Amuia i Latou o Loo Mataala Pea!
“Faauta, ou te alu atu pei o se gaoi! Amuia lē mataala, ma tausi i ona ofu.”—FAAALIGA 16:15.
1. Talu ai ua latalata mai lava le aso o Ieova, o le ā e mafai ona tatou faatalitalia?
UA LATALATA mai lava le aso tele o Ieova, o lona uiga o le taua! Sa vaaia e le aposetolo o Ioane i le faaaliga ni “agaga . . . o temoni” e pei o rane o loo ō atu i “tupu” uma, po o pule, o le lalolagi. Ina ia faia le ā? Ioe, ina ia “faapotopoto ia te i latou i le taua i le aso tele o le Atua e ona le malosi uma lava”! Na faapea atili mai Ioane: “Na latou faapotopoto foi ia te i latou i le mea ua igoa i le gagana Eperu o Amaketo.”—Faaaliga 16:13-16.
2. O ai Koku o Makoku, ma o le ā o le a tupu pe a ia osofaia tagata o Ieova?
2 Ua lē o toe mamao, ona uunaia lea e Ieova lenei faiga o mea faapolotiki ina ia faaumatia Papelonia le Aai Tele, le emepaea o lotu sese o le lalolagi. (Faaaliga 17:1-5, 15-17) Ona faatulaga loa lea e Koku o Makoku, o Satani le Tiapolo lea ua faamalaiaina o loo i le lalolagi, ana ʻau ma latou matuā osofaia tagata o Ieova o loo fifilemu, faapei e lē o malupuipuia. (Esekielu 38:1-12) Peitai o le a gaoioi le Atua e laveai ona tagata. O le mea lena o le a faailogaina ai le gapā o “le aso tele ma le silisili o Ieova.”—Ioelu 2:31; Esekielu 38:18-20.
3. E faapefea ona e faamatalaina taualumaga o mea ia na valoia i le Esekielu 38:21-23?
3 Ioe, o le a laveai e Ieova ona tagata ma faaumatia vala uma o loo totoe o le faiga o mea a Satani, pe a tatou taunuu atu i le tulaga o le lalolagi lea ua taʻua o Amaketo. Ia faitau i upu faavaloaga o le Esekielu 38:21-23, ma faaāta i le mafaufau le vaaiga. Ua matuā faaaogaina e Ieova lona mana ina ia faatotō ifo ao mafiafia, o uatoʻa mamafa, o le afi, ma le faamaʻi oti matautia. E iai le atuatuvale i so o se vaipanoa a o fememeai ʻau a Koku ma toe fetauai lava i latou. So o se fili o loo ola o le Atua e Ona le Malosi Uma Lava, e faatamaʻia uma a o faaaogā e Ieova auala uigaese e faasaoina ai ana auauna. Pe a faaiuina le “puapuaga tele” lea na valoia, e leai se mea o le a toe totoe o le faiga o mea faalemataʻu a Satani. (Mataio 24:21) Peitai, e oo lava i o latou toe taimi, o le a iloa ai e ē amioleaga po o ai ua māfua ai lo latou faasalaga. Ua fetalai mai lo tatou Atua manumalo: “E iloa ai lava e i latou o aʻu lava o Ieova.” O nei mea uigaese o le a tutupu i o tatou aso, i le vaitaimi o le faatasi mai o Iesu.
O Loo Sau e Pei o se Gaoi
4. O le a faapeī le auala o le a afio mai ai Iesu e faaumatia lenei faiga amioleaga o mea?
4 Na fetalai mai le Alii faamamaluina o Iesu Keriso: “Faauta, ou te alu atu pei o se gaoi!” O le sau e pei o se gaoi o le a faafuasei, i se taimi e lei faatalitalia, a o momoe le toatele o tagata. Pe a afio mai Iesu e pei o se gaoi ina ia faaumatia lenei faiga amioleaga o mea, o le a ia faasaoina i latou o loo mataala moni. Na ia taʻu atu ia Ioane: “Amuia lē mataala, ma tausi i ona ofu, ina neʻi savali o ia e lē lavalavā, neʻi latou iloa atu foi lona mā.” (Faaaliga 16:15) O le ā le faauigaina o na fetalaiga? Ma e mafai faapefea ona tatou mataala pea faaleagaga?
