‘Le Auauna Faamaoni’ ma Lona Vaega Pule
“O ai foi le auauna faamaoni ma le mafaufau, ua tofia e lona alii e pule i ana auauna, ia avatu a latou mea e ʻai i ona itu aso?”—MATAIO 24:45.
1. Aiseā ua finagalo malie ai Ieova e tuuina atu le pule, ma ia te ai ua muamua ona ia faia i ai faapea?
O IEOVA o le Atua maopoopo. O ia foi o le puna o pule tonu uma lava. I le mautinoa e uiga i le faamaoni o ana meafaiola faatuatua, ua finagalo ai Ieova ina ia tuuina atu le pule. O Lē na ia tuuina atu i ai le pule aupito sili o lona Alo lea, o Iesu Keriso. E moni, o le Atua “ua ia tuu foi mea uma lava i lalo o ona vae, ma tuuina atu o ia e fai ma ulu o mea uma lava mo le ekalesia.”—Efeso 1:22.
2. O le ā ua taʻua e Paulo o le faapotopotoga Kerisiano, ma ia te ai ua tuuina atu i ai e Keriso le pule?
2 Ua taʻua e le aposetolo o Paulo le faapotopotoga Kerisiano o le “fale [aiga] o le Atua” ma faapea mai o le Alo faamaoni o Ieova, o Iesu Keriso, ua tuuina o ia e pule i lona aiga. (1 Timoteo 3:15; Eperu 3:6) E sosoo ai foi, ua tuuina atu e Keriso le pule i sui o le aiga o le Atua. Ua mafai ona tatou iloa lenei mai fetalaiga a Iesu o loo faamauina i le Mataio 24:45-47. Na fetalai o ia: “O ai foi le auauna faamaoni ma le mafaufau, ua tofia e lona alii e pule i ana auauna, ia avatu a latou mea e ʻai i ona itu aso? Amuia lea auauna, pe a sau lona alii e maua o ia o loo faapea ona fai. E moni, ou te fai atu ia te outou, e tofia o ia e pule i ana mea uma.”
Le Pule i le Aiga i le Uluai Senituri
3. O ai ua faia aʻe ai le “auauna faamaoni ma le mafaufau,” ma o le ā le faaupuga ua faatatauina ia i latou i le avea o tagata taitoatasi?
3 Mai lo tatou suesueina ma le faaeteete o le Tusi Paia, ua tatou iloa ai faapea o sui o le fanauagagaina o le aiga o le Atua i so o se taimi lava ua tuupoina, ua faia atoa aʻe ai “le auauna faamaoni ma le mafaufau,” le “tausi mea” po o le “pule i le aiga.” I le avea o tagata taitoatasi, ua taʻua ai sui o le aiga o Ieova o “tagata o le aiga” po o le “tino o auauna.”—Mataio 24:45; Luka 12:42; New World Translation Reference Bible, faamatalaga i lalo.
4. I se taimi puupuu lava a o leʻi oo i lona maliu, o le ā le fesili na lagā e Iesu, ma ia te ai na ia faatusaina i ai o ia lava?
4 I ni nai masina a o leʻi oo i lona maliu, na lagā ai e Iesu lenei fesili, ua faamauina i le Luka 12:42: “O ai foi le auauna e pule, ua faamaoni ma le mafaufau, ua tofia e lona alii e pule i ana auauna, ia avatu mea e ʻai ia te i latou i ona itu aso?” I lea, i ni nai aso muamua atu a o leʻi maliu o ia, na faatusaina ai e Iesu ia lava i se tagata na alu malaga i se mea mamao, o lē na tofia ana auauna ma tuuina atu i ai ana mea uma ia te i latou.—Mataio 25:14.
5. (a) O anafea na tofia ai e Iesu isi e tausia ana mea? (e) O le ā le tofiga lautele na tuuina atu e Keriso i ē o le a avea o se vaega o ē pule i lona aiga?
