‘Ia Aʻoaʻo Atu iā te i Latou ia Tausi i Mea Uma ua Ou Fai Atu ai iā te Outou’

“O lenei, ia outou ō atu e fai nuu uma lava ma soo, ma . . . aʻoaʻo atu iā te i latou ia tausi i mea uma ua ou fai atu ai iā te outou.”—MATAIO 28:19, 20.

1. O le ā le talanoaga a Filipo ma le tamāloa mai i Aitiope?

NA FAIMALAGA atu se tamāloa mai Aitiope i Ierusalema. O i inā na ia tapuaʻi ai i le Atua na ia alofa i ai, o Ieova. O le mea moni, na ia naunau foʻi i le Afioga a le Atua. A o toe foʻi atu i le kariota i lona aiga, na feiloaʻi ai ma le soo o Iesu o Filipo a o faitauina e le Aitiope se kopi o tusitusiga a le perofeta o Isaia. Na fesili atu Filipo i le Aitiope: “Po ua e lagona ea i mea ua e faitauina?” Na tali le tamāloa e faapea: “Ou te mafaia faapefea, pe a lē faasino mai se tasi iā te aʻu?” Na fesoasoani Filipo i lenei tagata aʻoga o le Tusi Paia ina ia avea ma soo o Keriso.—Galuega 8:26-39.

2. (a) O le ā le auala e uigā ai le tali na avatu e le Aitiope? (e) O ā fesili e fesootaʻi atu i le faatonuga a Keriso o le faia o soo o le a tatou iloiloina?

² E tāua tele le tali a le Aitiope. Na ia faapea mai: ‘⁠Ou te mafaia faapefea, pe a lē faasino mai e se tasi iā te aʻu?’ Ioe, na ia manaʻomia se tasi e faasino atu le ala iā te ia. Ua faaalia i lenei faamatalaga le tāua o le faatonuga patino na faaaofia e Iesu i lana poloaʻiga o le faia o soo. O le ā le faatonuga? Ina ia maua le tali, seʻi faaauau ona tatou iloiloina fetalaiga a Iesu i le Mataio mataupu e 28. O le mataupu faatoʻā mavae atu na taulaʻi i fesili aiseā? ma o fea? Ae o le a tatou iloiloina isi fesili e lua e fesootaʻi atu i le faatonuga a Keriso o le faia o soo—o ā mea? ma o afea?

‘Ia Aʻoaʻo Atu iā te i Latou ia Tausi i Mea Uma’

3. (a) E faapefea ona avea se tasi ma soo o Iesu Keriso? (e) O le faia o soo e aofia ai le aʻoaʻoina atu o ā mea?

³ O ā mea e ao ona tatou aʻoaʻo atu e fesoasoani i isi ia avea ma soo o Keriso? Na faatonu e Iesu ona soo: “O lenei, ia outou ō atu e fai nuu uma lava ma soo, ma papatiso atu iā te i latou i le suafa o le Tamā, ma le Atalii, ma le Agaga Paia; ia outou aʻoaʻo atu iā te i latou ia tausi i mea uma ua ou fai atu ai iā te outou.” (Mataio 28:19, 20) O lea la, e ao ona tatou aʻoaʻo atu mea ua faatonu mai e Keriso.a Ae peitaʻi, o le ā e ao ona faia e faamautinoa ai, e lē gata o le a avea se tasi ma soo ua aʻoaʻoina i faatonuga a Iesu ae o le a faaauau ai foʻi? Ua iai se fesoasoani i le auala na filifilia lelei ai e Iesu ana fetalaiga. Mātau, sa lē na ona ia faapea atu: ‘Aʻoaʻo i latou i mea uma ua ou fai atu ai iā te outou.’ Na i lo lea, na ia fetalai atu: ‘Ia aʻoaʻo i latou ia tausi i mea uma ua ou fai atu ai iā te outou.’ (Mataio 19:17) O le ā e aofia ai i lenā mea?

4. (a) O le ā le uiga o le tausia o se faatonuga? (e) Ia faataʻitaʻi le auala tatou te aʻoaʻo ai se tasi ina ia tausi i faatonuga a Keriso.

