“Ia E Aʻoaʻo mai ia te i Matou i Tatalo”

“Ona fai mai lea ia te ia o le tasi o lona au soo, Le Alii e, ia e aʻoaʻo mai ia te i matou i tatalo.”—LUKA 11:1.

1-3. (a) Aiseā na saili ai e soʻo o Iesu le aʻoaʻoina i le tatalo? (e) O ā fesili ua mapuna aʻe e uiga i tatalo?

O NISI tagata ua maua le meaalofa o le leo malie i pesega. O isi ua iai a latou lava taleni masani i le avea o ni tagata faimusika. Ae ina ia ausia o latou tulaga aupito sili ona maualuluga, e oo lava i nei tagata pepese ma tagata faifaaili e manaomia ona aʻoaʻoina. E faapena foi i tatalo. Sa oo ina iloa e soʻo o Iesu Keriso e manaomia ona aʻoaʻoina i latou pe afai e mananao ia faafofogaina e le Atua a latou tatalo.

² Sa masani lava ona tatalo toatasi Iesu i lona Tamā, e pei ona sa ia faia i le po atoa a o leʻi filifilia le au aposetolo e 12. (Luka 6:12-16) E ui lava sa ia uunaia foi ona soʻo ina ia tatalo taitoatasi, ae sa latou faalogo ia te ia o tatalo i le lautele ma matauina ai faapea sa lē pei o ia o tagata lotu faafiaamiotonu o ē na tatalo ina ia iloa mai e tagata. (Mataio 6:5, 6) O lea la, ua tatau ai le faanaunau o soʻo o Iesu mo ana faatonuga auiluma e faatatau i tatalo. O lea, ua tatou faitau ai: “Sa i le tasi mea o ia, ua tatalo, ua uma, ona fai mai lea ia te ia o le tasi o lona au soo, Le Alii e, ia e aʻoaʻo mai ia te i matou i tatalo; e faapei o Ioane [le Papatiso] foi ona aʻoaʻo i ona soo.”—Luka 11:1.

³ Na faapefea ona tali atu Iesu? O le ā e mafai ona tatou aʻoaʻoina mai i lana faaaʻoaʻoga? E mafai faapefea ona tatou maua aogā mai lana aʻoaʻoga i le tatalo?

Lesona mo i Tatou

4. Aiseā e ao ai ona tatou “tatalo e le aunoa,” ma o le ā le uiga o le faia faapea?

⁴ E tele e mafai ona tatou aʻoaʻoina mai fetalaiga ma le faaaʻoaʻoga a Iesu i le avea o se tagata o le tatalo. O se tasi o lesona e faapea, afai sa manaomia e le Alo lelei atoatoa o le Atua ona tatalo e lē aunoa, ua iai la i ona soʻo lē lelei atoatoa se manaoga e sili atu ona tele e faaauau ai ona vaavaai atu i le Atua mo le taʻitaʻiga, faamafanafanaga, ma meaʻai faaleagaga. O le mea lea, e ao ai ona tatou “tatalo e le aunoa.” (1 Tesalonia 5:17) E moni, e lē o le uiga o lenei mea faapea e tatau pea ona tatou tootutuli moni i lalo. Na i lo o lea, e ao ona iai pea ia i tatou se uiga i le tatalo. E ao ona tatou vaavaai atu i le Atua mo le taʻitaʻiga i vala uma o le olaga ina ia mafai ai ona tatou gaoioi ma le malamalama ma maua pea lana faamaoniga.—Faataoto 15:24.

5. O ā mea e mafai ona faasalavei i le taimi e ao ai ona tatou tuutoina atu i le tatalo, ma o le ā e ao ona tatou faia e uiga i ai?

