Lomiga mo le Polokalame mo le Sauniga o le Faiva ma le Olaga Faa-Kerisiano
© 2023 Watch Tower Bible and Tract Society of Pennsylvania
IANUARI 1-7
ʻOA TAUTELE MAI I LE AFIOGA A LE ATUA | IOPU 32-33
Faamāfanafana i Ē o Loo Feagai ma le Lotomafatia
it-1-E 710
Eliu
E leʻi faailoga tagata pe viiviia e Eliu se tasi. Na iloa e Eliu e tutusa i laʻua ma Iopu, na faia i laʻua i le efuefu e Lē e ona le malosi uma lava. E leʻi manaʻo Eliu e faamataʻu Iopu, ae na ia talanoa atu iā te ia o se uō moni. Na ia taʻua patino le igoa o Iopu, o se mea e leʻi faia e Elifasa, Pilitati, ma Sofara.—Iop 32:21, 22; 33:1, 6.
Pe e Tutusa Lau Vaaiga i Vaivaiga o Tagata ma le Silasila a Ieova?
8 O le a atili ona tatou tigā alofa pe afai e manatua, o nisi o o tatou uso ma tuafāfine pele ua vaivai ona o loo feagai ma tulaga faigatā. Atonu o maʻi o le tino, mafatia, pe nonofo faatasi ma sui o le aiga e lē upu moni. Pe afai sa tatou feagai foʻi ma na faafitauli, sa tatou mananaʻo i isi ia faaalia mai le tigā alofa iā i tatou. Sa matitiva ma vaivai tagata Isaraelu a o iai i Aikupito. Peitaʻi, a o leʻi ulu atu i le Nuu Folafolaina, na faamanatu atu i ai e Ieova e lē tatau ona ʻfaamaaa o latou loto’ i o latou uso sa mafatia. Sa faatalitalia e Ieova i latou ia fesoasoani i o latou uso sa matitiva ma vaivai.—Teu. 15:7, 11; Levi. 25:35-38.
9 E lē tatau ona tatou vave faitioina o tatou uso ma tuafāfine i o latou faafitauli, pe manatu e sili atu i tatou nai lo o i latou. E tatau ona tatou avatu faamāfanafanaga faaleagaga i ē o loo feagai ma tulaga faigatā. (Iopu 33:6, 7; Mata. 7:1) O se faataʻitaʻiga, seʻi faapea ua manuʻa se tasi i se faalavelave tau taavale ma avatu faatopetope i le falemaʻi. Pe a taunuu i le falemaʻi, pe e taumafai fomaʻi e suʻesuʻe po o ia na māfua ai le faalavelave? E leai, e muamua lava ona latou gaoioi e togafitia o ia. I se tulaga talitutusa, pe a vaivai se uso po o se tuafafine ona o ona faafitauli, e tatau ona tatou fesoasoani muamua i ai i le itu faaleagaga.—Faitau le 1 Tesalonia 5:14.
10 O nisi uso ma tuafāfine e foliga mai e vaivai. Ae a mafaufau i o latou tulaga, e tatou te ono iloa ai e lē faapea ua latou matuā vaivai. Seʻi manatu i tuafāfine o loo onosaia teteega mai i a latou tane mo le tele o tausaga. O nisi atonu e foliga mai e faatauvaa ma vaivai, peitaʻi e mataʻina le auala o loo latou faaalia ai le faatuatua ma le lototele. Pe a e vaai atu i se tinā nofo toʻatasi o loo auai mai e lē aunoa i sauniga ma lana fanau, pe e te lē maofa i lona faamaoni ma le maumauaʻi? Ae faapefea talavou o loo tumau i le upu moni, e ui lava i taaʻiga leaga mai i isi i le aʻoga? Pe a mafaufau i mea uma o loo faia e uso ma tuafāfine e auauna ai iā Ieova, o le a fesoasoani e tatou te vāai ai iā i latou o ē e “mauʻoa i le faatuatua,” e ui lava e foliga mai e vaivai.—Iako. 2:5.
O le ā le Taimi e Tatau Ona Tautala Ai?
17 O Eliu le tane lona fā na asiasi atu iā Iopu, o se tauaiga o Aperaamo. Na ia faalogologo lelei a o talanoa Iopu ma isi tane e toʻatolu. E mautinoa na ia uaʻi lelei atu i tala na fai, ona na mafai ona ia avatu fautuaga alofa ma tuusaʻo na fesoasoani iā Iopu e faasaʻo ai ona manatu. (Iopu 33:1, 6, 17) O le faanaunauga autū o Eliu, ia viia Ieova ae lē o ia po o se isi tagata. (Iopu 32:21, 22; 37:23, 24) Ua tatou aʻoaʻoina mai i le faaaʻoaʻoga a Eliu, e iai le taimi e lē tatau ai ona tatou tautatala, ae ia faalogo. (Iako. 1:19) Ua tatou aʻoaʻoina mai ai foʻi, pe a tatou avatu fautuaga, o lo tatou faanaunauga autū o le faamamaluina o Ieova ae e lē o i tatou.
18 E mafai ona tatou faailoa atu e tāua iā i tatou le meaalofa o le tautala, e ala i le mulimuli i fautuaga mai i le Tusi Paia e faatatau i le taimi ma le auala e tautala ai. Na faagaeeina le tupu atamai o Solomona e tusi: “O le upu e fai atu i le taimi tatau, e pei o apu auro i totonu o mea siliva ua togitogiina.” (Faata. 25:11) Pe a tatou faalogologo lelei i tala a isi, ma mafaufau muamua ae e tatou te leʻi tautatala, o le a pei ai a tatou upu o na apu auro e tautele ma matagofie. O lea, pe e itiiti pe tele a tatou tala e fai, ae o le a atiaʻe isi i a tatou upu, ma o le a fiafia mai Ieova iā i tatou. (Faata. 23:15; Efe. 4:29) Maʻeu se auala matagofie e faaali atu ai lo tatou talisapaia mo lenei meaalofa mai i le Atua!
