Pe E te Sailia Oloa Lilo?
“Ia faateleina ia te outou le agalelei tunoa ma le manuia e ala i le poto saʻo lelei e uiga i le Atua ma Iesu lo tatou Alii.”—2 PETERU 1:2, “NW”.
1, 2. O ā vala ua tāua ai ma taugata le auro?
AISEĀ ua taugata tele ai le auro? Ua na o se uʻamea vaivai, peitai o lona tāua ua oo atu i le faitau selau o tālā i le aunese. E moni, e faigofie ona galueaiina ma ua faia ai ni teuteu matagofie i le faia ai o se mama po o se taulima. (1 Timoteo 2:9; Iakopo 2:2) Peitai, afai na e se i se toafa, matelaina ai i le fiaʻai ma le fiainu, e lē mafai ona e ʻaina pe inu le auro. I lena itu, o se fasi falaoa po o se ipu arisa faatasi ma se ipu vai o le a sili atu ona tautele na i lo o le auro.
2 Aiseā la, ua sili ai ona taugata le auro? O se tasi mea, ona e seāseā ma e faigata ona maua. Mo se faaaʻoaʻoga, ina ua tapunia le kamupani Emepaea e eli ai le auro, i le itu i matu o Kalefonia i le 1957, ona ua lē toe taulia, sa eli e tagata eli auro i le loloto e sili atu i le 5,000 futu [1,500 mita] ae sa tatau ona latou ō ifo i lalo i le lua maila [3 kilomita] ina ia taunuu i le auro. E oo i lena taimi, o le maualuga o le tau o le auro na aogā ai taumafaiga tetele ina ia sailia pea le auro.
3. O le ā le ʻoa e mafai ona tatou sailia?
3 Ae peitai, e mafai ona tatou eli mo se mea e sili mamao atu lona tāua na i lo le auro. O le ā lea? Na aumaia e le Tupu poto o Solomona se tali i le 3,000 tausaga ua mavae: “Afai lava e te valaau atu i le atamai, ma e leo tele atu i le faautauta; afai e te sailiili ia te ia, e pei ona sailiili i le ario; afai e te suesue i ai, pei ona suesue i le oloa lilo; ona e lagona ai lea o le mataʻu ia Ieova, ma e maua ai le poto i le Atua.” Seʻi manatu i na o ni tagata faatauvaa ae ua mafai ona latou maua “le poto i le Atua”!—Faataoto 2:3-5.a
Le Pogai e Manaomia ai e Tagata Uma le Poto Saʻo Lelei
4. O le ā e tatau ona aofia ai i le poto saʻo lelei o se Kerisiano?
4 Talu mai le taimi o Keriso, na faalauteleina atu ai lena poto matuā manaomia ina ia faaaofia ai mea e tele atu na i lo o mea na tuuina atu i tane ma fafine faatuatua Eperu anamua. E pei ona sa faamatalaina lea mea e Paulo: “Ina ia foai atu ia te outou e le Atua o lo tatou Alii o Iesu Keriso, o le Tamā e ona le mamalu, le agaga o le atamai ma le faaaliga i le poto saʻo lelei e uiga ia te ia; ua faapupulaina mata o o outou loto, ina ia outou iloa po o le ā le faamoemoe ua i lona valaau mai, ma le ʻoa faamamaluina ua ia taofia mai e fai ma tofi mo le au paia.”—Efeso 1:17, 18, NW.
5. Aiseā e manaomia ona uaʻi atu pea ai ē faauuina i lo latou poto i le finagalo o le Atua?
5 I tuā i lena taimi, sa tuuina atu ai lenei fautuaga tuusaʻo mo le au paia faauuina o uso o Keriso, ma o loo aogā pea mo i latou i aso nei. I le avea o le vaega lona lua o le “fanau” o le folafolaga, ua avea ai i latou na o taulaʻiga faapitoa mo taumafaiga faaleagaga a Satani ina ia faaseseina ai. (Kalatia 3:26-29; Efeso 6:11, 12) E faapitoa lava mo ē faauuina, le tatau ona faia i se tulaga mautinoa lo latou valaauina e ala i lo latou lē faatalalē o le meaalofa foai fua o le alofa tunoa o le Atua. O le pogai lena e tatau ai ona faamalosia pea lava pea a latou oloa faaleagaga e ala i le faafouina o lo latou poto saʻo lelei e uiga i le finagalo o le Atua ma lana Afioga.—Efeso 3:7; Eperu 6:4-6; 2 Peteru 1:9-12.
