Faasusuluina mai o le Malamalama—Tele ma Iti (Vaega E Lua)

“O lou malamalama matou te iloa ai le malamalama.”—SALAMO 36:9.

1. O ā uluai taumafaiga na faia ina ia malamalama ai i le faafaatusa o le tusi o Faaaliga?

O LE tusi o Faaaliga i le Tusi Paia ua faaosofia ai le naunau fiailoa o Kerisiano i lona amataga mai. Ua aumaia ai se faataʻitaʻiga lelei i le auala e mafai ona pupula atili mai ai le susulu o le malamalama. I le 1917, i le tusi The Finished Mystery, na lomiaina ai e Molimau a Ieova se auiliiliga o le Faaaliga. Na faaalialia ai ma le lē fefe lotu o Kerisinetoma ma taʻitaʻi faalemalo, a e peitai o le tele lava o ana faamatalaga sa aumaia mai i nisi o puna eseese. A e na aogā pea le tusi The Finished Mystery e tofotofoina ai le faamaoni atu i le meafaigaluega vaaia lea na faaaogaina e Ieova.

2. O le mataupu o “Le Fanau mai o se Nuu” na faasusulu atu ai le ā le malamalama i le tusi o Faaaliga?

² O se faasusuluina e maofa ai, o lea na faasusulu atu i le tusi o Faaaliga ina ua lomiaina ai le mataupu e faapea, “Le Fanau mai o se Nuu” (Birth of the Nation) i le Watch Tower o Mati 1, 1925. Sa i ai le manatu e faapea na faamatalaina mai e le Faaaliga mataupu e 12, se taua na tauina i le va o Roma faapaupau ma ana lotu faa-Papelonia e faasaga i le Lotu Katoliko Roma, lea e avea ai le pope ma sui o le tama tane. A e peitai, na faaalia i lea mataupu e faapea o le Faaaliga 11:15-18, sa i ai sona sootaga atu i le mataupu e 12, lea e faasino mai ai o loo faatatau atu i le fanau mai o le Malo o le Atua.

3. O ā lomiga na faasusuluina atu atili le malamalama i le tusi o Faaaliga?

³ O nei mea uma na oo atu ai i se malamalamaga manino o le Faaaliga na aumaia faatasi i le tusi o le Light, i ni tuufaatasiga se lua, i le 1930. A e na i ai ni faamaninoga atili na aumaia i tusi nei, “Babylon the Great Has Fallen!” God’s Kingdom Rules! (1963) ma le “Then Is Finished the Mystery of God” (1969). Peitai ane sa tele pea nisi mea e ao ona aʻoaʻoina e faatatau i le tusi faavaloaga o Faaaliga. Ioe, na susulu mai i ai le malamalama manino i le 1988, ina ua lomia le tusi Revelation—Its Grand Climax At Hand! O le pogai o lenei faamalamalamaina agaigai i luma e ono mafai ona faapea atu ona o le valoaga o Faaaliga e faatatau atu lea i le “aso o le Alii,” lea na amata i le 1914. (Faaaliga 1:10) O lea o le a manino lelei ai le malamalamaga i le tusi o Faaaliga a o faagasolo lena aso.

Faamaninoina “o Pule Maualuluga”

4, 5. (a) O le ā le manatu sa i ai i Tagata Aʻoga o le Tusi Paia i le Roma 13:1? (e) O le ā le mea na iloa mulimuli i le tulaga faale-Tusi Paia e faatatau i “pule maualuluga”?

⁴ Na vaaia se faasusuluina manino mai o le malamalama i le 1962 e tusa ai ma le Roma 13:1, e faapea lona faitauina: “Ia usiusitai tagata uma lava i pule maualuluga [faipule silisili,” New World Translation].” (King James Version) Na manatu uluai Tagata Aʻoga o le Tusi Paia e faapea “o pule maualuluga” na taʻua o loo faatatau atu lea i faipule faalelalolagi. Na latou manatu ai i lenei mau e faapea afai e faamalosia atu se Kerisiano i taimi o faiga taua, o le a tatau la ia te ia ona fai sana toniga, tauavea se fana ma alu atu loa i le tafā o le taua, i lua o i ai fitafita. Sa i ai le lagona e faapea e le mafai e se Kerisiano ona fasiotia se isi uso a tagata, a e o le a faamalosia o ia e faapa lana fana i le ea pe a oo i ni tulaga e sili ona matautia.a