Saʻiliʻiliga mo ʻOa Faaleagaga
Ia Mafuta Vavalalata Atu Pea iā Ieova
10 E tatau ona tatou manatu mamafa i o tatou foliga vaaia. Peitaʻi, e lē tatau ona tatou soona naunau e toe maua foliga a o talavou. Ua faapea mai le Tusi Paia: “O le ulusinā o le pale matagofie lea pe a iai i le ala o le amiotonu.” (Faata. 16:31) E sili atu ona tāua i le silafaga a Ieova le tagata lilo i totonu, ma o le auala foʻi lenā e tatau ona tatou mafaufau ai. (Faitau le 1 Peteru 3:3, 4.) E lē tatau ona lamatia o tatou ola i le faia lea o ni togafitiga ma ni taotoga lavelave, ina ia aulelei atili ai. Po o le ā lava lo tatou matutua ma lo tatou soifua mālōlōina, ae “o le olioli mai iā Ieova,” e maua ai le fiafia moni. (Nee. 8:10) E na o le lalolagi fou o le a maua ai le soifua mālōlōina atoatoa, ma toe foʻi ai i le tulaga talavou. (Iopu 33:25; Isa. 33:24) O lea, ia faia filifiliga atamai i le taimi lenei, ma faatuatuaina folafolaga a Ieova. O le faia faapea, o le a maua ai le olioli i le taimi lenei, ma lē avea ai le mauaina o le soifua mālōlōina ma o tatou popolega autū.—1 Timo. 4:8.
IANUARI 8-14
ʻOA TAUTELE MAI I LE AFIOGA A LE ATUA | IOPU 34-35
Pe a Feagai ma Faiga Lē Tonu
O ā Uiga o le Atua?
E faia pea e le Atua le mea tonu i taimi uma. O le mea moni, “E mamao lava i le Atua moni ona faia o se mea leaga, ma Lē e ona le malosi uma lava ona faia o se mea e lē tonu!” (Iopu 34:10) E tonu ana faamasinoga, e pei ona taʻua e le faisalamo: “E te faamasinoina ma le tonu tagata.” (Salamo 67:4) Talu ai “o Ieova e vaai i le loto,” e lē mafai ona faasesēina o ia i le faalotolotolua ae e na te silafia le mea moni ma faia faamasinoga tonu. (1 Samuelu 16:7) E lē gata i lea, e silafia lelei e le Atua faiga lē tonu uma ma faiga piʻopiʻo i le lalolagi, ma ua ia folafola mai ua toeitiiti ona “faaumatia o ē e amioleaga mai i le lalolagi.”—Faataoto 2:22.
O ā Mea o le a Tafiesea pe a Oo Mai le Malo o le Atua?
5 O le ā o le a faia e Ieova i tagata amioleaga? I le taimi lenei, o loo tuu e Ieova i tagata amioleaga le avanoa e sui ai. (Isa. 55:7) Ua uma ona faia le faamasinoga faaiʻu o lenei faiga o mea lea o le a faaumatia, ae e leʻi oo i le taimi e faia ai le faamasinoga faaiʻu o tagata taʻitoʻatasi. E faapefea la tagata o loo mumusu e faia ni suiga, o loo faaauau ona lagolagoina lenei faiga o mea seʻia oo lava i le puapuaga tele? Ua folafola mai e Ieova o le a tafiesea tagata amioleaga uma mai i le lalolagi. (Faitau le Salamo 37:10.) E ono manatu tagata amioleaga o le a sao mai i lenā faaumatiaga. Ua iloa e le toʻatele nanā mea o loo latou faia, ma e masani ona latou sao mai i iʻuga o faamasinoga a lenei lalolagi. (Iopu 21:7, 9) Peitaʻi, ua faamanatu mai i le Tusi Paia: “O loo silasila ona [le Atua] fofoga i ala o le tagata, e silafia foʻi e ia ona ala uma. E leai se pogisa po o se pōuliuli tele mo i latou e faia mea e tigā ai ina ia lilo ai i latou i inā.” (Iopu 34:21, 22) E leai se mea e mafai ona natia mai iā Ieova le Atua. E leai se tagata taufaasesē e mafai ona faavaleaina le Atua, auā e ati lana silafaga i so o se mea, e oo lava i mea e pogisa ma pōuliuli. Pe a mavae Amaketo, e te ono mafaufau i le mea sa iai le tagata amioleaga, a ua leai lava. O le a tafiesea i latou e faavavau.—Sala. 37:12-15.
Po o le a E Teena Iesu?
19 Po o tupu i aso nei lenā faafitauli? Ioe. E teena e le toʻatele i aso nei i tatou, ona e tatou te solitū i faiga faapolotiki. E latou te faatalitalia i tatou e palota. Peitaʻi, ua tatou iloa le finagalo o Ieova pe a tatou filifilia se taʻitaʻi faaletagata e pulea i tatou, ua tatou teena la o Ia. (1 Samu. 8:4-7) E manatu foʻi tagata e tatau ona tatou fauina ni fale aʻoga, falemaʻi ma faia isi galuega e fesoasoani ai i tagata. E latou te teena i tatou ona e uaʻi atu a tatou taumafaiga uma i le galuega talaʻi, ae e lē o le foʻia o faafitauli o loo feagai ma le lalolagi i le taimi nei.
20 E faapefea ona ʻalofia le faavaivaia o lo tatou faatuatua? (Faitau le Mataio 7:21-23.) E tatau ona taulaʻi atu a tatou taumafaiga uma i le faia o le galuega na faatonu ai i tatou e Iesu. (Mata. 28:19, 20) E lē tatau ona tatou tosina atu i faiga faapolotiki ma faiga e foʻia faafitauli o lenei lalolagi. E tatou te alolofa i tagata ma e tatou te manatu mamafa i faafitauli o loo latou fesagaʻia. Peitaʻi, ua tatou iloa o le auala sili e fesoasoani ai iā i latou, o le aʻoaʻo o i latou e faatatau i le Malo o le Atua, ma fesoasoani iā i latou e atiaʻe se faauōga ma Ieova.
