Soifuaga o Iesu ma lana Faiva

Filifilia O Ona Aposetolo

Pe TUSA o le tausaga ma le afa talu ona faailoa mai e Ioane le Papatiso faapea o Iesu o le Tamai Mamoe a le Atua, a e amata ai loa le faiva lautele a Iesu. I lena taimi o Aneterea, Simona Peteru, Ioane ma atonu o Iakopo foʻi (le uso o Ioane) o Filipo foʻi ma Natanielu (sa taʻua o Patolomaio), ua uma ona avea ma uluaʻi soʻo. Mulimuli ane, e toatele isi na auai faatasi ma i latou e mulimuli atu ia Keriso.

Ua oʻo nei i le taimi e filifilia ai e Iesu ona aposetolo. O i latou ia o le a avea ma ana aumea vavalalata o le a tuuina atu i ai aʻoaʻoga faapitoa. Peitaʻi a o leʻi filifilia i latou, sa maliu atu Iesu i le mauga ma faaalu ai le po atou i le tatalo, atonu sa ole atu i le Atua mo le poto ma le faamanuiaga. Ina ua oʻo mai le ao, sa i valaaulia ona soʻo, ma filifilia ai mai ia i latou le toa 12. Peitaʻi, talu ai sa faaauau pea ona avea o i latou ma tagata aʻoga a Iesu, o lea na taʻua ai pea i latou o soʻo.

O le toaono na filifilia e Iesu ua taʻua i luga, o i latou ia na avea o ona uluaʻi soʻo. O Mataio na valaauina e Iesu mai lona ofisa o lafoga, na filifilia. O le isi toalima na filifilia o Iuta (o lea na taʻua o Tataio), Iuta le Sekara, Simona o le Kanana, Toma, ma Iakopo le atalii o Alefaio. O le Iakopo lea na taʻua foʻi o Iakopo lē itiiti, atonu e faaesea ai o ia ma le isi aposetolo o Iakopo.

I lea lava taimi ua loa ona faatasitasi Iesu ma le 12 lenei, ma ua ia silafia lelei foʻi i latou. O a mea moni, o nisi o i latou o ona lava aiga. O Iakopo ma lona uso o Ioane sa faamaonia o tausoga o Iesu. Ma atonu o Alefaio o le uso o Iosefa, le tamāfai o Iesu. O le atalii la o Alefaio, le aposetolo o Iakopo, o se tausoga foʻi o Iesu.

O le mea moni, o Iesu, sa leai se faafitauli i le manatuaina o igoa o ona aposetolo. Peitaʻi, e te manatuaina i latou? Ia, tau ina e manatua e toalua e igoa ia Simona, toalua e igoa ia Iakopo, ma e toalua e igoa ia Iuta, ma o Simona e i ai lona uso o Ioane. O le ki lena i le manatuaina o aposetolo e toavalu. o le isi toafa e aofia ai le ao lafoga (Mataio), ma le isi na masalosalo mulimuli (o Toma), ma le isi na valaaulia mai lalo le laau (Natanielu), ma lana uo o Filipo.

O le sefulu tasi e mai Kalilaia, le nuu o le aiga o Iesu. O Natanielu e sau mai Kana. O Filipo, Peteru ma Aneterea e o mai mai Petesaita. Peitaʻi, na toe o atu Peteru ma Aneterea i Kapanaumi i le mea e foliga mai na nofo ai muamua Mataio. O Iakopo ma Ioane sa fai faiva faapisinisi ma e foliga mai sa nonofo i Kapanaumi pe o le nonofo latalata foʻi i ai. E foliga mai o Iuta le Sekara, o lē na mulimuli ane faalata Iesu, e na o ia le aposetolo mai Iutaia. Mareko 3:13-19; Luka 6:12-16.

◆ O ai aposetolo atonu o auaiga o Iesu?

◆ O ai aposetolo o Iesu, ma e faapefea ona e manatua o latou igoa?

◆ O fea oganuu sa o mai ai le auaposetolo?

[Ata i le itulau 9]

A o leʻi filifilia ona aposetolo e 12, sa faaaluina e Iesu le po atoa e tatalo ai ia Ieova