LESONA 55
Ia Lagolagosua i Lau Faapotopotoga
I le lalolagi aoao, e faitau miliona tagata o loo tapuaʻi atu ma le fiafia iā Ieova i le faitau afe o faapotopotoga. E latou te lotofaafetai i faatonuga ma le taʻitaʻiga ua latou maua, ma e latou te naunau e lagolagosua i le faapotopotoga i le tele o auala. Po o lou manatu foʻi lenā i lau faapotopotoga?
1. O ā auala e mafai ona faaaogā ai lou taimi ma le malosi e lagolagosua ai i le faapotopotoga?
E mafai e i tatou uma lava ona fesoasoani i le faapotopotoga. Mo se faataʻitaʻiga, pe e iai nisi i lau faapotopotoga ua matutua pe aafia i maʻi? Pe mafai ona e fesoasoani e momoli i latou i sauniga, pe avatu se isi fesoasoani aogā e pei o le faia o se faatau, po o isi feʻau i le fale? (Faitau le Iakopo 1:27.) E mafai ona tatou tauofo e fesoasoani i le faamamāina ma le tausia o a tatou Maota mo Sauniga. E lē faamalosia i tatou e faia nei mea. O le alofa mo le Atua ma o tatou uso e uunaʻia ai i tatou e “ofo atu [i tatou lava] ma le lotomalie.”—Salamo 110:3.
E mafai e Molimau ua uma ona papatiso ona lagolagosua i le faapotopotoga i nisi o auala. O uso ua ausia agavaa faaleagaga e mafai ona fesoasoani i le faapotopotoga, o ni auauna o le faiva po o ni toeaina. E mafai uma e uso ma tuafāfine ona lagolagosua i le galuega talaʻi e ala i le avea ma paeonia. E fesoasoani nisi Molimau i le fausia o maota mo le tapuaʻiga, po o le siitia atu i se nofoaga o loo manaʻomia ai e se faapotopotoga le fesoasoani i nisi o auala.
2. E faapefea ona faaaogā a tatou meafaitino e lagolagosua ai i le faapotopotoga?
E mafai ona tatou “āva iā Ieova [i a tatou] ʻoa.” (Faataoto 3:9) E tatou te vaai o se faaeaga le foaʻi atu o a tatou tupe ma isi meafaitino, e lagolagoina ai a tatou faapotopotoga ma le galuega talaʻi i le lalolagi aoao. (Faitau le 2 Korinito 9:7.) E faaaogā foʻi a tatou foaʻi mo galuega laveaʻi i taimi o mala. Ua filifili le toʻatele e “tuu ese se mea” e lē aunoa, e foaʻi atu o se meaalofa. (Faitau le 1 Korinito 16:2.) E mafai ona faia a tatou foaʻi i pusa mo meaalofa o loo i a tatou maota mo le tapuaʻiga, po o le faia o foaʻi i le initaneti i le donate.jw.org. Ua aumaia e Ieova le avanoa e faailoa atu ai lo tatou alolofa iā te ia, i le auala e tatou te filifili e faaaogā ai a tatou meafaitino.
SAʻILIʻILI ATILI
Iloilo nisi o auala e mafai ona e lagolagosua ai i le faapotopotoga.
3. E mafai ona faaaogā a tatou meafaitino
E alolofa Ieova ma Iesu i lē e foaʻi ma le lotofiafia. Mo se faataʻitaʻiga, na talisapaia e Iesu se fafine mativa ua oti lana tane, o lē na faia se foaʻi mo Ieova e ui ina itiiti mea na iā te ia. Faitau le Luka 21:1-4, ona talanoa lea i fesili nei.
Pe e manaʻomia ona tatou foaʻi atu ni mea se tele ina ia faafiafiaina ai Ieova?
O ā faalogona o Ieova ma Iesu pe a tatou foaʻi atu ma le lotofiafia?