5. O le ā le fuafuaga mo le auaunaga o le malumalu sa iai a o iai Iesu i le lalolagi?
5 E masani lava, e lē saeia lavalava o se leoleo ma tuua ai lē lavalavā pe afai e moe a o fai lana tiute. Peitai o le mea lena sa tupu i le malumalu i Ierusalema a o iai Iesu i le lalolagi ma a o auauna se vaega o ositaulaga ma sa Levī i le malumalu i Ierusalema. O le senituri lona 11 T.L.M. lea na faatulaga ai e le tupu o Tavita le faitau selau o ositaulaga Isaraelu ma le faitau afe o o latou fesoasoani o sa Levī e faia aʻe ai se faalapotopotoga ua faia i ni vaega e 24. (1 Nofoaiga a Tupu 24:1-18) O vaega taitasi e silia ma le afe tagata galulue ua uma ona toleniina, sa feauauai i le taulimaina o vala o le auaunaga i le malumalu a itiiti mai e tailua ona fai i le tausaga mo le umi e vaiaso atoa. Ae peitai, i le Tausamiga o Faleapitaga, e galulue faatasi ai vaega uma e 24 mo le faia o o latou tiute. Sa manaomia foi ni fesoasoani faaopoopo i taimi o tausamiga o le Paseka.
6. O le ā atonu sa faasino atu i ai Iesu ina ua ia fetalai, “Amuia lē mataala, ma tausi i ona ofu”?
6 Ina ua fetalai Iesu, “Amuia lē mataala, ma tausi i ona ofu,” atonu sa ia faasino saʻo atu i se faagasologa i lena taimi na aofia ai leoleoga sa faia i le malumalu. Ua faapea mai le Mishnah faa-Iutaia: “Sa leoleoina pea e ositaulaga ni vaega se tolu i totonu o le Malumalu: o le Afeafe o le Aiga o Abtinas, o le Afeafe o le Mumū o le Afi, ma le Afeafe o le Taigafi; ae o le ʻau sa Levī sa leoleo i nofoaga e luasefulutasi: e toalima e leoleoina faitotoa e lima o le Temple Mount, e toafā sa leoleo i totonu o ona tulimanu e fa, e toalima sa leoleoina faitotoa e lima o le Lotoā o le Malumalu, e toafā sa leoleo i totonu o ona tulimanu e fa, ma le toatasi sa leoleoina le Afeafe o Osigataulaga, e toatasi sa leoleoina le Afeafe o le Iepupuni, e toatasi sa leoleo i tua o le nofoaga o le Nofoa o le Alofa Tunoa [i fafo i le papuipui i tua o le Mea e Sili ona Paia]. O le masani a le leoleo sili e pulea leoleoga a le Au Leoleo o le Malumalu, o le savali faataamilo lea ma ana sulu e siaki leoleo taitasi, ma afai e iai se leoleo e lē tulai ma faapea ane ia te ia, ‘Le leoleo sili o le Au Leoleo o le Malumalu, ia ia te oe le filemu!’ ma afai e iloa sa moe lea leoleo, ona sasa lea o ia e le leoleo sili i lona tootoo, ma sa iai foi i le leoleo sili le aiā e susunu ai lona ofu.”—The Mishnah, Middoth (“Measurements”), 1, palakalafa 1-2, ua faaliliuina e Herbert Danby.
7. Aisea na manaomia ai e ositaulaga ma le ʻau sa Levī ia na leoleo i le malumalu ona mataala pea?
7 O sa Levī e toatele ma ositaulaga a le vaega lea o loo faia le auaunaga sa latou mataala pea i le po atoa e leoleo ma teena so o se tasi e lē mamā mai le ulu atu i lotoā o le malumalu. Talu ai sa faia e le “leoleo sili o le Au Leoleo o le Malumalu,” po o le “kapeteni o le malumalu,” ni faataamilosaga i vaega uma e 24 a o faia leoleoga i le po, e tatau ai la i leoleo taitasi ona mataala pea i lana leoleoga sa iai pe afai e lē manao e maua atu o ia e lē o faia lona tiute.—Galuega 4:1.