6. (a) Aiseā e manaomia ai e i tatou uma lava le poto saʻo lelei, e tusa lava pe o lo tatou faamoemoe e mo le lagi po o le lalolagi? (e) O le ā o manaomia ina ia maua le poto saʻo lelei?
6 Ae faapefea i latou o ē o lo latou faamoemoe o le ola e faavavau i le lalolagi? Aiseā e matuā tāua ai le poto saʻo lelei mo i latou? Auā e leai ni tapulaa eseese o le faamaoni faa-Kerisiano, e peiseai e iai se tulaga e sili ai ona maulauga mo le vaega faauuina, o ē e iai le faamoemoe faalelagi, na i lo mo isi mamoe, o ē e iai se faamoemoe faalelalolagi. (Ioane 10:16; 2 Peteru 3:13) E tutusa lava le faatatauina o mataupu silisili faa-Kerisiano i tagata uma. O le pogai lena, e manaomia ai e i tatou uma lava ona toe fafagaina a tatou maauila faaleagaga i le poto saʻo lelei i se tulaga faifai pea. Ae e aofia ai taimi ma taumafaiga. E tatau ona tatou auai i le eliga faaleagaga, e pei o loo eli i se oloa lilo.—Salamo 105:4, 5.
Ia Faatau mai le Taimi e Eli Ai
7. (a) O ā faigata ua iai atonu e taofia ai lo tatou mauaina o le poto saʻo lelei? (e) O le ā e mafai ona avea o iʻuga o le faatalalē faaleagaga?
7 O le toatele o tagata i aso nei o loo ola i ni olaga pisi, ma i le avea o Kerisiano ua foliga mai ai o i tatou ua sili atu ona pisi na i lo o le toatele ona o a tatou faasologa mo sauniga faale-Tusi Paia, auaunaga i le fanua, galuega totogiina i aso fai soo, galuega i aiga, galuega faaleaʻoga, ma isi mea. Peitai, e pei ona tatou faia ni faasologa o taimi i aso taitasi e ʻaai ai, o lea e tatau ai foi ona tatou faataatiaese se taimi e fafaga ai o tatou mafaufau ma o tatou itu faaleagaga. E lē o se faamatalaga faaulaula lea na faia e Iesu ina ua ia siitia mai le Teuteronome 8:3: “Ua tusia, E le na o mea e ʻai e ola ai le tagata, a o afioga uma e tulei mai i le fofoga o le Atua.” (Mataio 4:4) Afai tatou te faatalalē lo tatou itu faaleagaga, ua tatou faatalalē a tatou mea tāua faaleagaga ma lo tatou faamoemoe mo le lumanai. Ona mafai ona amata ai lea ona tatou see malie ese atu ma faalotolotolua. O lea e mafai faapefea ona tatou faia le taimi mo suesuega totino faale-Tusi Paia e lē aunoa?
8. O le ā le fautuaga faale-Tusi Paia ua aumaia ai ia i tatou se vaaiga tatau e uiga i suesuega totino?
8 Ua talafeagai lava ai upu a le aposetolo o Paulo: “Ia matuā faaeteete outou ina ia outou savavali ia aua neʻi faapei o ē valelea, a ia faapei o tagata popoto, ia faatau mai le taimi e sili ona lelei mo outou, auā o aso ua leaga. Ona o lenei mea soia le faavalea o outou, ae ia suesue pea po o le ā le finagalo o Ieova.” E mafai ona tatou iloa pe se ā le finagalo o Ieova i lo na o lo tatou uaʻi totoʻa atu i lana Afioga e auala i a tatou suesuega totino. Ma o le uiga o lena mea e tatau ona tatou ‘faatau mai le taimi sili ona lelei’ po o le ‘faaaogā i se auala sili ona lelei o tatou taimi.’—Efeso 5:15-17, NW; Phillips.
