Pe e Fua Mai e le Faa-Kerisiano Moni Tagata Maelega Valea?

NA i ai tagata maelega valea a Kerisenitoma—mai tagata o ē na susunuina i latou e i latou e i latou lava i luma o le lautele i fouvalega faapolotiki, agai i tagata taitoatasi o ē gaoioi ma le lē onosai agai ia i latou o loo i ai ni manatu po o vaaiga eseese faalotu. Mo se faaaʻoaʻoga na faagaeeina e le Lotu Katoliko le ului Taua mo Eleele Paia ina ia faasaoloto ai Ierusalema mai lima o tagata, sa la manatu i ai e lē talitonu i le lotu. Na amata i ni vaega se tolu o tagata lē pulea faatupu faalavelave, na aofia ai i ā latou faiga sauā le matuā fasiotia o tagata Siu i Rhineland. Ina ua manuia taumafaiga faavaegaau o lenei Taua mo Eleele Paia i le puea o Ierusalema, ona liua ai lea o auala e nei fitafita ua taʻua o fitafita Kerisiano e fai ma vaitafe o le toto.

I lana tusi The Outline of History, na faapea mai ai H.G. Well e uiga i le Taua o Eleele Paia muamua: “Sa matuā mata’utia ma leaga le fasi; o le toto o ē na faatoilaloina na tafe atu i auala, seia oo ina pisi aʻe i tagata tietie solofanua. I le po, latou te ‘⁠masusū ona o le olioli,’ ona ō mai ai lea o nei tagata fai taua i le Tuugamau mai lo latou solia o le soligavine, ma tuu faatasi ō latou lima ua pisipisia i le toto tatalo.”

I se isi Taua Eleele Paia mulimuli ane na faatonuina e Pope Innocent lll, na piopio niniiina ai (tulou) tagata filemu o le lotu Albigense ma Waldense, o ē na tetee i aʻoaʻoga a Roma ma amioga leaga a faifeau. E tusa ai ma manatu po o faiga na faailoa atu faasaga ia i latou, na tusi ai Wells: “Sa lava ma totoe lenei mo le Komiti, ma o lea, ua ia i tatou le vaaiga a Innocent lll ma ia talaʻia se taua o eleele paia faasaga i nei tamaʻi lotu lē manuia, ma ia faatagaina le talia mo le taua o so o se tagata leaga o loo fealuai solo . . . ma se taumafaiga faalilolilo o loo faia i totonu o na tagata nuu aupito filemu a le Tupu o Farani. O faamatalaga e uiga i faiga sauā ma le inosia o lenei faiga taua o eleele paia e matuā sili atu ona leaga i le faitau ai, na i lo o so se isi lava faamatalaga e uiga i le fasiotia faamaturo o Kerisiano e faiga faapaupau.”

O le talafaasolopito o Kerisiano ua matuā faatumulia i faamatalaga e uiga i tagata maelega valea, ma e masani lava ona latou aumai ai fua o le sauā. O lea, ua mafai nei ona i ai sa tatou faaiuga e faapea, o uiga maelega valea e lē aumaia ai ni fua lelei. I le New Standard Dictionary of the English Language a Funk ma Wagnalls (lomia o le 1929) ua na faamanino mai ai uiga maelega valea i lenei auala: “O le faatautala po o le aasa valea,” Ma ua faaauau ona ia faataʻitaʻia mai i nei upu: “E lei i ia se vaitaimi i le talafaasolopito na faaalia ai se matuā sauā e sili ona matautia, o faiga tau i amioga lē mamā, ma le maelega valea na i lo Taua mo Eleele Paia.”

E lelei foi pe a matou le faamalamalamaga ua tuuina atu i le upu “maelega valea” e le Websterʻs Third New International Dictionary, lomiga o le 1961. Ua faapea mai: ‘Maelega valea—faa-Latina, faagaeeina ese atua. 1, uluitinoina pe e pei ua uluitinoina e se temoni; i se uiga lautele: lē pulea, lotoa, valea. 2. pulea, fuaina mai po o le faatinoina i uiga e sili ona sogasogā pe maelega: faatautala, le uigā; soona aasa, lē mafaufau, a e maise lava i mataupu faalotu.’ Faatasi ai la ma nei manatu, pe e mafai ona faapea atu o Kerisiano moni o ni tagata maelega valea?

E Iloa i Fua

E pei ona iloa o le laau i on afua, e faapena foi iuga o gaoioiga faaletagata, e faaalia ai po o le ā le ituaiga o tagata o loo latou fuaina mai. Na faasino mai lenei mea e Iesu Keriso le Faavae o le Faa-Kerisiano. Na ia fetalai: “E le mafai e le laau lelei ona fua mai i fua leaga, e le mafai foi i le laau leaga ona fua mai i fua lelei. O lea foi tou te iloa ai i latou i o latou fua.” —Mataio 7:18, 20.

