E Faapefea Ona e Pulea Ou Faalogona?

O LE TOATELE i aso nei ua losilosi e faagaee faalogona. Ua latou sailia le faamanititino e ala i le soona ave masau o taavale, taaloga mataʻutia, feusuaiga e le tatau ai, ma fualaau e faagaee ai. O lea mea moni, o le lalolagi o tamaoaiga ma faafiafiaga ua latou faamamafaina le manaoga i mea e faagaee ai faalogona. O lea, e toatele e itiiti lo latou talia o le filemu ma le toafilemu, ua latou lagona e tatau mo i latou ona maula e tele o faalogona e fiafia ai mai le olaga.

E moni, o i tatou uma lava e i ai faalogona. Mo se faaaʻoaʻoga, pe a tatou fiafia, ʻata, pe tagi, ua tatou faaalia le tulaga o i ai o tatou faalogona i lea taimi. A e sa e iloa e oo lava ina aafia ai lou tino i faalogona, e pei o le suia ai o le gasologa o le toto, le tulaga o le fatu, ma le sau o le āfu i lou tino? Atonu foi e mafua ai lou le tofilemu, e pei o le ulutiga, tiga o le manava, ma faafituli i lou tua. O lea, ua masani ai pea ona sailia e tagata faalogona fiafia ma alofia le le fiafia. O nisi tagata ua taumafai e sola ese mai faalogona le fiafia i le faasioa o le mafaufau e pei o fai se miti, soona ʻai, ma le soona inu. I le isi itu, o tulaga lelei tau faalogona e aumaia ai le tino malosi. Fai mai le Faataoto 14:30 “O le loto lelei, o le ola lea o le tino.”

O le mea malie, o loo taʻua e le Afioga a le Atua ituaiga eseese o faalogona uma faaletagata, e pei o le alofa, ʻinoʻino, olioli, faanoanoa, loto tele, ma le fefe. Atonu o e manatua i se tasi taimi sa “tagi ai Iesu,” ma faaalia ai ona faalogona ona o le oti o se uo. (Ioane 11:35) Sa taumafai Iosefa e taofi ona loimata “auā na mutimutivale lona alofa i lona uso,” ua leva tausaga e lei toe vaai i ai.—Kenese 43:30.

Ai se a e Pulea ai Ou Faalogona?

Talu ai ona ua tatou ola i “taimi o omiga” ma tatou te le lelei atoatoa, o le tele la o faalogona le fiafia e tolotolo mai i o tatou olaga na i lo o faalogona fiafia. (2 Timoteo 3:1-5, Revised Standard) E pei ona fai mai le Tusi Paia, “o le saua e faavalea ai lava le tagata poto.” (Failauga 7:7) O lea afai tatou te le taumafai e pulea faalogona le manaomia, e mafai ona afaina ai la tatou faia ma o tatou aiga, uo i aʻoga, tagata e faigaluega faatasi, ma e auaufaatasi faa-Kerisiano.

E pei lava ona masani ai, ua aafia uma i tatou i faalogona i le mea o loo taʻua i le Tusi Paia “o le tausaga ma le mea e tupu ai.” (Failauga 9:11) Mo se faaaʻoaʻoga, o se ulugalii ua uma ona faaipoipo, sa i le faiva sauatoa, na toe foi atu i lo la fale ma sa iloa ai ua gaoia le tele o a la mea totino. Sa tiga tele ai i laua, ma oo ai lava ina faalogoina le faamaʻia. E tele ni aso o taumafai e maua le pulea o ola faalogona. Ina ua malolosi i laua, sa toe faaauau ai i la laua galuega o le ‘faamafanafana atu i e o faanoanoa.’—Isaia 61:2.

