LESONA 23

O le Papatisoga o se Sini Aogā!

Maua le Lomiga Lolomi

Na aʻoaʻo mai e Iesu, o le papatisoga o se mea e tatau ona faia e Kerisiano. (Faitau le Mataio 28:19, 20.) Ae o le ā le papatisoga? O le ā e tatau ona faia e se tasi ina ia ausia ai lenā sini?

1. O le ā le papatisoga?

O le upu “papatiso” e sau mai i le upu Eleni e uiga atu i le “lolō i lalo” o le vai. Ina ua papatiso Iesu, na faatofu o ia i le vaitafe o Ioritana, ona ʻmaliu aʻe loa lea o ia mai i le vai.’ (Mareko 1:9, 10) I le pei o Iesu, o Kerisiano moni e papatiso e ala i le lolō i lalo, po o le faatofu i le vai.

2. O le ā e faailoa mai e le papatisoga?

O le papatisoga, ua faailoa mai ai e se tasi ua ia tuuina atu lona ola iā Ieova le Atua. E faapefea ona tuuina atu le ola o se tasi? A o leʻi papatiso, e faailoa atu e lenā tagata iā Ieova e ala i le tatalo, lona faanaunauga e auauna iā te Ia e faavavau. E na te taʻutino atu o le a ia tapuaʻi tau lava o Ieova, ma o le a avea le faia o le finagalo o le Atua o se mea e sili ona tāua i lona olaga. O le a filifili e ʻfaafitia e ia o ia lava ma mulimuli pea’ i aʻoaʻoga ma faaaʻoaʻoga a Iesu. (Mataio 16:24) O lona tuuina atu ma le papatisoga o le a ia maua ai se faiā vavalalata ma Ieova ma ona tagata tapuaʻi.

3. O le ā e tatau ona faia e se tasi ina ia agavaa ai mo le papatisoga?

Ina ia e agavaa mo le papatisoga, e tatau ona e aʻoaʻo e faatatau iā Ieova ma atiaʻe le faatuatua iā te ia. (Faitau le Eperu 11:6.) A o tuputupu aʻe lou malamalama ma lou faatuatua, o le a atiaʻe ai foʻi lou alofa mo Ieova. E mautinoa o le a e naunau e talaʻi atu e faatatau iā te ia, ma ola e ōgatusa ma ana tapulaa. (2 Timoteo 4:2; 1 Ioane 5:3) Pe a ola se tasi ʻe tusa ma le finagalo o Ieova, ma matuā faafiafiaina o ia,’ ona ia filifili lea pe tuuina atu lona ola i le Atua ma papatiso.—Kolose 1:9, 10.a

SAʻILIʻILI ATILI

Mātau po o le ā e tatou te aʻoaʻoina mai le papatisoga o Iesu, ma pe faapefea ona ausia lenei laasaga tāua.

4. Lesona e tatou te aʻoaʻoina mai i le papatisoga o Iesu

Faitau le Mataio 3:13-17 ma mātau nisi faamatalaga e faatatau i le papatisoga o Iesu, ona talanoa lea i fesili nei:

Pe na papatiso Iesu a o pepe?
O le ā le auala na papatiso ai o ia? Pe na papatiso e ala i le faatulutulu i ai o se vai?

Ina ua uma ona papatiso Iesu, ona amata loa lea ona ia faia se galuega e sili ona tāua i le lalolagi, lea na tuuina atu e le Atua iā te ia. Faitau le Luka 3:21-23 ma le Ioane 6:38, ona talanoa lea i le fesili lenei:

Ina ua uma ona papatiso Iesu, o le ā le galuega na ia faamuamua i lona olaga?

5. O le papatisoga o se sini e mafai ona e ausia

O le tuuina atu ma le papatisoga, e ono foliga mai e faigatā i le taimi muamua. Peitaʻi, e mafai lava ona e agaʻigaʻi i luma, seʻia oo ina e mautinoa i le faia o lenā filifiliga tāua. Mātau nisi na latou faia faapea. Faaali le VITIŌ.

VITIŌ: Atiaʻe se Faiā ma Ieova (1:11)

Faitau le Ioane 17:3 ma le Iakopo 1:5, ona talanoa lea i le fesili lenei:

O le ā e fesoasoani i se tasi ina ia agavaa ai mo le papatisoga?