⁴ O le tausia o se faatonuga, o lona uiga e “gaoioi se tasi e ōgatusa ai” ma usiusitai i ai. O lea la, e faapefea ona tatou aʻoaʻo se tasi ina ia tausi, pe usiusitai i mea na faatonuina e Keriso? Seʻi mafaufau i le auala ua aʻoaʻoina ai tagata aʻoga ia iloa avetaavale e se faiaʻoga, ina ia latou tausi i tulafono o le aualatele. Atonu e aʻoaʻo e le faiaʻoga ana tagata aʻoga i tulafono o le aualatele a o iai i le potu aʻoga. Ae peitaʻi, ina ia aʻoaʻo ana tagata aʻoga i le auala e usiusitai ai i na tulafono, e ao ona ia faasino atu iā i latou ia taʻiala a o latou aveina taavale i le auala tele, ma taumafai e faatatau mea ua latou aʻoaʻoina. E faapena foʻi pe a tatou suʻesuʻeina le Tusi Paia ma tagata, tatou te aʻoaʻo i latou i tulafono a Keriso. Ae peitaʻi, e manaʻomia foʻi ona tatou faasino atu i ai taʻiala a o latou taumafai e faatatau faatonuga a Keriso i o latou soifuaga i aso faisoo ma i le faiva. (Ioane 14:15; 1 Ioane 2:3) O lea la, ina ia faatinoina atoatoa le faatonuga a Keriso i le faia o soo, e manaʻomia ona avea i tatou o ni faiaʻoga ma faasino ala. I lenā auala, ua tatou faaaʻoaʻo ai i faaaʻoaʻoga na faataatitia e Iesu ma Ieova lava ia.—Salamo 48:14; Faaaliga 7:17.

5. Aiseā e ono faatalatū ai se tasi o tatou suʻesuʻe faatasi le Tusi Paia e usiusitai i le faatonuga a Keriso o le faia o soo?

⁵ O le aʻoaʻoina o isi ia tausi i faatonuga a Iesu, e aofia ai le fesoasoani iā i latou ia utagia le faatonuga o le faia o soo. Atonu o se galuega faigatā mo ē o loo tatou suʻesuʻe faatasi le Tusi Paia. E tusa lava pe na avea muamua i latou ma sui maelega o se lotu ua taʻua o Kerisiano, ae e lē o aʻoaʻoina i latou e o latou taʻitaʻi lotu ina ia ō atu e fai tagata ma soo. Na taʻutino nisi taʻitaʻi lotu e faapea, e lē taulau i lotu e taʻua i latou o Kerisiano ona aʻoaʻoina a latou lafu i le galuega faaevagelia. E faatatau i le faatonuga a Iesu ina ia ō atu i le lalolagi ma fesoasoani i tagata uma ia avea ma soo, na faapea mai se tagata aʻoga o le Tusi Paia e suafa iā John R. W. Stott: “O le lē taulau ona usiusitai i lenei faatonuga tāua, o le vaivaiga sili lea o Kerisiano o ē talaʻia le tala lelei i le galuega o le faaevagelia i aso nei.” Na ia toe faaopoopo mai: “E masani ona matou faalauiloa atu la matou feʻau mai luga o le pulelaa. Ua pei i matou i nisi taimi o tagata i luga o le paʻu mātū o loo fautua leotele atu i tagata ua malelemo. Matou te lē maulu i ai ina ia faasaoina i latou. Matou te fefefe ina neʻi susū.”

6. (a) E faapefea ona tatou faataʻitaʻi i le faaaʻoaʻoga a Filipo pe a fesoasoani i se tagata aʻoga o le Tusi Paia? (e) E faaalia faapefea lo tatou manatu mamafa pe a amata ona auai se tagata aʻoga o le Tusi Paia i le galuega talaʻi?