9. O fea atonu e leiloa ai lo tatou taimi lena e mafai ona faasaoina mo suesuega totino? Aumai ni faaaʻoaʻoga totino.
9 Afai tatou te iloiloina a tatou gaoioiga e lē manaomia i aso taitasi, tatou te iloa ua faaalu faapefea le tele o lo tatou taimi saoloto? Pe i luma o le televise? E mafai e lena masini e pule i le mafaufau atoa ona gaoia mai le lua i le lima itula i afiafi taitasi mai i o tatou olaga! E fia itula i le aso e te faaaluina totino e matamata ai i le televise? E masani lava, o mea o faaalia ai e iʻuvale, ona o lona faamamafaina lea o faiga sauā ma feusuaiga faaleituaiga. Ma i le tele o taimi, ua fuafuaina ina ia faatosina ai “le tuʻinanau o le tino, ma le tuʻinanau o mata, ma le faalialia o lenei olaga.” (1 Ioane 2:15-17) Peitai, o le toatele lava ua leai se malosi o le loto e tapē ai le televise. Ioe, e mafai ona faaumatia ai e lenei fausaga faaonaponei la tatou mea aupito sili ona tautele, o le taimi.
10. Aiseā e tāua tele ai i aso nei ona tatou faaaogā ma le atamai o tatou taimi?
10 Afai tatou te faamaoni ia i tatou lava, o le a tatou iloa ai faapea e masani ona mafai ona faasaoina taimi mo gaoioiga matuā manaomia e pei o le suesuega o le Tusi Paia. Ma o le suesuega totino faale-Tusi Paia lena e taʻitaʻiina atu ai le poto saʻo lelei e matuā manaomia mo le Kerisiano i nei taimi faigata. Peitai, ona o le sili atu i le 41,000 na faateʻaina i le tausaga ua mavae, ua manino ai faapea e toatele uso ma tuafafine ua latou faatalalē lo latou itu faaleagaga. O le ofuina ma le tausisia o le “ofutau atoatoa mai le Atua” e lē o se gaoioiga e lē manatu mamafa i ai. E oo i le tulaga o se fitafita ua ofuina i le ofutau faaletino, o se tiute fai i aso taitasi.—Efeso 6:10-18; Roma 1:28-32; 2 Timoteo 3:1.
11. O le ā le faaaʻoaʻoga ua faataatia e le aiga Peteli i le maopoopo mo suesuega faaleaiga?
11 I le lalolagi aoao, e faia ai e tagata e sili atu i le 9,000 o aiga Peteli e 95 i ofisa lala o le Sosaiete o le Olo Matamata a latou suesuega faaleaiga i po o Aso Gafua uma. Latou te suesueina Le Olomatamata e sauniuni ai mo le sauniga i le faaiʻuga o le vaiaso, ma i le tele o taimi latou e iai foi mo i latou se lauga faale-Tusi Paia po o se talanoaga i potu aʻoga mo tagata fou o le aiga Peteli. Ioe, o le Aso Gafua o le po lea mo suesuega a le aiga Peteli i le lalolagi aoao. O afea e fai ai le taimi mo lau suesuega totino po o le suesuega faaleaiga?—Eperu 10:24, 25.
