LESONA 03
Pe Mafai Ona E Maufaatuatuaina le Tusi Paia?
E tele folafolaga ma fautuaga o loo i le Tusi Paia. Atonu e te naunau e iloa mea o loo aʻoaʻo mai e le Tusi Paia, ae ono faigatā ona e talitonu pe moni na aʻoaʻoga. Pe e te maufaatuatuaina folafolaga ma fautuaga mai i se tusi ua leva? Pe e te matuā talitonu i mea o loo fai mai ai le Tusi Paia, e faatatau i le mauaina o se olaga fiafia i le taimi lenei ma le lumanaʻi? E faitau miliona tagata ua talitonu i ai. Seʻi iloilo pe mafai ona e talitonu ai foʻi.
1. Po o le Tusi Paia o se tusi o faamatalaga moni po o ni talafatu?
O loo faamauina i le Tusi Paia “upu saʻo o le upu moni.” (Failauga 12:10) O loo faamatalaina ai mea moni na tutupu, ma tagata moni na aofia ai. (Faitau le Luka 1:3; 3:1, 2.) Ua faamaonia mai e tusitala o le talafaasolopito ma tagata suʻesuʻe i toega o mea, le moni aʻiaʻi o aso, tagata, nofoaga, ma mea na tutupu o loo faamatalaina i le Tusi Paia.
2. Aiseā e faapea atu ai o loo aogā pea le Tusi Paia e ui o se tusi ua leva?
E tele faamaoniga e iloa ai le moni o mea ua leva ona tusia i le Tusi Paia. Mo se faataʻitaʻiga, o loo taʻua ai mataupu faasaienisi. O le tele o mea o loo taʻua i na mataupu, e leʻi talitonu le toʻatele pe e moni i le taimi na tusia ai. Peitaʻi, ua faamaonia mai e le faasaienisi i aso nei, le moni aʻiaʻi o mea o loo fai mai ai le Tusi Paia. “E maufaatuatuaina pea i le taimi nei e oo i le faavavau.”—Salamo 111:8.
3. Aiseā e tatau ai ona tatou maufaatuatuaina mea o loo taʻua i le Tusi Paia e faatatau i le lumanaʻi?
O loo iai i le Tusi Paia valoagaa ia e folafola mai ai “mea e leʻi faia.” (Isaia 46:10) Na valoia mai ai ma le saʻo le tele o mea iloga i le talafaasolopito, a o leʻi taitai ona tutupu. O loo faamatala auʻiliʻili mai ai foʻi le tulaga ua iai le lalolagi i aso nei. O le a tatou iloiloina i lenei lesona nisi o valoaga o le Tusi Paia, ma e te maofa i le saʻo aʻiaʻi o na valoaga!
SAʻILIʻILI ATILI
Iloilo pe e faapefea ona faamaonia e le faasaienisi i aso nei le moni o le Tusi Paia, ma suʻesuʻe nisi o valoaga mataʻina o le Tusi Paia.
4. Ua faamaonia e le faasaienisi le moni o le Tusi Paia
Sa talitonu le toʻatele o tagata i aso anamua, o loo tiʻetiʻe le lalolagi i luga o se mea. Faaali le VITIŌ.
Mātau le manatu na tusia i le tusi o Iopu i le 3,500 tausaga ua mavae. Faitau le Iopu 26:7, ona talanoa lea i le fesili lenei:
Aiseā e mataʻina ai le faamatalaga, “e leai se mea o tautau ai” le lalolagi?
Na faatoʻā malamalama lelei tagata i le faataamilosaga o le suāvai i le vaitausaga o le 1800. Ae mātau se faamatalaga na tusia i le Tusi Paia, i le pe ā o le 3,500 tausaga ua mavae. Faitau le Iopu 36:27, 28, ona talanoa lea i fesili nei:
Aiseā e mataʻina ai lenei faamatalaga faigofie, e faatatau i le faataamilosaga o le suāvai?