Saʻiliʻiliga mo ʻOa Faaleagaga
Tau Ina ia Viia Ieova i Lou Agaga Tauofo!
3 E leʻi faasaʻoina e Ieova Eliu i lana fesili e faapea: “Afai e saʻo lava oe, o le ā se mea e te avatu iā te ia [le Atua], po o le ā foʻi se mea e maua e ia mai i lou lima?” (Iopu 35:7) Po o le uiga o le faamatalaga a Eliu e lē tāua a tatou taumafaiga i le auaunaga i le Atua? E leai. Na faapea mai o ia e lē faalagolago Ieova i la tatou tapuaʻiga, auā o Ieova e atoatoa. E lē mafai ona tatou faia se mea ina ia faateleina atili ai lona tamaoaiga po o le malosi. Peitaʻi, o so o se uiga lelei, taleni, po o le malosi ua tatou maua, e mai i le Atua, ma e na te mātauina le auala o loo tatou faaaogā ai na mea.
IANUARI 15-21
ʻOA TAUTELE MAI I LE AFIOGA A LE ATUA | IOPU 36-37
Aiseā e ao ai Ona E Maufaatuatuaina le Folafolaga a le Atua mo le Ola e Faavavau?
Pe e Mafai Moni Lava Ona Tatou Iloa le Atua?
SOIFUA E FAAVAVAU LE ATUA: O loo aʻoaʻoina i le Tusi Paia na soifua le Atua “mai i le vavau e oo i le faavavau.” (Salamo 90:2) I nisi faaupuga, e leai se amataga ma se gataaga o le Atua. I le vaaiga faaletagata, ʻe lē masuʻesuʻeina le aofaʻiga o ona tausaga.’—Iopu 36:26.
Aogā mo oe: Ua folafola mai e le Atua e te maua le ola e faavavau pe afai e te iloa lelei o ia. (Ioane 17:3) E faapefea ona taunuu moni lenā folafolaga pe afai e lē soifua e faavavau le Atua? E na o le “Tupu o le vavau” e mafai ona faataunuuina lenā folafolaga.—1 Timoteo 1:17.
Po o E Talisapaia Meaalofa Mai i le Atua?
6 O le vai e mafai ona avea ma mea malō, suāvaia pe liuausa foʻi e fua i le vevela. Pe ana faapea e matuā latalata lava le lalolagi i le lā, o le a matuā vevela lava le vai ma o le a leai se mea e ola ai. Pe ana faapea foʻi e fai sina mamao ese mai o le lalolagi i le lā, o le a toʻa uma vai e avea ma aisa ma o le a lilofia le lalolagi i le aisa. Peitaʻi, ona na tuu e Ieova le lalolagi i lona tulaga talafeagai o loo iai nei, ua mafai la e le faataamilosaga o le vai i le lalolagi ona faatumauina le ola. O le vevela o le lā e māfua ai ona velasia vai mai i le suāsami ma vai i le fogāeleele, ona liuausa lea ma avea ma ao. I tausaga taʻitasi, e sili atu le tele o le vai e mitiia e le lā nai lo o vai e maua i vaituloto uma o le lalolagi. O lenei vai e iai lava i le ʻea i le pe ā ma le sefulu aso a o leʻi toʻulu mai o se timu po o ni aisa. O le a toe foʻi le vai i le sami po o isi nofoaga e tafe i ai le vai ma toe faaauau le faataamilosaga. O le maopoopo ma le sologa lelei o le faataamilosaga o le vai, ua faamaonia ai o Ieova e atamai ma e malosi foʻi.—Iopu 36:27, 28; Fai. 1:7.
Ia Faamalosia Pea Lou Faamoemoe o se Kerisiano
16 O lo tatou faamoemoe o le ola e faavavau, o se meaalofa tautele mai i le Atua. E tatou te tulimataʻia se lumanaʻi matagofie lea e mautinoa o le a tupu. E pei lo tatou faamoemoe o se taula, lea e faatumauina i tatou ina ia mafai ona onosaia tofotofoga, sauāga, ma e oo lava i le oti. E pei foʻi lo tatou faamoemoe o se puloutau, lea e puipuia o tatou mafaufau e teena ai le mea sesē ae faia le mea saʻo. O lo tatou faamoemoe lea e faavae i le Tusi Paia, ua tatou vavalalata atu ai i le Atua ma ua faaalia mai ai lona alofa loloto iā i tatou. E tatou te mauaina le tele o aogā, a o tatou taumafai e faamalosia pea lo tatou faamoemoe.
Saʻiliʻiliga mo ʻOa Faaleagaga
it-1 492
Fesootaʻiga
I taimi o le Tusi Paia, e tele auala na faaoo atu ai faamatalaga mai i lea tagata i lea tagata. O le tele lava o taimi e tuugutu tala o mea e tutupu i se vaipanoa, po o tala foʻi mai i isi atunuu. (2Sa 3:17, 19; Iop 37:20) Pe a mālōlō se ʻaumalaga i se aai po o se nofoaga e toe maua mai ai vai, meaʻai, po o isi mea e manaʻomia, e latou te taʻuina atu tala o mea na tutupu mai i isi nofoaga. Ona o le tulaga e tū ai Palesitina, e faigofie ai ona uia e ni ʻaumalaga, pe a femalagaaʻi i le vā o Asia, Aferika ma Europa, po o nisi foʻi nofoaga mamao. E faigofie la ona maua e tagata e nonofo i Palesitina, faamatalaga ma tala o mea e tutupu mai i atunuu mamao. E masani ona maua tala o mea e tutupu i se vaipanoa po o tala mai i isi atunuu i nofoaga faitele e pei o le maketi.
IANUARI 22-28
ʻOA TAUTELE MAI I LE AFIOGA A LE ATUA | IOPU 38-39
Po o E Faaalu se Taimi e Mātau ai Mea o le Foafoaga?
Pe E te Lotomalie e Faatalitali iā Ieova?