Meafaigaluega ma le Auala e Faaaogā Ai
12. O ā nisi o faatomuaga mataʻina mo suesuega i le New World Translation of the Holy Scriptures—With References?
12 E pei lava ona iai i le tagata eli auro meafaigaluega mo lana galuega, o lea e iai foi a tatou meafaigaluega e eli ai i le mea e iai le auro o le Afioga a le Atua. Seʻi manatu, mo se faaaʻoaʻoga, i le New World Translation of the Holy Scriptures—With References (Faaliliuga o le Lalolagi Fou o Tusitusiga Paia—Faatasi ma Faasinoga). Ua lomia nei i le gagana Holani, Peretania, Falani, Siamani, Italia, Iapani, Potukale, ma le Sepania. O le mea lea, ua maua e le toatele o Molimau a Ieova se meafaigaluega ofoofogia mo le mauaina o le poto saʻo lelei i le Atua moni. O lenei lomiga o le Tusi Paia ua aofia ai le faitau afe o faamatalaga faasino i autafa ma le anoanoai o faamatalaga i lalo. Ua iai foi i totonu o le faaopoopoga e 36 ona itulau, faamatalaga auiliili i nisi o fesili tāua faale-Tusi Paia eseese.b
13. O ā mea moni e fiafia ai ua tuuina mai e faatatau i le faaaogāina o le “poto” ma le “poto saʻo lelei” i Tusitusiga Eperu ma Tusitusiga Eleni?
13 I le itu i tua o le Reference Bible o loo iai se lisi o upu autū: “Bible Words Indexed” (Faasinoga o Upu Faale-Tusi Paia). E mafai faapefea ona tatou faaaogāina lena mea? Afai e te siakiina lau kopi mo le faaupuga “accurate knowledge” (poto saʻo lelei), o le a e maua ai mau e sefulu o loo lisi ai. Ae e leai se tasi o nei mau o iai i Tusitusiga Eperu. Pe o le uiga o lena mea faapea ua lē o faamatilatilaina e Tusitusiga Eperu le manaoga mo lena poto? E leai. Auā i lalo o le upu “knowledge” (poto), e iai faasinoga e 24, e aofia ai ma le 18 mai Tusitusiga Eperu. Ae peitai, e leai se upu faapitoa i le gagana Eperu mo le “poto saʻo lelei.” O lea, e pei ona e tagai nei i ai mai faasinoga, i nisi taimi na te faamatilatila ai le manaoga mo le poto e sili atu na i lo o le poto lautele e ala i le faafesootai atu i le “poto” (knowledge) faatasi ma upu e pei o le “faautauta” (discernment) ma le “malamalama” (insight) po o le tautala e uiga i le poto faapea “e tupu tele.”—Tanielu 1:4; 12:4; Ieremia 3:15.
14. O ā mea matilatila e fiafia ai ua iai i lalo o le ulutala “poto” (knowledge) i le tusi Insight on the Scriptures?
14 E pei ona tatou aʻoaʻoina i le mataupu na muamua atu, ua faaalia e gagana Eleni o le Tusi Paia se eseesega laitiiti i le va o tulaga e lua o le poto. Ma a o tatou eli, tatou te mananao ina ia tatou iloa atili e uiga i le eseesega i le va o nei faaupuga e lua e pei ona faatatauina i Kerisiano. Aiseā e matuā manaomia ai mo Kerisiano le poto, gnoʹsis, ma le poto saʻo lelei, e·piʹgno·sis? O fea e mafai ona tatou maua ai le tali? I le tusi o faamatalaga i mea faale-Tusi Paia Insight on the Scriptures (Malamalama i le Tusi Paia). Maeu se faaputuga teuoa ua iai nei tusi! Tagai i le ulutala “Knowledge” (Poto). O i inā o le a e maua ai se mataupu atoa i e uiga i faaupuga o loo tatou talanoaina ma uiga e fesootai i ai, o le atamai, le malamalama, le faautauta, ma le tomai o le mafaufau. Ma ua tatou maua uma lenei “auro,” lenei faamatalaga, i le na o le faaaogāina o ni nai fesoasoani faale-Tusi Paia! Ae o loo iai mea atili.—Salamo 19:9, 10.