⁵ I nei “aso e gata ai,” e tele mea e mafai ona faasalavei ane i le taimi e ao ona tatou faaaluina i le tatalo. (2 Timoteo 3:1) Ae afai o popolega tau i le aiga, tausiga o le pisinisi, ma mea faapena o loo faalavelavea ai tatalo e lē aunoa i lo tatou Tamā faalelagi, ua matuā faamamafaina la i tatou e popolega o lenei olaga. O se tulaga faapena e manaomia ona faasaʻoina e aunoa ma le faatalatū, auā o le lē taulau ona tatalo e taʻitaʻiina atu ai i le leiloa o le faatuatua. A lē o le tatau ona faaitiitia o a tatou avega tauave i aso fai soo, po o le faapaleniina o le tausiga o le olaga faatasi ai ma se faanaunauga sili ma le faifai pea, ina ia liliu atu pea o tatou loto i le Atua mo le taʻitaʻiga. E ao ona ʻtatou mataala . . . ma le tatalo.’—1 Peteru 4:7.

6. O le ā le tatalo o le a tatou suesueina nei, ma faatasi ai ma le ā le tulaga autū?

⁶ I le mea ua taʻua o le tatalo faaaʻoaʻo, sa aʻoaʻo ai e Iesu ona soʻo i le pe faapefea ona tatalo, ae lē o le aʻoaʻo o upu tonu e fai. O le faamatalaga a Luka e iai sina eseese mai i le faamatalaga a Mataio ona e eseese tulaga sa aafia ai. O le a tatou suesueina lenei tatalo e fai ma faaaʻoaʻo o le natura o a tatou tatalo i le avea o soʻo o Iesu ma o ni Molimau a Ieova.

Lo Tatou Tamā ma Lona Suafa

7. O ai ua faaeaina e fai atu ia Ieova faapea “lo matou Tamā e”?

⁷ “Lo matou Tamā e, o i le lagi.” (Mataio 6:9; Luka 11:2) Talu ai o Ieova o Lē na Foafoaina le fanau a tagata ma e afio i le nofoaga faalelagi, ua saʻo ai ona faapea atu ia te ia o “lo matou Tamā e, o i le lagi.” (1 Tupu 8:49; Galuega 17:24, 28) O le faaaogāina o le upu “matou” ua faailoa ai faapea o isi foi e iai se faiā vavalalata ma le Atua. Ae o ai o iai le faaeaga lē mataofiofia o le fai atu ia te ia faapea o lo latou Tamā? E na o tagata tuuina atu ma papatisoina i lona aiga o tagata tapuai. O le taʻua o Ieova “lo matou Tamā” ua faaalia ai le iai o lo tatou faatuatua i le Atua ma iloa faapea e na o le pau le faavae mo le faia o se leleiga ma ia o le talia atoatoa o le taulaga togiola a Iesu.—Eperu 4:14-16; 11:6.

8. Aiseā e ao ai ona tatou moomoo e faaalu taimi i le tatalo ia Ieova?

⁸ Maeu le latalata e ao ona iai o tatou lagona i lo tatou Tamā faalelagi! I le avea o ni fanau o ē e lē taitai ona vaivai e ō atu pea i lo latou tamā, e ao ai ona tatou moomoo e faaaluina taimi i le tatalo i le Atua. O le loloto o le loto faafetai mo ana faamanuiaga faaleagaga ma le faaletino e ao ona uunaia ai i tatou e faafetai atu ia te ia mo lona lelei. E ao ona ia i tatou le lagona ia maʻau i le tuuina atu ia te ia o avega o mafatia ai i tatou, i le mautinoa faapea o le a ia faaolaina i tatou. (Salamo 55:22) E mafai ona tatou mautinoa faapea afai tatou te faamaoni, i le iʻuga, o le a lelei ai ona galueaiina mea uma auā e manatu mai o ia ia i tatou.—1 Peteru 5:6, 7.