7 O loo faamatalaina i le Tusi Paia le auala na foafoaina ai e Ieova le lalolagi. Na ia “fuaina” “lona faavae” ma faataatia ona “maa tulimanu.” (Iopu 38:5, 6) Na faaalu foʻi e Ieova se taimi e iloilo ai ana galuega. (Kene. 1:10, 12) Seʻi faata le fiafia tele o agelu a o vaavaai atu i le faasolosolo ona tino mai o galuega mataʻina o le foafoaga a Ieova. E mautinoa na matuā fiafia lava agelu! E tatou te iloa le moni o lenā manatu, auā e iai le taimi na ʻalalaga ai i viiga’ atalii o le Atua. (Iopu 38:7) O le ā e tatou te aʻoaʻoina mai ai? E faitau afe tausaga na faia ai e Ieova ana galuega mataʻina o le foafoaga, ae ina ua iloilo e Ieova mea uma na ia foafoaina ma le faaeteete, ona ia fetalai lea, ua “matuā lelei lava.”—Kene. 1:31.
O le Toetū ua Faaalia ai le Alofa, Atamai ma le Onosaʻi o le Atua
2 Muamua, na foafoaina e Ieova lona Alo e la te galulue faatasi. O lea “na foafoaina isi mea uma” e aofia ai le faitau miliona o foafoaga agaga atamamai e ala mai i lenā Alo ulumatua. (Kolo. 1:16) Na olioli Iesu i le avanoa na la galulue faatasi ai ma lona Tamā. (Faata. 8:30) Na iai foʻi māfuaaga na olioli ai atalii agaga o le Atua. Na latou vaavaai atu a o foafoaina e Ieova ma lana Tufuga Poto o Iesu le lagi ma le lalolagi. O le ā na faaalia e agelu? Na latou “alalaga faatasi ma le olioli” ina ua foafoaina le lalolagi. E mautinoa na latou alalaga pea ma le olioli i aso taʻitasi o galuega o le foafoaga a Ieova, e aofia ai lana foafoaga mataʻina mulimuli o le tagata. (Iopu 38:7; Faata. 8:31) O nei foafoaga uma ua atagia mai ai le alofa ma le atamai o Ieova.—Sala. 104:24; Roma 1:20.
Aʻoaʻo Atili e Uiga iā Ieova Mai i Lana Foafoaga
8 E tatau ona tatou maufaatuatuaina Ieova. Na fesoasoani Ieova iā Iopu ina ia faamalosia atili lona maufaatuatuaina o ia. (Iopu 32:2; 40:6-8) I le la talanoaga ma Iopu, na faailoa atu ai e Ieova le tele o mea o le foafoaga e aofia ai fetu, o ao, ma le emo o uila. Na fetalai foʻi Ieova e faatatau i manu, e aofia ai le povi poʻa o le vao ma le solofanua. (Iopu 38:32-35; 39:9, 19, 20) O na mea uma ua faamaonia ai le ofoofogia o le mana o le Atua, lona alofa, ma le tele o lona atamai. Maʻeu le aogā o lenei talanoaga, ona na faamalosia ai le maufaatuatuaina e Iopu o Ieova i lenā taimi nai lo o se isi lava taimi! (Iopu 42:1-6) O lea la, pe a tatou mātauina mea o le foafoaga, ua faamanatu mai ai e sili atu ona atamai ma malosi Ieova nai lo o i tatou. E mafai foʻi ona Ia faamuta o tatou faafitauli uma. E fesoasoani lenā mea moni e faamalosia ai lo tatou maufaatuatuaina o ia.
Saʻiliʻiliga mo ʻOa Faaleagaga
it-2 222
Faitulafono
O Ieova o le Faitulafono. E na o Ieova le Faitulafono moni i le aoao o mea. Na ia faia tulafono o loo pulea ai mea e leai ni ola (Iop 38:4-38; Sl 104:5-19), ma manu eseese uma. (Iop 39:1-30) E pulea foʻi tagata e tulafono a Ieova, ona na ia foafoaina i latou. Talu ai na faia le tagata ma le tomai e mafaufau ai, faia ai filifiliga, ma faamalieina ona manaʻoga faaleagaga, e pulea foʻi la o ia e tulafono tauamio a le Atua. (Ro 12:1; 1Ko 2:14-16) E lē gata i lea, e pulea foʻi foafoaga agaga e pei o agelu e tulafono a le Atua.—Sl 103:20; 2Pe 2:4, 11.
E tumau e faavavau tulafono o le natura a Ieova. (Ie 33:20, 21) O le maufaatuatuaina o tulafono a Ieova o loo pulea ai le vateatea, ua mafai ai e saienitisi ona fua le saoasaoa o le faataamilosaga o le masina, paneta, ma isi mea i le vateatea. Pe a taumafai se tasi e suia tulafono o le natura, e lē iʻu lelei. E faapena foʻi tulafono tauamio a le Atua. E lē mafai ona suia, ma e lē iʻu lelei se tagata e na te solia. E ui e lē vave ona faasalaina se tasi e lē usitaʻia tulafono a le Atua, ae e tatau ona tatou usitaʻia na tulafono, e pei ona tatou usitaʻia o tulafono o le natura. “E lē ulagia le Atua. Auā o le mea e lūlūina e le tagata, o le mea lava lea e na te seleseleina mai.”—Ka 6:7; 1Ti 5:24.
IANUARI 29–FEPUARI 4
ʻOA TAUTELE MAI I LE AFIOGA A LE ATUA | IOPU 40-42
Lesona e Aʻoaʻoina Mai i Mea na Tutupu iā Iopu
“Po o Ai na te Iloa le Finagalo o Ieova?”
4 A o manatunatu loloto i mea ua faia e Ieova, e ao ona tatou ʻalofia le uiga lē lelei o le faamasino o le Atua e tusa ai o tapulaa a tagata. O loo atagia mai lenei uiga lē lelei i fetalaiga a Ieova o loo i le Salamo 50:21: “Na e mafaufau faapea o le a ou pei o oe.” Na taʻua e se tasi tagata atamai o le Tusi Paia i le silia i le 175 tausaga ua mavae: “E masani ona faamasino e tagata le Atua e tusa ai ma o latou lava manatu, ma mafaufau o loo pulea le Atua i tulafono ia e tatau foʻi ona usitaʻia e tagata.”
