1. O le ā na tupu i le taimi patino lava na tofotofoina ai Iesu?

SA AGAʻI atu Iesu Keriso ma ona soʻo i Ierusalema. E leʻi mamao tele a o leʻi oo i lea mea, sa taʻu atu ai e Iesu i ona soʻo i ni sauniga se lua faapea, o le a ia oo i puapuaga e tele ma o le a fasiotia o ia i lena aai. (Mareko 8:31; 9:31) I lenei vaitaimi faapitoa o tofotofoga o Iesu, ua faapea mai ai le faamatalaga a le Tusi Paia: “Ua latou au mai tama meamea ia te ia, ina ia paʻi ane o ia ia te i latou.”—Luka 18:15.

2. (a) Ai se ā atonu sa taumafai ai le au soʻo e tutuliese tagata? (e) Na faapefea ona tali atu Iesu i lea tulaga?

² O le ā le tali na i ai i lenei mea? Ia, na otegia e le au soʻo tagata ma taumafai e tutuliese i latou, e lē taumatea sa latou talitonu faapea sa latou faia se mea lelei mo Iesu e ala i le puipuia o ia mai le faalavelaveina lē tatau ma ni omiga. A e sa oo ina toatamai Iesu i ona soʻo, ua fetalai atu: “Ina tuu mai ia o tama iti e o mai ia te au; aua le vavao ia te i latou; . . . Ona siitia lea e ia o i latou i ona lima, ua faaee foi ona aao i luga ia te i latou, ma faamanuia ia te i latou.” (Mareko 10:13-16) Ioe, e ui lava i na mea uma sa tatau ona i lona mafaufau ma lona loto, a e sa i ai lava se taimi sa faaavanoa e Iesu mo tamameamea po o tamaiti.

9. O le ā le mea oona e manaomia faapitoa ona puipuia mai ai fanau?

⁹ A e peitai, talu ai ona o omiga i le taimi o loo tatou ola ai, atonu o le a e faia ai se faaiʻuga e pei ona sa faia e le au soʻo, o le tuleiese o tamaiti ina ia e uai atu ai i le mea ua manatu i ai atonu e sili atu ona tāua. A e o le ā e sili atu ona tāua na i lo o lau lava fanau? Ua i ai o latou olaga faaleagaga i se tulaga lamatia! Atonu e te manatua faapea ina ua tupu le faalavelave faaniukelea i Chernobyl i Rusia i le 1986, na aveese ai tamaiti mai lea vaega o le atunuu ina ia puipuia ai i latou mai le faaoonaina. E faapena foi, pe a e leoleoina le ola maloloina faaleagaga o lau fanau, e manaomia ona e puipuia i latou mai le “ea” oona o le lalolagi, lea e masani lava ona faasalalau solo mai e televise.—Faataoto 13:20.