9. O se tatalo mo le faapaiaina o le suafa o le Atua o se olega mo le ā?

⁹ “Ia paia lou suafa.” (Mataio 6:9; Luka 11:2) O le upu “suafa” i nisi taimi ua faailoa ai le tagata lava ia, ma “ia paia” o lona uiga “ia faia ia paia, vavaeese pe taofia o se mea e paia.” (Faatusatusa Faaaliga 3:4.) O lona uiga la, o le tatalo mo le faapaiaina o le suafa o le Atua o se talosaga lea faapea ia gaoioi Ieova e faapaiaina o ia lava. Faapefea? I le faamamāeseina o faifaiga uma ua faafaupuʻe atu i lona suafa. (Salamo 135:13) I lena itu, o le a aveesea ai e le Atua amioga leaga, faamamaluina o ia lava ma taʻu atu i nuu ina ia latou iloa faapea o ia o Ieova. (Esekielu 36:23; 38:23) Afai tatou te faanaunau ina ia iloa lena aso ma talisapaia moni le mamalu o Ieova, o le a tatou faalatalata atu ai pea ia te ia i le agaga migao ua faaalia i upu “ia paia lou suafa.”

Le Malo o le Atua ma Lona Finagalo

10. O le ā lona uiga pe a tatou tatalo mo le Malo o le Atua ia oo mai?

¹⁰ “Ia oo mai lou malo.” (Mataio 6:10; Luka 11:2) O le Malo i inei o lona uiga o le tulaga tau i le pule silisili ese a Ieova, e pei ona faaalia e ala i le pulega faalelagi faa-Mesia i aao o Iesu Keriso ma lana “au paia” ua latou auaufaatasi. (Tanielu 7:13, 14, 18, 27; Isaia 9:6, 7; 11:1-5) O le ā lona uiga o le tatalo mo lea malo ina ia “oo mai”? O lona uiga ia tatou talosaga atu ia oo mai le Malo o le Atua e faasaga atu i ē uma lava faalelalolagi e tetee i le tulaga pule tauatua. Pe a uma ona ʻtuʻimomomoina e le Malo ma aumaia le iʻuga i malo uma faalelalolagi,’ ona ia faaliliuina lea o le lalolagi i se parataiso faalekelope.—Tanielu 2:44; Luka 23:43.

11. Afai tatou te faanaunau e vaai atu ua faia le finagalo o Ieova i le vateatea aoao, o le ā o le a tatou faia?

¹¹ “Ia faia lou finagalo i le lalolagi, e pei ona faia i le lagi.” (Mataio 6:10) O se olega lenei ina ia faaauau e le Atua ona tauave atu lana fuafuaga agaʻi i le lalolagi, lea e aofia ai le aveesea o ona fili. (Salamo 83:9-18; 135:6-10) O le mea moni, e faaalia ai lo tatou moomoo e vaai atu o le a faia le finagalo tauatua i le vateatea aoao. Afai o le mea lena o loo i o tatou loto, o le a tatou faia pea la le finagalo o Ieova i le mea aupito sili ona lelei tatou te mafaia. E lē mafai ona tatou faia ma le faamaoni lena olega pe afai sa tatou lē taumafai ma le naunautai e faia le finagalo o le Atua i lo tatou lava tulaga. Afai ua tatou tatalo i lenei auala, ona ao ai lea ona tatou faamautinoa tatou te lē o faia mea e faasagatau ai i lena finagalo, e pei o le faia o evaga ma se tagata lē talitonu po o le talia o auala faalelalolagi. (1 Korinito 7:39; 1 Ioane 2:15-17) Na i lo lea, e ao ona teu pea i o tatou mafaufau le manatu, ʻO le ā le finagalo o le Atua i lenei mataupu?’ Ioe, afai tatou te alolofa i le Atua ma o tatou loto atoa, o le a tatou sailia la lana taʻitaʻiga i mataupu uma o le olaga.—Mataio 22:37.