5 E tatau ona tatou faaeteete e aua neʻi manatu iā Ieova e tusa ma a tatou lava tapulaa ma faanaunauga. Aiseā e tāua ai lenei mea? Auā a o tatou suʻesuʻeina le Tusi Paia, atonu o nisi o mea na faia e Ieova e foliga mai e lē saʻo aʻiaʻi i o tatou mafaufau lē lelei atoatoa. O le manatu lenā o tagata Isaraelu anamua ma sesē ai la latou faaiʻuga, e tusa ai o le auala na feagai ai Ieova ma i latou. Seʻi mātau le fetalaiga a Ieova iā i latou: “Ona outou faapea ane lea: ʻE lē tonu ala o Ieova.’ Faamolemole, le aiga o Isaraelu e, inā faalogo mai ia. Pe e lē tonu ea oʻu ala? Pe e lē o outou ea ua lē tonu o outou ala?”—Eseki. 18:25.
6 O se tasi mea e fesoasoani iā i tatou e ʻalofia ai le faamasino o Ieova e tusa ai ma a tatou lava tapulaa, o le iloa lea e gata mai lo tatou iloa ma o nisi taimi e sesē ai o tatou manatu. O le lesona lenei sa tatau ona iloa e Iopu. A o feagai Iopu ma puapuaga, na lotovaivai o ia ma taulaʻi atu ona manatu iā te ia lava. Na galo iā te ia mataupu e sili ona tāua. Ae na fesoasoani ma le alofa Ieova iā te ia ina ia faalautele ona manatu. Na faamatilatila e Ieova le gata mai o le iloa o Iopu, e ala i le fesiligia o ia i fesili e silia i le 70, ia sa lē mafai ona ia taliina. Na tali atu ma le lotomaulalo Iopu ma suia lona manatu.—Faitau le Iopu 42:1-6.
Ia E Taulaʻi Atu Pea i le Mataupu e Sili Ona Tāua
12 Pe sa soona inainā Ieova i le avatuina o na fautuaga tuusaʻo, ae o lea faatoʻā uma ona feagai Iopu ma tofotofoga e sili ona ogaoga? E leai, ma e leʻi mafaufau foʻi faapena Iopu. E ui i mafatiaga o Iopu, ae na mulimuli ane ia faaalia le lotofaafetai. Na faapea atu o ia: ʻOu te toe faafoʻi mai aʻu upu, ma ua ou salamō i le efuefu ma le lefulefu.’ O le aafiaga lelei lenā o fautuaga tuusaʻo ma faalaeiau a Ieova. (Iopu 42:1-6) Muamua atu, na maua ai foʻi e Iopu ni faasaʻoga mai iā Eliu, o lē e talavou ifo. (Iopu 32:5-10) Ina ua tali atu Iopu i le aʻoaʻiga a le Atua ma toe faasaʻo ona manatu, sa faailoa atu e Ieova i isi lona fiafia iā Iopu ona o le faamaoni e ui i tofotofoga.—Iopu 42:7, 8.
“Ia Faamoemoe Atu iā Ieova”
17 O Iopu o se tasi o auauna a Ieova, na tumau ona lototele ma faamalosi i taimi o tofotofoga ogaoga. Na taʻua e le aposetolo o Paulo i lana tusi i Eperu isi e pei o Iopu, o “se vaega e toʻatele o molimau.” (Epe. 12:1) Na feagai uma i latou ma tofotofoga ogaoga, ae na latou atiaʻe ni talaaga mataʻina o le faamaoni iā Ieova. (Epe. 11:36-40) Pe na aogā lo latou tumau ma a latou galuega mamafa? Na matuā aogā lava! Na latou faamoemoe atu pea iā Ieova, e ui e leʻi iai se folafolaga a le Atua na latou vāai o faataunuuina i o latou olaga. Na mautinoa e lenā vaega e toʻatele o molimau, ua latou maua le finagalo malie o Ieova. O lea, na latou mautinoa ai o le a latou vaaia le faataunuuina o ana folafolaga. (Epe. 11:4, 5) O a latou faaaʻoaʻoga e faamalosia ai pea lo tatou faamoemoe iā Ieova.
18 I aso nei, ua tatou ola i se lalolagi e sili ona leaga. (2 Timo. 3:13) E lē o muta taumafaiga a Satani e tofotofoina tagata o le Atua. Po o ā lava luʻi e tatou te fesagaʻia i le lumanaʻi, ia maumauaʻi pea e galulue mamafa mo Ieova, ma ia mautinoa “ua tuu atu lo tatou faamoemoe i le Atua soifua.” (1 Timo. 4:10) Ia manatua, o le taui na avatu e le Atua iā Iopu na faamaonia ai “e alofa faapelepele ma alofa mutimutivale Ieova.” (Iako. 5:11) Tau ina ia tatou tumau faamaoni foʻi iā Ieova, ma ia mautinoa o le a ia tauia “ē e matuā saʻili iā te ia.”—Faitau le Eperu 11:6.
Saʻiliʻiliga mo ʻOa Faaleagaga
it-2 808
Tauemuga
O Iopu o se tagata amiotonu, na tumau ma le faamaoni e ui i tauemuga. Ae na sesē lana vaai ma ia faia ai se faaiʻuga sesē, lea na mulimuli ane faasaʻoina ai o ia. Na faapea mai Eliu e faatatau iā Iopu: “O ai se tagata e pei o Iopu, o lē ua inu i tauemuga e pei o se vai?” (Iop 34:7) Na soona uaʻi atu Iopu iā te ia lava, ma ia faasilisilia ai lana amiotonu nai lo o le amiotonu a le Atua. (Iop 35:2; 36:24) Ina ua tauemu atu ana “aumea” e toʻatolu, na vaai i ai Iopu o loo tauemu iā te ia nai lo o le Atua. O lea, na pei ai o ia o se tagata ua lotomalie e tauemua ma fiafia i ai, e pei o loo ia inuina ma le fiafia se vai. Mulimuli ane, na faamatala auʻiliʻili atu e le Atua iā Iopu, o nei tagata tauemu, na latou tautatala ma le lē faamaoni e uiga i le Atua. (Iop 42:7) Ina ua talosaga atu tagata Isaraelu mo se tupu, na taʻu atu foʻi e Ieova i le perofeta o Samuelu: “E lē o oe ua latou tetee i ai, a o aʻu ua latou teena mai i le avea ma o latou tupu.” (1Sa 8:7) Na fetalai atu foʻi Iesu i ona soo: “O le a inosia foʻi outou e nuu uma [e lē ona o outou, ae] ona o loʻu igoa.” (Mat 24:9) O le manatua o na mea, o le a mafai ai e Kerisiano ona onosaia tauemuga ma se vaaiga saʻo, ma o le a latou maua ai le taui ona o lo latou tumau.—Lu 6:22, 23.
