O le Soifuaga o Iesu ma Lana Faiva

Ua Tuua le Aiga o Iairo ma Toe Asiasi Atu i Nasareta

SA AVEA le aso o se aso pisi ia Iesu—ona o le malaga mai le sami i Tekapoli, o le faamalōlōina o se fafine sa iai le puna toto, ma le toe faatuina o le afafine o Iairo. A e leʻi uma ai iinā le aso. E manino lava, a o tuua e Iesu le fale o Iairo, sa mulimuli atu ia te ia ni tamāloloa tauaso se toalua, ma alalaga ua faapea atu: “Le alo e o Tavita, ia e alofa mai ia te i maua.”

I lo la fai atu ia Iesu o le “alo o Tavita,” ua faailoa atu i nei tamaloloa lo la talitonuga e faapea o Iesu o le suli o le nofoaiga a Tavita, o lea o ia o le Mesia folafolaina. Peitaʻi, ua foliga mai e lē āno atu i ai Iesu i le alaga mai a nei tagata mo se fesoasoani, atonu pe o ia tofotofoina lo la maumauaʻi. A e leʻi fiu ai nei tamāloloa. Na mulimuli atu lava seʻi oo i le mea e api ai Iesu, ma ina ua ia ulu atu i le fale, na la ulu atu foʻi i totonu.

o inā ua fesili atu ai Iesu: “Ua oulua faatuatua mai ea ia te au ou te mafaia lenei mea?”

“Ioe, le Alii e,” ua la tali atu ai ma le mautinoa.

Ona paʻi atu ai lea o Iesu i o la mata ma faapea atu: “E pei ona oulua faatuatua, ia faapea lava ona faia ia te oulua.” Ona faafuasei lava lea ona fepulafi nei tamāloloa! Ona faatonu atu lea o Iesu, a e ua ō ma taʻu atu i le nuu uma le tala.

Ina ua faatoʻa ō ese atu lava nei tagata, a e aumai loa foʻi ia Iesu se tagata gūgū. Ua ofo uma tagata i nei vavega ua faapea ane: “E lei iloa mai anamua se mea faapena i Isaraelu.”

O loo i ai foʻi le ʻau Faresaio. Ua lē mafai ona latou faafitia vavega, a e ona o ō latou uiga leaga lē talitonu, ua latou toe molia ia Iesu i le pogai o ana galuega mamana, i lo latou faapea mai: “O le temoni sili ua tulia ai e ia o temoni.”

E leʻi pine mulimuli ane ai i nei mea, ona toe maliu atu ai lea o Iesu i lona nuu o Nasareta, ma o le taimi lea ua ō atu ai ma ona soʻo. Pe tusa o le tausaga muamua atu, sa ia asiasi atu ai i le sunako ma aʻoaʻo ai i inā. E ui sa muaʻi ofo tagata i ana upu faamalie loto, a e na mulimuli ane ua latou tetee i ana aʻoaʻoga ma taumafai e fasioti ia te ia. Nei la, ua tumu o ia i le alofa, ma ua toe taumafai ai Iesu e fesoasoani atu i ona uluaʻi tuaoi.

A o iai i isi nofoaga, e lolofi atu tagata ia Iesu, ae i inei e foliga mai e leai. O lea, i le aso Sapati, ua alu ai o ia i le sunako e aʻoaʻo ai. O le toatele o i latou na faalogologo ia te ia ua taufaiofo. “O fea na maua ai e lenei tagata lenei poto ma ia vavega?” ua latou fesili ane ai. “E le o le atalii ea lenei o le tufuga? e le o Maria ea le igoa o lona tinā, o ona uso foi o Iakopo, ma Iose, ma Simona, ma Iuta? E le o ia te i tatou ea ona tuafāfine uma? po o fea foi na maua ai e lenei tagata nei mea uma?”

Ua latou manatu faapea, ‘o Iesu foi o le tagata e pei o i tatou.’ Na tatou iloa lona tupu aʻe, ma ua tatou iloa foʻi lona aiga. E faapefea ona avea o ia ma Mesia? O lea e ui lava i nei faamaoniga uma—a e ua latou teena lava o ia. E oo lava i tagata o lona lava aiga, talu ai ona o lo latou faatausuai ia te ia, na mafua ai ona faaiu mai faapea e Iesu: “E leai se perofeta e le mamalu, ua na o lona lava nuu ma lona aiga e le mamalu ai.”

O le mea moni, ua ofo Iesu i lo latou lē faatuatua. O lea na te leʻi toe faia ai lava ni vavega i inā e ese ai mai le na ona faaee atu o ona aao i luga o ni nai tagata mamaʻi ma faamalolo ia i latou. Mataio 9:27-34; 13:54-58; Mareko 6:1-6; Isaia 9:7.

◆ I le taʻua o Iesu o le “alo o Tavita,” o le ā ua faaalia ai e talitonu tamāloloa tauaso e toalua?

◆ O le a le faamatalaga o vavega a Iesu ua saofafaʻi ai le ʻau Faresaio?

◆ Ai se ā ua o se alofa mutimutivale ai mo Iesu le toe foʻi atu e fesoasoani ia i latou i Nasareta?

◆ O le ā le tali na maua e Iesu i Nasareta, ma ai se ā

[Ata atoa i le itulau 9]