Na faavae e Iesu le Faa-Kerisiano moni e pei o se laau lelei. E lē mafai la ona fua mai fua leaga i le maelega valea. Sa leʻi i ai lava foi se taimi na uunaia ai e Iesu ona soʻo e faia ni mea e afaina ai faaletino i latou lava po o isi. Na i lo o lea, i le taʻua o se tasi o poloaiga sili e lua, na ia fetalai ai: “E te alofa atu i lē lua te tuaoi, ia pei o oe lava ia te oe.” (Mataio 22:39) Sa tatau i ona soʻo ona agalelei atu e oo lava i ō latou fili. Na fetalai Iesu: “Ia alofa atu (pea) i e o fai outou mo latou fili; ia agalelei atu i e ita mai ia te outou, ia outou faamanuia atu i e fetuu mai ia te outou, ia outou tatalo foi mo e tuuaʻi fua mai ia te outou.”—Luka 6:27, 28.

Sa ō atu soʻo moni o Iesu i tagata i atunuu eseese, e lē ma se afi ma se pelu, a e ma le Afioga tusia a le Atua ma faaoleole ma le filemu i ai. E leai ni vaegaau faafitafita na latou ō atu faatasi i isi atunuu ina ia fasiotia, faatautauina, ma faalegaina i latou o ē na teena le papatisoga faa-Kerisiano. Na i lo o lena, na mulimuli lava soʻo o Iesu i ana faaaʻoaʻoga filemu, o le talaʻiina atu lea o le tala lelei o le Malo o le Atua i tagata uma, ma faamalosiau ia i latou ia iloilo ma mafaufau i faamatalaga o loo aumaia i le Tusi Paia. O fua o ā latou galuega na aofia ai fua o le agaga o le Atua—“o le alofa, o le olioli, o le filemu, o le onosai, o le mataalofa, o le agalelei, o le faamaoni, o le agamalu ma le le gaoiā.”—Kalatia 5:22, 23.

E leai se eseesega i aso nei, O le Faa-Kerisiano moni na te aumaia pea lava fua lelei. O le laau, le faalapotopotoga Kerisiano, na totōina e Iesu ua sili atu i le 1, 900 tausaga ua mavae sa lelei, ma o loo tumau pea lona lelei. O lea, ua lē mafai ai ona ia fuaina mai fua leaga, le sauā, ma le lē faapalepale o le maelega valea. Ai se ā la ua taatele ai le maelega valea i Kerisenitoma?

Na faamanino mai e le aposetolo o Paulo faapea, o le a oo ma ile taimi e aliali mai ē e faatagā Kerisiano. O le a tauaveina le igoa o le Kerisiano, a e lē ola e tusa ai, pe fuaina mai ni ona fua lelei. Na ia taʻu atu i toeaina Efeso: Ua ou iloa lenei mea, pe a mavae ona ou alu, e oo mia ia te outou luko saua o e le faasaoina le lafu mamoe. E tupu ma ifoi ia te outou lava tagata e tautala mai i mea faapiopio, e fetoso ese ai le au soo ia muliluli ia i latou.” (Galuega 20:29, 30) O aposetate nei na tupu ma iai Kerisenitoma, faatasi ai ma le faitau selau o ona faalapotopotoga faalotu fevaaʻi, o loo aʻoaʻo mea e na ona fai ma sui o le avea ma se Kerisiano. A e o le mea moni lava, o “mea faapiopio,” o manatu o tagata a e lē o le upu moni o le Afioga a le Atua. O totonu lava o nei Kerisiano pepelo na faalaia ai e ia lava fua leaga o le maelega valea.

Pe e Maelega Valea le Maelega o se Kerisiano?

E moni o le maelega valea o se itugaiga o aasa o le maelega. A o le maelega valea o se “faatautala po o se aasa faivalea,” o se maelega “lē uigā.” E lē mafai la ona fai atu faapena i le Faa-Kerisiano moni.

Ua toe apoapoai mai foi le Tusi Paia i Kerisiano ina ia agamalu. Mo se faaaʻoaʻoga, ua faapea mai le Filipi 4:5: “Ia iloa lo outou agamalu e tagata uma lava.” Ma ua fautuaina Kerisiano ina ia “aua neʻi upu leaga i se tasi, aua neʻi faamisa, a ia faapalepale, ma ia faaali atu le agamalu uma i tagata uma lava.”—Tito 3:2.

Ona e asiasi atu Molimau a Ieova i tagata i o latou aiga ina ia talanoa atu i ai e uiga i le tala lelei o le Malo, e ese ai lava la ia latou mai le toatele o tagata o ē fai mai o i latou o Kerisiano. O lenei maelega i le faiva faa-Kerisiano e lē o se faavae lea e vaai ai pe manatu ai ia i lātou o ni tagata maelega valea. O se maelega tatau mo se galuega na faia ma poloaiina e Iesu ona soʻo e fai. (Mataio 24:14; 28:19,20) O se tagata na te faataatia ese le tele o taimi—tuuese gaoioiga totino ina ia tuutoina ai le tele o le taimi e mafaia i le galuega talaʻi o le Malo e lē o se tagata maelega valea. Na i lo o lena, na te faaalia lona talisapaia mo le manaoga faanatinati e fesoasoani atu ai i isi e aʻoaʻo e uiga i upu moni e aumaia i le ola o le Afioga a le Atua, i lenei taimi puupuu o loo totoe mo le faia o lenei galuega. Ua tatau la ma aogā tele lenei mea.