FEPUARI 5-11
ʻOA TAUTELE MAI I LE AFIOGA A LE ATUA | SALAMO 1-4
Ia Lagolagoina le Malo o le Atua
“Ou te Lūlūina Atunuu Uma”
8 O le ā le tali mai a tagata i lenā feʻau? O le toʻatele o tagata na teena lenā feʻau. (Faitau le Salamo 2:1-3.) Na feita atunuu ma na latou teena le Tupu tofia a Ieova. E latou te manatu e lē o se “tala lelei” le feʻau o le Malo o loo tatou talaʻia. O nisi malo ua latou faasāina le galuega talaʻi. E ui o loo faapea mai nisi o taʻitaʻi o nei malo o loo auauna i le Atua, ae e latou te lē mananaʻo e tuuese la latou pule ae amanaʻia le pule a le Atua. I aso o Iesu na teena o ia e pule o malo, ma i aso nei ua teena foʻi o ia e pule o malo o le Tupu Faauuina a Ieova e ala i lo latou sauāina o ona soo faamaoni.—Galu. 4:25-28.
Tausisia lo Tatou Solitū i se Lalolagi Fevaevaeaʻi
11 Manaʻo tele i meafaitino. Pe a tatou matuā faatāuaina tupe ma a tatou meafaitino, e ono faigatā ai ona tatou solitū. Ina ua mavae le 1970, na tuua ai e le toʻatele o Molimau i Malawi a latou meafaitino, ona sa mumusu e aufaatasi atu i se vaega faaupufai. E faanoanoa ona e leʻi mafai e nisi ona tuua o latou olaga sologa lelei. Na manatua e se tuafafine e igoa iā Ruth e faapea: “O nisi na matou sulufaʻi faatasi i nofoaga o tagata sulufaʻi, na mulimuli ane aufaatasi atu i le vaega faaupufai, ma toe foʻi atu i o latou aiga ona na mumusu i se olaga faigatā i le nofoaga o tagata sulufaʻi.” Ae e lē faapena le toʻatele o tagata o le Atua. E latou te tausisi pea i le solitū e tusa lava pe itiiti se tupe pe aveesea uma foʻi a latou meafaitino.—Epe. 10:34.
Saʻiliʻiliga mo ʻOa Faaleagaga
it-1 425
Aputi o Saito
O le aputi, o paʻu manifinifi lea e ufiufi ai fatu, e pei o fatu karite ma fatu saito. E ui na faaaogā e le Tusi Paia aputi i se uiga faafaatusa, ae ua faailoa mai ai foʻi le auala masani na soli ai fatu i aso anamua ina ia aveese ai aputi. Pe a uma le seleselega lea e aveese ai aputi o loo ufiufi ai fatu, o le a lē toe aogā na aputi. Ua talafeagai ona faaaogā faafaatusa e faaata mai ai se mea e māmā, e lē aogā, e lē manaʻomia, po o se mea e tatau ona aveese mai i se mea lelei, ma liaʻi ese.
Muamua, e soli fatu ina ia aveese ai aputi, ona asu lea i luga o fatu ina ia lelea ese ai aputi po o le otaota i le matagi, e pei o se pefu. (Tagaʻi i le WINNOWING.) Ua talafeagai ona faaata mai e lenei mea le auala o le a aveesea ai e Ieova le Atua mai i ona tagata ē ua liliuese mai i le upu moni, ma faaumatia tagata amioleaga ma malo e tetee i lana puleaga. (Iop 21:18; Sl 1:4; 35:5; Isa 17:13; 29:5; 41:15; Ho 13:3) O le a nutililii e le Malo o le Atua ona fili, ma o lea a pei i latou o aputi e faigofie ona lelea i le matagi.—Ta 2:35.
E masani ona faaputu ma susunu aputi ina neʻi toe lelea atu ma faaleagaina ai faaputuga o fatu. I se tulaga talitutusa, na valoia e Ioane le papatiso le faaumatiaga aʻiaʻi o tagata o lotu sesē. O le a aoaoina saito e Lē e soliina fatu, o Iesu Keriso, “ae o otaota o saito, e na te susunuina i le afi e lē mafai ona tineia.”—Mat 3:7-12; Lu 3:17; Tagaʻi i le THRESHING.
FEPUARI 12-18
ʻOA TAUTELE MAI I LE AFIOGA A LE ATUA | SALAMO 5-7
Tumau Faamaoni e ui i Mea e Faia e Isi
Le Auala e Faamalosia ai i Tatou e le Tusi Paia
7 Pe na faatigā atu sau uō po o se isi o ou tauaiga iā te oe? Afai o lea, o le a aogā la iā te oe le iloiloina o le tala e faatatau iā Apisaloma le atalii o le tupu o Tavita, lea na tetee i lona tamā ma foua le malo.—2 Samu. 15:5-14, 31; 18:6-14.
8 (1) Tatalo. Ae e te leʻi faitauina lenā tala, ia faailoa iā Ieova ou faalogona e faatatau i le auala na faileagaina ai oe. (Sala. 6:6-9) Ia faapatino au tatalo. Ia talosaga iā Ieova ia e iloa mataupu silisili e taʻitaʻia ai oe, a o e taumafai e fesagaʻia lenā luʻi faigatā.