A Tatou Meaʻai i Aso Taitasi

12. O le talosaga atu mo na o ʻmeaʻai o aso taitasi’ ua iai le ā le āuga lelei ia i tatou?

¹² “Ia e foai mai ia te i matou i le aso nei a matou mea e ʻai e tatau ma le aso.” (Mataio 6:11) O le faitauina lenei o le faamatalaga a Luka: “Ia e foai mai ia te i matou i lea aso ma lea aso a matou mea e ʻai e tatau ma le aso.” (Luka 11:3) O le talosaga atu i le Atua ina ia saunia meaʻai e tatau “ma le aso” ua siitia ai le faatuatua i lona tomai e tausia ai o tatou manaoga mai lea aso i lea aso. Sa tatau i tagata Isaraelu ona aoina le manai “o le aso ma ana mea e tusa ai,” ae lē mo le vaiaso po o le sili atu. (Esoto 16:4) Ua lē o se tatalo lenei mo meaʻai eseese ma le anoanoaʻi o sauniuniga ae mo o tatou manaoga i aso taitasi pe a mapuna aʻe. O le talosaga atu i na o meaʻai i aso taitasi ua fesoasoani foi ia i tatou ina ia lē manao tele ai.—1 Korinito 6:9, 10.

13. (a) I se uiga lautele, o le ā ua uiga i ai le ole atu mo meaʻai o aso taitasi? (e) O le ā e ao ona avea o lo tatou uiga faaalia, e tusa lava pe tatou te galulue mamafa ma maua ai na o ni nai mea ua lava?

¹³ I se uiga lautele, o le talosaga atu mo meaʻai i aso taitasi ua faaalia ai tatou te lē o lagona le fia tutoatasi ae o loo vaavaai atu pea i le Atua mo meaʻai, meainu, lavalava, ma isi mea manaomia. I le avea o ni ē tuuina atu o lona aiga o tagata tapuai, tatou te faalagolago ai i lo tatou Tamā ae lē na o le nofonofo ma faatalitali mo ia e saunia faavavega mea mo i tatou. Tatou te galulue ma faaaogā so o se auala ua tuuina mai ia i tatou e maua ai meaʻai ma isi mea manaomia. Peitai, ua saʻo lo tatou faafetai atu i le Atua i le tatalo auā ua tatou iloa atu i tua o nei sauniuniga le alofa, le atamai, ma le mana o lo tatou Tamā faalelagi. (Galuega 14:15-17; faatusatusa Luka 22:19.) O lo tatou filiga e mafai ona iʻu i le manuia. Ae tusa lava pe tatou te galulue mamafa ma maua ai na o ni nai mea ua lava, ae seʻi o tatou loto faafetai ma loto malie. (Filipi 4:12; 1 Timoteo 6:6-8) O le mea moni, o se tagata faaleatua ua maua meaʻai e masani ai ma lavalava e mafai ona sili atu ona fiafia na i lo o nisi o ē e tele le manuia faaletino. O lea e tusa lava pe itiiti ni mea tatou te maua ona o tulaga i tala atu o le mea tatou te mafaia, seʻi aua neʻi o tatou loto vaivai. E mafai lava ona tatou mauʻoa faaleagaga. E matuā lē manaomia lava ona tatou matitiva i le faatuatua, faamoemoe, ma le alofa mo Ieova, o lē e avatu i ai la tatou viiga ma le faafetai o tatalo mai o tatou loto.

Faamagaloina a Tatou Agasala

14. Mo ā aitalafu tatou te talosagaina ai le faamagaloga, ma o le ā ua faatatauina e le Atua ia i latou?

¹⁴ “Ia e faamagalo ia te i matou i a matou agasala [aitalafu, “NW”], e pei o i matou foi ona matou faamagaloina atu i e ua agaleaga mai ia te i matou.” (Mataio 6:12) Ua faaalia foi i le faamatalaga a Luka faapea o na aitalafu o agasala. (Luka 11:4) O le agasala tuufaasolo ua taofia ai i tatou mai le faia o mea uma e tusa ma le finagalo lelei atoatoa o lo tatou Tamā. O le mea lea, i se uiga, o nei mea sese ua avea ma a tatou aitalafu, po o avega tauave i luma o le Atua, talu ai ua amata ona tatou ʻola ma savavali i le agaga.’ (Kalatia 5:16-25; faatusatusa Roma 7:21-25.) Ua ia i tatou nei aitalafu ona tatou te lē lelei atoatoa ma e lē mafai i le taimi lenei ona ausia atoatoa tapulaa a le Atua. Ua tatou maua ai le faaeaga e tatalo atu mo le faamagaloina o nei agasala. E fiafia lava, ona e mafai e le Atua ona faatatau le aogā o le taulaga togiola a Iesu i nei aitalafu po o agasala.—Roma 5:8; 6:23.