8. O ā ofu faafaatusa o Kerisiano?
8 E manaomia e Kerisiano faauuina ma o latou uso a auauna ona mataala pea faaleagaga ma tausia o latou ofu faafaatusa. O nei ofu o faamaoniga vaaia ia o lo tatou tofiga i le faiva i le malumalu faaleagaga o Ieova. I le amanaiaina o lenei mea, ua ia i tatou le agaga paia o le Atua, po o le malosi galue, e fesoasoani ai ia i tatou ina ia faatino o tatou tiute ma tauaveina o tatou faaeaga o ni ē folafola le Malo. O lo tatou momoe ma lafoaia o tatou tofiga o ni faifeau a le Atua o le a tatou oo ai i se tulaga lamatia o le maua mai lea o i tatou e Iesu Keriso, le Taʻitaʻi o le malumalu sili faaleagaga. Pe afai e tatou te momoe faaleagaga i lena taimi, lona uiga e saeia faafaatusa o tatou lavalava ma lē lavalavā ai, ma susunuina o tatou ofu faafaatusa. E mafai la faapefea ona tatou mataala pea faaleagaga?
Le Auala e Mafai ai Ona Tatou Mataala Pea
9. Aisea e tāua tele ai le suesueina o le Tusi Paia faatasi ai ma le fesoasoani a lomiga faa-Kerisiano?
9 O le tinoū i le suesueina o le Tusi Paia faatasi ai ma le fesoasoani a lomiga faa-Kerisiano o se uunaiga lea mo le mataala faaleagaga. O lena suesuega o le a faaauupegaina ai i tatou mo le faiva, o le a fesoasoani ia i tatou e faafesagaia faafitauli, ma o le a faasino mai ai ia i tatou le ala i le fiafiaga e faavavau. (Faataoto 8:34, 35; Iakopo 1:5-8) E tatau i a tatou suesuega ona maeʻaeʻa ma agaigai i luma. (Eperu 5:14–6:3) O meaʻai lelei e taumafaina e lē aunoa e mafai ona fesoasoani ina ia tatou mataala ai pea ma mataalia. E mafai ona puipuia ai mai le vaivai lea atonu o se faailoga o le lē paleni o meaʻai tatau. E leai se mafuaaga e tatau ai ona lē lava a tatou meaʻai tatau faaleagaga ma tatou fia momoe ai, auā e anoanoai sauniuniga o loo faia e le Atua mo meaʻai faaleagaga e ala mai i le “auauna faamaoni ma le mafaufau.” (Mataio 24:45-47) O le aveina i fale e lē aunoa o meaʻai faaleagaga e ala i suesuega totino ma suesuega a le aiga o se tasi lea o auala e mataala ai pea ma “maloloina lelei ai i le faatuatua.”—Tito 1:13, NW.
10. Ua fesoasoani faapefea ia i tatou sauniga, o fonotaga, ma tauaofiaga faa-Kerisiano ina ia tatou mataala ai pea faaleagaga?
10 O sauniga faa-Kerisiano, o fonotaga, ma tauaofiaga e fesoasoani ina ia tatou mataala ai pea faaleagaga. Ua saunia mai ai faalaeiauga ma avanoa e ‘taufaatupu ai e le tasi i le tasi i le alofa ma galuega lelei.’ Ae maise lava e tatau ona tatou faapotopoto e lē aunoa a o tatou “iloa o le Aso o loo tāulata mai.” O lena aso ua matuā latalata mai lava. O le “aso o Ieova,” lea o le a ia faasilisilia ai lana pule silisili ese. Pe afai e tāua moni ia i tatou lena aso—ma o le tulaga lena e tatau ona iai—o le a tatou ‘lē faagaloina la le faapotopotoina faatasi o i tatou.’—Eperu 10:24, 25; 2 Peteru 3:10.
