O le Soifuaga o Iesu ma lana Faiva

O Ai O Fiafia Moni?

E MANANAO tagata uma ia fiafia. Ina ua iloa lenei mea, ona amata ai lea e Iesu lana Lauga i luga o le Mauga i lona faamatalaina o i latou o loo fiafia moni. E mafai ona tatou manatu i ai, ua vave ai lava ona puʻea le manatu o lana aofia matuā toatele. Ma i lea o ana uluaʻi fetalaiga e ao ona foliga mai e feteenaʻi i le toatele.

I le tuusao atu o ana fetalaiga i ona soʻo, ua amata ai e Iesu e faapea: “Amuia outou e mativa; auā e o outou le malo o le Atua. Amuia outou e fia aai nei; auā e maoona outou. Amuia outou e tagi nei; aua e featani outou. Amuia outou pe a itagia outou e tagata . . . Ia outou olioli i lea aso, ma ia outou osooso ma le fiafia; auā faauta, o i le lagi lo outou taui ua tele.”

O faamatalaga nei a Luka i le faatomuaga o le lauga a Iesu. A e tusa ai ma faamaumauga Mataio, ua faapea mai foʻi Iesu e amuia e agamalu, o ē alolofa atu, o ē loto mamā, o ē faatupuina le filemu. Ua matauina e Iesu le fiafia o i latou nei, auā e fai mo i latou le nuu, auā e alofaina mai i latou, auā latou te iloa atu le Atua, ma e taʻua foʻi i latou o atalii o le Atua.

O lea, ua faaalia mai e Iesu o i latou o ē fiafia moni, o i latou ia ua iloa o latou manaoga faaleagaga, e i ai le lagona faanoanoa ona o ō latou tulaga agasala, ma ua latou o mai ina ia iloa le Atua ma auauna ia te ia.

O lea, tusa lava pe inosia ma sauāina i latou ona o le faia o le finagalo o le Atua, latou e fiafia lava auā ua latou iloa o loo latou faafiafiaina le Atua ma o le a latou maua lana taui o le ola e faavavau.

A e peitaʻi, o le toatele o le au faalogologo a Iesu, ua pei lava o isi tagata i aso nei, ua talitonu faapea o le manuia ma le olioli i faafiafiaga e mafai ona faafiafiaina ai le tagata. Ua silafia lava e Iesu lena mea. I le aumai o se faaeseesega e ao ona ofo ai le toatele o lana au faalogologo, ua ia fetalai atu:

“Oi talofa ia te outou o e mauoa! auā ua outou maua lo outou lelei. Oi talofa ia te outou e ua maoona! auā e fia aai outou. Oi talofa ia te outou o e featani nei! auā e faanoanoa outou, ma fetagisi. Oi talofa ia te outou pe a tautala lelei tagata uma ia te outou! auā sa faapea lava ona fai e o latou tamā i perofeta pepelo.”

O le ā e uiga i ai upu a Iesu? Ai se ā e oi talofa e! ai pe a mauoa, pe saili ma le featani faafiafiaga, ma olioli i faaneeneega mai tagata? Auā afai e i ai i le tagata nei mea ma faapelepele i ai, ona punitia ai lea i tua mai lona olaga le auaunaga i le Atua, ua na o lea e mafai ona aumaia ai le fiafiaga moni. I le taimi lava e tasi, sa lē o le uiga o upu a Iesu faapea pe a na ona mativa, pe fia ʻai, ma faanoanoa o le a faafiafiaina ai se tasi. Peitaʻi e masani lava, ona o tagata faapenei atonu e tali atu i aʻoaʻoga a Iesu, ma i lea e faamanuiaina ai lava i latou i le fiafia moni.

I le isi ana lauga i ona soʻo, ua fetalai atu ai Iesu: “O outou o le masima o le lalolagi outou.” O le mea moni, e lē o le uiga o lana fetalaiga, faapea o i latou moni lava o ni masima. Na i lo o lena, o le masima e faasaoina se mea. E i ai se faaputuga tele o masima i tafatafa o le fata faitaulaga i le malumalu o Ieova, sa faaaogā e ositaulaga sili e faamasima ai taulaga.

O soʻo la o Iesu “o le masima o le lalolagi” ona ua ia i latou se aafiaga o le faasaoina o tagata. Auā o le mea moni, o le feau o loo latou aumaia o le a faasaoina ai ola o tagata uma lava o le a tali atu i ai! O le a ia aumaia i ola o na tagata uiga o le tumau, faamaoni, ma le faatuatua, e aloese mai ai i so o se uiga faaleagaga ma tau amio e faaleaga ai i latou.

“O outou, o le malamalama o le lalolagi outou,” ua taʻu atu ai e Iesu i ona soʻo. E lē mafai ona tuu se lamepa i lalo o se ufiufi a e tuu i luga o le tuugalamepa, o lea ua faapea mai Iesu: “Ia faapea ona pupula atu lo outou malamalama i luma o tagata.” Ua faia e soʻo o Iesu lenei mea e ala i la latou molimau atu i luma o le lautele, atoa foʻi ma lo latou auauna e avea o ni faaaʻoaʻo pupula i a latou amio e tusa ai ma mataupu silisili o le Tusi Paia. Luka 6:20-26; Mataio 5:3-16.

◆ O ai o fiafia moni, ma ai se ā?

◆ O ai o maua le oi talofa, ma ai se ā?

◆ Ua faapefea ona avea soʻo o “masima o le lalolagi” ma “malamalama o le lalolagi”?