15. O le ā lo tatou uiga faaalia e ao ona iai e faatatau i le aʻoaʻiga o manaomia?

¹⁵ Afai tatou te faatalitali e faamagalo e le Atua a tatou aitalafu po o agasala, e tatau la ona tatou salamō ma loto malie e talia aʻoaʻiga. (Faataoto 28:13; Galuega 3:19) Ona e alofa Ieova ia i tatou, ua ia aumaia ai ia i tatou le aʻoaʻiga tatou te manaomia totino ina ia mafai ai ona tatou faasaʻoina o tatou vaivaiga. (Faataoto 6:23; Eperu 12:4-6) E moni, e mafai ona faafiafiaina i tatou pe afai o le tutupu aʻe i le faatuatua ma le poto e oo ai o tatou loto i se tulaga atoatoa e ōgatasi ma tulafono a le Atua ma mataupu silisili na ua lē taitai ona tatou sopo tapulaaina ma le loto i ai. Ae faapefea pe afai tatou te iloa se mea sese ua tatou faia ma le loto i ai? Ona ao lea ona tatou tiga loloto ma tatau ona tatalo faatauanau mo le faamagaloga. (Eperu 10:26-31) I le faatatauina o le fautuaga ua tatou maua, e ao ai ona tatou faasaʻo vave o tatou ala.

16. Aiseā e aogā ai le talosaga atu pea i le Atua e faamagalo a tatou agasala?

¹⁶ E aogā le talosaga atu e lē aunoa i le Atua e faamagalo mai a tatou agasala. O le faia o lenei mea e tuu ai pea i o tatou luma a tatou agasala ma e tatau ona iai se āuga loto maulalo. (Salamo 51:3, 4, 7) Tatou te manaomia lo tatou Tamā faalelagi e “faamagalo ai a tatou agasala, ma faamamā mai ia i tatou i amioletonu uma lava.” (1 Ioane 1:8, 9) Ae lē gata i lea, o le taʻua o a tatou agasala i le tatalo ua fesoasoani ia i tatou e tau malosi ai pea faasaga i ai. O lea, ua faamanatu mai ai pea foi ia i tatou faatatau i lo tatou manaoga mo le togiola ma le aogā o le toto masaa o Iesu.—1 Ioane 2:1, 2; Faaaliga 7:9, 14.

17. Ua faapefea i le tatalo mo le faamagaloga ona fesoasoani ia i tatou i la tatou faiā ma isi?

¹⁷ O le tatalo mo le faamagaloga e fesoasoani foi ia i tatou ina ia alofa mutimutivale, tiga alofa, ma lima foai ia i latou o ē atonu o tatou nofo aitalafu ai i mea tetele ma mea iti. Ua faapea mai le faamatalaga a Luka: “Ia e faamagalo ia te i matou i a matou agasala; auā foi matou te faamagaloina atu ia i latou uma o e agaleaga mai ia te i matou.” (Luka 11:4) O le mea moni, faatoʻā mafai ona tatou maua le faamagaloga mai le Atua pe afai ua uma ona tatou “faamagaloina atu i e ua agaleaga mai,” o tagata ua agasala mai ia i tatou. (Mataio 6:12; Mareko 11:25) Na faaopoopo atu Iesu: “Auā afai tou te faamagaloina atu tagata i a latou agasala, e faamagaloina foi outou e lo outou Tamā o i le lagi. A e afai tou te le faamagaloina atu tagata i a latou agasala, e le faamagaloina foi e lo outou Tamā a outou agasala.” (Mataio 6:14, 15) O le tatalo mo le faamagaloina o a tatou agasala e ao ona uunaia ai i tatou e faapalepale i isi ma faamagalo i latou. Na tusi le aposetolo o Paulo: “Faapei ona faamagalo mai [Ieova, NW] ia te outou, ia faapea foi outou.”—Kolose 3:13; Efeso 4:32.