5 O anafea na tofia ai e Iesu isi e vaaia ana mea? Na tupu lenei mea ina ua uma ona toe faatuina o ia. I ana upu masani ia o loo maua i le Mataio 28:19, 20, na tuu muamua atu ai e Keriso ia i latou o ē o le a avea o se vaega o tagata eseese o lē pule i lona aiga se tofiga lautele ina ia aʻoaʻo atu ma faia soʻo. E ala i le molimau atu o ni tagata taitoatasi i “tuluʻiga uma o le lalolagi,” o le a faalautele atu ai e auauna le galuega faamisionare lea na amata e Iesu ona atiina aʻe i le taimi o lana faiva faalelalolagi. (Galuega 1:8) E aafia ai i lenei mea lo latou gaoioi e fai ma “sāvali . . . a Keriso.” I le avea o “auauna foi e tausi i upu lilo a le Atua,” o le a latou faia ai soʻo ma o le a tufatufa atu ai meaʻai faaleagaga ia i latou.—2 Korinito 5:20; 1 Korinito 4:1, 2.
Le Vaega Pule a le Aiga
6. O le ā na faagaeeina tauatua le vasega tausimea o le uluai senituri latou te saunia?
6 I se tulaga tuufaatasi, ua avea ai Kerisiano fanauagagaina o tausimea a le matai, po o lē pule i le aiga, ua tofia e tufatufaina meaʻai faaleagaga i tagata taitoatasi o le aiga o le Atua i ona itu aso e tatau ai. I le va o tausaga o le 41 T.A. ma le 98 T.A., sa faagaeeina ai tauatua sui o le vasega tausimea o le uluai senituri ina ia tusia ni faamatalaga faatalafaasolopito se 5, 21 tusi, ma le tusi o Faaaliga mo le aogā i o latou uso. O nei tusitusiga faagaeeina o loo maua ai meaʻai lelei faaleagaga mo le aiga, o lona uiga, o tagata faauuina taitoatasi o le aiga o le Atua.
7. Mo le ā le fuafuaga na filifilia ai e Keriso se fuainumera itiiti o tane mai i le vasega o le auauna?
7 E ui lava o Kerisiano faauuina uma lava i le tulaga tuufaatasi ua faia aʻe ai le aiga o le Atua, ua iai le anoanoai o faamaoniga faapea, na filifilia e Keriso se fuainumera toaitiiti o tane mai le vasega o le auauna ina ia auauna o le vaega pule vaaia. Ua faaalia i le uluai talafaasolopito o le faapotopotoga faapea o aposetolo e 12, e aofia ai Matatia, o le faavae lena o le vaega pule o le uluai senituri. Ua aumaia e le Galuega 1:20-26 (NW) ia i tatou se faamatalaga o lenei mea. I le fesootai atu ma le iai o sē e suitulaga ia Iuta le Sekara, ua faasino atu ai i inā le faia o se suiga i lona “tulaga o le ovasia” ma i “lenei faiva ma le tofiga faaaposetolo.”
8. O le ā na aofia i tiute tauave a le vaega pule o le uluai senituri?
8 O lena tulaga o le ovasia na aofia ai le tiute tauave a aposetolo o le tofia o tagata talafeagai i tulaga o le auaunaga ma ia faamaopoopoina le faiva. Ae sili atu foi lona uiga. Ua aofia ai foi le aʻoaʻoina ma le faamaninoina o manatu o mataupu ua aʻoaʻoina. I le faataunuuina o le folafolaga a Iesu o loo faamauina i le Ioane 16:13, ‘o le agaga o le upu moni’ sa taʻitaʻiina le faapotopotoga Kerisiano agaʻi i luma i upu moni uma lava. Mai lava i le amataga, o i latou na talia le upu ma papatisoina, na faaauau i Kerisiano faauuina ona tuutoina i latou lava i “le mataupu a le au aposetolo.” O le mea moni, o le pogai na tofia ai tane na fautuaina e 7 i le galuega tatau o le tufatufaina o meaʻai faaletino ina ia mafai ai ona saoloto le toasefulu ma le toalua e “finafinau i le talotaloga ma le auauna i le upu.”—Galuega 2:42; 6:1-6.