11. Aisea e mafai ai ona faapea atu e tāua tele le faiva faa-Kerisiano mo le mataala faaleagaga?
11 O le faia ma le loto atoa o se sao i le faiva faa-Kerisiano e tāua tele mo le mataala faaleagaga. O se sao e faia e lē aunoa ma le maelega i le talaʻia o le tala lelei e tausia ai pea lo tatou mataala. O la tatou faiva ua tatou maua ai le tele o avanoa e talanoa atu ai i tagata e faatatau i le Afioga a le Atua, lona Malo, ma ana fuafuaga. E faamalieloto le molimau atu mai lea fale i lea fale, le faia o toe asiga, ma le faia o suesuega faale-Tusi Paia i aiga e faaaogā ai lomiga e pei o Le Poto e Taʻitaʻia ai i le Ola e Faavavau. Sa mafai e toeaina i tuā i Efeso ona latou molimau mai e faapea sa aʻoaʻoina i latou e Paulo “i luma o le nuu, atoa foi ma lea fale ma lea fale.” (Galuega 20:20, 21) O le mea moni, o loo iai i nisi Molimau faamaoni a Ieova ni faafitauli tugā i o latou soifua maloloina ua taofia mai ai la latou faiva i nisi o itu, peitai o loo latou mauaina lava ni auala e taʻu atu ai i isi e uiga ia Ieova ma lona tulaga tautupu ma latou maua ai le olioli tele mai le faia faapea.—Salamo 145:10-14.
12, 13. O ā mafuaaga e tatau ai ona tatou alofia le soona faaloloto i meaʻai ma meainu?
12 O le alofia o le soona faaloloto i nisi o mea o le a fesoasoani ia i tatou e mataala ai pea faaleagaga. Ina ua fetalai Iesu e faatatau i lona faatasi mai, sa ia uunaia ai ona aposetolo: “Ia outou, neʻi mafatia o outou loto i le soona ʻai tele, ma le inu tele, ma le popole i mea a le olaga nei, neʻi faafuasei mai lea aso ia te outou e pei o se mailei; auā e oo mai ai i e nonofo uma lava i le fogāeleele uma.” (Luka 21:7, 34, 35, NW) O le soona ʻai ma le onā e matuā lē talafeagai lava ma mataupu silisili o le Tusi Paia. (Teuteronome 21:18-21) Ua faapea mai le Faataoto 23:20, 21: “Aua neʻi fai oe ma so latou o e inu tele i uaina; ma e ua aai tetele i manu; auā o lē inu tele ma ʻai tele e faamativaina o ia; ma lē fia moe pea e ofu o ia i ofu masaesae.”—Faataoto 28:7.
13 E tusa lava pe lei oo atu i lena tulaga o le soona ʻai ma le inu tele, ae e mafai ona faaninivaina ai se tagata, e oo lava ina matuā paie ai ma lafoaia ai le faia o le finagalo o le Atua. O le tulaga masani, o le a iai ni popolega e tusa ai o le olaga i le aiga, le soifua maloloina, ma isi lava mea. Peitai, o le a tatou fiafia pe a tatou faamuamua manaoga o le Malo i le olaga, ma mautinoa o le a saunia e lo tatou Tamā faalelagi mea mo i tatou. (Mataio 6:25-34) Pe a lē faia faapea, ona oo mai lea o “lea aso” ia i tatou e pei o “se mailei,” atonu e pei o se maunu e iloagatā o le a puea ai i tatou ma le lē nofouta pe faapei o se maunu ua faalata mai i ni manu ma puea faafuasei ai loa. O le a lē tupu lenei mea pe afai tatou te mataala pea, i le matuā iloa lelei o loo tatou ola i “ona po o le iuga.”—Tanielu 12:4.
14. Aisea e tatau ai ona faia ni a tatou tatalo faatauanau?
14 O le tatalo faatauanau o le isi lea fesoasoani i le mataala faaleagaga. I lana valoaga sili, na faalaeiau atili mai ai Iesu: “O lea ia outou mataala e le aunoa ma tatalo ina ia outou maua le malosi e sao mai ia mea uma ua tāli oo mai, ma ia tutū i luma o le Atalii o le tagata.” (Luka 21:36) Ioe, seʻi o tatou tatalo ina ia tatou iai pea i le itu a Ieova ma olioli ai i se tulaga faamaonia pe a afio mai Iesu, le Atalii o le tagata, ina ia faaumatia lenei faiga amioleaga o mea. Mo lo tatou lava lelei ma le lelei o o tatou uso talitonu o ē o loo tatou tatalo mo i latou, e manaomia ona tatou ‘tutumau pea e mataala i le tatalo.’—Kolose 4:2; Efeso 6:18-20.