15. O ā isi meafaigaluega mo le faia o sailiiliga ua ia i tatou, ma e mafai faapefea ona faaaogāina ia mea?
15 Afai e te manao e tuliloa se suesuega e sili ona auiliili ai e uiga i le “poto” (knowledge) ma faaupuga o fesootai atu i ai, e mafai ona e faaaogā Indexes (Faasino Mataupu) o lomiga a le Sosaiete o le Olo Matamata, na o loo maua i ni nai gagana. Ma e pei ona tatou tuliloaina le matua o le poto, e mafai ona e mulimuli atu i lea lava faiga mo le faitau selau o isi foi mataupu. Seʻi manatu i le ʻoa o faamatalaga i lalo o le suafa o Ieova! Maeu le anoanoai o le poto saʻo lelei o iai e uiga i le Alii Pule Silisili Ese o le vateatea!—Salamo 68:19, 20; Galuega 4:24.
16. O le ā ua fai mai ai le Tusi Paia e faatatau i le sailiga?
16 Faatasi ma nei mea ma isi fesoasoani mo suesuega ua lomia e le Watch Tower Bible and Tract Society, maeu le matagofie o “oloa lilo” ua mafai ona tatou maua! E te manao ea i le “auro”? Pe e te manatu e aogā? Pe o le a e faaavanoa se taimi e te eliina ai?—Faataoto 2:1-5.
O Ai o Taʻimua i le Eliga o le Auro Faaleagaga?
17. O le ā e tatau ona tatou faia ina ia maua le poto e uiga i le Atua ma Keriso?
17 O le ā le ki i le mauaina o lenei poto tautele e uiga i le Atua ma Keriso? O le uunaiga—o se faanaunautaiga ina ia maua se tulaga faamaonia i luma o Ieova ma lona Alo ma se faanaunauga ina ia maua le meaalofa o le ola e faavavau. Na faapenei ona faamatala e Iesu: “Ia outou ole atu [pea, NW], ona foaiina mai ai lea ia te outou; ia outou saili [pea], ona outou maua ai lea; ia outou tuʻituʻi atu [pea], ona toina ai lea ia te outou. Auā ai se ole atu, e maua e ia; o lē saili foi, e iloa e ia; e toina foi i lē tuʻituʻi atu.” Ae matau le mea manaomia. Na fetalai Iesu, ‘Ia ole atu pea, saili pea, ma tuʻituʻi pea.’ E lē o se mea e faatasi ona faia. O le saili mo le poto e tatau ona faifai pea.—Mataio 5:6; 7:7, 8.
18. I se aiga, o ai e tatau ona taʻimua i le sailia o le poto saʻo lelei, ma aiseā?
18 I se aiga Kerisiano, o ai e tatau ona taʻimua i le eliina mo le poto saʻo lelei? Ua tali Paulo: “O outou tamā foi, aua neʻi tou faaonoono atu i a outou fanau, a ia tausi atu i ai i aoaiga ma apoapoaiga a le Alii [taʻiala faalemafaufau a Ieova, NW].” Ioe, o mātua,ae maise lava le tamā, e tatau ona taʻimua i le faaalia o le talisapaia mo mea tāua faaleagaga. Ma ua toe faamanatu mai ai foi e lena mea ia i tatou le manaoga mo se faatulagaga e lē aunoa e mafai ona faatalitalia ma tulimataʻia e le aiga.—Efeso 6:4.
19. E mafai faapefea ona faia taimi o suesuega faaleaiga o se mea e fiafia ona mafaufau ai? O le ā le tulaga i lou aiga?
19 O taimi o suesuega faaleaiga e mafai ona faia ina ia avea o se mea e naunau i ai. Mo se faaaʻoaʻoga, afai e iai sau fanau, aiseā e lē tuu atu ai latou te filifilia se matua ona tofia lea o i latou e faia ni sailiiliga i lomiga eseese e tusa ai ma o latou tausaga ma le tomai. Pe a mavae la se afa itula pe ā, ia ō mai faatasi ma vaai po o le ā na maua e tagata taitoatasi e tusa ai o le mataupu na tofia atu i ai. Afai o maua le tusi faasino upu (concordance), e mafai e se tamaitiiti ona faitau pe faafia taimi o aliaʻi mai ai se upu patino i Tusitusiga Eperu ma Tusitusiga Eleni. Atonu o sē e matua atu e mafai ona ia faafesootai mai mea tāua i tusi o le Insight. Ua iloa e mātua tomai o a latou fanau ma le taimi e mafai ona latou uaʻi atu ai ma e tatau ona fausia aʻe le talanoaga e tusa ma na tulaga. Ia fetuunai ma ia talisapaia. Ia faalaeiau lou aiga i a latou eliga faaleagaga—ma ia iai le faanaunauga saʻo.