⁵ Na faasusuluina e le Watchtower o Novema 15 ma le Tesema 1, 1962, le malamalama manino i le mataupu i le talanoaina o fetalaiga a Iesu o i le Mataio 22:21 e faapea: “O mea a Kaisara, ia outou avatu ia Kaisara; a o mea a le Atua ia avatu ia i le Atua.” Ua faaalia foi i le Galuega 5:29 upu a le au aposetolo e sootaga atu i lea mataupu e faapea: “E tusa ona sili o lo matou anaana i le Atua i lo matou anaana i tagata.” E usiusitai Kerisiano ia Kaisara—“o pule maualuluga”—seʻi vaganā ai ua faapogaia se Kerisiano e faasagatau i le tulafono a le Atua. O le usiusitai atu ia Kaisara sa manatu i ai e faatatau a e le atoatoa. E totogi atu e Kerisiano ia Kaisara na o mea e le feteenai ma mea o loo manaomia mai e le Atua. Maeu le faamalieina i le mauaina o le malamalama manino i lena mataupu!

Faasusuluina mai o le Malamalama i Mataupu tau i le Faalapotopotoga

6. (a) Ina ia vavaeese mai i faiga taatele a Kerisinetoma o le fai o ni tofi, o le ā le mataupu silisili na taliaina? (e) Ma o le ā na iloa mulimuli ane o le ala saʻo e filifilia ai i latou o vaaia le faapotopotoga?

⁶ Sa i ai se fesili e uiga po o ai e ao ona auauna o ni toeaina ma tiakono i le faapotopotoga. Ina ia vavaeese mai i le faiga masani a Kerisinetoma o le fai o ni tofi, na faia ai se faaiuga, e tatau ona filifilia toeaina ma tiakono faatemokalasi e ala i le palota o sui o faapotopotoga taitasi. A e o le tuputele o le malamalama sa i ai i le Watchtower o Setema 1 ma le Oketopa 15, 1932, na faaalia ai e faapea e le o aumaia e le Tusi Paia se faavae mo le palotaina o toeaina. O lea na suia ai na mea e se komiti o le auaunaga, ma se faatonu mo le auaunaga na filifilia e le Sosaiete.

7. O le faasusuluina mai o le malamalama na iu ai i ā auala ua faaleleia mo le tofiaina o auauna i le faapotopotoga?

⁷ O le Watchtower o Iuni 1 ma Iuni 15, 1938, na mauaina ai ni faasusuluina mai o le malamalama e faapea, o auauna i le faapotopotoga e ao ona tofiaina faatiokarate a e lē o le palotaina. I le 1971 na faaalia ai foi i se isi faasusuluina mai o le malamalama e faapea, o faapotopotoga taitasi e le tatau ona faatonutonuina e na o se auauna e toatasi. Nai lo lea, e tatau ona tofu le faapotopotoga ma le au toeaina, po o ovasia, ua tofiaina e le Vaega Pule o Molimau a Ieova. O lea i le faatuputeleina o le malamalama i le sili atu i le 40 tausaga, na iloa ai o toeaina ma tiakono po o auauna o le faiva e pei ona taʻua ai i nei aso, e tatau ona tofiaina e “le auauna faamaoni ma le mafaufau,” e ala mai i le Vaega Pule. (Mataio 24:45-47) Sa talafeagai lea ma le mea na faia i le taimi o aposetolo. O tane e pei o Timoteo ma Tito na tofiaina ina ia avea o ni ovasia e ala i le vaega pule o le uluai senituri. (1 Timoteo 3:1-7; 5:22; Tito 1:5-9) O nei mea uma o se faataunuuga ofoofogia lea o le Isaia 60:17 e faapea: “Ou te aumaia le auro e sui aʻi le ʻapa memea; ou te aumaia foi le ario e sui aʻi le uamea, ma le ʻapa memea e sui aʻi laau, ma uamea e sui aʻi maa; e avea foi e aʻu ou alii ia filemu, ma ou faipule ia amiotonu.”