9. Na faapefea ona faaitiitia i le na o le 11 sui o le uluai vaega pule, ae aiseā ua foliga mai ai faapea, sa leʻi vave toe faafoisia le numera i le 12?
9 E foliga mai faapea muamua lava na faia aʻe totino ai le vaega pule e na o aposetolo lava o Iesu. Ae pe o le a tumau ai i lena auala? Pe tusa ma le tausaga e 44 T.A., na fasiotia ai le aposetolo o Iakopo, le uso o Ioane, e Herota Akeripa I. (Galuega 12:1, 2) E foliga mai sa leʻi faia se taumafaiga ina ia suia o ia o se aposetolo, e pei ona sa faia i le tulaga o Iuta. Aiseā ua leai ai? E lē taumatea ona o Iakopo sa maliu ma le faamaoni, o le uluai aposetolo lea o le 12 na maliu. I le isi itu, o Iuta sa o se faalata amio leaga ma sa tatau ona suia ina ia toe aumaia ai le numera 12 o maa faavae o le Isaraelu faaleagaga.—Efeso 2:20; Faaaliga 21:14.
10. O anafea ma na faapefea ona faalauteleina le vaega pule o le uluai senituri, ma na faapefea ona faaaogā e Iesu le vaega pule e taʻitaʻia lona aiga?
10 O uluai sui o le vaega pule o le uluai senituri, o aposetolo, o tane o ē na savavali ma Iesu ma sa avea o ni molimau i lona maliu ma lona toetu. (Galuega 1:21, 22) Peitai na suia lenei tulaga. A o faagasolo tausaga, na maua foi e isi tane Kerisiano tulaga faaleagaga ma na tofia e avea o toeaina i le faapotopotoga i Ierusalema. I le tausaga e 49 T.A. i se taimi aupito lata mai, na faalauteleina ai le Vaega Pule ina ia aofia ai e lē gata i aposetolo o loo totoe ae faapea foi ma se numera o isi tane matutua i Ierusalema. (Galuega 15:2) O lea o le faia aʻe o le vaega pule sa leʻi matuā faamautuina, ae mautinoa lava sa taʻitaʻia e le Atua mea ina ia faia ai ni suiga e fetaui ma tulaga o ona tagata. O Keriso, le Ulu tiotio o le faapotopotoga, na faaaogāina lenei faalauteleina o le vaega pule e foia ai le mataupu tāua tau aʻoaʻoga faapea o tagata e lē ni Kerisiano Iutaia e tatau ona peritomeina ma gauai atu i le Tulafono a Mose. Na tusia e le vaega pule se tusi e faamatalaina ai lana filifiliga ma mataupu ua poloaiina ina ia usiusitai i ai.—Galuega 15:23-29.
Se Taimi mo le Suesueina o le Pule o le Aiga
11. Pe sa talisapaia ea e uso le taʻitaʻiga mautū na faataatia e le vaega pule, ma o le ā ua faaalia ai faapea na faamanuia e Ieova lenei faatulagaga?
11 I le avea o tagata taitoatasi ma faapotopotoga, na talisapaia ai e uluai Kerisiano lenei taʻitaʻiga malosi na tuuina mai e le vaega pule. Ina ua uma ona faitauina e le faapotopotoga i Suria i Anetioka le tusi mai le vaega pule, sa latou olioli ona o le faalaeiauga. Ina ua maua e isi faapotopotoga le faamatalaga ma usiusitai i poloaiga, na latou ‘faaauau ona mausali i le faatuatua ma ua faatoateleina i lea aso ma lea aso.’ (Galuega 16:5) Ua faaalia lava, na faamanuia e le Atua lenei faatulagaga.—Galuega 15:30, 31.
12, 13. O ā mea tutupu na valoia e Iesu i ana faataoto i mina ma taleni?
12 Ae seʻi o tatou vaai i se isi vala o lenei mataupu uigā. I lana tala faatusa i mina, na faatusaina ai e Iesu ia lava i se tagata mamalu o lē na alu malaga i se nuu mamao ina ia saili mai se ao tautupu mo ia lava ma toe foi mai. (Luka 19:11, 12) I le avea o se iʻuga o lona toe faatuina i le 33 T.A., na faaeaina ai Iesu Keriso i le itu taumatau o le Atua, o i inā sa ia nofo ai seia tuuina i lalo ona fili uma e fai ma mea e tu ai ona vae.—Galuega 2:33-35.