⁶ Pe afai o tatou suʻesuʻe le Tusi Paia ma se tasi na auai muamua i se lotu e “fefefe ina neʻi susū” pe fefefe i le galuega talaʻi, atonu o se luʻi le manumalo i lea tulaga ma usiusitai i le faatonuga a Keriso o le faia o soo. O le a ia manaʻomia le fesoasoani. O lea la, tatou te manaʻomia ai le onosai a o avatu faatonuga ma taʻiala e faalolotoina ai lona malamalamaaga ma uunaʻia ai o ia e gaoioi, e pei lava ona faamalamalamaina le Aitiope i aʻoaʻoga a Filipo ma uunaʻia ai o ia e papatiso. (Ioane 16:13; Galuega 8:35-38) E lē gata i lea, o lo tatou faanaunauga e aʻoaʻo tagata aʻoga o le Tusi Paia ina ia tausia le faatonuga o le faia o soo, e uunaʻia ai i tatou e galulue faatasi ma i latou pe a faatoʻā auai i le galuega talaʻi.—Failauga 4:9, 10; Luka 6:40.

“I Mea Uma”

7. O ā poloaʻiga e aofia ai i le aʻoaʻoina o isi ia ‘⁠tausi i mea uma’?

⁷ E lē faatapulaaina le aʻoaʻoina o i latou i na o mataupu o le faia o soo. Na faatonuina i tatou e Iesu ina ia aʻoaʻo isi e “tausi i mea uma” na ia faatonu atu. E mautinoa e aofia ai poloaʻiga silisili e lua, o le alofa i le Atua ma le alofa i tuaoi. (Mataio 22:37-39) E ono faapefea ona aʻoaʻo se soo fou ia tausi i na poloaʻiga?

8. Ia faataʻitaʻi le auala e mafai ona aʻoaʻoina ai se soo fou i le poloaʻiga o le alofa.

⁸ Ia toe mafaufau i le tala faatusa i se tagata aʻoga o loo aʻoaʻo lana avetaavale. A o aveina e le tagata aʻoga le taavale ae o loo i ona autafa le faiaʻoga, e na te aʻoaʻoina le auala e ave ai le taavale e lē gata i le faalogo i lona faiaʻoga ae ala foʻi i le vaai i isi avetaavale. O se faaaʻoaʻoga, e faauaʻi atu e le faiaʻoga lana tagata aʻoga i se avetaavale e na te faaavanoaina le isi tagata e muamua atu i ona luma; po o se avetaavale e na te kiina i lalo ana molī ina ia aua ai ona segaia mata o le isi avetaavale o loo sau; po o se avetaavale foʻi e fesoasoani atu i se tasi la te masani ua pē lana taavale. O na faaaʻoaʻoga e aʻoaʻo ai e le tagata aʻoga ni lesona aogā e mafai ona ia faatatauina a o ia aveina le taavale. I se tulaga tutusa, e aʻoaʻoina se soo fou o loo faimalaga i le auala o le ola, e lē gata e ala i lona faiaʻoga ae i faaaʻoaʻoga lelei e vaai i ai i le faapotopotoga.—Mataio 7:13, 14.

9. E faapefea e se soo fou ona aʻoaʻoina le uiga o le tausia o le poloaʻiga ia alofa?

⁹ O se faaaʻoaʻoga, atonu e mātauina e se tagata aʻoga o le Tusi Paia se matua nofo toʻatasi o loo faia ni taumafaiga e ō mai faatasi ma lana fanau laiti i le Maota o le Malo. Atonu na te iloaina foʻi se tagata lotomafatia o loo sau pea i sauniga e ui ina tauivi ma ona faanoanoaga, o se fafine ua oti lana tane o loo ia momoliina tagata matutua i sauniga a le faapotopotoga, po o se talavou o loo fesoasoani i le faamamāina o le Maota o le Malo. E mātauina foʻi e le tagata aʻoga o le Tusi Paia se toeaina o le faapotopotoga o loo taulamua ma le faamaoni i le auaunaga i le fanua, e ui i le tele o ona tiute tauave i le faapotopotoga. Atonu e feiloaʻi foʻi i se Molimau e lē atoatoa le malosi o le tino ma ua faataotolia i le fale ae o ia o le puna o faalaeiauga faaleagaga iā i latou e asiasi atu iā te ia. E ono mātauina foʻi e le tagata aʻoga se ulugalii ua faia ni suiga tetele i o la soifuaga ina ia tausia o la mātua ua matutua. E ala i le mātauina o na Kerisiano agalelei, lotofesoasoani ma maufaatuatuaina, ua aʻoaʻoina ai se soo fou e ala i faaaʻoaʻoga i le uiga o le usiusitai i le poloaʻiga a Keriso ia alofa i le Atua ma tuaoi, aemaise lava i uso talitonu. (Faataoto 24:32; Ioane 13:35; Kalatia 6:10; 1 Timoteo 5:4, 8; 1 Peteru 5:2, 3) I lenei auala, e mafai ma e ao ai i tagata uma o le faapotopotoga Kerisiano ona avea ma faiaʻoga ma se faasino ala.—Mataio 5:16.

