Ioane 3:16—“Ona o le Alofa Tele o le Atua i le Lalolagi”

“Ona o le alofa tele o le Atua i le lalolagi, na ia foaʻi mai ai lona Atalii e toʻatasi, ina ia lē fano tagata uma e faatuatua iā te ia, a ia maua le ola e faavavau.”—Ioane 3:16, Faaliliuga a le Lalolagi Fou.

“Auā ua faapea lava ona alofa mai o le Atua i le lalolagi, ua ia au mai ai lona Atalii e toatasi, ina ia le fano se tasi e faatuatua ia te ia, a ia maua e ia le ola faavavau.”—Ioane 3:16, Tusi Paia Samoa—Lomiga 1969.

Uiga o le Ioane 3:16

E alofa le Atua iā i tatou ma e finagalo ia tatou ola e faavavau. O le māfuaaga lena na ia auina mai ai lona Alo o Iesu Keriso i le lalolagi. A o iai Iesu i le lalolagi, na ia faia le tele o galuega e sili ona tāua. O se tasi o galuega, o le aʻoaʻoina lea o ona soo e faatatau i le Atua po o lona Tamā. (1 Peteru 1:3) Na ia foaʻi mai foʻi lona ola mo tagata. Ina ia maua le ola e faavavau, e tatau ona tatou faatuatua iā Iesu.

O le tele o le alofa o le Atua ua faailoa mai i le faaupuga lenei, “na ia foaʻi mai ai lona Atalii e toʻatasi.”a O Iesu o le Alo e toʻatasi o le Atua. E faapefea? Talu ai e na o Iesu na foafoaina tuusaʻo e le Atua. (Kolose 1:17) O ia o le “ulumatua o foafoaga uma.” (Kolose 1:15) O isi foafoaga uma, e aofia ai ma agelu, na foafoaina e ala iā Iesu. Ae e ui i lenā, na lotomalie Ieovab le Atua e auina mai lona Alo pele ina ia “ia auauna atu, ma foaʻi atu lona ola e fai ma togiola e sui aʻi tagata e toʻatele.” (Mataio 20:28) Na puapuagatia Iesu ma oo iā te ia le oti ina ia faasaʻolotoina i tatou mai le agasala ma le oti, lea na tuufaasolo mai i le uluaʻi tagata o Atamu.​—Roma 5:8, 12.

O le faaalia o le faatuatua iā Iesu e tele mea e aofia ai nai lo le tau ina talitonu iā te ia, po o le iloa o mea na ia faia mo i tatou. E tatau ona faamaonia atu lo tatou faatuatua i le Alo o le Atua, e ala i le usiusitaʻi iā te ia ma mulimuli i lana faaaʻoaʻoga. (Mataio 7:24-27; 1 Peteru 2:21) Ua faapea mai le Tusi Paia: “O lē e faatuatua i le Alo e maua e ia le ola e faavavau. A o le tagata e lē usiusitaʻi i le Alo, e lē maua e ia le ola.”—Ioane 3:36.

Siʻomaga o le Ioane 3:16

Na taʻua e Iesu nei upu a o talanoa atu i se taʻitaʻi lotu Iutaia e igoa iā Nikotemo. (Ioane 3:1, 2) I lena talanoaga, na faailoa atu ai e Iesu faamatalaga e faatatau i le Malo o le Atuac ma le “toe fanau mai.” (Ioane 3:3) Na ia faailoa mai foʻi le auala o le a ia maliu ai. “E faapena foʻi ona tatau ona siitia i luga [faatautau i le laau e faapuapuagatia ai] o le Atalii o le tagata, ina ia maua e tagata uma e talitonu iā te ia le ola e faavavau.” (Ioane 3:14, 15) Ona ia faamatilatila lea o le manatu e faapea, o lenei avanoa mo le mauaina o le ola, ua maua ona o le alofa tele o le Atua mo tagata. Na faaiʻu le talanoaga a Iesu i le faapea mai e tatau ona tatou faaalia le faatuatua ma faia galuega e faafiafia ai le Atua, ina ia maua ai le ola.—Ioane 3:17-21.