13 I se tala faatusa e tutusa lelei, o le faataoto i taleni, na taʻua ai e Iesu faapea ina ua mavae se taimi umi lava, na toe foi mai le matai e suesueina ana auauna. I auauna la o ē na faamaonia lo latou faamaoni, na fetalai atu i ai le matai: “Ua e faamaoni i nai mea itiiti, ou te tofia oe e pule i mea e tele; ina ulufale mai ia i le fiafia o lou alii.” Ae e faatatau i le auauna lē faamaoni, na ia fetalai atu: “E faoa le mea ua i ai. Ia outou tulia foi le auauna le aoga i le pouliuli i fafo.”—Mataio 25:21-23, 29, 30.
14. O le ā na faatalitalia e Iesu mai ana auauna faauuina e le agaga?
14 Ina ua mavae se taimi umi—toetoe lava 19 senituri—na faaofuina ai Keriso i le mana tautupu i le 1914, i le iʻuga o “tausaga [atofaina] o nuu ese.” (Luka 21:24) E leʻi pine lava mulimuli ane, ona “sau ai lea o le alii . . . ua faamasino” i ana auauna, o Kerisiano faauuina e le agaga. (Mataio 25:19) O le ā na faatalitalia e Iesu mai ia i latou taitoatasi ma i le avea o se tino e tasi? Sa faaauau le tofiga o le auauna tausimea e pei ona sa iai talu mai le uluai senituri. Na tuuina atu e Keriso taleni i tagata taitoatasi—“ua faatatau i le mea ua mafai ai e le tagata.” I lea, na faatalitalia ai e Iesu ni iʻuga e tusa ma lea. (Mataio 25:15) Ua fetaui ai i inei le tulafono i le 1 Korinito 4:2, ua taʻua ai e faapea: “E suesueina i auauna tausi mea ina ia iloa ai le tagata ua faamaoni.” O le tuuina atu o taleni ina ia galulue o lona uiga o le gaoioi ma le faamaoni e avea o sāvali a le Atua, i le faia o soʻo ma le tufaina atu o upu moni faaleagaga ia i latou.—2 Korinito 5:20.
Le “Auauna” ma Lona Vaega Pule a o Tau Lata mai le Taimi o le Iʻuga
15. (a) O le ā na faatalitalia e Keriso mai le tino atoa o le pule i lona aiga? (e) O le ā ua faaalia ai faapea sa faatalitalia e Keriso le vasega o le auauna e faia lenei mea a o leʻi taunuu mai o ia e asiasia lona aiga?
15 Na faatalitalia e Iesu le tino atoa o Kerisiano faauuina e gaoioi e pei o se auauna tausimea faamaoni, e avatu i lona tino o tautua “mea e ʻai ia te i latou i ona itu aso.” (Luka 12:42) E tusa ai ma le Luka 12:43, na fetalai Keriso: “Amuia lea auauna, pe a sau lona alii e maua o ia o loo faapea ona fai.” Ua faaalia ai i lenei mea e faapea i se taimi a o leʻi taunuu mai Keriso e faamasinoina ana auauna faauuina e le agaga, e tatau ona latou tufatufaina atu meaʻai faaleagaga i sui o le faapotopotoga Kerisiano, le aiga o le Atua. O ai na maua mai e Keriso o faia faapea ina ua toe foi mai o ia i le mana tautupu i le 1914, ma agaʻi atu e asiasia le aiga o le Atua i le 1918?—Malaki 3:1-4; Luka 19:12; 1 Peteru 4:17.
16. Ina ua taunuu mai Keriso e asiasia le aiga o le Atua i le 1918, aiseā na ia maua ai lotu Kerisinetoma latou te lē o aumaia meaʻai faaleagaga i ona itu aso tatau?