‘E Oo i le Gataaga o le Lalolagi’

10. (a) O le ā le umi o le a faaauau ai pea ona tatou faia le galuega o le faia o soo? (e) O le ā le faaaʻoaʻoga na faia e Iesu e tusa ai ma le faataunuuina o galuega?

¹⁰ E tatou te faaauau i le faia o soo seʻia afea? Seʻia oo i le gataaga o le lalolagi. (Mataio 28:20) Po o le a mafai ea ona tatou faataunuuina lenei vala o le faatonuga a Iesu? I le avea o se faapotopotoga i le lalolagi aoao, ua tatou maumauaʻi ai ia faia faapea. I tausaga ua mavae, na tatou fiafia ai e faaaogā o tatou taimi, malosi ma alāmanuia ina ia saʻilia ai i “latou uma lava ē ua saunia i le ola faavavau.” (Galuega 13:48) O loo faia e Molimau a Ieova le galuega o le talaʻia o le Malo ma le faia o soo i aso nei i se fua faatatau e sili atu i le tolu miliona itula i aso taʻitasi i le tausaga. Ua tatou faia faapea talu ai o loo tatou mulimuli i le faaaʻoaʻoga a Iesu. Na ia fetalai: “O laʻu mea e ʻai, ia ou faia le finagalo o lē na auina mai aʻu, ma faaiʻu lana galuega.” (Ioane 4:34) O lo tatou faanaunauga faamaoni foʻi lenā. (Ioane 20:21) E tatou te lē na ona mananaʻo e amata le galuega ua tuuina mai iā i tatou e fai, ae tatou te mananaʻo e faaumaina.—Mataio 24:13; Ioane 17:4.

11. O le ā ua tupu i nisi o tatou uso ma tuafāfine Kerisiano, ma o le ā e ao ona tatou fesili ifo ai iā i tatou lava?

¹¹ Ua iai le tulaga ua tatou faanoanoa ai ona ua oo ina vaivai faaleagaga nisi o tatou uso talitonu, ma o le iʻuga ua faavaivaia po ua lē usiusitai ai i le faatonuga a Iesu o le faia o soo. Pe e iai ea se auala tatou te fesoasoani ai iā i latou ina ia toe aufaatasi ma le faapotopotoga ma toe faia ai se sao i le galuega o le faia o soo? (Roma 15:1; Eperu 12:12) O le auala na fesoasoani ai Iesu i ona aposetolo i se taimi na vaivai faaleagaga ai, ua faaalia ai le mea tatou te ono faia foʻi i aso nei.

Ia Faaalia le Manatu Mamafa

12. (a) A o lumanaʻi le maliu o Iesu, o le ā na faia e ona soo? (e) Na faapefea ona feutagaʻi Iesu ma ona aposetolo e ui i lo latou matuā vaivai faaleagaga?

¹² I le faaiʻuga o le faiva a Iesu i le lalolagi ina ua latalata i lona maliu, na “tuua ai lea o ia e i latou uma [le ʻauaposetolo], ua sosola.” E pei ona valoia e Iesu, ua ‘⁠taapeape i latou, e taʻitasi ma alu i lona aiga.’ (Mareko 14:50; Ioane 16:32) Na faapefea ona feutagaʻi Iesu ma ana aumea vaivai faaleagaga? E leʻi umi ona mavae lona toe faatūina, na fetalai atu Iesu i nisi o ona soo: “Aua lua te matataʻu; inā ō atu ia, lua te taʻu atu i oʻu uso, ina ia latou ō atu i Kalilaia, latou te iloa mai ai aʻu.” (Mataio 28:10) E ui lava na matuā vaivai faaleagaga le ʻauaposetolo, ae na taʻua pea e Iesu i latou o “oʻu uso.” (Mataio 12:49) Na ia maufaatuatuaina pea i latou. I lenei auala, na alofa mutimutivale ma faamagalo ai Iesu e pei foʻi ona alofa mutimutivale ma faamagalo Ieova. (2 Tupu 13:23) E faapefea ona tatou faaaʻoaʻo iā Iesu?

