O le Soifuaga o Iesu ma Lana Faiva

Tatalo, ma le Faalagolago i le Atua

A o Faagasolo le lauga a Iesu, sa ia taʻusalaina le pepelo o tagata o e fia faaalialia lo latou faafiaamiotonu. “A e avatu ai ni mea alofa,” na ia fetalai ai, “aua neʻi e ilia le pu i ou luma, pei ona faia e tagata pepelo.”

A e lē gata i lea, ua faaauau pea Iesu, “pe a e tatalo, aua neʻi e pei o tagata pepelo, auā ua latou fia tutū ma tatalo i sunako ma fetaulaigaaʻla, ina ia iloa i latou e tagata.” Na i lo lena ua ia faatonu atu: “Pe a e tatalo, ina e ulu atu ia i lou afeafe, ma pupuni lona puipui, i le e tatalo ai i lou Tamā o i le mea lilo.” O Iesu lava ia sa tatalo i luma o le lautele, o lea na te leʻi taʻusalaina ai lenei mea. O mea sa ia taʻuvaleaina o tatalo na faia e faatosina ai le au faalogologo ma aumai ai se faamalo faaviivii.

Ua faatonu atili Iesu: “A outou tatalo, aua neʻi tāutu i a outou upu, e pei o nuu ese.” E lē o le uiga o upu a Iesu faapea e sese le tatalo faatauanau. Sa ia “tāutu i upu” i nisi o taimi a o ia tatalo. A e le o le mea na te leʻi faamaonia o le aʻo faatauloto ma le “tāutu i upu,” e pei o i latou e faitau faasolo le losalio a o tāutu i a latou tatalo.

Ina ia fesoasoani i lana au faalogologo ia tatalo, sa saunia e Iesu se tatalo faaaʻoaʻo o loo aofia ai olega e fitu. O uluaʻi vaega e tolu ua avatua ai ma le tonu le faamaoniga i le silisili ese o le Atua ma ana fuafuaga. O loo talosagaina ai mo le faapaiaina o le suafa o le Atua, ia oo mai lona Malo, ma lona finagalo ia faia. O isi vaega a fa o manaoga totino, ua taʻua, o mea e ʻai e tatau mo le aso, faamagaloga o agasala, ia lē tofotofoina e sili atu i le mea e mafaia e se tasi, ma ia laveaiina mai lē o loo leaga.

Ua faaauau pea ona taʻua e Iesu le mataʻutia o le mailei o le faamuamua o mea faitino. Ua augani mai: “Aua tou te toloaʻi oa mo outou i le lalolagi, o i ai le mogamoga ma le ele e faaumatia ai; o i ai foi tagata gaoi e eli atu, ma gaoi ai.” E lē gata o na oa e faaumatia a e latou te lē fausiaina aʻe foʻi se faiā lelei ma le Atua.

O lea, ua fetalai mai Iesu: “A ia outou toloaʻi oa mo outou i le lagi.” E faia lenei mea i le faamuamuaina o le auaunaga i le Atua i lou olaga. E lē mafai e se tasi ona aveesea le faiā lelei na fausiaina aʻe ma le Atua po o lana taui sili. Ona faaopoopo mai lea o Iesu: “O le mea ua i ai lo outou oa, e i ai atoa foi ma o outou loto.”

I le taʻua atili o le mailei o le matapeapea po o le manao tele i mea faitino, sa aumaia e Iesu le faataʻitaʻiga: “O le lamepa o le tino, o mata ia; pe afai e lelei ou mata, e malamalama uma ai lou tino. A e afai e leaga ou mata, e pouliuli uma ai lou tino.” A malamalama lelei mata o le tino ona pei lea o se moli i le mea pogisa. A e ina ia saʻo le vaai, e ao ona lelei mata, o lona uiga, ia taulaʻi i le mea e tasi. O mata e lē lelei ona taulaʻi i le mea e tasi e taʻitaʻiina atu ai i le faatulaga seseina o mea, ma tuu ai mea faitino i luma o le auaunaga i le Atua, ma iʻu ina pouliuli “uma ai lou tino.”

Sa taualuga e Iesu lenei mataupu i se faatusa e sili ona malosi: “E leai se na te mafai ona auauna i alii e toalua; auā e ʻinoʻino o ia i le tasi, a e alofa atu i le tasi; a le o lea, e faapipii atu ia i le tasi, a e faaleaoga i le tasi. Tou te le mafaia ona auauna i le Atua atoa ma Mamone.”

Ina ua uma ona avatu lenei fautuaga, ona faamautinoa atu lea e Iesu i lana au faalogologo faapea e lē tatau ona latou popole i mea manaomia faaletino pe a latou faamuamua le auaunaga i le Atua. “Ia outou vaavaai i manu felelei,” ua ia fetalai atu ai, “latou te le lulu saito, pe selesele, pe faaputu i fale saito, a e fagaina i latou e lo outou Tamā o i le lagi.” Ona ia fesili atu lea: “E le sili ea lo outou lelei i lo latou?”

Ona sosoʻo ai lea, ma le faasino atu e Iesu i lili o le fanua ma matauina ai faapea, “o Solomona ma lona matagofie tele na le ofu o ia pei o le tasi o na mea. Afai e faapea,” ua ia faaauau atili, “ona faaofuina e le Atua le vao o le fanua. e le sili ea ona faaofuina o outou e faatuatua itiiti?”

Ona faaiʻu lea e Iesu: “Aua neʻi outou popole, ma faapea anei, Ni a mea tatou te aai ai, ni a foi mea tatou te inu ai, ni a foi mea tatou te oofu ai? . . . Auā ua silafia e lo outou Tamā o i le lagi e aoga ia mea uma ia te outou. A ia outou muai saili le malo o le Atua ma lana amiotonu; ona faaopoopoina atu lea o ia mea uma ia te outou.” Mataio 6:1-34; 26:36-45.

◆ O ā faatonuga na saunia e Iesu e uiga i le tatalo?

◆ Ai se ā e sili ai oa faalelagi, ma e faapefea ona maua?

◆ O ā faatusa na aumai e fesoasoani ai i se tasi ia alofia le matapeapea?

◆ Ai se ā na fetalai ai Iesu e aua le popole?