“Aua e te Fefe Oe le Lafu Mamoe Itiiti e”
“Aua e te fefe oe le lafu mamoe itiiti e, auā ua finagalo lo outou Tamā e foai mai le malo ia te outou.”—LUKA 12:32.
1. O le ā na faaautu i ai fetalaiga a Iesu: “Aua e te fefe oe le lafu mamoe itiiti e”?
“A IA saili e lē aunoa lona malo [o le Atua].” (Luka 12:31, NW) Ina ua fetalai atu Iesu i na upu i ōna soo, na ia faailoa atu ai se mataupu silisili ua faapea ona taitaiina ai manatu o Kerisiano mai i ōna aso seia oo mai i ō tatou taimi. O le Malo o le Atua e ao ona faamuamua i ō tatou olaga. (Mataio 6:33) E ui i lea, i le tala faamaumauina a Luka, na faaauau ona fetalai atu Iesu i ni upu alofa ma le faamautinoa i se vaega faapitoa o Kerisiano. Na ia fetalai e faapea: “Aua e te fefe oe le lafu mamoe itiiti e, auā ua finagalo lo outou Tamā e foai mai le malo ia te outou.” (Luka 12:32) I le avea o le Leoleo Mamoe Lelei, na silafia e Iesu e tele ni taimi faigata o tuu mai i luma mo ōna soo. Ae e leai se mafuaaga e matatau ai i latou pe afai latou te saili pea le Malo o le Atua. O lea, o faalaeiauga a Iesu sa lē o ni poloaiga sauā. Na i lo lea, na avea o se folafolaga alofa ua aogā e faagaeetia ai le mautinoa ma le lototele.
2. O ai e faia aʻe ai le lafu mamoe itiiti, ma aisea ua faaeaina faapitoa ai i latou?
2 Na fetalai atu Iesu i ōna soo, ma na ia taʻua i latou o le “lafu mamoe itiiti.” Na ia fetalai atu foi i a i latou o ē o le a ʻfoaiina atu i ai le malo’ e Ieova. I le faatusatusa atu i le anoanoai o tagata o le a talia Iesu i taimi mulimuli ane, e mautinoa lava sa toaitiiti lea vaega e tusa ai ma lo latou numera. Na faatauaina foi i latou ona sa filifilia i latou mo se lumanai ofoofogia, e faaaogā i se auaunaga tautupu. O lo latou Tamā, o Ieova le Leoleo Mamoe Sili, ua ia valaauliaina le lafu mamoe itiiti ina latou mauaina se tofi faalelagi i le fesootai atu ma le Malo Faa-Mesia o Keriso.
Le Lafu Mamoe Itiiti
3. O le ā le vaaiga mamalu e faatatau i le lafu mamoe itiiti na iloa e Ioane?
3 O lea, o ai e faia aʻe ai lenei lafu mamoe itiiti o loo iai se faamoemoega ofoofogia? O soo o Iesu Keriso o ē ua faauuina i le agaga paia. (Galuega 2:1-4) Na tusi mai le aposetolo o Ioane ina ua ia vaaia i latou o se ʻau pepese faalelagi ma kitara i ō latou lima e faapea: “Na aʻu iloa, faauta foi, ua tu mai le Tamai Mamoe i le mauga o Siona, ua faatasi foi ma ia tagata e selau afe ma afe e fa sefulu ma le fa o afe, ua tusia le suafa o lona Tamā i o latou muaulu. O tagata ia e lei leaga i fafine; auā o taupou i latou; o i latou ia o e ua mulimuli atu i le Tamai Mamoe i mea uma e alu i ai o ia; o i latou ia o e ua faatauina nai tagata, o e ua faapolopoloina mo le Atua ma le Tamai Mamoe; e le iloa foi se pepelo i o latou gutu; auā e le ponā i latou.”—Faaaliga 14:1, 4, 5.