Eli ma le Faanaunauga Saʻo
20. O le ā le faanaunauga sese e tatau ona tatou alofia i a tatou suesuega totino?
20 O le loto maulalo o se uiga lelei faa-Kerisiano. (Faataoto 11:2; 1 Timoteo 2:9) O lea, pe tatau ona tatou suesue ina ia tatou gugutu atu ai i mea ua tatou aʻoaʻoina? Pe, e tatau ona tatou faalialia e uiga i lo tatou poto ma atonu e faaali atu ai i isi o i latou ua vālea? Pe, e tatau ona tatou folafola atu a tatou lava malamalamaga po o taumatematega? Na fautua mai Paulo: “Auā e ala i le agalelei tunoa na tuuina mai ia te aʻu, ou te fai atu ai i tagata uma o iai ia te outou, ina ia aua neʻi faasili le manatu o se tasi ia te ia lava na i lo le mea e manaomia ona manatu ai; ae ia manatu ina ia tonu lou mafaufau, o tagata taitoatasi e pei ona tufaina atu e le Atua ia te ia se fua o le faatuatua.”—Roma 12:3, NW.
21, 22. E ao faapefea ona aafia i tatou i lo tatou poto saʻo lelei?
21 O taumafaiga faamaoni ma le faatatauina o le poto saʻo lelei e mafai ona taʻitaʻiina atu ai i le faatuatua, le amio lelei, le pulea o oe lava, le tumau, le tuutoina i le Atua, le faalogona mafana faaleuso, ma le alofa. Na faaalia e Peteru le tāua o nei mea ina ua ia tusi: “Auā pe a maua e outou ia mea, ma ua faateleina, ona avea ai lea o outou ma e ua le paie, a o e fua mai le iloa lelei o lo tatou Alii o Iesu Keriso.”—2 Peteru 1:2-8.
22 O lo tatou poto e tatau ona aafia ai le loto. E tatau ona faagaoioia ai i tatou e faaalia le alofa mo le Atua ma mo tuaoi ma ia avea o ni Kerisiano e fua mai i a tatou amio ma le faiva. O lenei mea o le a iʻu ai i le autasi ma i se malamalamaga e sili atu ona atoa e uiga i le faaaʻoaʻoga a Keriso. (Efeso 4:13) Meau se taui lelei mo le sailia o oloa lilo!
[Faaopoopoga i lalo]
a O se mea e fiafia ona manatu i ai, i le Faataoto 2:5 o le faaupuga o “le poto i le Atua” o loo aliaʻi mai i le Septuagint faa-Eleni o le e·piʹgno·sis, po o le “poto saʻo lelei,” o le tasi o faaaogāina lona valu o lena upu Eleni i le Septuagint.
b Mo se faamatalaga auiliili i le pe faapefea ona maua le tele o mea mai le Reference Bible, tagai i Le Olomatamata faa-Peretania o Novema 1, 1985, itulau 27-30.
Fesili ia Mafaufau i Ai
◻ E tusa ai ma le Tupu o Solomona, o le ā e sili ona tāua na i lo o le oloa lilo?
◻ Aiseā e matuā tāua ai le poto saʻo lelei mo ē faauuina ma isi mamoe?
◻ E mafai faapefea ona tatou faatau mai le taimi mo suesuega totino?
◻ O ā meafaigaluega faapitoa ua ia i tatou mo le eliina o le poto saʻo lelei?
◻ O ai e ao ona taʻimua i le suesuega faaleaiga, ma faatasi ai ma le ā le faanaunauga e ao ai ona tatou suesue?