16 A o agaʻi atu ina faaiʻuina le vaitaimi umi o le faatalitaliga a Iesu i le itu taumatau o Ieova, sa auaumalie ona iloa tino mai po o ai o avatuina meaʻai faaleagaga i le aiga o Keriso e oo lava i le taimi a o leʻi oo atu i le 1914. Pe e te manatu sa faia faapea e lotu Kerisinetoma? E mautinoa lava e leai, auā sa matuā aafia i latou i faiga faapolotiki. Sa avea i latou o ni mea faigaluega e fiafia i le faalauteleina atu o faiga faakolone ma na taumafai ina ia faatoilaloina e le tasi le isi e faamaonia ai lo latou loto atunuu, i lea ua faalaeiauina ai faiga faailoga lanu. Sa leʻi pine ae aumaia e lenei mea le matuā toto o o latou lima, o lona uiga, ina ua avatu la latou lagolagosua tiotio i faiga malo faapolotiki na aafia ai i le Taua I a le lalolagi. I le tulaga faaleagaga, na faavaivaia ai lo latou faatuatua e ala i Faiga Faaonaponei. Na aumaia ai se taimi faigata faaleagaga ona o le toatele o a latou taʻitaʻi lotu sa faigofie ona maileia i faitioga silisili ma le faaevolusione. Sa leai ni meaʻai susua faaleagaga e mafai ona faatalitalia mai taʻitaʻi lotu Kerisinetoma!
17. Aiseā na teena ai e Keriso nisi o Kerisiano faauuina, ma o ā iʻuga mo i latou?
17 E faapena foi ona leai ni meaʻai susua faaleagaga na sau mai i na Kerisiano faauuina o ē na sili atu ona manatu mamafa i lo latou lava faaolataga na i lo o le tuuina atu o taleni a le Matai ina ia galulue. Sa avea i latou o ni tagata “paie,” ma le lē aogā e tausia mea a le Matai. I lea, na lafoina ai i latou “i le pouliuli i fafo,” i le mea o loo iai pea lotu Kerisinetoma.—Mataio 25:24-30.
18. O ai na maua mai e le Matai o avatua meaʻai faaleagaga i le tino o ana auauna i ona itu aso e tatau ai, ma o le ā ua faamaonia ai lenei mea?
18 Ina ua taunuu mai e asiasia ana auauna i le 1918, o le mea lea, o ai na maua e le Matai o Iesu Keriso, o avatu i lona tino a auauna a latou meaʻai i ona itu aso tatau? Ia, i lena taimi, o ai na avatua i tagata loto faamaoni o ē saili i le upu moni le malamalamaga saʻo e uiga i le taulaga togiola, le suafa tauatua, le lē vaaia o le faatasi mai o Keriso, ma le uiga o le 1914? O ai na faaalialia le sese o le Tolutasi, le lē mafai ona oti o le solu, ma le afi i hele? Ma o ai na lapatai atu e uiga i le mataʻutia o le evolusione ma faiga faaagaga? O mea moni ua faaalia faapea sa o le vaega o Kerisiano faauuina o loo auaufaatasi ma le au talaʻi o le mekasini Zion’s Watch Tower and Herald of Christ’s Presence, ua taʻua nei o Le Olomatamata Faasilasilaina le Malo o Ieova.
19. Ua faapefea ona faaalia e se vasega o le auauna faamaoni ia lava a o leʻi oo i le 1918, e ala i le ā le auala na ia tufatufaina atu ai meaʻai faaleagaga, ma talu mai anafea?
19 I lona lomiga faa-Peretania o Novema 1, 1944, na taʻua ai e Le Olomatamata: “I le 1878, i le fasefulu tausaga a o leʻi afio mai le Alii i le malumalu i le 1918, sa iai se vasega o Kerisiano tuuina atu faamaoni na vavaeese mai i faalapotopotoga o alii sili ma taʻitaʻi lotu ma o ē na saili ina ia faatinoina le Faa-Kerisiano . . . I le tausaga na mulimuli mai ai, ia Iulai, 1879, na amata ai ona faasalalau atu lenei mekasini o Le Olomatamata, ina ia mafai ona tufatufaina atu e lē aunoa upu moni na saunia e le Atua e ala ia Keriso e avea o ‘meaʻai i taimi tatau’ i lona aiga uma lava o fanau tuuina atu.”
