Luka 1:37—“Auā e Leai Lava se Mea e Tasi e le Mafaia e le Atua”

“Auā e faataunuuina e le Atua ana folafolaga uma.”—Luka 1:37, Faaliliuga a le Lalolagi Fou.

“Auā e leai lava se mea e tasi e le mafaia e le Atua.”—Luka 1:37, Tusi Paia Samoa—Lomiga 1969.

Uiga o le Luka 1:37

E mafai e le Atua Silisili Ese ona faia mea e manatu tagata e lē mafai ona faataunuuina. E leai se mea e mafai ona taofia o ia mai i le faataunuuina o ana folafolaga.

O le upu i le uluaʻi gagana mo le “folafolaga,” e mafai ona faasino atu i se “upu” po o se “fetalaiga” a le Atua. E mafai foʻi ona faasino atu i le iʻuga o se folafolaga a Ieovaa le Atua. Talu ai e faataunuuina so o se mea e fetalai i ai le Atua, e mafai foʻi la ona faaliliuina le Luka 1:37 e faapea: “E lē mafai ona lē taulau folafolaga a le Atua” pe “E leai se mea e faigatā i le Atua.” Ua faamatilatila mai i nei faaliliuga le upu moni tāua: E leai se folafolaga a le Atua e lē faataunuuina auā e leai se mea e faigatā iā te ia.—Isaia 55:10, 11.

O loo taʻua foʻi i le Tusi Paia ni faaupuga talitutusa e faatatau i folafolaga a le Atua. O se faaaʻoaʻoga, na valoia e Ieova e ala i se agelu o le a tō Sara le avā a Aperaamo ae ua loomatua. Na fetalai atili atu le Atua: “Pe e iai ea se mea e faigatā iā Ieova?” (Kenese 18:13, 14) Ina ua uma ona manatunatu loloto Iopu i foafoaga a le Atua na ia taʻutino mai: “E lē mafai foʻi ona vaoia se mea e te finagalo i ai.” (Iopu 42:2) Ina ua faailoa atu foʻi e soo o Iesu o latou popolega ina neʻi latou lē ausia tapulaa a le Atua mo le faaolataga, na faamanatu atu e Iesu iā i latou “e mafaia e le Atua mea uma lava.”—Mataio 19:25, 26.b

Siʻomaga o le Luka 1:37

Na fai atu e se agelu e igoa iā Kaperielu upu o loo i le Luka 1:37 i se taupou talavou Iutaia e igoa iā Maria. Na faailoa atu e Kaperielu iā Maria o le a ia fanauina “le Alo o le Silisili Ese,” ma e tatau ona “faaigoa iā te ia o Iesu.” O le a fai o ia ma Tupu o le Malo o le Atua lea o le a pule e faavavau.—Luka 1:26-33; Faaaliga 11:15.

Na fesili Maria pe e faapefea ona tupu lenā mea ae e leʻi faaipoipo ma e ʻla te leʻi momoe foʻi ma se tamāloa.’ (Luka 1:34, 35) Na tali atu Kaperielu o le a faaaogā e le Atua lona agaga paia po o lona mana galue. O le taimi lenā o loo iai Iesu i le lagi o se atalii agaga o le Atua. Na faaaogā la e Ieova lona agaga paia e tuu ai le ola o lona Alo i le manava o Maria. (Ioane 1:14; Filipi 2:5-7) O lea na maʻitō faavavega ai Maria. Ina ia faamalosia le faatuatua o Maria i le mana o le Atua, na taʻu atu ai e le agelu iā te ia ua tō foʻi lona tausoga o Elisapeta i se tama tama e ui “ua loomatua” o ia. E leʻi iai se fanau a Elisapeta ma lana tane o Sakaria ona e lē fanau Elisapeta. (Luka 1:36) Na avea la laʻua tama ma Ioane le Papatiso, o lē na valoia foʻi e Ieova lana faiva.—Luka 1:10-16; 3:1-6.

Atonu na mafaufau le agelu o Kaperielu iā Maria ma Elisapeta a o ia fetalai atu i upu o loo i le Luka 1:37. O na upu ua faamautinoa mai ai foʻi i auauna a Ieova i aso nei, o le a faaauau pea ona tausia e Ieova ana folafolaga. E aofia ai ma lana folafolaga o le suia o malo faaletagata i le pulega amiotonu a lona Alo o Iesu Keriso, le Tupu o le Malo o le Atua i le lagi.—Tanielu 2:44; 7:13, 14.

Ia matamata i lenei vitiō puupuu o loo aumaia ai se aotelega o le tusi o Luka.