Atonu foi e te iloa tagata o e faatagaina latou e faagaeeina e ala i le matamata i ata o faiga alofa. Ua latou matua pei ai o tagata o ata ma e masani lava ona latou fetagisi i mea e na o ni tala fatu. Sei manatu foi, i se mea na tupu i se fafine nofo taitasi. I le tasi po na ia matamata ai i se ata taufaafefe. E tiga lava “ona toeitiiti oti i le fefe,” a e sa le taofia ai lona matamata i ai. Mulimuli ane sa le mafai ona moe. A e ina ua moe lelei o ia mulimuli ane, e mafai ona e manatunatu i mea na ia miti i ai: o tino o tagata oti ua toe o mai mimiti toto o tagata o loo momoe ma tagata tino eese. O le faavalevale: Ua aafia i tatou i faalogona ona o mea tutupu o loo siomia ai i tatou. O lea, o le mea moni, e tatau lava ona tatou filifili lelei, ia alofia mea e afaina ai pe faaleagaina ai o tatou faalogona paleni.

Faamamafa Faalogona Manaomia

I le isi itu, ua fautuaina i tatou e le Afioga a le Atua “ia faatoeaina” e ala i ‘mea o tatou faia.’ (Tito 2:2; Roma 12:1) E le o le uiga o lenei mea faapea o le a taofiofia ai i tatou e oo atu ai i se tulaga faapea o le a vavae ese ai mai i le olaga. O le mea tatau lava le pulea o faalogona e faaopoopo atu ai i le sasala o le ola. Fai mai le Tusi Paia, mo se faataʻitaʻiga: “Ua leai se mea e sili ona lelei i le tagata, na ona olioli o ia i ana lava galuega.”—Failauga 3:22.

O lea la, ina ia fiafia moni le olaga, e mafai ona tatou aʻoaʻoina ia atiina ae faalogona e tatau ai. O lenei mea, na i lo o mafaufauga le aoga, e mafai ona fesoasoani ia i tatou “e maelega i galuega lelei.” (Tito 2:14 New International Version) O faalogona malolosi maloloina e faamalosia ai e maumauai ma tumau ai ina ia faataunuuina le mea e aoga. O le mea moni, ua iloa e Kerisiano latou te le faataunuuina mea i le auaunaga i le Atua ona e na o manatu tatau i a te i latou lava. Na i lo o lea, ua latou iloa le manaomia ona faalagolago atu atoatoa i le agaga o Ieova ina ia mafai ai ona fesagai ma le lumanai. (Luka 11:13; Faataoto 19:21) O lea, e faapefea la ona tatou pulea o tatou faalogona, ma faateleina ai faalogona aoga?

“Aua Foi le Feaveaiina o Outou Loto”

Ona o o latou iuga e afaina ai, o faalogona e pei o le ita, loto leaga, mataua, ma le fefe e manaomia ona pulea. Ina ia faataʻitaʻia pe faapefea ona tatou faia lenei mea, sei manatu i se tasi o faalogona: le popole.

Sa faamalosia e le mana galue o le Atua ana auauna loto naunau ma faamaoni i aso ua mavae, e pei ona ia faia foi i aso nei. O na o le taʻitaʻiga a le agaga paia, sa maua ai e Iesu se vaaiga mautinoa e ala i lona matua naunau i mea faaleagaga. Sa ia faalaeiau i ona soo ina ia “aua foi le feaveaiina o outou loto.” (Luka 12:29) Sa lei i ai lava sona faaletonu i le tausiga alofa a lona Tamā. (Ioane 15:9, 10) O lona maelega ma le aasa sa lei faalavelaveina i le fiu ma le manatu faapea e le aoga. E faapena foi oe, pe a e manao e pulea le soona popole, faatumu lou mafaufau i ‘mea e viia.’ (Filipi 4:8) Ioe, o le faatuatua ia Ieova e mafai ona aveesea mafaufauga le aoga.