13. E faapefea ona tatou vaai iā i latou o ē ua vaivai faaleagaga?

¹³ E ao ona tatou matuā manatu mamafa mo i latou o ē ua vaivai faaleagaga pe ua lē toe auai i le faiva. E tatou te manatua pea galuega lelei na faia e na uso talitonu i le taimi ua mavae, o nisi atonu mo le faitau sefulu o tausaga. (Eperu 6:10) Tatou te matuā misia i latou. (Luka 15:4-7; 1 Tesalonia 2:17) O lea la, e faapefea ona tatou faaalia le manatu mamafa mo i latou?

14. I le faaaʻoaʻo iā Iesu, e faapefea ona tatou fesoasoani i se tasi ua vaivai faaleagaga?

¹⁴ Na fetalai Iesu i ona aposetolo ua vaivai faaleagaga ina ia ō i Kalilaia o le a latou iloa ai o ia i inā. O lona uiga, na valaaulia i latou e Iesu ina ia auai i se sauniga faapitoa. (Mataio 28:10) I se tulaga tutusa foʻi i aso nei, tatou te faalaeiauina i latou ua vaivai faaleagaga ina ia auai i sauniga a le faapotopotoga Kerisiano, ma atonu e manaʻomia ona tatou valaaulia pea i latou ina ia auai. I le tulaga o aposetolo, na maua ni iʻuga lelei o lea valaaulia auā na “ō atu ai lea o le ʻau soo e toʻasefulu ma le toʻatasi i Kalilaia, i le mauga na poloaʻi atu ai Iesu iā te i latou.” (Mataio 28:16) Maʻeu lo tatou olioli pe a tali mai ē vaivai faaleagaga i la tatou valaaulia māfana ma toe auai i sauniga faa-Kerisiano!—Luka 15:6.

15. E faapefea ona tatou mulimuli i le faaaʻoaʻoga a Iesu i le faafeiloaʻia o ē vaivai faaleagaga e ō mai i le Maota o le Malo?

¹⁵ O le a faapefea ona tatou gaoioi pe a taunuu se Kerisiano vaivai faaleagaga i le Maota o le Malo? O le ā na fai e Iesu ina ua ia silafia ona aposetolo, o ē na vaivai lo latou faatuatua mo sina taimi, ua iai i le nofoaga na filifilia e feiloaʻi ai? “Ona maliu ane ai lea o Iesu, ua fetalai atu iā te i latou.” (Mataio 28:18) E leʻi silaloa o ia mai i se mea mamao ae peitaʻi, na ia maliu atu iā i latou. Seʻi manatu i le toʻafilemu o lagona o le ʻauaposetolo ina ua taulamua Iesu e talanoa atu! Seʻi o tatou taulamua foʻi la e faafeiloaʻi ma le māfana ē ua vaivai faaleagaga o loo faia taumafaiga e toe ō mai ai i sauniga a le faapotopotoga.

16. (a) O le ā tatou te aʻoaʻoina mai i le auala na feutagaʻi ai Iesu ma ona soo? (e) E faapefea ona tatou faaatagia atu le silafaga a Iesu i ē vaivai faaleagaga? (Tagaʻi i le faamatalaga pito i lalo.)

¹⁶ O le ā le isi mea na fai e Iesu? Muamua, na ia faia se faasilasilaga: “Ua tuuina mai iā te aʻu le pule uma.” Lona lua, na ia tuuina atu se galuega: “O lenei, ia outou ō atu e fai nuu uma lava ma soo.” Lona tolu, na ia faia se folafolaga: “Ou te iā te outou i aso uma lava.” Peitaʻi, po o e mātauina o le ā e leʻi faia e Iesu? E na te leʻi aʻoaʻia ona soo ona o o latou lotovaivai ma le iai o masalosaloga. (Mataio 28:17) Pe na uigā lana talanoa atu? Ioe. E leʻi umi ae toe “aʻoaʻo atu, ma talaʻi atu . . . le tala lelei” e le ʻauaposetolo. (Galuega 5:42) E ala i le mulimuli i le faaaʻoaʻoga a Iesu i le auala e mafaufau ma feutagaʻi ai ma ē vaivai faaleagaga, e lē taumatea o le a tupu na iʻuga faamāfanafanaloto i a tatou faapotopotoga.b—Galuega 20:35.

