Soifuaga o Iesu ma Lana Faiva

O Le Lauga Sili Ona Taʻutaʻua Na Faia

O LE vaaiga o se tasi lea o mea e sili ona lē ma faagaloina i loto i le talatuufasolo o le Tusi Paia: Sa nofo Iesu i luga o se auvae mauga, ma fai atu lana Lauga taʻutaʻua i luga o le Mauga. O le nofoaga e latalata ane i le Sami Kalilaia, atonu pe lē mamao ma Kapanaumi. Sa tatalo Iesu i le po atoa i le Atua, ma mulimuli ane i le taeao na ia fiifili ai le toa 12 o ona soʻo e avea ma aposeolo. O lea, faatasi ai ma i latou uma lava, ona maliu atu lea o ia i le mea laugatasi i luga o le auvae mauga.

Atonu ua e manatu nei la faapea ua vaivai tele Iesu ma ua manao i sina moe. A e ua o mai le motu o tagata e toatele, o nisi e ō mai mai Iutaia ma Ierusalema, e 60 i le 70 maila (100 i le 110km) le mamao. O isi e ō mai mai nofoaga tumatafaga o Turo ma le itu i Matu o Saitonu. Ua latou ō mai e faalogologo ia Iesu ma ia faamaloloina o latou maʻi. E i ai foʻi tagata ua faalavelaveina e temoni.

A o maliu mai i lalo Iesu, ua faalatalata atu tagata mamaʻi uma ina ia latou paʻi atu ia te ia, ma ua ia faamaloloina i latou uma. Mulimuli ane, ona maliu aʻe ai lea o Iesu i se mea mapuʻepuʻe i luga o le mauga. Ua ia nofo ai i lalo i ina ma amata loa ona aʻoaʻo atu i le motu o tagata o loo nonofo mai i le mea laugatasi i ona luma. Ma seʻi manatunatu i lenei mea! Ua leai nei se isi lava e toatasi o toe pagatia i se maʻi tigā i lenei faapotopotoga atoa!

Ua matuā naunau tagata e faalogo i lenei faiaʻoga o lē na faia nei vavega ofoofogia. A e peitaʻi ua fai atu e Iesu lana lauga ina ia maua faapitoa ai e ona soʻo ni aogā, o ē o loo nonofo latalata atu ia te ia. A e ina ia tatou maua foʻi e i tatou aogā, ua faamauina e Mataio ma Luka.

O faamaumauga a Mataio o le lauga pe tusa e faafā ona umi nai lo Luka. A e lē gata i lea, o vaega o faamaumauga a Mataio, ua aumaia e Luka o ni fetalaiga a Iesu i se isi taimi ese a o galue i lana faiva, e pei ona matauina pe a faatusatusa le Mataio 6:9-13 ma le Luka 11:1-4 ma le Mataio 6:25-34 ma le Luka 12:22-31. Ioe e lē o se mea e ofo ai lenei. O le mea manino lava sa aʻoaʻoina e Iesu mea lava ia e sili atu na i lo o le faatasi, ma ua filifilia ai e Luka e faia ni faamaumauga o nei aʻoaʻoga i se faatulagana e ese.

O le mea e sili ai ona tāua i le lauga a Iesu ona e le gata i le loloto o mea faaleagaga o i ai a e o le faigofie ma le manino o lona tuuina mai o nei upu moni. Sa ia aumaia ni mea e masani ona tutupu ma faaaogā mea e ono aafia ai tagata, ma o lea sa faigofie ona malamalama ai i ona manatu i latou uma sa saili se olaga sili ona lelei i ala o le Atua. I a tatou lomiga o loo mulimuli mai o le a tatou iloiloina ai nisi o ana fetalaiga. Luka 6:12-20; Mataio 5:1,2.

◆ O fea na fai ai le lauga e lē ma faagaloina a Iesu, o ai na i ai, ma o le a na tupu a o leʻi avatua le lauga?

◆ Ai se ā e lē o se mea e ofo ai faapea o faamaumauga a Luka o aʻoaʻoga i le lauga sa ese lona faatulagaga?

◆ O le ā ua sili ai ona tautele le lauga a Iesu?