Pe e mafai e nei mau ona faamalosia lou maufaatuatuaina o le Tusi Paia?
5. Na valoia mai i le Tusi Paia ni mea iloga
Faitau le Isaia 44:27–45:2, ona talanoa lea i le fesili lenei:
O ā faamatalaga na valoia mai e le Tusi Paia, i le 200 tausaga muamua atu a o leʻi faaumatia Papelonia?
Ua faamaonia e le talafaasolopito, o le tupu o Peresia e igoa iā Kuresa ma lana ʻautau, sa faaumatiaina Papelonia i le 539 T.L.M.b Sa latou faatafe ese le vai na siʻomia ai le aai o Papelonia. Na latou ulufale atu i faitotoʻa e leʻi tapunia, ma puʻea le nuu e aunoa ma se taua. Ua silia nei ma le 2,500 tausaga, talu ona faatafunaina lenei aai. Seʻi tatou iloiloina faamatalaga na valoia mai e le Tusi Paia.
Faitau le Isaia 13:19, 20, ona talanoa lea i le fesili lenei:
Na faapefea ona faataunuu lenei valoaga e faatatau iā Papelonia?
Toega o mea i le aai o Papelonia i aso nei i Iraq
6. Na valoia mai i le Tusi Paia mea o loo tatou vaaia i aso nei
Ua faailoa mai e le Tusi Paia ua tatou ola i “aso e gata ai.” (2 Timoteo 3:1) Mātau mea ua valoia mai e le Tusi Paia e faatatau i aso e gata ai.
Faitau le Mataio 24:6, 7, ona talanoa lea i le fesili lenei:
O ā mea iloga o loo taʻua i le Tusi Paia e tutupu a o faagasolo aso e gata ai?
Faitau le 2 Timoteo 3:1-5, ona talanoa lea i fesili nei:
O ā uiga o tagata o loo faamatalaina i le Tusi Paia, a o faagasolo aso e gata ai?
O lē fea o nei uiga o loo e vaai i ai?
UA FAAPEA MAI NISI: “O le Tusi Paia o se tusi o talatuu ma talafatu.”
Aiseā e te matuā talitonu ai, e mafai ona maufaatuatuaina le Tusi Paia?
AOTELEGA
Ua faailoa mai e le talafaasolopito, faasaienisi, ma valoaga, e mafai ona e maufaatuatuaina le Tusi Paia.
Fesili Autalu
Po o le Tusi Paia o se tusi o faamatalaga moni, po o ni talafatu?
O ā nisi o vala ua faamaonia ai e le faasaienisi le moni o le Tusi Paia?
Po o folafola mai i le Tusi Paia le lumanaʻi? Ia faamatala.
MANATU FAAOPOOPO
Pe e iai ni faamatalaga faasaienisi i le Tusi Paia e lē saʻo?
“Pe e Ioe le Faasaienisi i Manatu o le Tusi Paia?” (Mataupu i le jw.org)
O ā faamatalaga moni e faatatau i “aso e gata ai”?
“Valoaga e Ono a le Tusi Paia o Loo e Vaai i le Faataunuuga” (Le Olomatamata, Me 1, 2011)
Iloilo pe na faapefea ona faataunuu valoaga a le Tusi Paia e faatatau i le Malo o Eleni.
Iloilo pe na faapefea i valoaga o le Tusi Paia, ona suia ai le vaaiga a se tamāloa e faatatau i le Tusi Paia.
“Ou te Leʻi Talitonu e Iai se Atua” (Le Olomatamata Nu. 5 2017)
a O valoaga, o feʻau mai le Atua e faatatau i mea o le a tutupu i le lumanaʻi.
b O le T.L.M. e uiga atu i “Tausaga a o Lumanaʻi le Mesia,” ae o le T.A. e uiga atu i le “Tausaga o le Alii.”