4. O le ā le tulaga ua iai i le lafu mamoe itiiti i le lalolagi i aso nei?
4 Talu mai le Penetekoso i le 33 T.A., ua auauna ai i latou ia ua faauuina, o ē ua fanauagagaina, o sāvali a Keriso i luga o le lalolagi. (2 Korinito 5:20) I aso nei, e na o sina vaega toaitiiti o i latou o loo totoe, o loo galulue faatasi o le vasega o le auauna faamaoni ma le mafaufau. (Mataio 24:45; Faaaliga 12:17) Ae maise lava, talu mai le tausaga e 1935, ua aufaatasi atu i a i latou “isi mamoe,” o Kerisiano e iai se faamoemoe faalelalolagi, o ē ua oo atu nei lo latou faitau aofai i le faitau miliona. Ua fesoasoani atu i latou ia i le talaʻia o le tala lelei i le lalolagi uma lava.—Ioane 10:16.
5. O le ā le uiga o loo iai i ē o totoe o le lafu mamoe itiiti, ma aisea e lē manaomia ai ona fefefe fua?
5 O le ā le vaaiga o ē o totoe o lenei lafu mamoe itiiti o loo iai pea i le lalolagi? I le iloa e faapea o le a latou maua ʻse Malo e lē mafai ona luluina,’ ua latou tuuina atu ai la latou auaunaga paia i le mataʻu ma le migao i le Atua. (Eperu 12:28) Ua latou iloa ma le loto maulalo e faapea, e lē mafaatusalia lo latou faaeaga e iu i le olioli e lē gata mai. Ua latou maua le “penina tau tele” e tasi na faasino i ai Iesu ina ua fetalai e faatatau i le Malo. (Mataio 13:46) A o lalata mai le puapuaga tele, ua tutū ai ma le lē fefefe ē faauuina a le Atua. E ui i mea o le a oo mai i le lalolagi o tagata i le taimi o le “aso tele ma le silisili o le Alii [o Ieova, NW],” e leai se mea e fefefe ai fua i latou i mea o i le lumanai. (Galuega 2:19-21) Aisea latou te fefefe ai fua?
Faaitiitia le Numera
6, 7. (a) Aisea ua faaitiitia ai le numera o le lafu mamoe itiiti o loo totoe pea i le lalolagi? (e) E tatau faapefea i a i latou taitoatasi ona tagaʻi i le faamoemoe o loo latou taofia?
6 I tausaga ua mavae atu, o le numera o le lafu mamoe itiiti o loo iai pea i le lalolagi ua faaitiitia. Ua faamaonia lea mea mai i le lipoti o le Faamanatuga i le 1994. Mai i faapotopotoga e 75,000 o tagata o Ieova i le lalolagi aoao, e na o le 8,617 sa faailoa mai e ala i le tagofiaina o le uaina ma le areto, la latou taʻutinoga i le avea ma sui o le vaega totoe. (Mataio 26:26-30) I le faatusatusa atu i ai, o le aofai atoa o le aofia e 12,288,917. Ua iloa e Kerisiano faauuina o le mea lenei o loo faatalitalia. Ua faavaeina e Ieova se numera faatapulaaina, e 144,000, e faia aʻe ai le lafu mamoe itiiti, ma ua ia aoaoina lea numera talu mai le Penetekoso 33 T.A. Ua alagā tatau ai la, o le valaauina o le lafu mamoe itiiti o le a oo atu i lona mutaaga pe a latalata atu le numera i lona faamaeaina, ma e iai mea moni e iloa ai e faapea, o le vaega tele o le aoaoina o le toatele o i latou nei ua faamanuiaina, na iu i le 1935. E ui i lea, ua valoia e faapea o isi mamoe i le taimi o le iuga, o le a tupu aʻe e avea o se “motu o tagata e toatele mai atu nuu uma, ma aiga, ma nuu, ma gagana eseese, e le ma faitaulia e se tasi.” Talu mai le 1935, o le aoaoina tele a Ieova o loo faatatau lea i lenei motu o tagata e toatele, o ē o faamoemoe i le ola e faavavau i le lalolagi parataiso.—Faaaliga 7:9; 14:15, 16; Salamo 37:29.
