Na Ia Iloatino le Faanaunauga o Lona Loto

PE O le faanaunauga ea o lou loto ia vaai atu ua pule atoatoa le Malo Tau Mesia i le lalolagi aoao uma? Afai o lea, o loo e naunautai ma tatalo mo faamanuiaga folafolaina i le lalolagi i lalo o lena Malo faalelagi. O lea, ia faatino le onosai, auā “o le manao ua taunuu, o le laau o le ola lea.”—Faataoto 13:12; Iakopo 5:7, 8.

I le toeitiiti 2,000 tausaga ua mavae, sa nofo ai i Ierusalema le tamaloa ‘amiotonu ma le mataʻu’ o Simeona. Sa faatuatua o ia i valoaga Tau Mesia, ma sa “faatalitali atu o ia i le faamafanafanaina o Isaraelu” ma le onosai.—Luka 2:25.

Valoaga Tau Mesia Aumaia le Faamoemoe

Na faapogaia e Ieova le uluai valoaga Tau Mesia—o lē na te aumaia le faamoemoe i tagata agasala ma feoti. Na valoia mai e le Atua le oo mai o le Fanau a lana “fafine,” po o le faalapotopotoga faalevateatea.—Kenese 3:15.

Sa faailogaina Ia lena o se fanau a Aperaamo, ma sa valoia e Iakopo lona oo mai. (Kenese 22:17, 18; 49:10) O loo faasilisilia le mamalu o le Malo o le Mesia i salamo. (Salamo 72:1-20) Na valoia e Isaia e faapea, o le a ala mai le Fanau i se taupou, ma na valoia e Mika o le a fanau mai i Peteleema. (Isaia 7:14; Mika 5:2) Ua na o ni nai valoaga nei o le anoanoai o valoaga Tau Mesia.

Ua Leai Pea se Mesia!

Ia manatunatu i le taimi ua tuanai, ma manatu faalemafaufau e faapea o loo fotuai mai le senituri muamua T.A. Ua 4,000 nei tausaga le matua o le uluai valoaga Tau Mesia a le Atua. Sa tofo tagata Iutaia i le faaumatiaga o le malumalu o Ieova, le faalafuaina o lo latou nuu, le faaaunuuaina i Papelonia mo le 70 tausaga, ma isi tausaga e 500 o le gauai atu i pulega a Nuu Ese. Ae ua leai pea se Mesia!

Maeu le naunautai atu o tagata Iutaia e matatau i le Atua mo le oo mai o le Mesia! O le a tafe mai ia te ia faamanuiaga mo i latou ma atunuu uma.

O se Tagata Tapuai

Faatasi ai ma tagata Iutaia tapuai o loo moomoo ma tatalo atu mo le oo mai o le Mesia, o Simeona, o se auauna matua faamaoni a Ieova o loo mau i le laumua o Iutaia. E i ai se mea faapitoa sa tupu ia Simeona.

Na ulufia Simeona e le agaga paia o le Atua, ma sa tauia o ia i se faaaliga. O le a lē oo le oti ia Simeona seia ona vaai i Lē o le a avea ma Mesia. Ae o loo gasolo pea aso ma masina. Ua faasolo ina matua tele Simeona ma ua faafaigata ona faatalitalia le ola umi. Pe o le a faataunuuina ea le folafolaga a le Atua ia te ia?

I se tasi aso (i le 2 T.L.M.), na ō mai ai se ulugalii faaipoipo talavou ma se pepe i le malumalu mai Peteleema. Sa faaali atu e le agaga paia ia Simeona e faapea, o le aso lenei ua loa ona faatalitalia. Sa alu atu o ia i le malumalu, i le mea o le a ia vaai ai i Lē sa tusi faatatau i ai perofeta. I le nanati atu i le vave e faatagaina e si ona tino matua, ua ia iloa atu ai Iosefa, Maria, ma le tamaitiiti.

Faatasi ai ma le olioli na opoopo ai e Simeona le tamaitiiti o Iesu i ona lima! O Ia lenei o le a avea ma Mesia folafolaina—‘le Keriso a Ieova.’ I sea tulaga matua, sa lē mafai ona faamoemoe Simeona e matamata a o faataunuu e Iesu Lana galuega faalelalolagi. E ui i lea, o se mea matagofie le vaai ia te ia o se pepe. Ua amata nei ona faataunuuina valoaga Tau Mesia. Maeu le fiafia o Simeona! Nei la, ua lotomalie o ia e moe i le oti seia oo i le toetu.—Luka 2:25-28.