“Ou te iā te Outou i Aso Uma”

17, 18. O ā manatu faalaeiau o loo maua i fetalaiga a Iesu, “Ou te iā te outou i aso uma lava”?

¹⁷ O upu mulimuli o faatonuga a Iesu, “Ou te iā te outou i aso uma lava,” ua iai se manatu faalaeiau mo i latou uma o tauivi e faatinoina le faatonuga a Keriso o le faia o soo. Po o ā lava omiga mai fili e faasaga i la tatou galuega talaʻi o le Malo ma tala taufaaleaga latou te lafo faasaga iā i tatou, ae e leai se māfuaaga tatou te fefefe ai. Aiseā tatou te lē fefefe ai? Talu ai ua faatasi mai Iesu ma lagolagoina i tatou, o ia o lo tatou taʻitaʻi, ma ua tuuina atu i ai le “pule uma i le lagi ma le lalolagi”!

¹⁸ O se matuā faalaeiauga mo i tatou le folafolaga a Iesu, “Ou te iā te outou i aso uma lava.” A o tatou tauivi e faataunuu le faatonuga a Iesu o le faia o soo, e lē gata o le a iai aso e olioli ai ae o le a iai foʻi aso e faanoanoa ai. (2 Nofoaiga a Tupu 6:29) O nisi o i tatou e iai taimi ua faavauvau ai ona o le maliu o se tasi e pele. (Kenese 23:2; Ioane 11:33-36) O nisi ua feagai ma le soifua matua, ua oo ina lē lelei le soifua mālōlōina ma fai ifo le malosi. (Failauga 12:1-6) O nisi o loo feagai pea ma vaitaimi ua lofitūina ai i latou i le lotomafatia. (1 Tesalonia 5:14) Ua faateleina foʻi le aofaʻi o i tatou o tauivi i tulaga faigatā tau tamaoaiga. Ae peitaʻi, e ui i na luʻi ae ua tatou taulau pea i la tatou faiva talu ai, o loo faatasi Iesu ma i tatou i “aso uma lava,” e aofia ai faafitauli tugā o tatou olaga.—Mataio 11:28-30.

19. (a) O ā mataupu ua aofia ai i le faatonuga o le faia o soo? (e) O le ā ua mafai ai ona tatou faataunuuina le faatonuga a Keriso?

¹⁹ Ua tatou iloa mai i lenei mataupu ma le mataupu ua mavae atu, e aofia ai vala uma i le faatonuga a Iesu o le faia o soo. Na fetalai mai Iesu iā i tatou i le māfuaaga ma o fea e ao ona tatou faatinoina ai lana faatonuga. Na ia fetalai mai foʻi po o ā mea e ao ona aʻoaʻo atu ma seʻia oo afea ona tatou faia ai faapea. Ioe, o se luʻi le faataunuuina o lenei faatonuga. Peitaʻi, ua mafai ona tatou faataunuuina lenei faatonuga ona o le pule a Iesu o loo lagolagoina ai i tatou ma o loo ia faatasi ma i tatou! E lē taumatea e te ioe i lenā manatu.

[Faamatalaga pito i lalo]

O le a Faapefea Ona E Tali?

• E faapefea ona tatou aʻoaʻo isi ina ia tausi i mea na faatonu mai e Iesu?

• O ā lesona e ono aʻoaʻoina e se soo fou mai isi o le faapotopotoga?

• O le ā tatou te faia e fesoasoani ai iā i latou ua vaivai faaleagaga?

• O le ā le faalaeiauga ma le faamāfanafanaga tatou te maua mai i le folafolaga a Iesu, “Ou te iā te outou i aso uma lava”?

[Ata i le itulau 15]

E ao ona avea i tatou o ni faiaʻoga ma faasino ala

[Ata i le itulau 17]

E aʻoaʻoina e se soo fou ni lesona aogā mai i faaaʻoaʻoga e faataatitia e isi