7 O le toatele o le lafu mamoe itiiti o loo iai pea i luga o le lalolagi ua silia i le 70, 80, ma 90 ō latou tausaga. E toaitiiti lava i latou ua ova atu ma le 100 tausaga lo latou matutua. O i latou uma na e tusa lava po o le ā le matua o iai i tausaga, ua iloa e ala i se toetu faalelagi, o le a latou faatasia mulimuli ane ai ma Iesu Keriso ma o le a pule faatasi ma ia i lona Malo mamalu. O i latou o le motu o tagata e toatele o le a avea ma tagatanuu i le lalolagi e pule mai i ai Keriso le Tupu. Ia taitoatasi ma olioli i mea ua teuina e Ieova mo i latou o ē alolofa i a te ia. E lē o i tatou e filifilia po o le ā le faamoemoe tatou te taofia. O Ieova na te fuafuaina le mea lena. E mafai e vaega uma e lua ona faagaeetia i ō latou faamoemoe mo se lumanai fiafia, a lē o le iai i le Malo faalelagi po o i luga o le lalolagi parataiso i le pulega a lena Malo.—Ioane 6:44, 65; Efeso 1:17, 18.
8. O le ā le mamao ua oo i ai le faamaufaailogaina o le 144,000, ma o le ā le mea o le a tupu pe a oo ina faamaeaina?
8 O le lafu mamoe itiiti ma le malosi e 144,000, o le “Isaraelu o le Atua,” lea ua ia suia le tulaga sa iai Isaraelu faaletino i fuafuaga a le Atua. (Kalatia 6:16) O lea la, o le vaega totoe, e faia aʻe i ē o totoe o lea nuu faaleagaga o loo iai pea i le lalolagi. O i latou na o ē o totoe ua faamaufaailogaina mo le talileleia mulimuli e Ieova. Na vaaia e le aposetolo o Ioane lena mea o tupu i se vaaiga, ma na ia faamatala mai ai e faapea: “Ua aʻu iloa foi le tasi agelu ua ui ae i le mea e alu ae ai le la, ua ia te ia le faamaufaailoga a le Atua soifua; ua alaga ia ma le leo tele i agelu e toafa na tuuina atu ia i latou ia faaleaga i le fanua ma le sami, ua faapea atu, ʻAua tou te faaleaga i le fanua, po o le sami, po o laau, seia matou faamaufaailogaina auauna a lo tatou Atua i o latou muaulu.’ Na ou faalogo foi i le faitau aofai o e na faamaufaailogaina; e selau afe ma afe e fagafulu ma afe e fa o e ua faamaufaailogaina mai ituaiga uma o le fanauga a Isaraelu [faaleagaga].” (Faaaliga 7:2-4) Ona o lenei galuega o le faamaufaailogaina o Isaraelu faaleagaga ua mautinoa ua tu lata atu i lona mutaaga, o mea e maofa ai ua toeitiiti nei ona faataunuuina lea, ua faailoa mai. O le tasi o mea, o “le puapuaga tele,” ua tatau ona lalata tele mai, pe a oo ina tatalaina mai matagi e fa i le lalolagi.—Faaaliga 7:14.
9. E faapefea le vaaiga a le lafu mamoe itiiti e tusa ai ma le numera faatuputeleina o le motu o tagata e toatele?
9 E faitau miliona i latou o le motu o tagata e toatele o ē ua uma ona aoaoina. Maeu le faamafanafanaina ai o loto o le vaega totoe! E ui lava ina faaauau ona faaitiitia le numera o i latou o le lafu mamoe itiiti o loo totoe pea i le lalolagi, ae ua latou toleniina ma sauniunia tane agavaa mai le motu o tagata e toatele ina ia faafoeina tiute tauave e fesootai atu i le faalapotopotoga faalelalolagi a le Atua o loo faatuputeleina. (Isaia 61:5) E pei ona faailoa mai e Iesu, o le a iai ē e faasaoina mai le puapuaga tele.—Mataio 24:22.