Ina ia iloa le auala o loo faaaogā ai a tatou foaʻi, faaali le VITIŌ. Pe a uma, ona talanoa lea i le fesili lenei:
O ā auala o loo faaaogā ai foaʻi ina ia maua ai e faapotopotoga i le lalolagi aoao aogā?
4. E mafai ona tatou fesoasoani e ala i le faaavanoa atu o i tatou
I taimi o le Tusi Paia, na galulue mamafa tagata tapuaʻi o Ieova e tausia nofoaga na latou faaaogāina mo le tapuaʻiga. E tele atu isi mea na aofia ai nai lo le tau ina foaʻi atu o tupe. Faitau le 2 Nofoaiga a Tupu 34:9-11, ona talanoa lea i le fesili lenei:
O ā auala na fesoasoani ai tagata Isaraelu uma i le tausiaina o le fale o Ieova, po o le nofoaga mo le tapuaʻiga?
Ina ia iloa le auala o loo mulimuli ai Molimau a Ieova i faaaʻoaʻoga a i latou o loo taʻua i le Tusi Paia, faaali le VITIŌ. Pe a uma, ona talanoa lea i fesili nei:
Aiseā e tāua ai le tausia o le mamā ma le lelei o a tatou Maota mo Sauniga?
O ā nisi auala e mafai ona e fesoasoani atu ai?
5. E mafai ona aapa atu uso mo nisi faaeaga
O loo faalaeiauina e le Tusi Paia tane Kerisiano e aapa atu e faia le mea sili latou te mafaia, ina ia lagolagosua ai i le faapotopotoga. O loo faaalia i le vitiō lenei se faaaʻoaʻoga. Faaali le VITIŌ, ona talanoa lea i le fesili o loo mulimuli mai.
I le vitiō, na faapefea ona aapa atu Ryan ina ia fesoasoani atoatoa i le faapotopotoga?
O loo faailoa mai e le Tusi Paia agavaa mo uso ina ia avea ai ma auauna o le faiva ma toeaina. Faitau le 1 Timoteo 3:1-13, ona talanoa lea i fesili nei:
O ā mea e faatalitalia mai i uso o loo aapa atu e avea ma auauna o le faiva ma toeaina?
O ā mea e faatalitalia mai i o latou aiga?—Tagaʻi i le fuaiupu e 4 ma le 11.
Pe a taumafai malosi uso e ausia nei agavaa, o le a faapefea ona maua uma ai e sui o le faapotopotoga aogā?
PE A FESILI MAI SE TASI: “E faapefea ona faatupe le galuega a Molimau a Ieova?”
O le ā lau tali?
AOTELEGA
E matuā talisapaia e Ieova a tatou taumafaiga e lagolagoina le faapotopotoga, e ala i le foaʻi atu o o tatou taimi, malosi ma meafaitino.
Fesili Autalu
E faapefea ona faaaogā o tatou taimi ma le malosi e lagolagoina ai le faapotopotoga?
E faapefea ona faaaogā a tatou meafaitino e lagolagoina ai le faapotopotoga?
O ā ni auala e te manaʻo e lagolagoina ai le faapotopotoga?
MANATU FAAOPOOPO
Mātau māfuaaga e lē toe faatalitalia ai e le Atua ona tagata e faia le sefuluaʻi.
“O le ā le Manatu o le Tusi Paia i Sefuluaʻi?” (Mataupu i le jw.org)
I le Tusi Paia, e iai nisi tiute tauave ua tofia i tane papatiso. Ae faapefea pe afai ua manaʻomia ona faia e se tuafafine na tiute tauave?
“Ia Malamalama i le Tulaga Ulu i le Faapotopotoga” (Le Olomatamata, Fepuari 2021)
Mātau nisi o Molimau lototetele o ē na faia ni faataulaga, ina ia faaoo atu lomiga i o latou uso tapuaʻi.
E faapefea ona ese le auala e faatupe ai la tatou galuega mai isi faalapotopotoga faalelotu?
“E Faapefea Ona Faatupe le Galuega a Molimau a Ieova?” (Mataupu i le jw.org)