Mo se faaaʻoaʻoga, o se teine talavou e le atoatoa le tino i Sāo Paulo, i Brazil, sa popole tele o ia ona e leai ni ona tomai atoa ma le lumanai. Sa ia tausia tamaiti laiti i le fale a e o uma ona matua e faigaluega. I lona lagona faapea e itiiti sona aoga, sa ia tusi ai: “Ua ou fefe nei teʻi ua leaga lou ulu, ona ou faia ai lea o se mea valea. Ua oo lava ina ou mafaufauina i le pule i loʻu ola. Ua ou lagona lava o le a le mafai ona ou faaipoipo.” Ina ua uma ona ia maua se tusi e uunaia ai o ia ia faateleina ana suesuega faale-Tusi Paia, sa ia tusi: “Ua amata nei ona ou fiafia ona i le faaiuga sa i ai se tasi na fiafia e iloiloina ou faafitauli. Sa e faailoa mai ia te au le taua o le ola i le faiga fou a Ieova.” O lea, na i lo o le na ona popole, ai se a e le faatutū ai ni sini tumau, a e maise lava sini faaleagaga, e pei o le faia ia sili atu i le faasalalauina o le tala lelei o le Malo po o le faaalu o se taimi tele i le suesueina o le Afioga a le Atua?

E moni, o ni faalogona ua mapu mo sina taimi atonu e oo mai pe a malolo, pe a savalivali, suia o gaoioiga masani po o siomaga, po o le faalogologo atu foi i musika logo malie. Atonu la o le a le tāitāi ona tatou lolo atu ai i ni manatu le aoga, ma le popole, e faalagolago lava i mea ua tatou aʻoaʻoina po o mea na tutupu. O le mafuaaga lena, e le lava ai le tomai i le faauigaina o mea po o le pulea o le mafaufau e aumaia ai le filemu o le mafaufau pe aumaia ai se tasi i le finagalo lelei o le Atua. E tatau ona tatou faamasani e ‘tuu atu ia Ieova mea uma tatou te popole ai.’ E mafai ona tatou faia o lenei mea ‘aua o loo manatu mai o ia ia i tatou.’ —1 Peteru 5:7.

O le Naunau Totino o le Atua ia te Oe

E lei fuafuaina e Le na Faia mea ia tutusa tagata uma ma ia tutusa uiga. Ua ia aumaia i le Tusi Paia, mataupu silisili e fai ma taʻiala e fetaui ma lava mo tagata uma. Sa ia aumaia foi ia i tatou ni faaaʻoaʻoga aoga o le faaalia o lona naunau totino mo le lelei o ana auauna. “Ua latalata mai Ieova i e ua loto momomo . . . E tele lava mea leaga e oo i le ua amiotonu, a e laveaiina o ia e Ieova ai ia mea uma.” (Salamo 34:18, 19) O le mea moni, e sili ona silafia e Ieova o o tatou faalogona i totonu, e oo lava i o tatou mafatiaga ma loimata. Ua faailoa mai e le Salamo 56:8 i upu nei: “Ia e utu oʻu loimata i lau fagu; e le o i ai ea i lāu tusi?” O lea, pe a tatou i ai i se tulaga ua manaomia ai se mea, e oo lava ina “puapuagatia ma ou mativa” e mafai ona avea Ieova ma o tatou “fesoasoani ma loʻu faaola.” (Salamo 40:17) A e ua na o le a le mea manaomia mai ia te oe e maua ai lea fesoasoani?

O le talisapaia o uiga silisili o le Atua, lona “alofa mutimutivale,” e fesoasoani ia i tatou e aloese mai i le uai atu ma le le mautinoa ia i tatou lava. (2 Korinito 1:3, 4) E le mafai ona tatou fia tutoatasi ma mulimuli tauaso atu i o tatou faalogona aua o le loto o e tagata e “faaʻoleʻole,” e taʻitaʻiina atu ai i gaoioiga le faamaoni, e oo lava i feusuaiga le mama. (Ieremia 17:9) Mo se faataʻitaʻiga, o se fafine faaipoipo i Amerika Latina sa oo ina tosina atu i se tamaloa la te tuaoi. Ina ua uunaia e ona faalogona, ma sa oo ane ai sona ioega i faanaunauga e “fesoasoani” atu ia te ia. O le mea faiaina, ona sa ia sailia ni fautuaga faaleagaga mai Kerisiano matutua. I lona talisapaia i se tulaga maualuga o uiga o le Atua, sa ia faaumaina ai loa lea faiā. Ua fai mai nei la o ia ma le fiafia tele: “Ua faasaoina lau faaipoipoga.” O le mea moni, e lelei mo i tatou uma lava ona atiina ae se loto malie e aʻoaʻoina ai e Ieova ma ia lalata atu ia te ia. —Salamo 19:7-11.