Ua Itiiti le Taimi o Totoe
15. O le ā ua faataunuuina e la tatou auaunaga o ni tagata talaʻi o le amiotonu?
15 A o tatou faatalitali atu i le aso tele o Ieova, e lē taumatea lo tatou faanaunau ia faia mea uma tatou te mafaia i lana auaunaga. Afai tatou te tatalo faatauanau ia te ia e tusa o lenei mea, atonu o le a tatala mai ai ia i tatou “le faitotoa lautele o galuega.” (1 Korinito 16:8, 9, NW) I le taimi atofaina a le Atua, o le a faaoo mai ai e Iesu le faamasinoga ma tuueseeseina “mamoe” amiotonu o ē ua tatau ma onomea i ai le ola e faavavau, ma “ʻoti” amio faalemataʻu ua tatau i ai le faaumatiaga e faavavau. (Ioane 5:22) E lē o i tatou e tuueseeseina mamoe mai ʻoti. Peitai o la tatou auaunaga o ni tagata talaʻi o le amiotonu i le taimi nei, ua maua ai e tagata le avanoa e filifilia ai se olaga o le auauna atu i le Atua ma maua ai le faamoemoe o le vavae ese mai mo le ola pe a ‘afio mai Iesu i lona mamalu.’ O le itiiti o le taimi o loo totoe mo lenei faiga o mea ua matuā faanatinati ai le manaoga mo ni galuega ma le loto atoa a o tatou saili atu mo i latou ‘ua saunia mo le ola e faavavau.’—Mataio 25:31-46; Galuega 13:48.
16. Aisea e tatau ai ona avea i tatou o nisi e maelega e folafolaina le Malo?
16 Sa oo ina uma le taimi mo le lalolagi o aso o Noa, ma ua lē o toe umi ona uma foi lea o le taimi mo lenei faiga o mea. O lea, seʻi avea ai i tatou o nisi e maelega e folafolaina le Malo. O loo lauolaola pea la tatou galuega talaʻi, auā i tausaga taitasi e faitau selau afe ua papatisoina e faailogaina ai lo latou tuuina atu i le Atua. O loo avea i latou ma vaega o le faalapotopotoga ua faamanuiaina a Ieova—“o lona nuu . . . o le lafu mamoe ua ia fagaina.” (Salamo 100:3) Maeu le olioli i le faia o se sao i le galuega talaʻi o le Malo lea e aumaia ai le faamoemoe i le toatele o tagata a o lei oo i “le aso tele ma le silisili o Ieova”!
17, 18. (a) A o tatou talaʻi atu, o ā uiga e tatau ona tatou faatalitalia le faaalia mai e nisi? (e) O le ā e mautinoa e oo i ē tauemu?
17 Ua pei i tatou o Noa, o loo ia i tatou le lagolagosua ma le puipuiga a le Atua. Ioe, o tagata, o agelu na fai ni o latou tino tagata, ma le ʻau Nefilimi sa latou aamu i le feau a Noa, ae sa lei taofia mai ai o ia. I aso nei, o loo aamu mai nisi pe a tatou faasino atu i le tele o faamaoniga e iloa ai o loo tatou ola i “aso e gata ai.” (2 Timoteo 3:1-5) O na tauemuga o se faataunuuga lea o le valoaga a le Tusi Paia e faatatau i le faatasi mai o Keriso, auā na tusi mai Peteru: “E o mai i ona aso e gata ai o e tauemu, latou te savavali e tusa ma o latou lava tuʻinanau; e faapea mai, Ofea nei le folafolaga o lona afio mai [“faatasi mai,” NW]? auā talu ona momoe o le augātamā, ua tutumau pea o mea uma pei ona faatoa faia.” —2 Peteru 1:16; 3:3, 4.
18 O ē tauemu i aso nei atonu e manatu faapea: ‘E leai lava se mea ua suia talu mai le foafoaga. O loo faagasolo pea le olaga, o loo aai ma feinu tagata, o loo faaipoipo, ma fai fanau. E tusa lava foi pe ua faatasi mai Iesu, o le a lē faaooina mai e ia le faasalaga i oʻu aso.’ Pagā lo latou sese! Pe afai e lē feoti i latou i lenei taimi mai nisi o mafuaaga, e mautinoa lava o le a oo mai le aso tele ma le silisili o Ieova ma faaumatia ai i latou e pei lava ona faaooina mai e le Lolo matautia le faaumatiaga i le tupulaga amioleaga i aso o Noa.—Mataio 24:34.