“Aua e te Fefe”
10. (a) O le ā le osofaiga ua toeitiiti ona faia lea agaʻi i tagata o le Atua, ma o le ā o le a taitaiina atu i ai? (e) O ā fesili ua fesiligia ai i tatou taitoatasi?
10 Ua tulia mai Satani ma ana temoni i inei i le lalolagi. Ua saunia o ia ma ana ʻau ina ia faia sa latou osofaiga tele i tagata o Ieova. O lenei osofaiga, ua valoia mai i le Tusi Paia, ua taʻua o le osofaiga a Koku o Makoku. O ai o loo taulai faapitoa atu i ai le osofaiga a le Tiapolo? Pe e lē o sui mulimuli ea o le lafu mamoe itiiti, le Isaraelu faaleagaga a le Atua, o ē o loo nonofo ma le fifilemu i “totonugalemu o le lalolagi”? (Esekielu 38:1-12) O lea lava, peitai, o le vaega totoe o le vasega faauuina faamaoni faatasi ai ma ā latou aumea faamaoni, o isi mamoe, o le a latou molimauina pe faapefea i osofaiga a Satani ona faapogaia ai se tali mai ma le matautia a Ieova le Atua. O le a faauilavea ane o ia ina ia puipuia ōna tagata, ma o le a faapogaia ai e lenei mea le pasae aʻe o “le aso tele ma le silisili o Ieova.” (Ioelu 2:31) I aso nei, o loo faataunuuina ai e le auauna faamaoni ma le mafaufau se auaunaga tāua ma faasaoola, o loo lapatai atu i le oo mai o lenei faalaa ane a Ieova. (Malaki 4:5; 1 Timoteo 4:16) Pe o e lagolagoina ea ma le maelega lena auaunaga, i le auai lea i le talaʻia o le tala lelei o le Malo o Ieova? Pe o le a faaauau ea ona e faia faapea o sē faalauiloa le Malo e aunoa ma le fefe?
11. Aisea e tāua ai ona iai se uiga o le lototele i aso nei?
11 Pe a tagaʻi atu i tulaga o iai nei le lalolagi, maeu le fetaui i lenei taimi mo le lafu mamoe itiiti ona utagia fetalaiga a Iesu na faatatau atu i a i latou e faapea: “Aua e te fefe oe le lafu mamoe itiiti e”! O se uiga lototele faapea, e tāua tele pe a manatu atu i mea uma ua faataunuuina e ogatusa ma fuafuaga a Ieova. I se tulaga taitoatasi, ua iloa e le lafu mamoe itiiti le tatau ona taitoatasi le tagata ma tumau seia oo i le iuga. (Luka 21:19) E pei ona tumau ma faamaonia le faamaoni o Iesu Keriso, o le Alii ma le Matai o le lafu mamoe itiiti, seia oo i le mutaaga o lona soifuaga faalelalolagi, o lea e tatau ai foi i tagata taitoatasi o le vaega totoe ona tumau ma faamaonia le faamaoni.—Eperu 12:1, 2.
12. Na faapefea ona pei Paulo o Iesu i lona faalaeiauina o Kerisiano faauuina ina ia aua neʻi fefefe?
12 O i latou uma lava ua faauuina e tatau ona iai le vaaiga lea sa i le aposetolo o Paulo. Mātau pe faapefea i āna upu o sē na faauuina e folafola atu le toetu i le lautele ona talafeagai ma faalaeiauga a Iesu ina ia aua neʻi fefefe. Na tusi Paulo e faapea: “Ia e manatua Iesu Keriso ua faatuina mai o ia nai e ua oti, o le fanau lava a Tavita, e tusa ma laʻu tala lelei; ona o lea ua tigaina ai aʻu, ua oo ina noanoatia o aʻu, peiseai se pagota; a o le afioga a le Atua e le noatia lava lea. O le mea lea ou te onosai ai i mea uma ona o le au filifilia, ina ia maua e i latou foi le faaolataga o loo ia Keriso Iesu ma le manuia faavavau. O le upu moni lenei: Pe afai tatou te oti faatasi ma ia, tatou te ola faatasi ai foi; pe afai tatou te onosai, e fai foi i tatou ma tupu faatasi ma ia; pe afai tatou te faafiti ia te ia, e faafiti foi o ia ia te i tatou; afai e le faamaoni i tatou, e faamaoni pea lava ia—auā e le mafaia e ia ona faafiti ia te ia.”—2 Timoteo 2:8-13.
