LESONA 51
E Faapefea Ona E Faafiafiaina Ieova i Upu E te Tautala Ai?
Ina ua foafoaina i tatou e Ieova, na ia tuuina mai iā i tatou se meaalofa tautele, o le tautala. Pe e tāua iā te ia le auala e tatou te faaaogā ai lenā meaalofa? Ioe, e tāua! (Faitau le Iakopo 1:26.) E faapefea la ona faaaogā lo tatou tomai e tautala ai, i se auala e faafiafiaina ai Ieova?
1. E faapefea ona tatou faaaogā lelei le meaalofa o le tautala?
Ua faalaeiauina i tatou e le Tusi Paia, ina ia “fefaalaeiauaʻi pea ma atiaʻe e le tasi le isi.” (1 Tesalonia 5:11) Pe e te iloa se tasi o loo manaʻomia ni faalaeiauga? O le ā e mafai ona e faia e fesoasoani ai iā te ia? Ia faamautinoa i ai lou manatu mamafa iā te ia. E mafai ona e faailoa i ai māfuaaga e te talisapaia ai o ia. Pe e iai se mau e te manatu e mafai ona faalaeiau ai se tasi e te masani ai? E tele mau e mafai ona e filifili ai. E tatau foʻi ona manatua, e mafai ona faalaeiauina se tasi i le auala e te talanoa atu ai, e pei lava ona faalaeiauina i upu o loo e fai atu. O lea, ia taumafai e tautala atu i se auala agalelei ma filemu i taimi uma.—Faataoto 15:1.
2. O ā ituaiga faamatalaga e tatau ona tatou ʻalofia?
Ua faapea mai le Tusi Paia: “Ia aua neʻi alu atu se upu leaga mai i o outou gutu.” (Faitau le Efeso 4:29.) O lona uiga, e lē tatau ona tatou tautatala i upu masoā, po o faamatalaga sauā ma lē alofa, e faatigā ai i faalogona o isi. E tatau foʻi ona tatou ʻalofia le faitala ma le faia o tala taufaaleaga.—Faitau le Faataoto 16:28.
3. O le ā e fesoasoani iā i tatou e faia ai ni faamatalaga faalaeiau?
E masani lava, o mea e tatou te talanoa atu ai, e iloa ai mea o loo i o tatou loto ma mafaufau. (Luka 6:45) E ao ona toleni i tatou lava ina ia uaʻi atu i mea lelei, e pei o mea ua tonu, mea ua mamā, mea e faatupu ai le lotofiafia, ma mea e viia ai se tasi. (Filipi 4:8) Ina ia mafai ona tatou uaʻi atu i nei mea, e tatau ona filifili lelei a tatou faafiafiaga ma uō. (Faataoto 13:20) E fesoasoani foʻi le mafaufau muamua i upu o le a fai atu ma le auala e fai atu ai, a o leʻi tautala. Ia mafaufau i aafiaga o au upu i isi. Ua faapea mai le Tusi Paia: “O le tagata e tautala lē mafaufau, ua pei o le tutuʻi o le pelu, a o laulaufaiva o ē e atamamai, e mālōlō ai.”—Faataoto 12:18.
SAʻILIʻILI ATILI
Mātau pe faapefea ona tautala atu i se auala e faafiafiaina ai Ieova ma faalaeiauina ai isi.
4. Ia faaeteete i faamatalaga e fai atu, o le taimi, ma le auala e fai atu ai
E iai taimi e tatou te faia ai ni faamatalaga e tatou te toe salamō ai. (Iakopo 3:2) Faitau le Kalatia 5:22, 23, ona talanoa lea i fesili nei:
O fea o nei uiga e mafai ona e tatalo atu ai, ina ia fesoasoani e pulea ai lau tautala? E faapefea ona fesoasoani nei uiga iā te oe?
Faitau le 1 Korinito 15:33, ona talanoa lea i le fesili lenei:
E faapefea i uō ma faafiafiaga e te filifilia ona aafia ai le auala e te tautala ai?
O ā mea e ono aafia ai le auala e te tautala ai?
Faitau le Failauga 3:1, 7, ona talanoa lea i le fesili lenei:
O le ā se taimi e lē tatau ai ona fai atu se tala, pe faatali foʻi i se taimi talafeagai e fai atu ai?
5. Ia faia faamatalaga lelei e faatatau i isi
E faapefea ona tatou ʻalofia le faatigā i isi, pe faia ni faamatalaga lē lelei? Faaali le VITIŌ, ona talanoa lea i fesili o loo mulimuli mai.
I le vitiō, aiseā na manaʻo ai le uso e sui le auala e talanoa ai e faatatau i isi?
O le ā na ia faia ina ia suia ai le auala e tautala ai?
Faitau le Failauga 7:16, ona talanoa lea i le fesili lenei:
O le ā e tatau ona tatou manatua pe a faaosoosoina i tatou e faia se tala lē lelei e faatatau i se isi?
Faitau le Failauga 7:21, 22, ona talanoa lea i le fesili lenei:
E faapefea ona fesoasoani lenei mau iā te oe, e ʻalofia ai le vave ita pe a faia e se tasi se tala lē lelei e faatatau iā te oe?
6. Ia talanoa atu ma le agalelei i lou aiga
E finagalo Ieova ina ia tatou fesootaʻi ma o tatou aiga i se auala agalelei ma alofa. Faaali le VITIŌ, ona talanoa lea i le fesili o loo mulimuli mai.
O le ā e fesoasoani iā te oe e talanoa atu ai ma le agalelei i lou aiga?
Faitau le Efeso 4:31, 32, ona talanoa lea i le fesili lenei:
O ā ituaiga faamatalaga e atiaʻe ai se aiga?
Na faailoa mai e Ieova ona faalogona e faatatau i lona Alo o Iesu. Faitau le Mataio 17:5, ona talanoa lea i le fesili lenei:
E faapefea ona e faaaʻoaʻo iā Ieova i le auala e te fesootaʻi ai ma lou aiga?
Saʻili avanoa e te faamālō atu ai i isi
UA FAAPEA MAI NISI: “E pule lava aʻu i aʻu tala e fai. Ou te lē popole pe fiafia i ai isi pe leai.”
Pe e te ioe i lenā manatu? Aiseā?
AOTELEGA
E telē le aafiaga o faamatalaga e tatou te faia. E tatau la ona tatou faaeteete i faamatalaga e fai, o le taimi e fai ai, ma le auala e fai atu ai.
Fesili Autalu
E faapefea ona e faaaogā le meaalofa o le tautala e fesoasoani ai i isi?
O ā ituaiga faamatalaga e te manaʻo e ʻalofia?
O le ā e fesoasoani iā i tatou ina ia faia ai faamatalaga agalelei ma atiaʻe ai i taimi uma?
MANATU FAAOPOOPO
O le ā e fesoasoani iā i tatou ina ia fai atu ni upu e atiaʻe ai?
O le ā e fesoasoani iā te oe e ʻalofia ai le tautala i upu masoā?
Mātau pe faapefea ona e ʻalofia le mailei o le faitala taufaaleaga.
Mātau pe na faapefea ona fesoasoani Ieova i se tamāloa, na taumafai malosi e taofia le faaaogāina o upu masoā.