Na i lo o se galuega e faia e le maelega valea ina ia faamanuʻaina ai isi, o lenei galuega e atiina aʻe ai le faatuatua i le Atua ma lana Afioga. Na te avatuina le faamoemoe ia i latou e leai se faamoemoe, e aumaia le saolotoga mai le mataʻu i faiga faatemoni ma le lē malamalama, ma liua ai le anoanoai o tagata amioleaga ma le sauā i amioga mamā ma avea ai o ni Kerisiano filemu. O nei fua lelei e iloa ai se faalapotopotoga lelei.

I le sili atu i le 200 atunuu, o loo tumau ai pea ona tausia e Molimau a Ieova lo latou faamaoni i le Malo o le Atua, e ui lava o loo latou i ai i lalo o faasasaga mai pule o malo i le tele o nofoaga. O lo latou faamaoni i le Atua le Silisiliese Sili, e faigata ona faavasega faatasi ma nia tagata maelega valea. O ia o le Pule silisili, ma i ia i se feteenaiga i ana tulafono ma tulafono a malo faaletagata, o le tiute tauave lava la a le Kerisiano moni le usiusitaʻi ia te ia. I lalo o malo faaletagata, o tulafono a se aai lava latou e ono lē aoga i nisi taimi auā e feteenai ma tulafono a le malo soofaatasi. E faapena foi la mo Kerisiano moni, o le mea noa lava tulafono faaletagata pe a feteenai ma tulafono a le Pule Aoao o Ieova le Atua. Talu ai e lē mafai e se Kerisiano moni ona usiusitaʻi i ni tulafono feteenai se lua, o lea na te faia ai le mea na faia e le au aposetolo. Na latou faapea atu: “E tusa ona sili o lo matou anaana i le Atua (le pule) i lo matou anaana i tagata.” (Galuega 5:29) O se mea tatau lenei.

Ua faapena foi ona faaalia le magafagafa tatau e Molimau a Ieova e tusa ai ma aso faamanatu o malo, ma lotu ia e feteenai ma le Afioga a le Atua. E lē o se maelega valea le lē lolo atu e auai i le mea o loo matauina e le toatele i se atunuu. A e ona o lo latou loto fuatiaifo faatatau i la latou tapuaiga, ua tuu ai Molimau i le tulaga lava e tasi e pei o le uluai Kerisiano, o ē sa leʻi auai i faamanatuga lautele o ō latou aso. Ma e fiafia Molimau a Ieova e avatu se pogai faale-Tusi Paia o lo latou lē auai.—1 Peteru 3:15.

O nisi tagata atonu latou te faavasega Molimau o ni tagata maelega valea ona o lo latou teena o letuiina o le toto, o se taualumaga ua masani lelei ai le toatele o fomaʻi. I i nei foi la, o se mataupu foi o le usiusitaʻi i le tulafono a le Atua. Ua poloaiina soʻo moni o Iesu ina ia “faamamao . . . ma le toto.”—Galuega 15:28, 29.

Pe e maelega valea la se tagata ona o le tausia o le loto fuatia ifo, i lona teena o se taumafaiga faafomaʻi ua lauiloa i aso nei? O nisi e lē o ni Molimau a Ieova ua latou teena tuiga toto, ona o le mataʻu ina nei maua i le AIDS po o isi faamaʻi. O lea, pe o se mea lē saʻo mo ni togafitiga faafomaʻi e lē faaleagaina ai o latou loto fuatia ifo?

O le ā nei la o le a tatau ona avea o se faaiuga mai lenei mataupu? O lona uiga o Molimau a Ieova e lē o ni tagata maelega valea, ona e ese i latou mai le toatele ma tausisi i le usiusitaʻi atu i le Atua. E ui lava latou te maelega i le Atua, a e leai so latou “faatautala pe aasa vale” e pei ua uluitino e se temoni; latou te lē foliga mai foi ua “lē pulea,” lotoa, pe “valea.” E leai lava se taimi latou te faia ai ni faiga sauā i isi, po o ia i latou fi ona o lo latou maelega faalotu. Na i lo o lea, ina ia tusa ai ma le mea o fai mai ai le Tusi Paia e uiga i Kerisiano moni latou te “nofo (filemu) ma tagata uma lava.”—Roma 12:18.

O lea, o le faalapotopotoga Kerisiano na amataina e Iesu Keriso i le uluai senituri e avea o se laau lelei, o loo faaauau pea i aso nei ona fua mai na o fua lelei. O le mea la lea, e lē tatau ai i le Faa-Kerisiano moni ona fua mai ni tagata maelega valea.

[Faamatalaga faaopoopo i le itulau 30]

E leai se mafuaaga e faapea ai o Molimau a Ieova o ni tagata maelega valea, ona o lo latou maelega i le faiva faa-Kerisiano