8. (a) O le faatuputeleina o le malamalama na aumaia ai ia ā faaleleiga i le auala na faagaoioia ai le Sosaiete? (e) O ā komiti o le Vaega Pule, ma o ā a latou matafaioi i tulaga tau i galuega ma le vaavaaiga?

⁸ O le isi foi mataupu e faatatau i le faagaoioia o le Sosaiete o le Olo Matamata. Mo le tele o tausaga na tutusa ai le Vaega Pule o Molimau a Ieova ma le tino o faatonu o le Watch Tower Bible and Tract Society of Pennsylvania, ma o mataupu na tele lava ina faafoeina lea e lona peresitene. E pei ona faaalia i le 1977 Yearbook of Jehovah’s Witnesses (itulau e 258-259), na amata ai ona faagaoioia mai le Vaega Pule i ni komiti se ono, na tofia atu komiti taitasi ina ia vaaia ni vala patino o le galuega i le lalolagi aoao. O le Komiti e Vaaia le Au Uso e gafa ma mataupu e fitoi tonu i le au uso, e aofia ai ma mea e mo le lelei o i latou uma o i le aiga Peteli. O le Komiti Lomitusi e faafoeina mataupu uma mo le olaga nei ma mataupu tau i le tulafono, e pei o fanua ma galuega faalomitusi. O le Komiti o le Auaunaga e naunau atu i latou i le galuega o le molimau atu ma vaaia ovasia femalagaai, o paeonia, ma galuega a le au talaʻi o le faapotopotoga. O le Komiti Tau Aʻoaʻoga e gafa mo sauniga a faapotopotoga, o aso faapitoa o fonotaga, o fonotaga matagaluega, ma tauaofiaga itumalo ma tauaofiaga faavaomalo, e faapena foi ma aʻoga eseese mo aʻoaʻoga faaleagaga o tagata o le Atua. O le Komiti o Tusitusiga e faafoeina le sauniunia ma le faaliliuina o lomiga i so o se vala lava, ia faamautinoa lelei ua talafeagai mea uma ma le Tusi Paia. E tausia e le Komiti o le Taitaifono faalavelave faafuasei ma isi mataupu e faanatinati le manaomia.b E le gata i lea, i tausaga e amata mai i le 1970, na amata ai ona faatonutonuina e se komiti nai lo le faia e se ovasia, ia ofisa o le lala o le Sosaiete o le Olo Matamata.

Malamalama e Fesootai atu i Amio Faa-Kerisiano

9. Na faapefea i le malamalama o le upu moni ona aafia ai le faiā a Kerisiano i malo o le lalolagi?

⁹ E tele faasusuluina mai o le malamalama ua faatatau atu lea i amio Faa-Kerisiano. Mo se faataʻitaʻiga, manatu i le tulaga e faatatau i le solitu. O se faasusuluina faapitoa mai o le malamalama manino i lenei mataupu o le “Solitu” sa aumaia i le Watchtower o Novema 1, 1939. Maeu le fetaui lelei o le taimi na aumai ai, ina ua faatoʻā uma lava ona amata le Taua e Lua a le lalolagi! Na faamatala mai ai e le mataupu le solitu ma na faaalia ai e faapea e tatau i Kerisiano ona le aafia i mataupu faapolotiki po o ni fetaiaiga i le va o atunuu. (Mika 4:3, 5; Ioane 17:14, 16) O se mafuaaga lenei na faapogaia ai ona inosia i latou e atunuu uma. (Mataio 24:9) O taua a Isaraelu anamua ua le aumaia ai se ata mo Kerisiano, e pei ona faamanino lelei mai e Iesu i le Mataio 26:52. E le gata i lea, e leai lava ma se malo faapolotiki i aso nei e faatiokarate, pe pulea e le Atua, e pei ona sa i ai ia Isaraelu anamua.

10. O le ā na faailoa mai i le faasusuluina mai o le malamalama e faatatau i le auala e tatau ona vaai ai Kerisiano i le toto?

