sa iai faafitauli i lana faaipoipoga, e tautala i gagana masoā, ma e faigatā ona faaaloalo lana fanau iā te ia. Peitaʻi, sa ia auai e lē aunoa i sauniga. O lea, na ou asiasi pea i ai ma fesoasoani iā te ia ma lona aiga. Na agavaa o ia mo le papatisoga, ina ua mavae le tolu tausaga talu ona ma feiloaʻi.”

17. O le ā o le a tatou talanoaina i le mataupu o loo sosoo mai?

¹⁷ Na faatonuina i tatou e Iesu ia ʻō e fai tagata o nuu uma lava ma soo.’ Ina ia faataunuu lenā faatonuga, e masani ona tatou talanoa i tagata e matuā eseese le auala e latou te mafaufau ai mai iā i tatou, e aofia ai i latou e lē auai i ni faalapotopotoga faalotu, po o ē foʻi e lē talitonu e iai se Atua. O le a talanoaina i le mataupu o loo sosoo mai, auala e faailoa atu ai le tala lelei i na tagata.