13. O le ā le talitonuga maumaututu o loo taofia e sui o le lafu mamoe itiiti, ma o le ā ua uunaia i latou e fai ona o lea mea?
13 E pei o le aposetolo o Paulo, o sui o totoe faauuina o le lafu mamoe itiiti o loo naunau e onosaia puapuaga a o latou faalauiloa atu le feau malosi ua tuuina mai i le Afioga a le Atua. Ua maumaututu lo latou talitonuga a o latou faatuatua atu i folafolaga mai le Atua e faatatau i le faaolataga ma le tuuina atu i a i latou o “le pale o le ola” pe afai latou te faamaoni seia oo i le oti. (Faaaliga 2:10) I le oo i ai o le suiga ma le toetu faafuasei, o le a faaooina atu ai i latou e aufaatasi ma Keriso, ina ia pule faatasi ma ia o ni tupu. Maeu se manumalo mo lo latou tausisi i se ala o le faamaoni o ni ē manumalo i le lalolagi!—1 Ioane 5:3, 4.
O se Faamoemoe e Tutasi
14, 15. Ua faapefea ona tutasi le faamoemoe o le lafu mamoe itiiti?
14 O le faamoemoe o le toetu o loo iai i le lafu mamoe itiiti e tutasi. I ā itu? O se tasi o mea, e muamua i le toetu lautele, o “e ua amiotonu atoa ma e ua amioletonu.” (Galuega 24:15) O le mea moni, o le toetu o ē faauuina e faavasegaina le tāua, e pei ona manino le faamautuina mai i upu o loo maua i le 1 Korinito 15:20, 23 e faapea: “A o lenei, ua toe faatuina mai Keriso i e ua oti, ua avea ma faapolopolo o e ua momoe. A e peitai e taitoatasi ma lona lava tofi; o le uluai fua o Keriso ia, mulimuli ane o e ua fai mona i lona toe afio mai.” I le mauaina o le onosai ma le faatuatua lea na faaalia e Iesu, ua iloa e le lafu mamoe itiiti le mea o teuina mo i latou a o faaiuina lo latou olaga i le lalolagi, ae maise ina ua afio mai le Alii i lona malumalu mo le faamasinoga talu mai le 1918.—Malaki 3:1.
15 Ua aumaia e Paulo i a i tatou ni mafuaaga faaopoopo e tagaʻi ai i lenei toetu o se mea e tutasi. E pei ona faamauina i le 1 Korinito 15:51-53, na ia tusi ai e faapea: “Faauta mai, ou te taʻu atu ia te outou le mea lilo; e le momoe i tatou uma, a e liua i tatou uma, e faafuasei lava, o le emo o le mata, pe a ilia le pu faauma. . . . Auā e tatau ona ofu o lenei tino iu vale i le tino ola pea, ia ofu foi lenei tino oti i le tino le oti lava.” O nei upu e faatatau i a i latou o le lafu mamoe itiiti o ē maliliu i le taimi o le faatasi mai o Keriso. Na i lo le momoe i se taimi umi i le oti, o le a pei “o le emo o le mata” le faaofuina o i latou i le tino e lē oti lava.
16, 17. E tusa ai ma lo latou faamoemoe i le toetu, ua faapefea ona faamanuiaina faapitoa i aso nei Kerisiano faauuina?