Faaosoosoga ma Lē o Leaga

18. Aiseā e lē tatau ai lava ona tatou tuuaʻia le Atua mo o tatou faaosoosoga ma tofotofoga?

¹⁸ “Aua foi e te taʻitaʻiina i matou i le tofotofoga.” (Mataio 6:13; Luka 11:4) O nei upu e lē o faaalia ai faapea e tofotofoina i tatou e Ieova ina ia faia le agasala. I nisi taimi ua tautala ai le Tusi Paia e uiga i le faia po o le faapogaia e le Atua mea e na ona ia faatagaina. (Ruta 1:20, 21; faatusatusa Failauga 11:5.) Ae “e le mafai ona faaosoosoina e le Atua i mea leaga, e le faaosooso atu foi o ia i se tasi,” na tusi ai le soʻo o Iakopo. (Iakopo 1:13) O le mea lea, seʻi aua lava neʻi o tatou tuuaʻia lo tatou Tamā faalelagi mo faaosoosoga ma tofotofoga i mea leaga, auā o Satani o Lē Tofotofo e taumafai e faaliliu i tatou ina ia agasala faasaga i le Atua.—Mataio 4:3; 1 Tesalonia 3:5.

19. E mafai faapefea ona tatou tatalo e tusa ai o tofotofoga?

¹⁹ E ala i le talosaga, “Aua foi e te taʻitaʻiina i matou i le tofotofoga,” i se uiga ua tatou fesili atu ai ia Ieova ina ia lē faatagaina i tatou e lolo atu e lē usiusitai ia te ia pe a tofotofoina pe omia. E mafai ona tatou augani i lo tatou Tamā e taʻitaʻiina o tatou laasaga ina ia lē oo mai ia i tatou ni tofotofoga e sili ona matuiā mo i tatou. E tusa ai o lenei mea, na tusi Paulo: “Ua le maua outou e se tofotofoga e ese i lo tagata; a ua faamaoni le Atua, o le na te le tuuina atu outou i le tofotofoga e sili i se mea ua outou lavatia, a e sauni foi faatasi ma le tofotofoga se mea e sao ai, ina ia outou lavā oono.” (1 Korinito 10:13) E mafai ona tatou tatalo ia Ieova e taʻitaʻiina i tatou ina ia lē tofotofoina i tatou e sili atu i lo le mea tatou te lavatia ma ua ia saunia ai se auala e sao mai ai pe a tatou matuā tigaina. O tofotofoga e mai le Tiapolo, o lo tatou tino agasala, ma vaivaiga o isi, ae mafai e lo tatou Tamā alofa ona taʻitaʻiina i tatou ina ia tatou lē fememeai ai.