Ia Faamautinoa o Mea ua E Talitonu i ai o le Upu Moni
3 E iai isi mea e tatau ona faavae aʻe ai lo tatou faatuatua nai lo o le alofa faa-Kerisiano e faaalia e tagata o le Atua. Aiseā? Seʻi faapea ua faia e se uso talitonu, o se toeaina po o se paeonia se agasala matuiā. Pe faapea foʻi ua faatigā se uso po o se tuafafine iā te oe. Pe atonu foʻi ua faapea mai se tasi ua liliu ese mai i le upu moni, e lē o le upu moni lenei. Pe a tutupu nei mea, po o le a e tausuai ai ma e lē toe auauna ai iā Ieova? O le lesona: Pe afai e pau le māfuaaga e te faatuatua ai i le Atua ona o le auala e gaoioi ai isi tagata nai lo o le iai o sau oe lava faiā ma Ieova, o le a lē malosi la lou faatuatua. O ou faalogona e faatatau iā Ieova ma ona tagata, e mafai ona fesoasoani e atiaʻe ai lou faatuatua. Peitaʻi, e tāua tele lou toʻaga e suʻesuʻe le Tusi Paia, malamalama i mea ua e aʻoaʻoina ma fai saʻiliʻiliga, ina ia faamaonia ai ua e aʻoaʻoina le upu moni e faatatau iā Ieova.—Roma 12:2.
4 Na fetalai Iesu e iai nisi o le a latou talia “ma le olioli” le upu moni, ae e faavaivaia lo latou faatuatua pe a tofotofoina. (Faitau le Mataio 13:3-6, 20, 21.) Atonu e latou te leʻi iloa o le mulimuli iā Iesu e aofia ai luʻi ma faigatā. (Mata. 16:24) Pe atonu foʻi na latou manatu o le avea ai ma Kerisiano o le a latou ola ai i se olaga e aunoa ma faafitauli, e na o faamanuiaga ae e leai ni luʻi. Peitaʻi, i lenei lalolagi lē lelei atoatoa, e iai luʻi. E iai taimi e suia ai le tulaga o mea, ma faaitiitia ai lo tatou olioli.—Sala. 6:6; Fai. 9:11.
Saʻiliʻiliga mo ʻOa Faaleagaga
it-1 995
Tuugamau
I le Roma 3:13, na sii mai ai e le aposetolo o Paulo le Salamo 5:9 lea o loo faatusaina ai faaʻī o tagata amioleaga ma taufaaʻoleʻole i “se tuugamau ua faamaga.” E pei o se tuugamau e tuu iai se tino oti ma pala ai, e faapena foʻi faaʻī o tagata amioleaga, e sau ai tala pepelo ma upu leaga.—Faatusatusa i le Mat 15:18-20.
FEPUARI 19-25
ʻOA TAUTELE MAI I LE AFIOGA A LE ATUA | SALAMO 8-10
“Ieova e, Ou te Vivii Atu iā te Oe”!
Ia Faatāua Lou Tulaga i le Aiga o Ieova
6 Na saunia e Ieova se lalolagi matagofie e tatou te nonofo ai. A o leʻi taitai foafoaina le uluaʻi tagata, na saunia e Ieova le lalolagi ina ia mafai ona ola fiafia ai. (Iopu 38:4-6; Iere. 10:12) Talu ai e magafagafa ma agalelei Ieova, na ia saunia ai le anoanoaʻi o mea lelei e tatou te maua ai le fiafia. (Sala. 104:14, 15, 24) Na faaalu e le Atua se taimi e iloilo ai ana galuega o le foafoaga, ma na silasila atu i ai ua lelei lava. (Kene. 1:10, 12, 31) Na faamamaluina foʻi e Ieova le tagata ina ua ia tuuina atu i ai le “pule” i ana galuega ofoofogia uma i le lalolagi. (Sala. 8:6) O le fuafuaga a le Atua mo tagata lelei atoatoa, ia olioli i le tausia o ana galuega matagofie e faavavau. Pe e masani ona e faafetai atu iā Ieova mo lenā fuafuaga matagofie?
Po o E Talisapaia Meaalofa Mai i le Atua?
10 O se tasi o auala e faaalia ai lo tatou talisapaia o le meaalofa o le tautala, o le faamatala atu lea o o tatou talitonuga e faatatau i le Atua iā i latou e taumānatu pe aiseā e tatou te lē taliaina ai le aʻoaʻoga o le evolusione. (Sala. 9:1; 1 Pete. 3:15) O i latou e faaauilumaina lenā talitonuga e latou te mananaʻo ia tatou talitonu, na teʻi lava ua iai le lalolagi ma le ola. E mafai ona tatou lagolagoina lo tatou Tamā i le lagi e ala i le faaaogā o le Tusi Paia, ma nisi o manatu na tatou talanoaina i lenei mataupu. E mafai foʻi ona tatou faamatala atu iā i latou e fia faalogo le māfuaaga ua tatou mautinoa ai o Ieova o Lē na foafoaina le lagi ma le lalolagi.—Sala. 102:25; Isa. 40:25, 26.
Po o Fai Oe ma ʻFaaaʻoaʻoga i le Tautala’?
13 Ia pese mai le loto. O le māfuaaga e sili ona tāua e tatou te pepese ai i sauniga, ina ia vivii ai iā Ieova. E manatu le tuafafine o Sara e lē o ia o se tagata e lelei tele i le pese, peitaʻi e manaʻo e pese ina ia vivii ai iā Ieova. Ina ia faia faapea, na fesoasoani iā te ia le faataʻitaʻi o le usuina o pese i le fale, e pei lava ona sauniuni mo isi vaega o le sauniga. E na te faataʻitaʻi le usuina o pese, ma taumafai e iloa le fesootaʻiga o upu o le pese ma le mataupu o le a talanoaina i le sauniga. Na ia faapea mai: “O le faia faapea, na fesoasoani ai iā te aʻu ina ia uaʻi atu i upu o le pese ae lē o loʻu leo.”