16 E tusa ai o lenei malamalamaga, e mafai ai ona tatou iloa uiga o upu a le aposetolo o Ioane o loo maua i le Faaaliga 14:12, 13. Na ia tusi e faapea: “O le mea lenei ua fia maua ai le onosai o le au paia; o e ua tausi i poloaiga a le Atua ma le faatuatua ia Iesu. Na ou faalogo foi i le leo mai le lagi, ua faapea mai ia te au, ʻIa e tusi: Amuia ē ua oti, o e ua oti o i le Alii e amata i nei ona po.’ ʻO lea lava,’ ua fetalai mai ai le Agaga, ʻina ia latou malolo i a latou galuega tiga; auā foi o a latou galuega e mulimuli ia te i latou.’”
17 Maeu se taui tutasi o loo teuina mo le vaega totoe o le lafu mamoe itiiti! O le a vave ona faatutuina i latou, i le taimi lava latou te momoe ai i le oti. Maeu se suiga ofoofogia o le a oo i a i latou a o latou amataina ō latou tofiga i le nofoaga agaga! A o faagasolo atu lena faamamaluina o le lafu mamoe itiiti ma valoaga autū o le Tusi Paia i ōna faaiuiuga, e manaomia moni lava e le vaega faaiu o totoe o le lafu mamoe itiiti ona ʻaua le fefefe.’ Ma o lo latou lē fefefe e aogā e faamalosia ai le motu o tagata e toatele, o ē e tatau foi ona atiina aʻe le agaga lava lea e tasi o le lē fefefe a o latou aloalo atu mo le faasaoina i le taimi sili o faalavelave e leʻi iai muamua lava i le lalolagi.
18, 19. (a) Aisea ua faanatinati ai nei le taimi o tatou ola ai? (e) Aisea e tatau ai i ē faauuina faapena foi i isi mamoe ona lē fefefe?
18 O le manatuaina o galuega a le lafu mamoe itiiti e mafai ai e i latou ma le motu o tagata e toatele ona matatau pea i le Atua moni. Ua oo mai le itula e faamasinoina ai e ia, ma o le taimi o le talileleia o totoe e matuā tāua tele ai. Ioe, o le taimi mo isi e fai ai se gaoioiga ua faatapulaaina. Ae mo i tatou, ʻaua le matatau faapea o le a lē taulau le fuafuaga a le Atua. O le a mautinoa lona faataulauina!
19 Ua uma ona lagonaina i le lagi leo tetele o faapea mai: “O le malo o le lalolagi ua avea mo lo tatou Alii ma lona Keriso, e fai foi o ia ma tupu e faavavau faavavau lava.” (Faaaliga 11:15) E mautinoa lava, o le Leoleo Mamoe Sili, o Ieova, o loo taitaiina āna mamoe i le “ala o le amiotonu ona o lona suafa.” (Salamo 23:3) Ua taitaiina atu ma le lē masese le lafu mamoe itiiti i lo latou taui faalelagi. Ma o isi mamoe o le a faasaoina atu ma le saogalemu i le puapuaga tele ina ia olioli i le ola e faavavau i le nofoaga faalelalolagi o le Malo faamamaluina o le Atua i le pule a Keriso Iesu. O lea, a o faatatau atu fetalaiga a Iesu i le lafu mamoe itiiti, e mautinoa lava o auauna uma a le Atua o i le lalolagi ua iai mafuaaga e usiusitai atu ai i āna fetalaiga: “Aua e te fefe.”
Pe e Mafai ona E Faamatalaina?
◻ Aisea tatou te faatalitalia ai o le a faaitiitia le numera o totoe o le lafu mamoe itiiti?
◻ O le ā le tulaga o le vaega totoe i aso nei?
◻ Aisea e tatau ai ona lē fefefe Kerisiano, e ui i le latalata mai o le osofaiga a Koku o Makoku?
◻ Aisea ua tutasi ai le faamoemoe o le toetu o le 144,000, ae maise lava i lenei vaitaimi?