O le faatuatua malosi, o le faalagolago po o le faamoemoe mautinoa, e saosaolaumea i se uiga mautinoa, i so o se itu le mailoa e tupu a i le popole ma le fefe. (Eperu 11:6) E mautinoa lava, o mafaufauga le aoga ma faaletonu e mafai ona tatou le taulau ai i mea sa tatau ona tatou manuia ai. O le leai o se faatuatua e faailoa ai le manaoga ia atiina ae se mautinoa sili i le tomai o le Atua e gaoioi ai. (1 Ioane 5:10) Maeu la le taua, o le faalagolago i le Atua, tatalo atu e le aunoa mo le fesoasoani ina ia pulea o tatou faalogona!— Iakopo 1:5.

O le onosai ma le agamalu, o uiga foi ia e manaomia ona atiina ae ina ia maua ai se faia lelei ma isi. “O le ua agamalu foi, o le tagata faautauta lea,” e pulea ona faalogona. (Faataoto 17:27) E ese ai mai lea, sa tusi foi le aposetolo o Paulo: “Ia iloa lo outou agamalu e tagata uma lava,” o lea, e saosaolaumea i se olaga sologa lelei ma le filemu.—Filipi 4:5.

O le alofa atu i isi e aumaia ai faalogona sili ona matagofie, e nofo sauni ai e faamalosi atu i isi ma ia faatoafilemu i latou: “Ia fepalepaleai i le fealofani o uso; ia tausolomua ona ava o le tasi i le tasi.” “E onosai le alofa, e agamalu, e le losilosi le alofa, e le mitamitavale le alofa, e le faafefeteina, e le amio mataga, e le sailia e ia ana lava mea, e le faaitaitagofie, e le tuuina atu i nisi le leaga.”—Roma 12:10; 1 Korinito 13:4, 5, Today’s English Version.

Afai e te atiina a e pea nei uiga, e mafai ona e mautinoa le fesoasoani a Ieova. E pei ona sa tusi ai Paulo: “O le manuia foi mai le Atua e silisili lava i mea uma e manatu i ai, e leoleoina ai o outou loto atoa ma o outou mafaufau ia Keriso Iesu.”—Filipi 4:7.

O le a E te Manao e Fai?

O lea la atonu ua iloa e i tatou taitoatasi uma lona lava manaoga e pulea lelei ni faalogona patino, e pulea lelei ni faalogona patino, e mafai ona tatou talitonu o le agaigai i luma ma se fiafiaga sili ua i o tatou lima. I lena itu, e tatau ai ona tatou faaeteete ina ia le avea i tatou o ni tagata sioa po o le fai miti i le ao ia le gauai atu foi i faalogona le pulea e pei o mea e le manaomia ona popole ai. Na i lo o lena, sei faamalosia i tatou e atiina ae ni faalogona, mama, mautinoa ina ia tatou filemu ai ma i tatou lava, a tatou uo, ma le Atua.

Ioe, e sili atu ona aoga le faia o lena mea, ma vaavaai atu i luma i le aso o le a ‘faamalie ai e Ieova le manao o mea ola uma.’ (Salamo 145:16) O lea, ia galue maumauʻai agai i le olioli i le ola i le faiga foi filemu a le Atua. O le faia faapena o le a le gata ina saosaolaumea ai i lou fiafiaga i le taimi nei, a e mautinoa foi ma se faalogona sili ona moomia.