Saʻiliʻiliga mo ʻOa Faaleagaga
it-1 832
Tamatamaʻilima
I se uiga faafaatusa, o loo faamatalaina ai le faia e le Atua o galuega i ona “tamatamaʻilima,” e pei o le tusiaina o Tulafono e Sefulu i papamaa (Eso 31:18, fpl; Te 9:10), faia o vavega (Eso 8:18, 19), ma le foafoaina o le lagi (Sl 8:3). O tamatamaʻilima o le Atua lea na ia faia ai galuega o le foafoaga, e faasino atu i lona agaga paia po o lona mana galue, e pei ona taʻua i le tala o le foafoaga o loo i le Kenese, lea o loo faapea mai na fegaoioiaʻi le mana galue o le Atua i luga o vai loloto. (Ke 1:2) Ae ua fesoasoani mai Tusitusiga Paia Eleni i le auala e tatou te malamalama atili ai i le faaaogāina faafaatusa o lenei faaupuga. O loo ta’ua e Mataio na tutuli e Iesu temoni ona o le ʻagaga paia o le Atua’, ae na faapea mai Luka ona o le ʻtamatamaʻilima o le Atua.’—Mat 12:28; Lu 11:20, fpl.
FEPUARI 26–MATI 3
ʻOA TAUTELE MAI I LE AFIOGA A LE ATUA | SALAMO 11-15
Ia Faaata o Loo E Iai i le Lalolagi Fou Filemu a le Atua
Manatu Tāua Mai le Vaega Muamua o le Tusi o Salamo
11:3—O ā faavae ua fulisia? O faavae nei o loo faalagolago atu i ai le sosaiete o tagata—tulafono, poloaʻiga, ma faamasinoga tonu. Pe afai e lē maopoopo faavae nei, ona malepe foʻi lea o le olaga masani o tagata, ma leai foʻi se faamasinoga tonu. Pe a oo mai na tulaga, e tatau i “le tagata amiotonu” ona tuu atu atoatoa lona faatuatuaga i le Atua.—Salamo 11:4-7.
Pe e Mafai Ona Iai se Lalolagi e Aunoa ma le Sauā?
Ua folafola mai i le Tusi Paia ua lē o toe umi ae aveesea le sauā i le lalolagi. Ua toeitiiti ona fesagaʻia lea e lenei lalolagi sauā le ʻaso faamasino o le Atua ma le faaumatiaga o tagata faalēmataʻu.’ (2 Peteru 3:5-7) O le a lē toe mafatia nisi ona o tagata sauā. E faapefea ona tatou mautinoa e finagalo Ieova e faalaa mai ma tafiesea faiga sauā?
Ua taʻua i le Salamo 11:5 ʻe inosia lava e le Atua le tagata e fiafia i le faasauā.’ E fiafia Lē na foafoaina mea i le filemu ma le amiotonu. (Salamo 33:5; 37:28) O le pogai lea e lē faavavau ai ona ia faatagaina tagata sauā.
Po o E Lotomalie e Faatalitali ma le Onosaʻi?
15 Aiseā na lotomalie ai Tavita e faatalitali ma le onosaʻi? Ua ia taʻu mai iā i tatou le tali i le salamo lea e faafā ona ia fesili ai: “O le ā le umi?” Ua ia faapea mai: “A o aʻu nei, ou te faatuatua atu i lou alofa faamaoni; ia olioli foʻi loʻu loto i lau faaolataga. Ou te pese atu iā Ieova, auā ua ia agalelei mai iā te aʻu.” (Sala. 13:5, 6) Na maufaatuatuaina e Tavita le alofa faamaoni o Ieova. Na ia tulimataʻia ma le olioli le taimi o le a laveaʻiina ai o ia, ma manatunatu i auala na agalelei ai Ieova iā te ia. Ioe, na lagona e Tavita le matuā faamanuiaina o ia ona o le faatalitali ma le onosaʻi.
Ua Faataunuu e le Malo le Finagalo o le Atua i le Lalolagi
16 Saogalemu. E faamāfanafanaloto le vaaia moni o le faataunuuga tele o vaaiga matagofie o loo taʻua i le Isaia 11:6-9. O le a maua e tane, fafine ma tamaiti le saogalemu i so o se vaipanoa e latou te iai i le lalolagi. O le a leai ni meaola po o ni tagata o le a avea ma faamataʻuga i isi. Seʻi faaāta le taimi o le a avea ai lenei lalolagi atoa ma ou aiga, o le a e taʻele i vaitafe, vaituloto ma le sami. O le a e faimalaga i atumauga, ma fealuaʻi ma le saogalemu i laufanua lafulemu. O le a e lē popole foʻi pe a oo i le pō. O le a faataunuuina le Esekielu 34:25, e faatatau i le mafai e tagata o le Atua ona “nonofo i le toafa ma le saogalemu ma momoe i le vaomatua.”
Saʻiliʻiliga mo ʻOa Faaleagaga
Po ua Liliuina Oe?
12 E faanoanoa ona ua siʻomia le lalolagi i aso nei i tagata e pei ona taʻua e Paulo. Ua latou manatu o se faiga tuai le mulimuli i taʻiala ma tapulaa, ma e lē tatau ona faamalosia isi e mulimuli i ai. Ua faataga foʻi e le toʻatele o faiaʻoga ma mātua a latou fanau e fai so o se mea e mananaʻo i ai. Ua aʻoaʻoina foʻi fanau e iai le aiā i le tagata e filifili ai le saʻo ma le sesē. Ua manatu foʻi le toʻatele o tagata lotu e fai so o se mea latou te manatu e fetaui, e aunoa ma le usitaʻi i le Atua ma ana tulafono. (Sala. 14:1) E mataʻutia tele nei manatu mo Kerisiano. A tatou lē mataala, e mafai ona tatou lē toe mulimuli ai i faatulagaga mai le faalapotopotoga a le Atua, ma faitio i mea e tatou te lē fiafia iai. Pe atonu e tatou te lē talia atoatoa foʻi fautuaga faale-Tusi Paia e faatatau i faafiafiaga, le faaaogāina o le Initaneti ma le tuliloaina o aʻoaʻoga maualuluga.