¹⁰ Na faasusulu mai ai foi le malamalama e faatatau i le paia o le toto. Na manatu nisi Tagata Aʻoga o le Tusi Paia e faapea o le faasaina o le ʻaina o le toto o i le Galuega 15:28, 29, sa mo na o Kerisiano Iutaia. Peitai ane, ua faaalia i le Galuega 21:25 e faapea i le vaitaimi o aposetolo, na faatatau atu foi lenei poloaiga ia i latou mai nuu ese sa avea ma e na talitonu. O lea, o le paia o le toto e faatatau atu lea i Kerisiano uma, e pei ona faaalia i le Watchtower o Iulai 1, 1945. O le uiga o lena mea e le gata ina le ʻaina toto o mea ola, e pei o sosisi e faia i le toto, a e e ao foi ona faamamao mai le toto o tagata, e pei i tulaga e faatatau i tuigā toto.

11. O le ā na iloa e faatatau i le vaaiga a Kerisiano e faatatau i le faaaogaina o le tapaa?

¹¹ O le iuga o le faatuputeleina o le malamalama, o amioga na le manatu mamafa i ai muamua, na mulimuli ane faafoeina o ni soligatulafono mamafa. O se faaaʻoaʻoga o lenei mea e faatatau atu lea i le faaaogaina o le tapaa. I le Zion’s Watch Tower o Aokuso 1, 1895, na faatepa atu ai e le uso o Russell manatu i le 1 Korinito 10:31 ma le 2 Korinito 7:1 ma tusi mai e faapea: “Ou te le mafai ona iloa e faamamalu ai le Atua, pe e aogā foi mo so o se Kerisiano le faaaogaina o le tapaa i so o se itu.” Talu mai le 1973, na manino ai le malamalamaga e faapea e leai se tasi o faaaogaina le tapaa e mafai ona avea ma se tasi o Molimau a Ieova. I le 1976 na faamanino mai ai e faapea e leai se Molimau a Ieova e mafai ona faigaluega i so o se pisinisi tau pele tupe ma tumau pea le avea ma faaaʻoaʻoga lelei i le faapotopotoga.

O Isi Toe Faaleleiga

12. (a) O le faasusuluina mai o le malamalama na faailoa mai ai le ā e faatatau i le aofaiga o ki o le Malo na faatuatuaina atu i le vaaiga a Peteru? (e) O ā tulaga na faaaogā ai e Peteru na ki taitasi?

¹² Na faatuputeleina foi le malamalama i le aofaiga o ki faafaatusa na avatu e Iesu ia Peteru. Na manatu Tagata Aʻoga o le Tusi Paia e lua ki sa taofia e Peteru e tatala ai le ala mo tagata avea ai ma suli o le Malo—e tasi mo Iutaia, na faaaogā i le Penetekoso 33 T.A., a o le isi mo Nuuese, na uluai faaaogā i le 36 T.A. ina ua talaʻi Peteru ia Konelio. (Galuega 2:14-41; 10:34-48) I le taimi tonu, na oo ina iloa ai e faapea sa i ai se vaega lona tolu o aafia ai—o tagata Samaria. Na faaaogā ai e Peteru le ki lona lua ina ua tatala atu le avanoa o le Malo ia i latou. (Galuega 8:14-17) O lea, na faaaogā ai le ki lona tolu ina ua talaʻi atu Peteru ia Konelio.—O le Watchtower, o Oketopa 1, 1979, itulau 16-22, 26.

13. O ā ua faailoa mai e le faasusuluina mai o le malamalama e faatatau i lotoā mamoe o taʻua i le Ioane mataupu e 10?

¹³ I se tasi o ave o le malamalama, na iloa ai e faapea na faatatauina atu fetalaiga a Iesu i lotoā mamoe e tolu a e e le i ni lotoā mamoe e lua. (Ioane, mataupu e 10) O le (1) lotoā mamoe o Iutaia na avea ai Ioane le Papatiso ma leoleo faitotoa, (2) le lotoā o suli faauuina o le Malo, ma le (3) lotoā o “isi mamoe,” o e e faamoemoe mo le lalolagi.—Ioane 10:2, 3, 15, 16; i Le Olomatamata Tesema 1, 1984, itulau 12-22.

14. Na faapefea ona faamanino atili mai e le faatuputeleina o le malamalama mataupu e faatatau i le amataga o le Iupeli e tusa ai o le ata faaonaponei?