20. Aiseā e tatalo ai mo le laveaiina mai ʻle o leaga’?

²⁰ “A ia e laveai ia i matou ai le leaga.” (Mataio 6:13) E mautinoa e mafai e le Atua ona puipuia Satani, ʻle o leaga,’ mai le manumalo ia i tatou. (2 Peteru 2:9) Ma sa leʻi faapea ona iai muamua se manaoga tele mo le faasaoina mai le Tiapolo na i lo o le taimi nei, auā ʻua ita tele o ia, ua iloa ua puupuu ona aso.’ (Faaaliga 12:12) Tatou te lē valea i togafiti a Satani, ae e lē faapea foi na te lē o iloaina o tatou vaivaiga. I lea, e manaomia ai ona tatou tatalo ina ia tausia e Ieova i tatou mai taofiofiga a le Fili pei se leona. (2 Korinito 2:11; 1 Peteru 5:8, 9; faatusatusa Salamo 141:8, 9.) Mo se faataʻitaʻiga, afai tatou te mananao e faaipoipo, atonu e manaomia ona tatou ole atu ia Ieova ina ia laveaiina i tatou mai togafiti a Satani ma mai faaosoosoga ina ia atiina aʻe ni faiā faalelalolagi na e mafai ona taʻitaʻiina atu ai i amioga lē mamā po o le lē usiusitai i le Atua e ala i le faaipoipo i se tagata lē talitonu. (Teuteronome 7:3, 4; 1 Korinito 7:39) Pe o tatou moomoo mo le tamaoaiga faitino? Atonu la e manaomia le tatalo ina ia fesoasoani ia i tatou e tetee tofotofoga o le pelē tupe pe faia ni faiga taufaasese. Ona o le naunau ina ia faaumatia la tatou faiā ma Ieova, o le a faaaogā ai e Satani so o se auupega i lana faaputuga o tofotofoga. O lea seʻi o tatou faaauau pea ona tatalo i lo tatou Tamā faalelagi, o lē e lē taitai ona tuulafoaiina le amiotonu ia tofotofoina ma o lē na te saunia le laveaiina mai lē o leaga.

E Atiina aʻe e le Tatalo le Faatuatua ma le Faamoemoe

21. Ua mafai faapefea ona tatou maua aogā mai le tatalo atu mo le Malo?

²¹ O lo tatou Tamā faalelagi, o lē na te laveaiina i tatou mai lē o leaga, e fiafia e faamanuia tele mai i tatou. Peitai, aiseā ua ia faatagaina ai mo se taimi umi ona tagata pele e tatalo, “Ia oo mai lou malo”? Ia, i le gasologa o tausaga, o le tatalo i lenei auala ua faateleina ai lo tatou naunau ma le talisapaia mo le Malo. O na tatalo ua faamanatu mai ai ia i tatou le manaoga sili mo lenei pulega faalelagi mo le lelei. Ua taofia ai foi i o tatou luma le faamoemoe o le ola i lalo o le pulega a le Malo.—Faaaliga 21:1-5.

22. O le ā e ao ona avea o lo tatou uiga faaauau pea agaʻi i le tatalo i lo tatou Tamā faalelagi, o Ieova?

²² O le tatalo e lē mafesiligia le atiina aʻe ai o le faatuatua ia Ieova. Ua faamalosia lo tatou noataga ma ia pe a ia tali mai i a tatou tatalo. O le mea lea, seʻi aua lava neʻi o tatou faavaivai i le liliu atu ia te ia i aso uma i le viiga, le faafetai, ma le faatoga. Ma tau lava ina ia tatou loto faafetai i le tali fesoasoani atu a Iesu i le manaoga o ona soʻo: “Le Alii e, ia e aʻoaʻo mai ia te i matou i tatalo.”

E te Manatua?

◻ O ā lesona e mafai ona tatou aʻoaʻoina mai fetalaiga ma le faaaʻoaʻoga a Iesu i le avea o se tagata o le tatalo?

◻ Mo le ā e ao ona tatou tatalo ai i lo tatou Tamā faalelagi ma lona suafa?

◻ O le ā o tatou ole atu ai pe a tatou tatalo mo le Malo o le Atua ina ia oo mai ma ia faia lona finagalo i luga o le lalolagi?

◻ O le ā o tatou ole atu ai pe a tatou tatalo mo meaʻai i aso taitasi?

◻ O le ā le uiga pe a tatou tatalo mo le faamagaloina o a tatou agasala?

◻ Aiseā e matuā tāua ai le tatalo e faatatau i tofotofoga ma le laveaiina mai ia Satani, lē o leaga?

[Ata i le itulau 16]

Na talosaga atu soʻo o Iesu ia te ia ina ia aʻoaʻo i latou pe faapefea ona tatalo. E te iloa e mafai faapefea ona tatou maua aogā mai ana aʻoaʻoga i le tatalo?