Upu Faavaloaga a Simeona

A o sii aʻe le leo o Simeona i le viiga o Ieova, tatou te lagona atu o ia o faapea mai: “Le Alii e, e te tuuina atu nei lau auauna ia alu ma le manuia, pei o lau afioga; auā ua iloa e oʻu mata le faaolataga mai ia te oe, ua e saunia i luma o nuu uma lava; o le malamalama e faamalamalama aʻi nuu ese, ma le mamalu o lou nuu o Isaraelu.” Sa faaauau pea ona taufaiofo le tamā fai o Iesu, o Iosefa, ma Lona tinā, o Maria, e uiga i nei upu.—Luka 2:29-33.

Na iloga le malamalama o foliga o Simeona a o ia faamanuiaina Iosefa ma Maria, e manino o loo talosia mo i laua faamanuiaga a Ieova i le faataunuuina o o la tiute tauave agaʻi i le tamaitiiti. Ona pupula toʻa ai lea o foliga o le tamaloa matua. I le tuusao o ana faamatalaga ia Maria, na ia faaopoopo atu: “Faauta, ua tuu le tama nei e pauu ai ma toe tutū ai tagata e toatele o i Isaraelu; e fai foi ma faailoga e faaleagaina; (e tūʻia foi lou lava loto ia ati i le pelu), ina ia faaalia mai ai manatu o loto o tagata e toatele.”—Luka 2:34, 35.

Le Faamatalaga a Simeona ia Maria

Manatu faalemafaufau i le faalogona o Maria. O le ā na uiga i ai Simeona? O le a talia e nisi Keriso ma siitia aʻe mai o latou tulaga mafatia. Ae peitai, o le a teena o ia e nisi, tautevateva ona o ia, ma pauu ai. E pei ona valoia, ua faamaonia le avea o Iesu o se maa e tautevateva ai le toatele o tagata Iutaia. (Isaia 8:14; 28:16) Sa leʻi uiga upu a Simeona e faapea, o le a muamua pauu tagata Isaraelu i le lē talitonu, ona toe tutū lea i le talitonu ona ua taliaina Iesu. Na i lo o lena, o le a eseese le tali atu ia te ia a tagata eseese taitoatasi, i le faailoaina mai o mafaufauga o i le tele o loto, ma tatai atu ai i le faamasinoga a le Atua ia i latou mo le lelei po o le leaga. I ē e lē talitonu, o le a avea o ia o se faailoga, po o se mea e manatu faatauvaa i ai. I le faatuatua ia te ia, o le a faaeaina i luga isi mai le oti i mea e sese ma agasala ai, ma o le a oo ina olioli i se tulaga amiotonu ma le Atua. O gaoioiga a tagata agaʻi i le Mesia, o le a faaalia ai mea o i o latou loto.

Ae ā upu a Simeona e faapea: “E tūʻia foi lou lava loto ia ati i le pelu”? E leai se faasinoga faale-Tusi Paia e faapea sa ati se pelu moni ia Maria. Ae peitai, o le teena o Iesu e le toatele o le a puapuaga ai o ia. Ma pagā le tiga na iai mo Maria i le vaai atu o tutuʻi Iesu i le laau! Sa pei o le ati o se pelu ia te ia.

Faatatau e Simeona Valoaga Tau Mesia

Na uunaia e le agaga o le Atua Simeona ina ia faatatau valoaga Tau Mesia ia Iesu. Sa mafai ona maliu filemu ma toafimalie Simeona, ‘auā ua iloa e ona mata le faaolataga mai le Atua, ua Ia saunia i luma o nuu uma lava; o le malamalama e faamalamalama aʻi nuu ese, ma le mamalu o Lona nuu o Isaraelu.’ (Luka 2:30-32) Maeu le fetaui o le faatatauina o lenei mea i upu faavaloaga a Isaia!

Sa valoia e lena perofeta e faapea: “Ona faaalia mai ai lea o le pupula o Ieova, e vāaia lava e tagata uma faatasi.” “Ua ou [Ieova] avatua foi oe [le Mesia] e fai ma malamalama o nuu ese, e fai maʻu faaolataga ia oo i tuluiga o le lalolagi.” (Isaia 40:5; 42:6; 49:6; 52:10) Ua tauavea e Tusitusiga Kerisiano Eleni ma mea moni faaletino e faapea o le Mesia, Iesu Keriso, o le malamalama moni o nuu, o Lē e toesea le pupuni o le pogisa faaleagaga ma aumaia le faaolataga i tagata.

E lē o toe taʻua e le Afioga a le Atua nisi faamatalaga e uiga ia Simeona matua. E manino, na maliu o ia a o leʻi tatalaina e Keriso le ala i le ola faalelagi. O lea, e lē o toe umi, ae toe faatuina Simeona i le ola i le lalolagi. Maeu le olioli o le a mafai e ia—ma oe—ona tofo i ai i le lalolagi fou i lalo o le Malo Tau Mesia!