20. (a) Na faapefea ona aliaʻi mai se Vaega Pule faaonaponei i le vaaiga? (e) O le ā na faia e sui o le Vaega Pule, ma i lalo o le taʻitaʻiga a ai?
20 I le aumaia o faamatalaga faatatau i le atiina aʻe o lenei Vaega Pule faaonaponei, ua faamatala ai e Le Olomatamata faa-Peretania o Tesema 15, 1971, e faapea: “I le lima tausaga mulimuli ane [i le 1884] na faatuina ai le Zion’s Watch Tower Tract Society ma auauna e avea o se ‘mea faigaluega’ e tufatufaina atu meaʻai faaleagaga i le faitau afe o tagata loto faamaoni o loo saili ina ia iloa le Atua ma malamalama i lana Afioga . . . O Kerisiano faauuina tuuina atu ma papatisoina sa oo ina auaufaatasi ma lena Sosaiete i le ofisa autū i Pennsylvania. E tusa lava pe sa iai le komiti o faatonu pe leai, ae na faaavanoaina i latou ma tuuina atu mo le galuega faapitoa a le vasega o le ‘auauna faamaoni ma le mafaufau.’ Sa latou fesoasoani i le fafagaina ma le taʻitaʻia o le vasega o le auauna, ma i lea ua oo ai ina aliaʻi mai se vaega pule. O lenei mea e foliga mai sa i lalo o le taʻitaʻiga a le malosi galue lē vaaia o Ieova po o le agaga paia. Sa faapea foi ona i lalo o le taʻitaʻiga a le ulu o le faapotopotoga Kerisiano, o Iesu Keriso.”
21. (a) O ai na maua mai e Keriso o tufatufaina atu meaʻai faaleagaga, ma na faapefea ona ia tauia i latou? (e) O le ā o loo faatali mai mo le auauna faamaoni ma lona Vaega Pule?
21 I le 1918, ina ua asiasia e Iesu i latou na faapea mai o ana auauna, sa ia maua ai se vasega faavaomalo o Kerisiano o faasalalau upu moni o le Tusi Paia mo le faaaogāina i totonu o le faapotopotoga ma fafo atu i le galuega talaʻi. I le 1919 sa avea moni ai lava lea faalapotopotoga e pei ona sa valoia e Keriso: “Amuia lea auauna, pe a sau lona alii e maua o ia o loo faapea ona fai. E moni, ou te fai atu ia te outou, e tofia o ia e pule i ana mea uma.” (Mataio 24:46, 47) Na ulu atu nei Kerisiano moni i le fiafia o lo latou Matai. I le faaalia o i latou lava e “faamaoni i nai mea itiiti,” ua tofia ai i latou e le matai ina ia “pule i mea e tele.” (Mataio 25:21) I lea ua tulaga lelei mai ai le auauna faamaoni ma lona Vaega Pule, ua nofo sauni mo se tofiga faalauteleina. Maeu le fiafia e tatau ona ia i tatou faapea ua faia lenei mea, auā ua faaoaina Kerisiano faamaoni i le maua o aogā mai le galuega tuutoina a le auauna faamaoni ma lona Vaega Pule!
Manatu Autū ia Manatua
◻ O ai le Ulu o le aiga o le Atua, ma ia te ai na tuuina atu ai e Ia lenei le pule?
◻ O le ā le tofiga faitele na tuuina atu e Iesu i le vasega o le auauna?
◻ O le ā le isi tino atoa na iai faatasi ma le vasega o le auauna, ma o ā ona tiute faapitoa?
◻ Ina ua taunuu mai Keriso e asiasia le aiga o le Atua, o ai na saunia meaʻai faaleagaga i ona tagata?
◻ Ua faapefea ona tino mai se Vaega Pule i ona po nei?
[Ata i le itulau 10]
Le “auauna” o le uluai senituri ua iai sona vaega pule ua faia aʻe i aposetolo ma toeaina o le faapotopotoga i Ierusalema