¹⁴ Na maua ai foi se faamaninoga o le malamalama e uiga i le Iupeli i lona ata faaonaponei. I taimi o le Tulafono, na avea ai le lona 50 o tausaga uma o se Iupeli, na faapea ona toe faafoisia ai mea uma ia i latou e ana muamua na mea. (Levitiko 25:10) Sa leva ona manatu i ai e faapea sa faaatagia e lenei mea le Puleaga o le Afe Tausaga a Keriso. E ui i lea, i ni taimi e lei mamao atu, na iloa ai na amata moni mai le Iupeli i lona ata faaonaponei i le Penetekoso 33 T.A., ina ua maua e i latou na liligi atu i ai le agaga paia le tuufaasaolotoina mai le nofo pologa i le feagaiga o le Tulafono a Mose.—O le Watchtower, o Ianuari 1, 1987, itulau 18-28.

Faatuputeleina o le Malamalama i Faaupuga

15. O le ā le malamalama na faasusulu atu i le faaaogaina o le upu “fuafuaina”?

¹⁵ “Na sailia e le Failauga ia maua upu e faafiafia aʻi; o mea ua tusia foi e tonu ia, o upu moni lava.” (Failauga 12:10) O nei upu e faatatauina atu lea i la tatou mataupu lenei, talu ai ua le gata ina susulu mai le malamalama i mataupu tāua e pei o talitonuga ma amio, a e faapena foi i faaupuga faa-Kerisiano ma ona uiga tonu. Mo se faaaʻoaʻoga, o se tasi o lomiga sa sili ona faapelepeleina e nisi o Tagata Aʻoga o le Tusi Paia, o le tusi muamua lea o tusi Studies in the Scriptures, ua faaulutalaina The Divine Plan of the Ages. A e ui lava i lea, i le taimi tonu na iloa ai e faapea o loo faasino le Afioga a le Atua e na o tagata e mafai ona faia ni fuafuaga. (Faataoto 19:21) E le o taʻua lava e le Tusi Paia ia Ieova e faapea o loo ia fuafuaina se mea. E le manaomia e ia ona faia ni fuafuaga. O le mea lava na ia saunia e mautinoa lava e taunuu ona o lona poto ma le mana e faavavau, e pei lava ona tatou faitau ai e faapea i le Efeso 1:9, 10: “E tusa ma lana lava pule tunoa, na ia tuu ai i lona lava finagalo; ina ia na faaopoopoina ia [“te ia,” NW] i le sauniuniga i le faaatoaga o tausaga.” O lea la, sa mulimuli ai lava ona iloaina e faapea o le faaupuga ‘saunia,’ o le upu lea e sili atu ona fetaui pe a faatatauina atu ia Ieova.

16. O le ā le malamalamaga saʻo na mulimuli ane iloa e faatatau i le Luka 2:14?

¹⁶ Na i ai foi le taimi na mauaina ai le malamalamaga manino i le Luka 2:14. Ua faitauina faapea i le King James Version: “O le viiga i le Atua i mea aupitoaluga; ma le manuia i le lalolagi: o le finagalo alofa i tagata.” Na iloa ai sa le o aumaia ai le manatu saʻo i inei, auā e le o faaooina atu le finagalo alofa o le Atua i tagata amio leaga. O lea na manatu ai Molimau i lenei mea e manuia i latou o e o maua le finagalo alofa o le Atua. O lea, na latou taʻua ai pea i latou e naunau i le Tusi Paia o tagata o le finagalo alofa. Peitai ane na oo ina malamalama i ai e faapea e le aofia ai i le finagalo alofa se vaega e faia e le tagata, a e o le Atua. O lea ua faasino atu ai le faamatalaga i le pito i lalo o le New World Translation i le Luka 2:14 o “tagata o e ua talileleia e le [Atua].” O Kerisiano uma o ola e tusa ma lo latou tautoga o le tuuina atu ua ia i latou le finagalo alofa o le Atua.

17, 18. O le ā o le a faaeaina e Ieova a e o le ā o le a ia faapaiaina?

