O le Soifuaga o Iesu ma lana Faiva

Le Ala i le Ola

O Le ala i le ola o le tausisi lea i aʻoaʻoga a Iesu. A e lē o se mea e faigofie lea ona faia. Mo se faaaʻoaʻoga, o le ʻau Faresaio, sa latou mafuli atu i le faamasinoina ma le sauā o isi, ma sa faapena foʻi ona faataʻitaʻi i ai le toatele. O lea a o faaauau e Iesu lana Lauga i luga o le Mauga, sa ia tuuina atu lenei apoapoaiga: “Aua tou te faamasino atu, ina neʻi faamasinoina outou. Auā o le faamasinoga tou te faaamsinoina atu ai, e faamasinoina ai outou.”

O se mea mataʻutia le mulimuli atu i le taʻitaʻiga a Faresaio sili ona faitio. E tusa ai ma le faamatalaga a Luka, ua faataʻitaʻia mai ai e Iesu lenei mataʻutia i lona fetalai faapea: “E mafai ea le tauaso ona taʻitaʻi i le tauaso? la te le pauu uma lava ea i le utu.?”

O le faitio naua i isi, i le faamatilatila o ō latou sese ma taufaaleaga ia i latou, o se sala matuiā. O lea ua fesili atu ai Iesu: “Pe faapefea foi ona e fai atu i lou uso, Tuu mai ia, soʻu eu ese le fāsi laau i lou mata; faauta foi, o i lou lava mata le utupoto? O oe na le pepelo, ia e muai tiai le utupoto i lou lava mata, ona e iloa lelei ai lea e eueseina atu le fāsi laau i le mata o lou uso.”

E lē o lona uiga faapea e lē tatau i soʻo o Iesu ona faaaogā le utaga poto i le feagai ai ma isi tagata, auā ua ia fetalai mai: “Aua tou te avatua le ma paia i ulī; aua foi tou te lafo a outou penina i luma o puaa.” O upu moni mai le Afioga a le Atua e paia. E pei ona o ni penina faafaatusa. Peitai a i ai ni tagata taitoatasi o ē pei ni ulī po oni puaa, [tulou] e lē faaalia le talisapaia mo nei upu moni tāua, e tatau la i soʻo o Iesu ona tuua na tagata a e saili tagata e sili ona fiafia e talia mai.

E ui lava ina muaʻi talanoaina e Iesu i lana lauga le tatalo, a e uai faamamafa mai nei le manaomia ona ia maumauaʻi pea i ai. “Ia outou ole atu,” ua ia unaʻi atu ai, “ona foaiina mai ai lea ia te outou.” Ina ia faataʻitaʻia le nofo sauni pea o le Atua e tali mai i tatalo, ua fesili atu Iesu: “O ai foi se tagata o outou pe a ole mai lona atalii o se areto, na te avane ea ia te ia se maa? . . . O lenei, o outou e leaga, afai ua iloa e outou ona avatu o mea lelei mā a outou fanau, e le sili ea ona foaiina mai e lo outou Tamā o i le lagi o mea lelei i e ole atu ai ia te ia?” Ona sosoʻo ai lea ma le saunia e Iesu o le mea ua avea nei o le tulafono taʻutaʻua tau i amio, ua taatele ona taʻua o le Tulafono Faaauro. Ua ia fetalai mai: “O mea uma foi tou te loto i ai ia faia e tagata ia te outou, ia faapea lava ona outou faia i ai te i latou.” O le ola ai i lenei tulafono e aofia ia gaoioiga mautinoa i le faia o le mea lelei i isi, ia faia ia i latou e pei ona e manao e faia ia te oe.

Ona o le ala i le ola e lē faigofie e pei ona faaalia i faatonuga a Iesu: “Ia outou ulu atu i le faitotoa va apiapi; auā e va tele le faitotoa, e lautele foi i latou o e ui atu ai. Auā e va apiapi le faitotoa, e lauitiiti foi le ala e tau atu i le ola, e toaitiiti foi i latou o e maua.”

E matuā mataʻutia tele foʻi le faaseseina o se tasi, o lea ua lapataʻia mai ai Iesu: “Ia outou ma perofeta pepelo, o e o mai ia te outou o ofu faamamoe, a o totonu o luko feai lava i latou.” E oo lava foʻi i laau lelei ma laau leaga e mafai ona iloa i o latou fua, ua matauina e Iesu, e iloa perofeta pepelo ia latou amio ma aʻoaʻoga.

A o faaauau pea Iesu, ua ia faamatala mai faapea e lē na o mea e tautala ai se tagata e faia ai o ia ma Ona soʻo o mea na te faia. Ua faapea mai nisi o Iesu o lo latou Alii, a e afai latou te lē faia le finagalo o lona Tamā, ua ia faapea mai: “Ona ou taʻutino atu ai lea ia te i latou, Ou te lei iloa lava outou; ina o ese ia outou ia te au, o outou o e fai amio leaga.”

I le iʻuga, ua faataatia e Iesu faaiʻuga ia manatuaina i lana lauga. Ua ia faapea atu: “Ai se faalogo i aʻu upu nei, ma faia e ia, ou te faatusaina o ia i le tagata poto, ua na faia lona fale i luga o le papa; ona to mai lea o uaga, ua oo mai foi tafega, ua agi, mai foi o matagi, ua pesi mai i lea fale a e lei paū lava ia; auā ua faavaeina i luga o le papa.”

I le isi itu, ua faalauiloa atu e Iesu: “Ai se faalogo foi i aʻu upu nei, a e le faia, e faatusaina o ia i le tagata valea, na na faia lona fale i luga o le oneone; ona to mai lea o uaga, ua oo mai foi tafega, ua agi mai foi matagi, ua pesi mai i lea fale, ona paū ai lea, ua nutipalaina lava.”

Ina ua faauma e Iesu lana lauga, ona ofo ai lea o le motu o tagata i le auala o lana aʻoaʻoga, aua ua ia aʻoaʻo ia i latou e pei o sē ua i ai le pule a e lē pei o ō latou taʻitaʻi lotu. Mataio 7:1-29; Luka 6:27-49.

◆ I le ā ua fetalai ai Iesu e uiga i tatalo, ma o le ā le tulafono tau amio na ia saunia?

◆ O le ā ua fetalai atili mai ai Iesu e uiga i tatalo, ma o le ā le tulafono tau amio na ia saunia?

◆ Ua faapea ona faaalia e Iesu o le a lē faigofie le ala i le ola ma e i ai le mataʻutia pe a taʻitaʻiseseina?

◆ Ua faapefea ona faaiʻu e Iesu lana lauga, ma o le ā le aafiaga o i ai?