Ua Matuā Tatau Lava Ona Tatou Mataala Pea!
19. O le ā le vaaiga e tatau ona tatou manatu ai i a tatou galuega o le faia o soo?
19 Afai ua tatou tuuina atu ia Ieova, tau ina ia aua neʻi o tatou tautulemomoe i ni mafaufauga lē tatau. O le taimi lenei e mataala ai pea, ia faaalia le faatuatua i le valoaga tauatua, ma faaauau lo tatou tofiga ina ia “fai nuu uma lava ma soo.” (Mataio 28:19, 20) A o agaʻi atu lenei faiga o mea i lona iuga mulimuli, ua leai lava se isi o tatou faaeaga e sili atu nai lo le auauna ia Ieova le Atua i le taitaiga a Iesu Keriso ma faia se sao i le galuega aoao o le talaʻia o “lenei tala lelei o le malo” a o lei oo mai le gataaga.—Mataio 24:14; Mareko 13:10.
20. O le ā le faaaoaoga na faataatia e Kalepo ma Iosua, ma o le ā ua faaalia mai ia i tatou e le ala na la uia?
20 E iai nisi tagata o Ieova ua autausagā o auauna ia te ia, pe atonu mo se vaitaimi umi lava. E tusa lava pe e lei leva ona tatou talia le tapuaiga moni, ae tau ina ia pei i tatou o Kalepo le Isaraelu, o lē na “matuā mulimuli atu . . . ia Ieova.” (Teuteronome 1:34-36) Sa sauniuni o ia ma Iosua e ulu atu i le Nuu Folafolaina ina ua faatoʻā mavae ona laveaia Isaraelu mai le nofo pologa i Aikupito. Peitai ane, o le toatele lava o tagata Isaraelu matutua, sa leai so latou faatuatua ma na latou faaaluina ai le 40 tausaga i le vaomatua, ma latou feoti ai iina. Sa onosaia e Kalepo ma Iosua mea faigata sa latou fesagai i na taimi uma, ae na mulimuli ane ulu atu na tane e toalua i le nuu o le folafolaga. (Numera 14:30-34; Iosua 14:6-15) Pe afai tatou te ‘matuā mulimuli atu ia Ieova’ ma mataala pea faaleagaga, o le a tatou maua ai le olioli i le ulu atu i le lalolagi fou ua folafolaina mai e le Atua.
21. O le ā o le a tatou tofo i ai pe afai tatou te mataala pea faaleagaga?
21 O faamaoniga manino e faapea o loo tatou ola nei i le taimi o le iuga ma ua latalata mai le aso tele o Ieova. E lē o se taimi lenei e tautulemoe ai ma lafoaia le faia o le finagalo o le Atua. O le a faatoʻā faamanuiaina i tatou pe afai tatou te mataala pea faaleagaga ma tausia o tatou ofu e mātaulia ai i tatou o ni faifeau Kerisiano ma o ni auauna a Ieova. Tau ina ia avea ma a tatou filifiliga ina ia ‘mataala pea, ia tutumau i le faatuatua, ia faatamatane, ma faamalolosi.’ (1 Korinito 16:13) Ona o ni auauna a Ieova, tau ina ia tatou taitoatasi ma tutumau ma lototele. Ona avea ai lea o i tatou ma ē o loo nofo sauni pe a oo mai le aso tele o Ieova, i le auauna atu ma le faamaoni o ni muaʻau o ē fiafia o loo mataala pea.
E Faapefea Ona E Tali?
◻ E faapefea ona e faamatalaina o tatou ofu faafaatusa, ma e mafai faapefea ona tatou faatumauina pea?
◻ O ā nisi o auala e mataala ai pea faaleagaga?
◻ Aisea e tatau ai ona tatou faatalitalia e iai ē tauemu, ma e faapeī la tatou vaaiga ia i latou?
◻ O le ā le vaaiga e tatau ona tatou manatu i ai i la tatou galuega o le faia o soo i nei aso e gata ai?
[Faamatalaga faaopoopo i le itulau 16]
Ua iai i Kerisiano le agaga paia o le Atua e fesoasoani ia i latou ia tausia pea le mataala ma faataunuuina o latou tiute
[Ata i le itulau 15]
Po o e filifili ea e mataala pea faaleagaga ma faatumauina pea ou ofu faafaatusa?