¹⁷ E faapea foi mo se taimi umi lava, na taʻua ai e Molimau le faaeaina (vindicate) o le suafa o Ieova. A e pe na faaoo ea e Satani se masalosaloga i le suafa o Ieova? E tusa ai ma lena mataupu, pe na faapogaia ea e so o se au faigaluega a Satani se masalosalo i le suafa o Ieova, e peiseai e le o ia Ieova le aiā e umia ai lena suafa? E matuā mautinoa lava e leai. E le o le suafa o Ieova na luia na manaomia ai ona faaeaina. O le mafuaaga lena na le taʻua ai e le Sosaiete o le Olo Matamata i lomiga lata mai nei le faaeaina (vindicated) o le suafa o Ieova. Na taʻua ai le pule silisiliese ia faaeaina ma o lona suafa ia faapaiaina. Ua talafeagai lea ma le mea na fetalai mai ai Iesu ia i tatou ina ia tatalo: “Ia paia lou suafa.” (Mataio 6:9) Ua faatele ona fetalai mai Ieova o le a ia faapaiaina lona suafa, lea sa faapea ona le luia e tagata Isaraelu a e na latou tauvaleaina.—Esekielu 20:9, 14, 22; 36:23.

¹⁸ Ma le talafeagai ai, i le 1971, na faia ai e le tusi “The Nations Shall Know That I Am Jehovah”—How? le faaeseesega lenei: “E tau Iesu Keriso . . . mo le faaeaina o le Pule Silisili i le vateatea aoao a Ieova ma mo le faamamaluina o le suafa o Ieova.” (Itulau 364-365) I le 1973, na faapea mai ai le tusi God’s Kingdom of a Thousand Years Has Approached: “O le ‘puapuaga tele’ o loo fotuai mai o le taimi lea mo le Atua Silisiliese o Ieova e faaeaina ai lana pule aoao ma faapaiaina ai lona suafa tāua.” (Itulau 409) Ma i le 1975, na taʻua ai faapea e le tusi Man’s Salvation Out Of World Distress at Hand!: “Ona faataunuuina ai lea o le mea e sili atu ona tāua o le tala faasolopito aoao, o le faaeaina lea o le pule aoao a Ieova ma le faapaiaina o lona suafa mamalu.”—Itulau 281.

19, 20. E faapefea ona tatou faaalia lo tatou talisapaia mo le faasusuluina mai o le malamalama faaleagaga?

¹⁹ Maeu le faamanuiaina o tagata o Ieova i le maua o nei malamalama uma faaleagaga! I se faaeseesega maoae, o le faailoa mai o le pogisa faaleagaga o loo i ai i taʻitaʻi o Kerisinetoma e pei ona taʻua e se tasi o failotu: “Aisea ua agasala ai? Aisea ua puapuagatia ai? Aisea ua i ai le tiapolo? O fesili nei ou te fia fesili ai i le Alii pe a ou oo atu i le lagi.” A e e mafai e Molimau a Ieova ona taʻu ia te ia le mafuaaga ua faapea ai: Ona o le finauga i le tonu o le pule silisiliese a Ieova ma le fesili pe mafai e le tagata ona tumau i le faamaoni i le Atua e ui i teteega mai le Tiapolo.

²⁰ I le gasologa o tausaga, o le faasusulu mai o le malamalama e tele ma iti ua faamalamalamaina ai le ala o auauna tuuina atu a Ieova. Ua faataunuu ai i lenei mea mau e pei o le Salamo 97:11 ma le Faataoto 4:18. A e aua neʻi galo ia i tatou o le savavali i le malamalama o lona uiga ia talisapaia le faatuputeleina o le malamalama ma ia ola e talafeagai ai. E pei ona tatou iloa nei, o lenei faatuputeleina o le malamalama e aofia ai a tatou amio ma le faatonuga ua tuuina mai ia i tatou ia talaʻi.

[Faaopoopoga i lalo]

Pe E te Manatua?

◻ O le ā le malamalama ua faasusuluina mai e faatatau i le usiusitai atu i “pule maualuluga”?

◻ O le faasusulu mai o le malamalama ua iu i ā faatulagaga tau i le faalapotopotoga?

◻ Ua aafia faapefea amio Faa-Kerisiano i le faatuputeleina o le malamalama?

◻ Ua aumaia e le malamalama faaleagaga ia ā faaleleiga i lo tatou malamalamaga i nisi o manatu patino faale-Tusi Paia?

[Ē Ana le Ata i le itulau 25]

O Ki o i le itulau e 24: O ata tusi na aumaia i ata na puʻe i Cooper-Hewitt, National Design Museum, Smithsonian Institution