A. O se fafine o loo faia lana tatalo o le tuuina atu iā Ieova.

E. O le fafine lava lenā ua papatiso ma avea ma Molimau a Ieova, e ala i le faatofu atoa i le vai.

A. O le tuuina atu, o lou tatalo lea iā Ieova ma faailoa atu e te manaʻo e auauna iā te ia e faavavau
E. O le papatisoga ua faailoa atu ai i isi, ua uma ona e faia se tuuina atu i le Atua

6. Pe a uma ona e papatiso, o le a avea oe o se vaega o le aiga o Ieova

Pe a uma ona papatiso, ona avea loa lea ma vaega o se aiga autasi i le lalolagi aoao. E ui e eseese o matou atunuu ma talaaga, ae e tutusa o matou talitonuga ma tapulaa tau amio e ola ai. Faitau le Salamo 25:14 ma le 1 Peteru 2:17, ona talanoa lea i le fesili lenei:

O ā aafiaga lelei o le papatisoga i le faiā a se tasi ma Ieova, ma lana faiā ma isi o loo tapuaʻi atu foʻi iā Ieova?

Tuufaatasiga o ata: O se tuafafine ua uma ona papatiso o loo mafaufau i lana faiā lelei ma isi i le faapotopotoga. 1. O loo faamāfanafana i ai se isi tuafafine. 2. O loo fesoasoani i se tuafafine matua. 3. O loo aai faatasi ma ana uō e eseese o latou tausaga. 4. O loo talaʻi atu ma se isi tuafafine i se tamāloa. 5. O loo puʻe se latou ata ma isi Molimau a Ieova e eseese o latou atunuu, i se tauaofiaga.

UA FAAPEA MAI NISI: “Ou te leʻi sauni e papatiso.”

Pe afai o ou faalogona na, pe o le a e manaʻo e ausia pea lenā sini?

AOTELEGA

Na aʻoaʻo mai e Iesu e tatau i Kerisiano ona papatiso. Ina ia ausia e se tasi lenā sini, e manaʻomia ona ia atiaʻe se faatuatua malosi iā Ieova, ola e ōgatusa ma Ana tapulaa, ma tuuina atu lona ola iā te Ia.

Fesili Autalu

O le ā le papatisoga, ma aiseā e tāua ai?
O le ā le fesootaʻiga o le tuuina atu ma le papatisoga?
O ā laasaga e manaʻomia ina ia e agavaa ai mo le tuuina atu ma le papatisoga?

Le aso na uma ai le lesona:

Sini

Iloilo lisi o loo i le faaiʻuga o le Vaega 4, “Po ua Ou Sauni e Talaʻi Faatasi ma le Faapotopotoga?” ma “Po ua Ou Sauni e Papatiso?,” ina ia iloa le auala e te agavaa ai.

Isi sini:

Your other goal

MANATU FAAOPOOPO

Iloilo po o le ā le papatisoga ma po o le ā e lē uiga atu i ai.

“O le ā le Papatisoga?” (Mataupu i le jw.org)

Toe autalu auala e mafai ona agavaa ai se tasi mo le papatisoga.

“Le Alofa ma le Lototalisapaia mo Ieova e Uunaʻia ai e Papatiso” (Le Olomatamata, Mati 2020)

Faitau po o le ā na faavae ai le filifiliga a se tamāloa ina ia papatiso.

“Na Mananaʻo Ou te Faamaonia e Aʻu Lava ia Aʻoaʻoga Moni a le Tusi Paia” (Le Olomatamata, Fepuari 1, 2013)

Iloilo pe aiseā e avea ai le papatisoga o se sini aogā, ma pe faapefea ona e sauniuni i ai.

“Pe e Tatau Ona Ou Papatiso?” (Fesili ua Fesili Mai ai Talavou—Tali e Aogā, Tusi 2, mataupu 37)

a Pe afai na papatiso muamua se tasi i se isi lotu, e manaʻomia la ona toe papatiso. Aiseā? Talu ai e leʻi aʻoaʻoina e lenā lotu upu moni mai i le Tusi Paia.—Tagaʻi i le Galuega 19:1-5 ma le Lesona 13.